Read Lelemi Lɛkpa Ulu 2 Bible Online

Lɛkpa Ulu 2 - Lelemi bible

Lɛkpa Ulu 2

¹Amu na bɔ́sɔ búnwini búti búsela kalɔ kakwiidi kammɔ lɛlɔ na bɔkɛ Ɛpugyie ulu lɛlɔ aani kalɛ na Katɔti ɔ́su-bu. Na mmɔ na bɔ́kya bɔ́ka bɔmana Edom abi lɛlɔ kalɔ mmɔ bútu uwi gyɔlɔɔ.

²Amu na Katɔti ɔ́su-mi ɔnini,

³“Bɛ́ɛka bɛ́mana abi amɛni lɛlɔ bítu uwi bɛ́gya. Anwuɔsu bɛta na biti bina anumi bɛtina kɔmii kakɛ.”

⁴Na ɔ́su-mi ka mbo-mii ɔda ɔmɛni ɔnini, “Kásɔ kébu blii na biduo bina banwani bani nási Esau kaba kemmo na beli Edom abi lɛlɔ kalɔ akɔ. Badubɔyia-mii, nsu mɔɔsú-mii nnii bɛ́nu kaduɛ na bana lɛlɔ.

⁵Bitakya-ma kɔnyi kalɛ na bata bekpoku-mii. Ɔsika lɛɛɛdubo bana kalɔ kadi muedi buti bute-mii. Ɔsika ami líti Edom abi lɛlɔ kalɔ ku kana amadɔ ƒui líte Esau na úti ɔ́bla nwuna kadikɔ.

⁶Na si bídu Edom abi lɛlɔ kalɔ mmɔ ni, biti sika ɔƒualadi bɛƒɔ adila ku ntu bɔni na bɛdubɔdi na bɛni mmɔ kayu.”

⁷Na bínyimo kalɛ na bina Unwoti Katɔti úte-mii kusɛ kusɛ na bina kabla biala kemmo. Na anwu nákya-mii akɔ na ɔ́nu-mii lɛlɔ na kalɔ kakwiidi bonwu kamɛni kemmo akwa aavlene sɔɔn na bítayaki lɛla lɛdi.

⁸Anwuɔsu ka bɔ́vi Edom abi lɛlɔ kalɔ kesii kani na bula banwani bani ndi Esau kaba béli mmɔ bɔ́wɔlɔ ni, búnwini anumi bɔ́tina Yordan Ketu kɔwɛ kada kakɛ ulu ɔni ntɛ Elat na Esion-Geber na bɔ́vi bɔkɛ kalɔ kakwiidi ulu ɔni ntɛ úsie Moab kalɔ kemmo.

⁹Na Katɔti ɔ́su-mi ɔnini, “Lɛ́su-mi ka ɔdi biala útakya Moabƒuɔ bani nkya mmɔ kɔnyi na bata bekpoku-mii. Si bɛ́bla lɛni ni, lɛɛɛdubo bana kalɔ kadi buti bute-mii. Ɔsika ami néti Ar ɔma ɔmmɔ líte Lot bawɔ ka beti mmɔ babla bana kadikɔ.”

¹⁰Uwi ɔdi kemmo ni, nka bekyuli bani baalɔ banii Emiƒuɔ nli Ar ɔma ɔmmɔ kemmo. Bekyuli bammɔ bákuku na bemomo na bebo ɔlɔkplu lɛnɔ aani Anakƒuɔ.

¹¹Na Anakƒuɔ bamɛni ni, Moabƒuɔ bátaalɔ-ma banii Emiƒuɔ. Na kadi bamba baalɔ Emiƒuɔ bamɛni ku Anakƒuɔ bamɛni banii Raƒaƒuɔ.

¹²Na nka Horiƒuɔ nli Edom abi lɛlɔ kalɔ kamɛni lɛlɔ asa na Esau bawɔ bábabɔku-ma na báyila-ma udu na béti kalɔ kammɔ beli aani kalɛ kani na Israelƒuɔ badubo bana bekisine bɔbɔku budie kalɔ kani na Katɔti úti úte-ma kemmo na bayila-ma udu.

¹³Amu na Katɔti ɔ́su-bu ɔnini, “Bɛta na bɛvia Sered Ketu.” Na abu lɛnɔ bɔ́bla lɛni.

¹⁴Na akwa ani búti bɔ́ta bɔ́si Kades-Barnea úbédu uwi ɔni na bɔ́via Sered Ketu adi akwa Avlaatɛ-maane. Na uwi ɔmmɔ kemmo na bekyuli bani ƒui na bédu kekpo busie békpi bása aani kalɛ na Katɔti ɔ́su úse.

¹⁵Na Katɔti útete-ma bɔnwuna úti útédu ka ɔ́yila bana udu ƒui.

¹⁶Amu uwi ɔni bekyuli bani nédu kekpo busie mɛni békpi bása ƒui basa ni,

¹⁷Katɔti ɔ́su-mi ɔnini,

¹⁸“Ɔmwi limeyi lɛmɛni bɛdubɔsia Ar na Moab kalɔ kemmo na bitávia ɔmii na katɔ kakɛ.

¹⁹Na si bɛ́vi mmɔ bɛ́wɔlɔ ni, bɛdubudu Arnonƒuɔ kalɔ lɛlɔ. Na si bíduo mmɔ ni, bitakya-ma kɔnyi na bata bekpoku-mii. Na si bɛ́bla lɛni lɛɛɛdubo Arnonƒuɔ kalɔ kammɔ kadi buti bute-mii. Ɔsika líti-ka líte Lot bawɔ ka beti-ka babla bana kadikɔ.”

²⁰Asa na Arnonƒuɔ badubukpo baƒɔ kalɔ kani na Katɔti úti úte-ma mmɔ ni, na nka Reƒateƒuɔ nli mmɔ. Na ama na Arnonƒuɔ bátaalɔ banii Samsumƒuɔ.

²¹Ama lɛnɔ bákuku aani Anakƒuɔ. Na bemomo na bebo ɔlɔkplu lɛnɔ, nsu Katɔti ɔ́yila-ma udu ƒui na ɔ́ƒɔ bana kalɔ na úti-ka úte Arnonƒuɔ na bétélie mmɔ.

²²Lɛni kani na Katɔti ɔ́bla úte Esau bawɔ bani nli Edom abi lɛlɔ kalɔ. Lɛni kani na ɔ́yila Horiƒuɔ udu na bana anumi, na úti kalɔ kani lɛlɔ beli ɔmwi mɛni úte-ma.

²³Na Awiƒuɔ bani nli akpaklɔ ani nsiaku lɛlɔ úti útédu Gasa ni, Kaƒtorƒuɔ bani nási Kaƒtor bébo bábadu-ma na béti bana kɔlɔ na belie mmɔ.

²⁴Amu na Katɔti ɔ́su-bu ɔnini, “Bɛklibi lɛlɔ na bítávia Arnon Kɔwɛ. Ɔsika líti Hesbon Ɔga Sihon ɔni ndi Amorini kalɔ lɛ́kya-mii enu kemmo. Bise kalɔ bitaadi kalɔ kammɔ lɛlɔ na biteekpoku-ma.

²⁵Na mɔɔsu-mii nnii ɔ́si ɔmwi ni, ndubuse kalɔ liti liƒu ntaakya kadi biala nkya ɔƒɛ kalɔ lɛlɔ kemmo na amii ɔsu. Badubuteenu bina lɛlɔ litemi na liƒu libendi lɛdubo-ma bɔda na amii ɔsu.”

²⁶Amu ka búdu Kedemot kalɔ kakwiidi kemmo ni, mmɔ na lɛ́tala batu badi ku keyi buɛɛ kenye kadi ka batásu Ɔga Sihon ɔni nási Hesbon ka mɔɔsu nnini,

²⁷“Buvele na nda-a, ya na Israelƒuɔ bavi bina kalɔ lɛlɔ. Bɔdubusie siin bɔvia ɔni na buledie ulu bamba ɔdi.

²⁸Na ntu ku adila biala bɔdubɔni na bɔdi ni, bɛbu kuye bite-bu na bɔdubɔƒɔ-mii kayu. Lɛla lɛni kani na buuvele-ɔ ndi ka aya na bɔsia ƒula kalɔ kemmo.

²⁹Lɛni na Esau bawɔ bani nli Edom abi lɛlɔ kalɔ ku Moabƒuɔ bani nli Ar bénu kalɔ na bɔ́via bana lɛmii ku Yordan Ketu asa na búduo kalɔ kani na Katɔti ɔ́su úse ka weti wete-bu kemmo.”

³⁰Nsu Ɔga Sihon anwu útenu kalɔ ka bɔsia bana kalɔ kemmo. Bina Unwoti Katɔti nábla-nwu na nwuna kayi káyu ɔkplu kalɛ na bukpoku-nwu na bɔdi-nwu lɛlɔ.

³¹Amu na Katɔti ɔ́su-mi ɔnini, “Bɛta na bitékpoku Ɔga Sihon ku nwuna bekyuli na bɛdi-ma lɛlɔ na biti bana kɔlɔ.”

³²Amu na Ɔga Sihon ɔ́ta ku nwuna bekyuli ka bebekpoku-bu na ɔma ɔni baalɔ banii Yahas.

³³Nsu bula Unwoti Katɔti uti Ɔga Sihon ku nwuna bebi ku nwuna bekyuli ƒui ɔ́kya-bu enu kemmo na bɔ́du bana ƒui kede kede.

³⁴Uwi ɔmmɔ kani si búdu nwuna ɔma biala buukpóku ɔma ɔmmɔ bekyuli na bɔ́du ukyuli biala, ɔnana ɔdi o-o uleku ɔdi o-o iye ɔnamu ɔdi o-o ni, bɔɔdú-nwu ɔni na buláda ukyuli ɔdi taanyonu.

³⁵Na bebuo bani nkya ɔma ɔmmɔ kemmo ku bana ala ƒui ni, bɔ́da-nya búti búnwini abu adi.

³⁶Na ɔdanku ɔ́si Aroer ɔni ntɛ Arnon Kɔwɛ kenye ku lɛma lɛni nkya mmɔ ƒui úti útédu Gilead. Ɔma biala uuubo ɔni bútadi-ma lɛlɔ. Bula Unwoti Katɔti úti lɛma lɛmmɔ ƒui ɔ́kya-bu enu kemmo.

³⁷Nsu bútani bútede Arnonƒuɔ kɔlɔ ku Yabok Ketudɔ ku abinkpo kalɔ lɛma lɛni na bula Unwoti Katɔti úbo-bu ɔda ɔnii butesie. Mmɔ kani na bútesie.