Read Lelemi Lɛkpa Ulu 20 Bible Online

Lɛkpa Ulu 20 - Lelemi bible

Lɛkpa Ulu 20

¹Si bísela bitékpoku bina bekisine badi na bɛ́nu ka bekyuli bammɔ belie bapɔnkɔ ku kɛɛkɛ ɔni na bapɔnkɔ baaní lɛlɔ ni, na bɛ́nu bekyuli bumomo bɔni ntulo amii ni, bitanu-ma bitayia. Ɔsika bina Unwoti Katɔti ɔni náda-mii údie Egyipte kalɔ lɛlɔ ni, anwu ndubukpo ute-mii.

²Na asa na bɛdubuse kalɔ ku bukpo ni, ɔlɛka Katɔti ɔkpane ɔdi ɔlɛ ubo ubenye bina anumi na ɔsu bekpone bammɔ ɔnini,

³“Israel bananabi, bise atu na binu. Ɔmwi kadi ni, bísela bitékpo. Bitayia bina bekisine bammɔ na enu ataƒɛ-mii na ɔtɔtɔ utagyu-mii.

⁴Ɔsika bina Unwoti Katɔti ɔkya-mii akɔ na ɔdubɔya na bɛdi lɛlɔ.”

⁵Na baduɔti bammɔ lɛnɔ badubɔlɛ bebo na betemi bete bekpone bammɔ na beye-ma banini, “Ɔnana ɔdi ɔkya-mii akɔ mɛni na ɔ́tu ɔtɔ ɔwɔdi na útesie útetélie-nwu kemmo tɔ?” Na si ɔdi údie kenye ka “Ɛɛn” ni, na unwini uteesie kaduli. Na si ɔɔɔdi lɛni na ɔ́ta na útékpi na kekpo kammɔ kemmo ni, ukyuli ɔbambadi ndubo kaduli kammɔ kemmo bulie.

⁶Na basɔ beye bekpone bammɔ benu si ɔnana ɔdi ɔkya-ma akɔ na ɔ́tuma adingyii kemo kadi, nsu útakɛ kɔnu útaƒɛ edula ammɔ tɔ? Na si ɔdi ɔtuna ka “Ɛɛn” ni, bɛya na unwini usie kaduli. Si ɔɔɔdi lɛni na ɔ́ta úsie kekpo kammɔ na útékpi ni, ukyuli bamba ndubɔni kɔdingyii kɔmmɔ ntɛ bute-nwu.

⁷Na basɔ beye bekpone bammɔ si ɔnana ɔdi ɔkya-ma akɔ na ɔ́bla uleku lili ala use, nsu útawɛɛ-nwu tɔ. Si ɔdi ɔ́tuna ka “Ɛɛn” ni, na bɛya na unwini usie kaduli. Si ɔɔɔdi lɛni ni, ukyuli bamba ndubuti uleku ɔmmɔ.

⁸Na basɔ beye bekpone bammɔ kɔkladi banini, “Bina akɔ ɔdi ɔkya na ɔtɔtɔ ɔɔgyú-nwu iye enu áƒɛ-nwu?” Na si badi bátuna banii “Ɛɛn” ni, na bɛya na benwini kalɛ na lɛlɔ lilawiɛ bekpone bakladi.

⁹Na si baduɔti bammɔ bátɛmiku-ma báwɔlɔ ni, na bedie bekpone baƒanti bete bekpone bammɔ.

¹⁰Asa na bɛdubusie bitékpo ɔma ɔdi bekyuli ni, bɛka-ma buye si badubute lili.

¹¹Na si bénu kalɔ ka bete lili na bálɛmi ɔma ɔmmɔ kayakun béte-mii ni, bekyuli bani nkya ɔma ɔmmɔ kemmo badubo kabla kpakplaa butaabla teete-mii.

¹²Nsu si bétenu kalɔ ka bete lili ni, bɛka bɛmana ɔma ɔmmɔ na bikpoku-ma.

¹³Na si bina Unwoti Katɔti ɔ́ya na bɛ́di-ma lɛlɔ ni, na bɛdu ɔnana biala na ɔkya ɔma ɔmmɔ kemmo.

¹⁴Na bɛɛyɔ́ ni, bɛkana biti bana beleku ku bebi ku bebuo ku lɛla biala lɛni nkya ɔma ɔmmɔ kemmo. Na bibo kuƒi ka bɛblaku lɛla biala na bina bekisine bammɔ bebo kalɛ na bɛɛyɔ́. Ɔsika bina Unwoti néti-nya úte-mii.

¹⁵Na ɔda bubo bɔmɛni buse bute lɛma lɛni na lɛ́gyunku-mii kakaaka kani. Na ɔɔɔdanku kalɔ kani lɛma na Katɔti úti uute-mii mmɔ ɔdi.

¹⁶Nsu si bɛ́di lɛma lɛni nkya kalɔ kani na bina Unwoti Katɔti ɔ́su úse ka wete-mii mmɔ lɛlɔ ni, na bɛyila lɛla biala nkya ɔma ɔmmɔ kemmo udu.

¹⁷Na lɛma lɛmmɔ ndi Hetiƒuɔ ku Amoriƒuɔ ku Kanaanƒuɔ ku Perisiƒuɔ ku Hewiƒuɔ ku Yebusiƒuɔ lɛma aani kalɛ na Unwoti úbo-mii ɔda úse ka bɛbla-ma mmɔ.

¹⁸Bɛyila-ma udu kalɛ na balátɔlɔ-mii na bitaabla ala ani muusé-nwu lɛlɔ ɔkɛnku bana lɛƒiɔkpa ablala lɛlɔ. Na ɔdi uláƒiɔ bina Unwoti Katɔti.

¹⁹Na si bítáka ɔma ɔdi bɛ́kya ka bikpoku-ma na kekpo kammɔ keetu uwi ni, bitada adingyii ammɔ. Ɔsika bɛkana na bɛdi ebi ani na aanwu mmɔ adi. Ɔsika egyii ammɔ aaadi bekyuli bani na bítáka bɛ́kya ka bikpo.

²⁰Nsu bɛkana bɛda egyii ani naaadi adingyii bɛbla ala ani ndubɔya na bɛkɛ kenyekɔ bɛka bɛmana ɔmmɔ na biƒie-ma enu enu.