Read Lelemi Lɛkpa Ulu 23 Bible Online

Lɛkpa Ulu 23 - Lelemi bible

Lɛkpa Ulu 23

¹Ukyuli ɔni ndi ɔsaɛ ni, bitaya na uduo Unwoti bebi kasalakɔ.

²Na ubi ɔni na kɔsɔnɔ badi báwɔ-nwu ni, bitaya na utéduo Unwoti bebi kasalakɔ ɔ́si nwuna lɛlɔ útédu bana kaba leevudi lɛlɔ.

³Bitaka Amonni iye Moabni iye bana kaba kadi utédu bana kaba leevudi lɛlɔ bitakya Unwoti bebi akɔ.

⁴Ɔsika uwi ɔni bɛ́lɛ Egyipteƒuɔ kalɔ lɛlɔ na bíbedu bana lɛma ni, ɔdi utéte-mii adila adi na bɛdi iye ntu na bɛni. Mmomu buti na bététi Bileam ɔni ndi Boer ubidi ɔni nási ɔma ɔni baalɔ banii Petor na Mesopotamia kalɛkɛ lɛlɔ ka ubewida-mii.

⁵Nsu bina Unwoti Katɔti útakpete Bileam ewida ammɔ. Mmomu búti na úti ewida ammɔ únwini kusɛ kusɛ úte-mii. Ɔsika ɔɔyɔ́-mii litemi.

⁶Na bitabla unwi ku Arnonƒuɔ ku Moabƒuɔ bamɛni na bitawia-ma bɔdia lɛnɔ kudii.

⁷Nsu Edomƒuɔ ama ni, bɛƒɔ-ma, ɔsika badi bina bekyuli. Na biteni Egyipteƒuɔ, ɔsika bíilie bana kalɔ lɛlɔ dii aani baƒɔ.

⁸Na ɔ́si bana kaba katɛdi lɛlɔ úsela ni, bɛkana na bɛka bana bebi bibunku Unwoti bebi akɔ.

⁹Na si bɛ́sala lisu bɛɛklibi lɛlɔ bite kekpo kadi ni, ɔdi utabla lɛla lɛni ndubɔya na nwuna lɛlɔ lilabla sɛɛn.

¹⁰Na si ɔdi úgye kɔna na lɛlɔ líbo-nwu na ɔmmɔ ɔsu na uuuse sɛɛn ni, ɔlɛka ɔlɛ kesii kani na bekpone bammɔ básala lisu bakya mmɔ na utákya kesii bamba.

¹¹Na si úsela useyi uwi ni, ɔlɛka ɔkpi na ɔsɔ unwini ubo bekpone kakyakɔ mmɔ uwi ɔni na ɔƒɛ ɔ́nu.

¹²Na bɛwia kesii bamba na bina kakyakɔ kama na biti bɛbla bina kuvodɔ kesekɔ.

¹³Na si ɔdi úsela kuvodɔ ni, ɔwia lɛnwami blii lɛdi ɔda na uku ubu asa na use kuvodɔ. Na uwi-ku lɛti si ɔ́wɔlɔ.

¹⁴Ka Katɔti ɔkya-mii akɔ uusié taasɔ na kesii kani na bɛkya na ɔɔgyumana-mii kalɛ na bɛdi bina bekisine lɛlɔ ɔsu ni, bɛbla bina keliekɔ sɛɛn kalɛ na ulanu lɛla lɛni maya na wenwini kama wakya-mii.

¹⁵Si kabla ɔblane ɔdi úkeli nwuna unwoti kudɔ na úbo úbawia kabɛkɔ na bina ɔdi kudɔ ni, bɛƒɔ ukyuli ɔmmɔ na bitasɔku-nwu bitemene nwuna unwoti.

¹⁶Na bite ukyuli ɔmmɔ kuƒi na ɔkya-mii akɔ na ɔma ɔni na ɔɔyɔ́. Na bitenye-nwu lɛlɔ bɛnii ɔbla lɛla lɛdi ulikplu kemmo.

¹⁷Na Israelni ɔnana iye uleku ɔdi utenwini ɔyalɛ na koƒiodu kɔdi.

¹⁸Ɔƒɛni egulabi biala na ukyuli ɔmɛni udu ɔdubɔkɛ na kabla kani na ɔɔbla mɛni kemmo ni, uteti egulabi ammɔ adi uteboku bina Unwoti Katɔti kakpakɔ ɔnii ubedie lili na kenye kani na úse ɔsu. Ɔsika Katɔti bayalɛ beesé Katɔti lɛlɔ.

¹⁹Na si ɔdi úvo egulabi iye adila iye lɛla bamba lɛdi úte nwuna Israelni ɔkpana ni, utaƒɔ-nwu kuvonsia kɔdi.

²⁰Nsu si úvo lɛla lɛdi úte ɔƒɔ ɔni nkya-mii akɔ ni, ɔkana na ɔƒɔ-nwu kuvonsia. Nsu Israelni ɔkpana anwu ni, bitaƒɔ kuvonsia kɔdi kalɛ na bina Unwoti Katɔti wete-mii kusɛ kusɛ na lɛla biala bíti bina enu bɛ́bla na kalɔ kani lɛlɔ na bísela bitélie mmɔ kemmo.

²¹Na si ɔdi úse kenye kadi úte nwuna Unwoti Katɔti ni, ɔnu ka ɔ́ƒɔ kayu kammɔ. Na utabla atuɔkplu na kenye kani úse mmɔ lɛlɔ. Ɔsika ɔdi likpidi ka ése kenye na aladi-ka lɛlɔ, ɔsika Unwoti ɔdubo-ɔ buye.

²²Na ɔɔɔdi likpidi lɛdi si étese kenye kadi étete Unwoti.

²³Nsu lɛla lɛni na awɔ ɔlati néti ƒula bɔyɔ kemmo ásu na ése Katɔti kenye kadi bɔdi ni, nu ka ádi kenye kammɔ lɛlɔ.

²⁴Na si ɔdi ɔkɛ ɔɔví na útáda ɔ́lɛ ɔkpanadi adingyii kemo na ɔ́nu ka ebi ammɔ adi égyie ni, ɔkana na ude ɔdi na ɔdi umo. Nsu uuubo kuƒi ka uti kɔdingyii kɔmmɔ ebi adi uwi lɛla lɛdi kemmo usienku kaduli.

²⁵Na si ɔdi ɔ́kɛ ɔɔví na útáda ɔ́lɛ ɔkpanadi edula kemo ni, ubo kuƒi ka uti kɔnu na ukpeli edula ammɔ adi na ɔdi kalɛ na ɔkana. Nsu uuubo kuƒi ka ukulo adi ɔtɔlɔku.