Read Lelemi Lɛkpa Ulu 24 Bible Online

Lɛkpa Ulu 24 - Lelemi bible

Lɛkpa Ulu 24

¹Bɛya na buti-nwu bɔnii ɔnana ɔdi úti uleku, na buti bɔmmɔ kama ɔ́nu lɛla lɛdi ɔ́siku uleku ɔmmɔ lɛlɔ na ɔsɔ ulayɔ-nwu. Anwuɔsu ɔnana ɔmmɔ úte uleku ɔmmɔ kakunkɛ ka ɔ́nyonu-nwu na údie-nwu ulu na ɔ́tɔlɔ-nwu kaduli.

²Na ɔmmɔ kama ɔnana bamba ɔ́nu uleku ɔmɛni na úti-nwu,

³na anwu lɛnɔ ɔ́nu ka ɔ́sɔ ulayɔ-nwu na úte-nwu kakunkɛ ka ɔ́nyonu-nwu na údie-nwu ulu na ɔ́tɔlɔ-nwu kaduli iye si bukpi na ɔgyani unyɔdi ɔmɛni úkpi muedi ni,

⁴ɔnana udeedi ɔmmɔ ɔsɔ uuubo kuƒi ka utéti uleku ɔmmɔ lɛnɔ. Ɔlɛka ɔnana ɔmmɔ ɔnu uleku ɔmmɔ aani ukyuli ɔni na béwi-nwu anumi kalɔ. Na si ɔnana ɔmmɔ ɔ́sɔ úti-nwu ni, ɔdi lɛla lɛni muusé Unwoti lɛlɔ. Na ɔdi utatábla lɛla lɛni udu muusé bina Unwoti Katɔti mmɔ na kalɔ kani lɛlɔ na bísela bitélie mmɔ.

⁵Na si ɔnana ɔdi úti uleku ɔwɔdi ni, batakpanku ɔnana ɔmmɔ betesienku kekpo iye kabla kadi kemmo. Ɔlɛka bete-nwu kuƒi lɛkwa linwi na anwu ku ulekudi bakɛ kubiti.

⁶Na si ɔdi úvo lɛla lɛdi úte ɔkpanadi ni, utaƒɔ nwuna kukɔ iye lɛklɔyi lɛni na uuti taakɔ ɔlaaƒɔ utése ɔkpa. Si ɔdi ɔ́bla lɛni ni, ukyuli ɔmmɔ údie nwuna ɔkpanadi ɔmmɔ lɛdila ɔ́lɛku ɔnwani kenye kemmo. Ɔsika kukɔ kɔmmɔ na uuti taakɔ ɔlaaƒɔ na anwu ku nwuna kaduli bekyuli baadi.

⁷Na si ɔdi úƒie nwuna Israelni ɔkpana na úti ukyuli uƒiedi ɔmmɔ únwini ukyuli ɔni mɔɔbla kabla teete-nwu iye úti-nwu uuyé ni, ɔlɛka bebo ukyuli ɔni néƒie ɔkpanadi uuyé mmɔ badu. Na ulu ɔmɛni lɛlɔ na bɛdubo likpidi lɛmmɔ udu bɔda budie bina akɔ.

⁸Na si ukyuli ɔdi uuƒi ɔlɛ buɛ ni, ukyuli ɔmmɔ ɔsia anu kaduɛ na ɔbla ɔsiaku lɛla lɛni na bakpane bani ndi Lewiƒuɔ badubɔsu-nwu ka ɔbla lɛlɔ. Na bɛnu ka bɛ́di ɔda ɔni líbo-mii mɛni lɛlɔ.

⁹Na binyimo lɛla lɛni na bina Unwoti Katɔti ɔ́bla Miriam uwi ɔni na bɛ́si bɛɛlɛ́ Egyipte kalɔ lɛlɔ.

¹⁰Na si bina ɔdi évo lɛla lɛdi éte ƒula ɔkpanadi na úti nwuna kɔdi úse ɔkpa úte-ɔ ni, tesie tetéduo ukyuli ɔmmɔ ɔtɔ kemmo na etéti kɔdi kɔmmɔ awɔ ɔlati.

¹¹Mmomu sɔ nye keyi na ukyuli ɔmmɔ ɔlati utéti kɔdi kɔmmɔ uboku-ɔ.

¹²Na si ɔwabane névo lɛla lɛmmɔ na kɔdi na úti úse ɔkpa úte-ɔ ni, taƒɔ kɔdi kɔmmɔ tese lɛlɔ tetédu useyi uwi.

¹³Mmomu useyi uwi ni, ti ɔwabane ɔmmɔ kɔdi boku-nwu na ubi lɛlɔ ɔtɛ. Na ɔmɛni ɔdubɔda-nwu kubiti na kaƒɔ kadubɔyɔ bina Unwoti Katɔti.

¹⁴Tanya Israelni ɔwabane iye ɔƒɔ ɔwabane ɔni nkya-mii akɔ takya si éti-nwu anii ubabla kabla na limeyi lɛyuƒɔla kenye ute-ɔ.

¹⁵Nu ka áƒɔ-nwu nwuna limeyi kabla kenye kayu asa na ɔƒɛ ɔ́nu. Ɔsika bɔwia na ɔwabane ɔmmɔ ɔɔwia egulabi ammɔ ɔbla lɛla lɛdi. Na si átaƒɔ-nwu kayu kammɔ na úwulo ɔ́kpali Unwoti na lɛla lɛni na ábla-nwu mmɔ ɔsu ni, Katɔti ɔdubɔdu awɔ unwoti ɔmmɔ likpidi kɔtɔ.

¹⁶Kuƒi kuuubo ka badu bawɔne na likpidi lɛni na bana bebi bábla ɔsu, na batadu bebi na likpidi lɛni na bana bawɔne bábla ɔsu. Mmomu ɔdi biala ɔ́manku ka badu-nwu na anwu ɔlati likpidi lɛni na ɔ́bla ɔsu.

¹⁷Bɛsi litemi lɛlɔ siin bite baƒɔ bani nkya-mii akɔ ku bekpinebi. Na ɔdi utaƒɔ ukpinele ɔdi kɔdi utese ɔkpa si ɔɔwia kevonkɔ kadi.

¹⁸Na binyimo ka dii uwi ɔdi kemmo ni, Egyipteƒuɔ bénye-mii lɛlɔ na bítaabla kabla teete-ma asa na bina Unwoti Katɔti úbaƒɔ-mii ɔ́lɛku bana enu kemmo. Ɔmɛni ɔsu na muubó-mii ɔda amɛni udu.

¹⁹Na si bísie bitáƒɛ bina edula adi na bɛ́yiƒala adi bíse ni, bɛsɔ bitenwini bitetéti-nya. Mmomu bɛda biwi baƒɔ bani nkya-mii akɔ ku bekpinebi ku bekpinele. Na bitesie bitetéti edula ammɔ. Na si bɛɛbla lɛni ni, bina Unwoti Katɔti ɔdubuteete-mii kusɛ kuse na lɛla biala bɛɛbla kemmo.

²⁰Kunwi pɛ kani na ɔlɛka bisie bitála bina adingyii ebi na bɛsɔ bitesie bitatála ɔdi lɛnɔ. Bɛda ɔkladi bise bite bekyuli bani naaadi Israelƒuɔ ku bekpinebi ku bekpinele.

²¹Na si bísie bítála bina adingyii ebi ni, bɛsɔ bitesie kunyɔdi lɛnɔ. Na bɛda ɔkladi biwi bise bite bekyuli bani naaadi Israelƒuɔ ku bekpinebi ku bekpinele.

²²Na bitaya na ɔlɛ-mii kasusu kemmo ka uwi ɔdi kemmo ni, bɛdi bekyuli bani na bénye-mii lɛlɔ na bɛɛbla kabla teete Egyipteƒuɔ. Ɔmɛni ɔsu na líbo-mii ɔda ɔmɛni.