Read Lelemi Lɛkpa Ulu 25 Bible Online

Lɛkpa Ulu 25 - Lelemi bible

Lɛkpa Ulu 25

¹Bɛya na buti-nwu bɔnii Israelni ku Israelni bákɛ litemi na béti litemi lɛmmɔ bésienku litemi batɛne kudɔ na bátɛ na béte unwi ubo na bádu ɔkladi kɔtɔ.

²Na ukyuli ɔni bádu kɔtɔ mmɔ nwuna kɔtu bɔni ndi ka bebo-nwu kugyiimi. Na asa na badububo-nwu kugyiimi kɔmmɔ ni, litemi ɔtɛne ɔmmɔ ɔlɛka unwini ukyuli ɔmmɔ anumi ubi kalɔ asa na beteewi-nwu kugyiimi kɔmmɔ. Na likpidi lɛni udu na ɔ́bla ndubɔtina kugyiimi bumomo bɔni na ɔlɛka bebo-nwu.

³Bakana na bebo-nwu kugyiimi aavlene. Na ɔmmɔ kama basɔ betebo-nwu lɛnɔ. Si útulo lɛni ni, badubo-nwu kɔƒa bɔkya na bekyuli akɔ.

⁴Na si ukyuli ɔdi ɔmantɛ akɔ unye ɔɔbla kabla teete-nwu ni, utenyimi-nwu kenye.

⁵Si banwa inyɔ beli básala na bana kemmo unwi úkpi na útawɔ asa na úkpi ni, ukpinele ɔmmɔ utalɛka utélie kɔgya na ɔtɔ bamba kemmo. Mmomu ɔgyani ɔni nékpi mmɔ ɔnwani ɔlɛka uti-nwu.

⁶Na si anwu ku uleku ɔmmɔ báwɔ ubi udeedi ni, na ubi ɔmmɔ ɔdubɔbla ɔnwani ɔni nékpi mmɔ ubi. Ɔmɛni ndubɔya na ɔnwani ɔni nékpi mmɔ lɛnyi lilayi na Israel.

⁷Nsu si uleku ɔmmɔ ɔgyani ɔnwani úni ɔnii uleti-nwu ni, uleku ɔmmɔ usie ɔma benengu anumi na ɔsu ɔnini, “Mina ɔgyani ɔnwani ɔnii ulayɔ-mii. Na ulayɔ ka ɔnwani ɔni nékpi ɔkɛ kaba kadi ɔkya Israel kaba kemmo.”

⁸Na si uleku ɔmɛni ɔ́su lɛni ni, ɔlɛka ɔma benengu bamɛni balɔ ɔnana ɔmmɔ na bakɛ lɛla lɛdi basu-nwu. Na si básu-nwu na ɔnana ɔmmɔ ɔ́mu unye ɔɔsu ka ulayɔ uleku ɔmmɔ ɔsu uleti-nwu ni,

⁹na ukpinele ɔmmɔ ɔta usie ɔma benengu bammɔ anumi na ɔda ɔnana ɔmmɔ lɛgbanvuo udie-nwu lɛgba na ɔbwɛ lisuo uwi-nwu anumi na ɔsu ɔnini, “Ati bene, ukyuli ɔmɛni néni ka ɔnwani utakɛ kaba kadi.”

¹⁰Na ɔmɛni ɔsu ukyuli biala ɔdubɔnu bɔti kalɛ na ɔtɔ ɔmmɔ use. Na bekyuli basu banii ɔtɔ ɔmɛni kemmo na ɔnana ɔni bedie-nwu lɛgbanvuo ɔ́si.

¹¹Na si banana inyɔ badi beekpó na unwi ulekudi ɔ́lɛ ɔnii utáƒɔ ɔgyani na úse kalɔ ɔɔda ɔnana ɔkladi ɔmmɔ agobɛɛ taani ni, ɔlɛka beƒie uleku ɔmmɔ kɔnu bekulo.

¹²Na batanu-nwu kɔnyana kɔdi.

¹³Na lɛbuala lɛni beeti taakɔku ala unu taanu ni, bitabla-nwu ɔgya ku ule na biti bitaanya bekyuli taakya.

¹⁴Lɛni kani na bitawia akyami ani baakɔ́ku ala ɔgya ku ule bitese lɛlɔ biti bitaanya bekyuli taakya.

¹⁵Bɛnu ka lɛbuala lɛni na bɛɛkɔ́ku ala unu ku akyami ani na bɛɛkya ala bumomo ƒui adi akɔkula ani námanku.

¹⁶Ɔsika Unwoti ulayɔ ukyuli ɔni mbo kasisi na ɔɔnu ukyuli anumi ƒui na ɔɔnya-nwu taakya.

¹⁷Na bitayiƒala lɛla lɛni na Amalekƒuɔ bábla-mii uwi ɔni na bɛ́si Egyipte kalɔ lɛlɔ bɛkɛ ulu bísela.

¹⁸Bátina ka beeebo Katɔti bɔyia biala na bana kemmo. Anwuɔsu ka bánu báti ka lɛlɔ líitu-mii na bina ulu busie kemmo ɔsu ni, báta na békpoku-mii na bádu bani nábla kpɛtɛ kpɛtɛ.

¹⁹Anwuɔsu si bítéduo kalɔ kani na bina Unwoti Katɔti ɔ́su úse ka wete-mii mmɔ lɛlɔ na ɔ́ya na bɛ́kɛ bɔnwuna bɛ́siku bina bekisine enu kemmo ni, bɛnu ka bɛ́du Amalekƒuɔ ƒui kalɛ na ukyuli ɔdi ulenyimo-ma muedi. Ɔmɛni ɔsu bise litemi lɛmɛni likpo na bitayiƒala!