Read Lelemi Lɛkpa Ulu 26 Bible Online

Lɛkpa Ulu 26 - Lelemi bible

Lɛkpa Ulu 26

¹Si bísie bítéduo kalɔ kani na bina Unwoti Katɔti ɔ́su úse ka wete-mii mmɔ lɛlɔ ni, na bɛ́bla bina keliekɔ bɛ́wɔlɔ ni,

²ɔdi biala na ɔ́bla edula edeedi na ɔ́ƒɛ-nya ni, uti edula edeedi ammɔ adi uwi kagyigyɛ kemmo na uti-nya usienku kesii kani na Katɔti kakpakɔ kakya.

³Na utánu Katɔti ɔkpane ɔni mɔɔbla-nwu kabla uwi ɔmmɔ na ɔsu-nwu ɔnini, “Ɔmwi limeyi lɛmɛni líti edula amɛni líboku na líti mɔɔtina ka líduo kalɔ kani na mina Unwoti Katɔti ɔ́su úse ka weti wete bula bati kuuku kemmo.”

⁴Si ásu lɛni áwɔlɔ ni, Katɔti ɔkpane ɔmmɔ ɔdubɔƒɔ kagyigyɛ kammɔ na uti-ka utásia bina Katɔti lɛkpabi lɛmmɔ anumi.

⁵Na ɔmmɔ kama bɛdubɔsu etemila amɛni na Unwoti anumi bɛnini, “Kuuku ni, mina ɔti ndi Aramni ɔni neeebo keliekɔ kadi. Bulie kani na uulie taata. Na útélie Egyipte kalɔ lɛlɔ. Na asa na ɔdubusie utélie mmɔ ni, nwuna badi beeemomo. Nsu ɔƒɛni búmomo na búnwini bekyuli bani mbo ɔyikun.

⁶Ka búsie bútélie Egyipte kalɔ lɛlɔ mmɔ ni, Egyipteƒuɔ bammɔ bábla-bu kalala na bénye-bu lɛlɔ ka butaabla kabla teete-ma.

⁷Amu na búwulo bɔ́kpali Unwoti ɔni ndi bula bati kuuku Katɔti ka ubo ubebunku-bu. Na sɔsɔ ni, únu bula bɔkpali na ɔ́nu bula lɛbibo ku kalala kani kemmo bɔkya.

⁸Na ɔkɛnku nwuna ɔyikun ku ɔlɔkplu kemmo na ɔ́ƒɔ-bu ɔ́lɛku Egyipteƒuɔ enu kemmo. Na ɔ́bla akɔla budie taatina lidu lidu. Na ɔ́ya na liƒu ala lidu lidu ébo-ma lɛlɔ.

⁹Amu na ɔ́ya na búbo búlie kalɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii mɛni lɛlɔ.

¹⁰Anwuɔsu líti mina edula edeedi ani na Katɔti úti úte-mi mɛni muuboku-nwu.” Na si ásu lɛni áwɔlɔ ni, na eti kagyigyɛ kammɔ ese bula Unwoti Katɔti anumi na emwi-nwu.

¹¹Na ɔmmɔ kama ni, awɔ ku Lewiƒuɔ ku bekyuli bani naaadi Israelƒuɔ bɛkɛ ebiti na lɛla libendi lɛni na bina Unwoti Katɔti ɔ́bla úte awɔ ku ƒula kaduli bekyuli ɔsu.

¹²Na lɛkwa lɛtɛdi biala kemmo ni, biti bina edula lɛkpa leevudi bite Lewiƒuɔ ku bekyuli bani naaadi Israelƒuɔ ku bekpinebi ku bekpinele kalɛ na bakɛ badi na bemo na bina lɛma kemmo.

¹³Ɔmmɔ kama na asu anini, “Mina ala lɛkpa leevudi lɛni na lídie líse sɛsɛɛ líte awɔ mina Katɔti ni, ntada ntese mina kaduli. Mmomu líti ala ammɔ ƒui líboku Lewiƒuɔ ku bani naaadi Israelƒuɔ ku bekpinebi ku bekpinele aani kalɛ na ébo-mii ɔda anii mbla. Na ntata ntenye iye lɛ́yiƒala ƒula ɔda bubo bɔni ndanku ala lɛkpa leevudi bute lɛlɔ.”

¹⁴Na asɔ asu anini, “Ńtadi ala ammɔ adi uwi ɔni mɔɔbla kekwa iye lídie ɔdi uwi ɔni na liiise sɛɛn iye líti ɔdi líte ukpine ɔdi. Mmomu lɛ́di mina Unwoti Katɔti litemi lɛlɔ. Na lɛ́bla lɛ́siaku ala ani ƒui na ásu-mi anii mbla na ala lɛkpa leevudi lɛlɔ.

¹⁵Anwuɔsu, Katɔti, nwini anumi na anu-mi asiku katɔ ƒula keliekɔ kedee kesii kani na elie mmɔ. Na ete ƒula bekyuli Israelƒuɔ kusɛ kusɛ na ete kalɔ kani na éti éte-bu mmɔ lɛnɔ kusɛ kusɛ aani kalɛ na ése kenye éte bula bati kuuku, kalɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii mmɔ.”

¹⁶Ɔmwi kadi ni, bina Unwoti Katɔti uubó-mii ɔda ɔnii bɛdi nwuna ɔda bubo ƒui lɛlɔ. Anwuɔsu biti bina kɔyu ku kayi ƒui bɛdi-mu lɛlɔ sɔsɔ.

¹⁷Na ɔmwi ni, bɛ́lɛ ugyii ka Unwoti ndi bina Katɔti, na bíse kenye ka bɛdubunu-nwu litemi na bɛdubɔdi nwuna ɔda bubo ƒui lɛlɔ, na lɛla biala wasu-mii ni, bɛdubuti-ni.

¹⁸Na ɔmwi kadi ni, Unwoti lɛnɔ ɔ́lɛ ugyii ka bɛdi nwuna bekyuli aani kalɛ na ɔ́su úse. Na ɔɔsu-mii ɔnii bɛdi nwuna ɔda bubo ƒui lɛlɔ.

¹⁹Na ɔdubɔya na bɛyu ɔkplu bitulo bekyuli bani ƒui nkya kayawi. Na amii ndubuti ɔbu ku bumwi bite nwuna lɛnyi. Na bɛdubɔbla bekyuli kedee bite bina Unwoti Katɔti aani kalɛ na ɔ́su úse.