Read Lelemi Lɛkpa Ulu 27 Bible Online

Lɛkpa Ulu 27 - Lelemi bible

Lɛkpa Ulu 27

¹Amu na Mose ku Israelƒuɔ ɔma batɔnkune bammɔ ƒui básu bekyuli bammɔ banini, “Bɛdi ɔda bubo etemila ani búti buute-mii ɔmwi mɛni ƒui lɛlɔ.

²Na limeyi lɛni na bɛdubɔvia Yordan Ketu na bisie bitéduo kalɔ kani na bina Unwoti Katɔti úti uute-mii mɛni lɛlɔ ni, bɛwia atabi bonwu bonwu na bɛkwaa-nya lɛlɔ ku uƒi.

³Na binweni etemila ani ƒui na nwuna ɔda bubo bɔmmɔ bɔdanku bɛsia-nya lɛlɔ nwaa si uwi ɔni na bɛ́via na bɛdubo buduo kalɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii, na bina bati kuuku Katɔti úse kenye ka weti wete-mii kemmo.

⁴Na si uwi ɔni na bɛ́via Yordan Ketu kammɔ ni, na bɛtɛ atabi ammɔ bise Ebal Kɔbi lɛlɔ aani kalɛ kani na buubó-mii ɔda ɔmwi mɛni. Na bɛnu ka bɛ́kwaa atabi ammɔ lɛlɔ ku uƒi.

⁵Na bɛtu Katɔti lɛkpabi bɛlɛ mmɔ bite bina Unwoti Katɔti, na biti atabi bɛtu lɛkpabi lɛmmɔ. Na biteti lɛbuala lɛdi bitamana-nwu lɛlɔ.

⁶Biti atabi ani na bátanwi na bɛtu lɛkpabi lɛmmɔ bite bina Unwoti Katɔti, na bitaabla akpala teete-nwu.

⁷Na bitaabla unwi bɔbla akpala na mmɔ na bitaadi unwi bɔbla akpala adila na bitaakɛ kubiti na bina Unwoti Katɔti anumi na mmɔ.

⁸Na binweni etemila ani ƒui na ɔda bubo bɔmmɔ bɔdanku bɛsia atabi ani na bɛ́tɛ mmɔ lɛlɔ nwaa.”

⁹Amu na Mose ku Katɔti bakpane bani ndi Lewiƒuɔ bammɔ básu Israelƒuɔ banini, “Bɛba lɛsɛ na bise atu! Ɔƒɛni ni, bínwini bina Unwoti Katɔti bekyuli.

¹⁰Anwuɔsu binu-nwu litemi na bɛdi nwuna ɔda bubo bɔni ƒui na úti uute-mii ɔmwi mɛni lɛlɔ.”

¹¹Limeyi lɛmmɔ kani na Mose úbo bekyuli bammɔ ɔda ɔnini,

¹²“Si bɛ́via Yordan Ketu ni, adua ani bekyuli ndubunye Gerisim Kɔbi lɛlɔ na bete Israelƒuɔ kusɛ kusɛ anyi ndi Simeon ku Lewi ku Yuda ku Isakar ku Yoseƒ ku Benyamin.

¹³Na adua ani bekyuli ndubunye Ebal Kɔbi lɛlɔ na benu kalɛ na Katɔti uuwida bekyuli ndi Ruben ku Gad ku Aser ku Sebulon ku Dan ku Naƒtali.

¹⁴“Na Lewiƒuɔ ndubɔva momoomo basu Israel bekyuli ƒui banini,

¹⁵“ ‘Ewida asiaku ukyuli ɔni nánwi iye ɔ́vɔ baƒiɔ badi na úti ɔ́bla lɛla lɛni muusé Unwoti lɛlɔ. Ɔsika lɛla ndi lɛla lɛni udu na ukyuli úti nwuna kɔnu ɔ́bla úse úte lɛlɔ na bɔbɛ kemmo ni, ɔ́ƒiɔ Katɔti.’ Na ɔlɛka bekyuli bammɔ ƒui basu banii, ‘Ɔsia lɛni.’

¹⁶‘Ewida asiaku ukyuli ɔni naaabu ɔti iye uni.’ Na ɔlɛka bekyuli ƒui batuna banii, ‘Ɔsia lɛni.’

¹⁷‘Ewida asiaku ukyuli ɔni mavumana ɔkpanadi ɔmii.’ Na ɔlɛka bekyuli batuna basu banii, ‘Ɔsia lɛni.’

¹⁸‘Ewida asiaku ukyuli ɔni mɔɔtɔnku ɔnumbwɛne kalɛ na ɔyii ulu.’ Na ɔlɛka bekyuli batuna banii, ‘Ɔsia lɛni.’

¹⁹‘Ewida asiaku ukyuli ɔni mɔɔnya bekyuli bani naaadi Israelƒuɔ ku bekpinebi ku bekpinele taakya.’ Na ɔlɛka bekyuli batuna banii, ‘Ɔsia lɛni.’

²⁰‘Ewida asiaku ukyuli ɔni na anwu ku ɔti ulekudi baatɛ. Ɔsika ɔ́ya na ɔti katɛnkɔ keesé lɛlɔ.’ Na ɔlɛka bekyuli batuna banii, ‘Ɔsia lɛni.’

²¹‘Ewida asiaku ukyuli ɔni na anwu ku ebuo baatɛ.’ Na ɔlɛka bekyuli batuna banii, ‘Ɔsia lɛni.’

²²‘Ewida asiaku ukyuli ɔni na anwu ku ɔnwani ulekubi iye ɔtibi iye unibi baatɛ.’ Na ɔlɛka bekyuli batuna banii, ‘Ɔsia lɛni.’

²³‘Ewida asiaku ukyuli ɔni na anwu ku nwuna uleni baatɛ.’ Na ɔlɛka bekyuli batuna banii, ‘Ɔsia lɛni.’

²⁴‘Ewida asiaku ukyuli ɔni ndubɔbɛ ɔdu ukyuli.’ Na ɔlɛka bekyuli batuna banii, ‘Ɔsia lɛni.’

²⁵‘Ewida asiaku ukyuli ɔni maƒɔ egulabi adi na badu ukyuli ɔni nátaƒiɔ.’ Na ɔlɛka bekyuli batuna banii, ‘Ɔsia lɛni.’

²⁶‘Ewida asiaku ukyuli ɔni naaadi Katɔti ɔda bubo ku nwuna ala bɔtina ƒui lɛlɔ.’ Na ɔlɛka bekyuli batuna banii, ‘Ɔsia lɛni.’ ”