Read Lelemi Lɛkpa Ulu 28 Bible Online

Lɛkpa Ulu 28 - Lelemi bible

Lɛkpa Ulu 28

¹Si bɛɛdi bina Unwoti Katɔti litemi lɛlɔ kaduɛ na bɛɛsiaku nwuna ɔda ɔni na uubó-mii ɔmwi mɛni kama ni, bina Unwoti Katɔti ɔdubɔtalaku-mii katɔ utulo bekyuli bani ƒui nkya kayawi.

²Na kusɛ kusɛ ɔmɛni ɔdubɔsiaku-mii si biinú bina Unwoti Katɔti litemi.

³Unwoti ɔdubutemi-mii kusɛ kusɛ na bina lɛma ku bina mmo.

⁴Unwoti ɔdubute-mii kusɛ kusɛ na bɛwɔ bebi pii na bɛkɛ edula pii lɛnɔ. Na ɔdubɔya na bɛkɛ ɔmantɛ bakɔ ku baƒonu pii.

⁵Unwoti ɔdubute-mii kusɛ kusɛ na bina edula ani bɛ́va adia kaduɛ na adila ani na bɛdubuti edula ammɔ bɛnwa lɛnɔ eƒu na emomo.

⁶Na Unwoti ɔdubute-mii kusɛ kusɛ na lɛla biala na bɛɛbla kemmo.

⁷Na Unwoti ɔdubɔdi bina bekisine lɛlɔ ute-mii si bata banii bebekpoku-mii. Bekisine bammɔ badubɔsia ulu unwi bebo, nsu badubɔsia lilu maatɛ lɛlɔ bekeli.

⁸Unwoti ɔdubute-mii kusɛ kusɛ na bina kabla kani bɛɛbla kemmo. Na ɔdubɔya na bina linwu liyi ku bina edula ani na bɛdubɔƒɛ. Na ɔdubute-mii kusɛ kusɛ na kalɔ kani na úti uute-mii mmɔ lɛlɔ.

⁹Si biinú bina Unwoti Katɔti litemi na bɛɛdi nwuna ɔda bubo lɛlɔ ƒui ni, ɔdubuti-mii ɔbla nwuna bekyuli aani kalɛ na ɔ́su.

¹⁰Na kayawi bekyuli ƒui badubɔnu bɔti ka Unwoti náƒuna-mii ɔ́bla anwu ɔlati bekyuli. Ɔmɛni ɔsu badubutaayia-mii.

¹¹Unwoti ɔdubɔya na bɛwɔ bebi pii na bɛkɛ ɔmantɛ bakɔ ku edula pii na kalɔ kani na úti uute-mii mɛni lɛlɔ. Na aka na ɔ́su úse ka weti wete bina bati kuuku.

¹²Na Unwoti ɔdubɔlɛmi Katɔ kesii kani na ntu bɔ́bu bɔkya na ɔya na ɔnantu utaana teewi bina kalɔ lɛlɔ na nwuna uwi lɛlɔ. Na ɔdubute-mii kusɛ kusɛ na bina kabla kadia. Na amii bɛdubute kadi pii kevonkɔ. Nsu amii bilésie bilatáwia kevonkɔ kadi na bana kudɔ.

¹³Si bɛɛdi Unwoti ɔda ɔni na úbo-mii mɛni lɛlɔ na bɛɛsia-mu anu kaduɛ ni, ɔdubɔya na bɛdi lili na biladi ɔka kudii. Na lɛla biala kemmo bɛdubo bɔbla udeedi na bilabla ukplodi.

¹⁴Na ɔda ɔni na uubó-mii ɔmwi mɛni ni, ɔdi utada utavia utesie kɔdianu iye kɔmii na utákpa baƒiɔ badi.

¹⁵Nsu si bítadi ɔda bubo bɔni na muute-mii ɔmwi mɛni lɛlɔ na bítasia nwuna ala ani na ɔ́tina-mii anu kpakplaa ni, ewida amɛni ndubo-mii lɛlɔ.

¹⁶Unwoti ɔdubo bina lɛma ku bina mmo buwida.

¹⁷Unwoti ɔdubo bina edula ani bɛ́va ku adila ani bɛ́nwa bise buwida.

¹⁸Unwoti ɔdubo-mii buwida na bilawɔ bebi pii, na bina edula lɛnɔ aaadubo bɔdia, na bina ɔmantɛ bakɔ ku baƒonu belemomo.

¹⁹Unwoti ɔdubo bina lɛla biala na bɛdubɔbla buwida.

²⁰Na si bɛ́bla likpidi na bíni bina Unwoti ni, ɔdubuti ala ani na aadu kɔnyana geen na ese basa basa uboku-mii lɛlɔ. Na ala ani muukpóku ukyuli kani ndubo buteebo-mii lɛlɔ úti útédu ka ɔ́yila-mii udu ƒui.

²¹Na ɔdubuti lɛlɛ lidu lidu uboku-mii lɛlɔ uti utédu ka ɔdi biala ɔsɔ uuuli ngba na kalɔ kani lɛlɔ na bísela bitélie mmɔ lɛlɔ.

²²Unwoti ɔdubuti lɛlɛ kpakplaa ukpoku-mii. Na ɔdubɔya na eƒula eteeƒu-mii na lɛlɔ bɔbi lɛnɔ buteekpoku-mii. Na ɔdubɔya na kaƒɛndi kekpidi kataalɛ, na ɔƒɛƒɛɛ ukpidi uteekpo kalɛ na ubie bina edula. Na ɔgbankpi ɔmɛni ɔdubɔkya-mii akɔ uti utédu ka bina ƒui bíkpi.

²³Ɔnantu lɛnɔ ulana na bina kalɔ kadubɔyu ɔkplu aani lɛbuala kalɛ.

²⁴Uwi ɔni na binye bɛɛnu ɔnantu anumi ni, Unwoti ɔdubuti ɔƒɛƒɛɛ ku kɔnwinimi uyile kayaa uti utédu ka ɔyila-mii udu ƒui.

²⁵Unwoti ɔdubɔya na bina bekisine badi-mii lɛlɔ. Na bɛdubɔsia ulu unwi bɛnii bitékpoku-ma, nsu bɛdubɔsia lilu maatɛ lɛlɔ bikeli bɛtɔlɔ. Na si ɔmɛni udu ɔ́lɛ lɛni ni, ɔdubɔbla kayawi bekyuli ƒui kalɛ kadi. Na badubuye lɛlɔ ka bi mɔɔlɛ́ na bina lɛlɔ mɛni.

²⁶Na si bíkpi ni, baasɛ ku bebuo ndubo bina lɛna bɔkun. Na lɛla biala liiibo na lɛbɔku-ma.

²⁷Unwoti ɔdubɔya na eƒula eteeƒu-mii aani kalɛ na ɔ́ya na éƒu Egyipteƒuɔ úbavi. Na ɔdubɔya na bina ɔlɔna utaabla alɛbi na ulie ntu na utaadu-mii. Nsu kuvo kɔdi kuuubo kɔni mabwi-mii.

²⁸Unwoti ɔdubɔya na biteekpi libuo na kasusu keteeƒu-mii na anumi ataabuɛ-mii.

²⁹Na ɔƒiiwi bɛduti bina enu bitaawia ala taanɔ aani banumbwɛne kalɛ. Na lɛla biala bɛdubɔbla limeyi ndi limeyi ni, lilatɛ lilete-mii. Bɛdubo abi bubo na bekyuli beteekpeli bina ala taaƒɔ, nsu ukyuli biala uuubo na ukpo ute-mii.

³⁰Bɛdubɔnu beleku na bɛbla-ma elila, nsu banana bamba ndubukpeli-ma bɔƒɔ na beti-ma beti. Bɛdubɔtu lɛtɔ, nsu bilelie-ni kemmo. Bɛdubɔbla adingyii mmo, nsu bilákɛ egyiibi ammɔ biladi.

³¹Bekyuli badubɔdu bina ɔmantɛ bakɔ na bina anumi, nsu bilákɛ bana lɛna lɛmmɔ lɛdi bilakun. Na bekyuli badubuti bina bapɔnkɔ wɛlɛ wɛlɛ batɔlɔku na bina anumi. Nu basɔ beleti-ma beleboku. Na bina bekisine badubo bebeti bina baƒonu batɔlɔku, nsu ukyuli biala uuubo na ukpo ute-mii.

³²Bekyuli bani naaadi Yudaƒuɔ badubo bebeti bina bebi bananabi ku belekubi batɔlɔku na bina anumi na batátaabla-ma kabla. Na limeyi ndi limeyi ni, bɛdubɔnu-ma anumi ka benwini bebo, nsu keeke.

³³Na ɔgyu kakaaka kadi bekyuli badubo na babaƒɛ bina edula ani bíbo abi bɛ́va batɔlɔku, nsu baaadubo-mii kayu kadi bɔƒɔ. Lɛbibo kama lɛbibo na bɛdubɔnu.

³⁴Na lɛbibo lɛdubɔya na bina kasusu keƒu-mii.

³⁵Na Unwoti ɔdubɔya na ekpegyiibi alɛ-mii lɛgba, nsu bilákɛ-nya kuvo. Na alɛbi ku eƒula adubɔsia-mii ɔ́si bina lili úti útédu bina lɛgba lɛlɔ.

³⁶Na Unwoti ɔdubɔya na bekyuli bani naaadi Israelƒuɔ beƒie amii ku bina ɔga batɔlɔku besienku kalɔ bamba lɛlɔ kesii kani na amii iye bina bati kuuku bételie kudii na bitélie mmɔ. Na mmɔ na bɛdubɔkpa baƒiɔ bani béti ligyii ku atabi bánwi.

³⁷Unwoti ɔdubugyingya-mii ɔkya kɔlɔ kɔmmɔ ƒui lɛlɔ. Na ɔdubɔbla kɔlɔ kɔmmɔ bekyuli dɛye dɛye na beye banii bi ɔsu na ɔ́lɛku-mii lɛni. Na ɔmmɔ ɔsu badubɔma-mii.

³⁸Na bɛdubɔva edula pii, nsu blii suɛ kani na bɛdubo bɔƒɛ. Ɔsika Unwoti ɔdubɔya na baalɔlɔ bebebile-nya evete ammɔ.

³⁹Na bɛdubɔtuma adingyii mmo na biwi lɛlɔ bɛnu-nya lɛlɔ kaduɛ. Nsu bilákɛ-nya ebi bilala iye bɛkɛ ebi ammɔ adi bɛbla ntɛ. Ɔsika beklubi badubuduo egyiibi ammɔ kemmo.

⁴⁰Nnɔ egyii adubɔkwɛ bina kalɔ kesi kesii, nsu bɛɛɛdubo nnɔ biala bɔkɛ bɔsiku-ni kemmo. Ɔsika nnɔ ebi ammɔ adubɔnu ebie ewi kalɔ.

⁴¹Bɛdubɔkɛ bebi bananabi ku belekubi pii, nsu bilákɛ-ma kɔsia kɔdi. Ɔsika bekyuli bamba badubo bebekpoku-mii na beƒie-ma batɔlɔku.

⁴²Na baalɔlɔ yuu badubo bina egyii ku edula bubile.

⁴³Na bekyuli bani naaadi Israelƒuɔ na bakya-mii akɔ badubo katɔ butaakɔ, nsu amii bɛdubo kalɔ butaayu.

⁴⁴Na ama ndubo-mii kevonkɔ bute, nsu ama belévo lɛla lɛdi na bina kudɔ. Na kawɔlɔkɔ ni, ama ndubo-mii lɛlɔ bɔdi.

⁴⁵Lɛbibo lɛmɛni ndubo-mii lɛlɔ buteebo na eteekpoku-mii úti útédu ka bina ƒui bɛ́yii udu. Ɔsika bítenu bina Unwoti Katɔti litemi na bítadi nwuna ala bɔtina lɛlɔ.

⁴⁶Na ɔgbankpi ɔmɛni ndubɔbla likposela ku akɔla budie taatina bɔni ndubo buse bute amii ku bina bawɔ.

⁴⁷Ɔsika bítemwi bina Unwoti Katɔti ku ebiti ku lɛlɔyɔ na bina lɛkɛ kemmo.

⁴⁸Anwuɔsu kɔka ku utukwɛ ku kɔwaba bonwu kɔdubɔda-mii na bɛkɛ ku kasɔngya bitaabla kabla teete bina bekisine bani enu kemmo na Unwoti ɔdubuti-mii ɔ́kya. Na Unwoti ɔdubɔya na bibo abi laa wetédu ka bina ƒui bíkpi bɛ́yii udu.

⁴⁹Na Unwoti ɔdubɔya na kadi bamba bekyuli bani na si bátɛmi na bilénu kalɔ basi ɔgyu kakaaka bada balɛ-mii lɛlɔ kɔnakunwi aani kalɛ na kasangbii kaayu teeƒie lɛkɔkɔbi kalɛ.

⁵⁰Na bekyuli bammɔ badubɔbla lili ɔkplu na balanu ukyuli biala kɔnyana, unengu ɔdi o-o iye ɔnamu ɔdi o-o, balanu-nwu kɔnyana.

⁵¹Na bekyuli bammɔ badubo bina edula bɔdi na badu bina bebuo bakun ƒui na kɔka kɔda-mii kaduɛ úti útédu ka bíkpi bɛ́sa ƒui. Na bekyuli bammɔ baaadubo edula iye ntɛ iye nnɔ iye ɔmantɛ bakɔ iye baƒonu badi bɔda buse-mii. Badubɔkyula ala ammɔ ƒui kede kede na bikpi bɛsa.

⁵²Na bekyuli bammɔ badubo bebekpoku bina lɛma lɛni ƒui bina Unwoti Katɔti ɔdubo buti bute-mii. Na bina awodu ani na bɛ́tu bínyene ƒui na anya na bɛ́sia anu na kekpo uwi adubo bɔƒɛ.

⁵³Na kalala kani na bina bekisine bammɔ badubo-mii bɔbla si báda-mii bákya uwi ɔmmɔ kemmo ɔsu ni, bɛdubo bina bebi bananabi ku belekubi bani na bina Unwoti Katɔti úte-mii bɔdu bɔkun.

⁵⁴Ina ukyuli ɔni nse buɛɛ iye ubo kasusu geen ulanu ɔwani iye ulekudi ɔni na ɔɔyɔ́ geen iye nwuna bebi bani nébu kɔnyana.

⁵⁵Na ubidi lɛna lɛni na ɔ́kɛ ɔɔkun mmɔ ni, ulete bana akɔ bani nébu lɛna lɛmmɔ lɛdi ɔnii ɔkun.

⁵⁶Na uleku ɔni nse buɛɛ na ubo kasusu geen na ubo akɛla ɔsu na ulesie kesi kesii muedi ni, si bina bekisine bammɔ báda bálɛ ɔma ɔmmɔ kemmo ni, anumi adubugyie uleku ɔmmɔ na adila lɛlɔ. Na ɔdubo bɔbɛ na ɔdu ubidi ɔni na ɔ́wɔ ɔkun ku awɔla ammɔ. Na ulete ɔgyani ɔni na ɔɔyɔ́ iye ubidi bamba lɛna lɛmmɔ lɛdi ɔnii ɔkun.

⁵⁷

⁵⁸Na si bítewi lɛlɔ na bɛdi ɔda bubo ala bɔtina bɔni bénweni bákya ɔku ɔmɛni kemmo na biti ɔbu unengudi ɔni na bɔyia bɔkya-nwu kemmo bite bina Unwoti Katɔti ni,

⁵⁹Unwoti ɔdubuti lɛlɛ lidu lidu lɛni mɔɔví bekyuli na ukyuli biala ulakana-ni bɔbwi uboku amii ku bina bawɔ lɛlɔ.

⁶⁰Na ɔdubɔya na lɛlɛ likpidi lɛni ƒui na ɔ́ya na líbo Egyipteƒuɔ lɛlɔ uwi ɔni na bɛ́kya Egyipte kalɔ lɛlɔ na bɛ́yia geen mmɔ libo-mii lɛlɔ na ɔdi ulákɛ-nwu kuvo.

⁶¹Na ɔdubɔya na lɛlɛ lidu lidu lɛni mɔɔví bekyuli na batalɔ-ni anyi bátakya Katɔti ɔda bubo ɔku ɔmɛni kemmo libo-mii lɛlɔ na bikpi bɛyii udu.

⁶²Na ina ka bimomo aani katɔ ayabi kalɛ ni, bɛdubɔsa bɛbla blii suɛ, ɔsika bítenu bina Unwoti Katɔti litemi.

⁶³Kalɛ kani na ɔ́yɔ Unwoti kaƒɔ na ɔbla-mii lɛƒɔndia na bímomo bíbu ni, lɛni kani na ɔdubɔyɔ-nwu kaƒɔ ka ɔyila-mii udu na bina lɛma lɛbla kuliekɔ kukpludi. Na ɔda-mii udie kalɔ kani na nka bísela bitéti binwini bina kadikɔ na bilie mmɔ lɛlɔ.

⁶⁴Bina Unwoti ɔdubɔya na bigyingya bɛkya kalɔ lɛlɔ ƒui. Mmɔ na bɛdubo baƒiɔ bani na béti egyii ku atabi bánwi bɔkpa, baƒiɔ bani na bina bati kuuku bátakpa kudii.

⁶⁵Na kadi bamba bekyuli bammɔ akɔ ni, bɛɛɛdubo bɔkɛ atubɔyɔ, na ɔdi ulalɔ-mii lɛnyi lɛbuni lɛdi. Na bina Unwoti ɔdubɔya na ɔtɔtɔ utaagyu-mii na binwini bekyuli bani neeebo kɔsia kɔdi na biteewulo kɔnyana na bina kɔyi kemmo.

⁶⁶Na uwi biala ni, bina ngba bɔdubɔkya ɔgbankpi kemmo usien ku ɔƒɛ. Na bɛdubo butaayia uwi ndi uwi ka badubo-mii bɔdu.

⁶⁷Bina kayi kadubo buyi ku liƒu. Na lɛla biala bɛdubɔnu ni, lɛdubo-mii liƒu bɔda. Na si kadi kégye ni, bɛdubuye bɛnii uwi ɔmani na kadi kadubɔsa. Na si kása lɛnɔ ni, bɛdubuye bɛnii uwi ɔmani na kadubugye.

⁶⁸Na bina Unwoti ɔdubuti lɛkɔlɔ libendi libendi na uti-mii ɔkya-ni kemmo na unwini-mii usienku Egyipte kalɔ kesii kani na ɔ́su ka bɛsɔ bilésie kudii. Na si bíduo mmɔ ni, bɛdubuti lɛlɔ biye bite Egyipte kalɔƒuɔ bammɔ na bitaabla kabla teete-ma. Nsu ukyuli biala uláyɔ ka uye-mii.