Read Lelemi Lɛkpa Ulu 29 Bible Online

Lɛkpa Ulu 29 - Lelemi bible

Lɛkpa Ulu 29

¹Bunyimi bɔmɛni na Katɔti úbo Mose ɔda ka unyimi ku Israelƒuɔ na uwi ɔni bákya Moabƒuɔ kalɔ lɛlɔ. Na úti-mu úbunku bunyimi bɔni na únyimiku-ma uwi ɔni na bákya Sinai kɔbi lɛlɔ.

²Uwi ɔmmɔ ni, Mose ɔ́lɔ Israelƒuɔ ɔ́sala na ɔ́su-ma ala amɛni. Amii alati bɛ́nu ku bina anumi ala ani na Unwoti ɔ́bla Egyipteƒuɔ ɔga ku nwuna kabla bablane ku ɔma ɔmmɔ ƒui bekyuli.

³Na bɛ́nu Unwoti ɔyikun bonwu ɔni na údie keyi na ala ebendi ku akɔla budie taatina lidu lidu ani na ɔ́bla úti úkpoku-ma.

⁴Nsu úti úbedu ɔmwi limeyi lɛmɛni lɛlɔ útaya na binu kalɔ iye bɛnu bɛti lɛla lɛni ɔsu na ala ammɔ álɛ lɛni.

⁵Na akwa aavlene kemmo ni, Unwoti ɔ́tɔnku-mii na kalɔ kakwiidi kemmo ɔni na ukyuli ɔdi adala iye agbanvuo étebie.

⁶Na bɛɛɛda bodobodo iye ntɛ bɔdi, nsu Unwoti úte-mii ala ani ƒui bɛɛwia. Ɔ́bla lɛni úti ɔ́tina ka anwu ndi Katɔti.

⁷Na uwi ɔni búbedu kesii kani bɔkya mɛni ni, Ɔga Sihon ɔni nási Hesbon ku Ɔga Og ɔni nási Basan báta bébekpoku-bu. Nsu bɔ́di-ma lɛlɔ.

⁸Na búti bana kɔlɔ na búle kɔlɔ kɔmmɔ búte Ruben ku Gad kaba, na búti kakɛ lɛnɔ búte Manase kaba.

⁹Anwuɔsu bɛdi bunyimi bɔmɛni lɛlɔ kaduɛ kalɛ na lɛla biala bɛdubɔbla lɛtɛ lite-mii.

¹⁰Ɔmwi kadi ni, bina ƒui binye bina Unwoti Katɔti anumi, batɔnkune ku kabla bablane ku banana ku belekubi ƒui ku bina bebi ku bekyuli bani naaadi Israelƒuɔ na bakya-mii kudɔ na baadá bina egyii na beesié ketu teete-mi.

¹²Ɔmwi limeyi lɛmɛni ni, bina ƒui binye mɛni ka binu bunyimi bɔni na bina Unwoti Katɔti únyimiku-mii. Na bɛbla bɛsia lɛla biala na ɔ́su-mii lɛlɔ.

¹³Na Unwoti ɔlɛ-nwu ugyii ka bɛdi nwuna bekyuli. Na anwu lɛnɔ ɔbla bina Katɔti aani kalɛ na úse kenye úte amii ku bina bati kuuku bani ndi Abraham ku Isak ku Yakob.

¹⁴Na ɔɔɔdi amii lɛti kani na Unwoti únyimiku linyese lɛmɛni.

¹⁵Mmomu uunyimi-mu ku abu bani ƒui nnye-nwu anumi ɔmwi limeyi lɛmɛni ku bula bawɔ bani na bátawɔ tɔ lɛnɔ.

¹⁶Na bɛdubunyimo kalɛ na bílie Egyipte kalɔ lɛlɔ bɛ́vi ku kalɛ na bɛ́vi lɛma lɛni nkya ulu lɛlɔ asa na bíbedu mɛni.

¹⁷Na bɛ́nu kalɛ na baakpá ala ani muusé lɛlɔ ku ala ani na béti egyii ku atabi bánwi ku ala ani na béti sika ɔƒualadi ku ugyiedi bávɔ.

¹⁸Anwuɔsu bɛnu kaduɛ kalɛ na bina akɔ ɔdi ɔnana iye uleku iye ɔtɔ iye kɔdua kɔdi kayi kelénwini kama kalakya bula Unwoti Katɔti na usie utákpa bana baƒiɔ bammɔ badi. Bɛnu kaduɛ na ɔdi utebile ɔdi kasusu aani kugyii kɔni ntu mbo ɔdu ukpidi ɔdi na bina akɔ.

¹⁹Na bɛnu kaduɛ na bina akɔ ɔdi ɔni muunú bunyimi bɔmɛni ɔmwi limeyi lɛmɛni ulátɔlɔ lɛlɔ na anwu lɛti ɔsia ulu ɔni na ɔɔyɔ́ lɛlɔ na ɔsu lɛlɔ ɔnini, “Ɔdubɔdia bute-mi na ulu ɔni lɛlɔ na nkɛ mɛni.” Si ɔdi ɔ́bla lɛni ni, ɔdubɔya na bina ƒui bɛkywi bɛsa.

²⁰Na ukyuli ɔni mabla lɛla lɛmmɔ udu ni, Unwoti uleti ulakyiɛ-nwu kudii. Mmomu Unwoti kɔnyi kɔdubo ukyuli ɔmmɔ bɔlɛlɛ na ɔgbankpi etemila ani bénweni bákya ɔku ɔmɛni kemmo ƒui adubo-nwu lɛlɔ uti utédu ka Unwoti ɔ́yila-nwu udu ƒui kede kede.

²¹Na Unwoti ɔdubudie-nwu na Israel adua ammɔ ƒui kemmo na ɔya na ewida ala ani na bénweni bákya Unwoti Bunyimi Ɔku ɔmɛni kemmo ebo-nwu lɛlɔ.

²²Na dii limeyi lɛdi bina bebi ku bawɔ badubɔta ku bekyuli bani naaadi Israelƒuɔ na bási ɔgyu kakaaka babanu ɔgbankpi ku lɛbibo libendi lɛni na Unwoti úti úboku bina kalɔ lɛlɔ.

²³Bina kɔlɔ ƒui kɔdubɔkywi na kabla aani mma ku kɔnu. Na si bɛkya edula adi biala ni, aaadubo bɔdia. Na livo muedi lɛɛɛdubo-nya lɛlɔ bɔkwɛ. Na bina kɔlɔ kɔdubɔbla aani Sodom ku Gomora ku Adma ku Sebiom lɛma lɛni na Unwoti úti kɔnyi na ɔ́kyula mmɔ.

²⁴Na mmɔ na kayawi ƒui bekyuli badubuye banini, “Bi mɔɔlɛ́ ɔsu na Unwoti úbile kalɔ kammɔ lɛni? Na bi bɛ́bla ɔsu na úti kɔnyi kati kati ɔ́kya-mii lɛni?”

²⁵Na kenye kani na bekyuli bammɔ badubudie ndi ɔnii, “Bekyuli bamɛni báta béni bunyimi bɔni na Unwoti únyimiku-ma uwi ɔni na ɔ́da-ma údie Egyipte kalɔ lɛlɔ. Unwoti ndi bana bati kuuku Katɔti.

²⁶Bésie bakya baakpá ala bamba ani udu bátakpa kudii na Katɔti úbo-ma ɔda ɔnii ɔdi utakpa kudii.

²⁷Anwuɔsu na Unwoti úti kɔnyi ɔ́kya nwuna bekyuli, na ɔ́ya na ɔgbankpi ala ani na únweni ɔ́kya ɔku ɔmɛni kemmo ébo-ma kalɔ lɛlɔ lɛni.

²⁸Na ɔkɛnku livo lɛni néƒi-nwu ku nwuna kɔnyi kati kati kɔni na úti ɔsu na Unwoti ɔ́gya-ma ɔ́lɛku bana kalɔ lɛlɔ na úƒwimi-ma utáva kɔlɔ bamba lɛlɔ. Anwuɔsu mmɔ belie ɔmwi kadi.”

²⁹Ala adi bene akya ani na bula Unwoti Katɔti úti ɔ́bɛla-bu. Nsu ɔda bubo etemila ese ete abu ku bula bebi ka bɔdi-nya lɛlɔ ɔ́si ɔƒɛni úsela uwi ƒui.