Read Lelemi Lɛkpa Ulu 3 Bible Online

Lɛkpa Ulu 3 - Lelemi bible

Lɛkpa Ulu 3

¹Ɔmmɔ kama búnwini na bútásia ulu ɔni ntɛ úsie Basan kalɔ kemmo. Na Ɔga Og ɔni mɔɔdi Basan kalɔ kammɔ lɛlɔ ku nwuna bekpone ƒui báta ka bebekpoku-bu na ɔma ɔni nde Edrei.

²Nsu Unwoti ɔ́su-mi ɔnini, “Tayia ɔga ɔmmɔ. Ɔsika líti Ɔga ɔmmɔ ku nwuna bekpone ƒui ku nwuna kɔlɔ lɛ́kya-a enu kemmo. Anwuɔsu kalɛ na ábla Amoriƒuɔ Ɔga Sihon ɔni nádi lɛga na Hesbon na kekpo kemmo ni, lɛni kani na adubɔbla Ɔga Og.”

³Anwuɔsu Unwoti úti Ɔga Og ku nwuna bekpone ƒui ɔ́kya-bu enu kemmo na bɔ́du-ma ƒui kede kede.

⁴Uwi ɔmmɔ kemmo búukpo bɔ́ƒɔ nwuna kalɔ kani baalɔ banii Argob ƒui ku lɛma libendi lɛni bumomo ndubɔbla liti ku leevu na Basan kalɛkɛ kani lɛlɔ na Ɔga Og ɔɔdi mmɔ. Na ɔma biala uuubo ɔni na bútaƒɔ bútasiku-nwu enu kemmo.

⁵Na lɛma lɛni ƒui kɔtɛ na mɔɔtɛmi-mii mɛni ni, bátu awodu ebendi báka bámana-nya na ana kɔyakun ni, abuala kɔlɛmikɔ sɔɔn na kɔdi na béti bábala-ku. Na akpaklɔ adi lɛnɔ akya na ébomo, nsu anya amu ni, bátatu awodu bátaka bátatamana-nya.

⁶Bɔ́yila-ma udu ƒui na lɛma ku akpaklɔ ammɔ kemmo. Na bɔ́du banana ku beleku ku banamu bammɔ ƒui aani kalɛ na bɔ́bla Ɔga Sihon ɔni mɔɔdi lɛlɔ na Hesbon.

⁷Nsu bana ɔmantɛ bebuo ama ni, bútadu-ma. Mmomu búti-ma ku bana ala ƒui búnwini bula adi.

⁸Anwuɔsu uwi ɔmmɔ kemmo ni, búkpo bɔ́ƒɔ lɛmii lɛni nkya Yordan Ketu ɔƒɛ katukɔ kakɛ bɔ́lɛku Amoriƒuɔ baga inyɔ bammɔ enu kemmo. Úti ɔ́si Arnon Kɔwɛ ɔvi útédu Hermon Kɔbi lɛlɔ.

⁹Hermon Kɔbi kɔmɛni na Sidomƒuɔ bátaalɔ banii Sirion. Na Amoriƒuɔ bátaalɔ-ku banii Senir.

¹⁰Búkpo bɔ́ƒɔ lɛma lɛni ƒui nwi ɔtantɛ ku Gilead kalɛkɛ ku Basan úti útédu Salka ku Edrei. Na lɛma lɛmɛni ni, nka Basanƒuɔ Ɔga Og útaadi-ni lɛlɔ.

¹¹Na Raƒa bekyuli ƒui kemmo ni, Ɔga Og lɛti pɛ nébu. Na binu! Nwuna lɛla lɛni lɛlɔ na ɔɔtɛ ni, nwuna bune butulo lɛgba leevu-ɛtɛ. Na nwuna bɔbɛbɛ bɔbla aani lɛgba ɛku. Na abuala lɛti lɛti na béti bábla lɛla lɛmmɔ. Na kamu kese Arnonƒuɔ ɔma ubendi ɔni baalɔ banii Raba ɔmwi kadi.

¹²Uwi ɔni kemmo búkpo bɔƒɔ kɔlɔ kɔni mɔɔsu mɛni ni, líti kalɔ kani nkya Aroer katɔ kakɛ kani nde Arnon Kɔwɛ ku Gilead abi lɛlɔ kalɔ ntɛ bule lɛma lɛni nkya-ni kemmo líte Ruben kɔdua bekyuli ku Gad kɔdua bekyuli.

¹³Na Gilead abi lɛlɔ kalɔ kakladi kani nébu ku Basan kalɔ kani lɛlɔ na Ɔga Og útaadi ni, líti líte Manase kɔdua bekyuli kakɛ kenwi. Na Argob kalɛkɛ na Basan kalɔ kemmo ni, mmɔ na Raƒaƒuɔ beli.

¹⁴Na Yair ɔni nási Manase kɔdua ni, anwu náƒɔ Argo kalɛkɛ ƒui na Basan kalɔ kemmo úti útédu Gesur ku Maakatƒuɔ ɔmii. Na úti nwuna lɛnyi ɔ́sia lɛma lɛmmɔ, anwuɔsu na baalɔ mmɔ ɔmwi ɔmwi banii Yair lɛma.

¹⁵Na líti Gilead abi lɛlɔ kalɔ líte Makir.

¹⁶Na Ruben kɔdua bekyuli ku Gad kɔdua bekyuli ni, líti kalɔ kani nwi ɔ́si Gilead úti ɔɔyu útédu Arnon Kɔwɛ úti útédu Yabok Ketu ɔni ndi Arnon bebi ɔmii líte-ma.

¹⁷Na nwuna ɔƒɛ kanukɔ kakɛ na Yordan Ketu kakya ɔ́si Galilea Ɛpu na katɔ kakɛ ɔ́yu úbedu Mma Ɛpu na ɔkɛ ɔdanku Pisga Kɔbi.

¹⁸Uwi ɔmmɔ kemmo ni, líbo-ma ɔda nnini, “Bula Unwoti Katɔti néti kalɔ kani nkya Yordan Ketu ɔƒɛ katukɔ kakɛ úte-mii ka biti bɛbla bina kadikɔ. Nsu ɔƒɛni mɔɔsu bina bekpone ƒui ka bavia Yordan Ketu na bagyu batɔ-bu na betékpo baƒɔ kɔlɔ kɔni nkya mmɔ bete Israel adua akladi na beti babla bana kadikɔ.

¹⁹Nsu bɛda bina beleku ku bebi ku bebuo pii bani na bibo mmɔ bɛkya kama.

²⁰Binye ku bina banwani na bikpo bɛƒɔ kɔlɔ kɔni na Katɔti ɔ́su ka wete ama lɛnɔ na Yordan Ketu ɔvi ɔmmɔ útédu ka ama lɛnɔ bákɛ bana kadikɔ aani kalɛ na amii lɛnɔ bɛ́kɛ kɔdikɔ kɔni na líti líte-mii asa na bɛsɔ binwini bibo bina keliekɔ.”

²¹Ɔmmɔ kama líbo Yosua ɔda nnini, “Awɔ ɔlati, ánu ku ƒula anumi lɛla lɛni na Katɔti ɔ́bla Ɔga Sihon ku Ɔga Og. Lɛni kani na Katɔti ɔdubɔbla ɔga biala ɔni na wata wenye-mii lɛlɔ.

²²Anwuɔsu tayia-ma, ɔsika ƒula Unwoti Katɔti ɔdubukpo ƒula kekpo biala ute-ɔ.”

²³Uwi ɔmmɔ kemmo ni, lɛ́kpali katɔ na lívele Unwoti kpakplaa nnii,

²⁴“O Ɔyikune Ƒui Katɔti, awɔ nése kalɔ eedie ƒula ɔyikun bonwu taatina ami ƒula kabla ɔblane ku ƒula akɔla budie taatina. Na ɔyikun ɔdi uuubo na katɔ iye kalɔ na ɔkana akɔla ebendi ani na aabla mɛni bɔbla.

²⁵Anwuɔsu muuvele-ɔ nnii ya na lɛvia lisie kalɔ kabunidi kani nwi Yordan Ketu ɔvi ngye na ntánu abi lɛlɔ kɔlɔ kɔbunidi kɔni nkya mmɔ ku Lebanon abi kalɔ kabuni kammɔ.”

²⁶Nsu ɔ́si amii ɔsu ni, Katɔti úti kɔnyi ɔ́kya-mi na útakpete-mi. Mmomu úbo-mi ɔda ɔnini, “Da bɔtɛmi ya! Takpali-mi na ɔmmɔ lɛlɔ lɛnɔ!

²⁷Kɔ sie na eténye Pisga Kɔbi lili na asia kalɔ kammɔ anu amana kaduɛ. Ɔsika aaadubo Yordan Ketu kamɛni bɔvia.

²⁸Mmomu lɔ Yosua na ebo-nwu ɔda na bekyuli bammɔ anumi na akya-nwu ogya, ɔsika kalɔ kani na ánu mmɔ ni, anwu ndubɔkpanku bekyuli bammɔ ɔvia Yordan Ketu na betéti mmɔ babla bana kadikɔ.”

²⁹Anwuɔsu bɔ́sɔ búlie kɔwɛ kɔni nde Bet-Peor ɔma kakɛ.