Read Lelemi Lɛkpa Ulu 30 Bible Online

Lɛkpa Ulu 30 - Lelemi bible

Lɛkpa Ulu 30

¹Bɛya na buti-nwu bɔnii ala akpa anyɔ amɛni ƒui ébo-mii lɛlɔ, kusɛ kusɛ ku ewida. Na ɔ́si bina atuɔkplu ɔsu ni, bɛkya kesii kani na bina Unwoti Katɔti úgyingya-mii ɔ́kya na kadi bamba bekyuli akɔ. Mmɔ na bɛdubunyimo alakpa anyɔ ani na lɛ́da lɛ́va-mii anumi ka bidie.

²Si amii ku bina bawɔ bɛdubunwini kayi bibo Unwoti kudɔ na bɛdi ɔda bubo bɔni líti muute-mii ɔmwi limeyi lɛmɛni lɛlɔ ku bina kayi ƒui ni,

³bina Unwoti Katɔti ɔdubɔnu-mii kɔnyana. Na ɔdubɔsɔku-mii ɔsiku kesii kani na úgyingya-mii ɔ́kya na kayawi ekpo ekpo ubasala. Na ɔsɔ ɔdubɔya na binwini ala badine lɛnɔ.

⁴Ina si bígyingya bɛ́kya kayawi ɔ́gyu kakaaka lɛkɔkɔ muedi ni, bina Unwoti Katɔti ɔsɔ ɔdubɔsala-mii na ɔsɔku-mii uboku kesii kani na úti úte-mii.

⁵Na kɔnu kɔdubɔsɔ kutuku-mii kalɔ kani na bina bati kuuku bélie bávi. Na ɔdubɔya na ɔsɔ ɔtɛ ute-mii na bɛsɔ bimomo bibu bitulo kalɛ na bina bati kuuku bábla.

⁶Bina Unwoti Katɔti ɔdubɔya na binu lɛlɔ kalɔ na bina kayi kemmo amii ku bina bawɔ kalɛ na biteenu-nwu litemi na bitaayɔ-nwu ku bina kayi ƒui. Na ɔmɛni ndubɔya na bilie kalɔ kammɔ lɛlɔ bítu uwi.

⁷Na ewida ani na ɔ́su ka adubo-mii lɛlɔ ni, adubunwini busie bina bekisine bani mɔɔwia-mii babla kalala kudɔ.

⁸Na bɛsɔ bitaadi nwuna litemi ku ɔda ɔni na úbo-mii ɔmwi mɛni ƒui lɛlɔ.

⁹Na Unwoti ɔdubɔya na ɔdia ute-mii na lɛla biala bɛɛbla kemmo. Na ɔdubɔya na bɛkɛ bebi ku bebuo pii. Na Unwoti ɔsɔ ɔdubɔyɔ-mii litemi na ɔdia ute-mii aani kalɛ na ɔ́yɔ bina bati kuuku litemi na ɔdia úte-ma.

¹⁰Nsu ɔlɛka binu nwuna litemi na bɛdi ala ani ƒui na únweni ɔkya nwuna ɔda bubo ɔku ɔmɛni kemmo lɛlɔ. Na ɔlɛka binwini bisie-nwu kudɔ ku bina kayi ƒui.

¹¹Na ɔda bubo bɔni líti muute-mii ɔmwi mɛni ni, buuubo ɔkplu buuute-mii na bɛsu bɛnii bilakana-mu lɛlɔ bɔdi.

¹²Na bɔɔɔkya katɔ katɔ na bɛsu bɛnii, “Ɔma ndubusie katɔ katɔ mmɔ utéti-mu uboku-bu kalɛ na bunu ɔda bubo bɔmmɔ na bɔdi-mu lɛlɔ?”

¹³Iye bɛsu bɛnii, “Ɔda bubo bɔmmɔ bɔkya ɛpu kama kama ngye. Na ɔma ndubusie ɛpu kama kama mmɔ na utéti-mu uboku-bu kalɛ na bunu-mu na bɔdi-mu lɛlɔ?”

¹⁴Oowo! Uuuse lɛni. Mmomu ɔda bubo bɔmmɔ bude-mii. Na bɛgyi-mu ku kesii kani na ɔkya. Anwuɔsu bɛkana bɛdi-mu lɛlɔ.

¹⁵Na ɔmwi limeyi lɛmɛni lɛlɔ ni, lɛ́da ala adi mɔɔvá-mii anumi na bɛƒuna lɛni na bɛɛyɔ́. Na anya ndi ngba ku lɛkɛ, kukpi ku udu bɔyii. Bi na bɛɛwia, ngba munuu kukpi?

¹⁶Na muubó-mii ɔda kpakplaa ɔmwi limeyi lɛmɛni ka ni, bɛyɔ bina Unwoti Katɔti na bɛsia nwuna ulu lɛlɔ na bɛdi ɔda bubo bɔni ƒui úte-mii lɛlɔ. Na si bɛɛbla lɛni ni, bɛdubulie ngba gyɔlɔɔ na bimomo na bina Unwoti Katɔti ɔdubute-mii kusɛ kusɛ na kalɔ kani lɛlɔ bísela bitélie mmɔ lɛlɔ.

¹⁷Nsu si bíni Katɔti litemi na bísie bɛkya bɛɛkpá baƒiɔ badi ni,

¹⁸mɔɔsu-mii ɔmwi nnii Unwoti ɔdubɔyila-mii udu kede kede. Na bilelie ngba gyɔlɔɔ si bɛ́via bísie Yordan Ketu ɔvi na bítéle kalɔ kani Unwoti úti uute-mii mɛni.

¹⁹Na ɔmwi limeyi lɛmɛni líti ala amɛni líte-mii nnii bidie. Na anya ndi kukpi ku ngba! Ewida ku kusɛ kusɛ! Na mɔɔsu katɔ ku kalɔ ka benye ala ani mɔɔsu-mii mɛni kama. Nsu mɔɔsu-mii nnii bidie ngba kalɛ amii ku bina bebi beele ngba gyɔlɔɔ.

²⁰Anwuɔsu bɛyɔ bina Unwoti Katɔti na binu-nwu litemi, na biti bina anu bɛsia-nwu lɛlɔ kaduɛ. Ɔmɛni ndubɔya na amii ku bina bawɔ belie ngba gyɔlɔɔ na kalɔ kani na Unwoti ɔ́su úse ka wete bina bati kuuku bani ndi Abraham ku Isak ku Yakob.