Read Lelemi Lɛkpa Ulu 31 Bible Online

Lɛkpa Ulu 31 - Lelemi bible

Lɛkpa Ulu 31

¹Amu na Mose ɔ́ta na ɔ́su Israelƒuɔ ɔnini,

²“Ɔƒɛni mina akwa éedu eti anyɔ ku aavlanyɔ-inyɔ na nsɔ naaakana-mii bɔtɔnku lɛnɔ. Na Unwoti ɔ́su-mii lɛnɔ ka lɛɛɛdubo Yordan Ketu kamɛni bɔvia.

³Na bina Unwoti ɔlati ɔdubɔtɔnku-mii na bɛvia bisie Yordan Ketu ɔvi. Na bina Unwoti Katɔti ɔdubɔgyu bɔtɔ na ɔyila lɛma lɛni nkya-mii anumi udu, na biti bana kɔlɔ kɔmmɔ. Na Yosua ndubɔtɔnku-mii aani kalɛ na Unwoti ɔ́su úse.

⁴Na kalɛ kani na Unwoti ɔ́bla Amoriƒuɔ baga bani baalɔ banii Sihon ku Og ni, lɛni kani na ɔdubɔyila lɛma lɛmmɔ udu.

⁵Na Unwoti ɔdubɔya na bɛdi lɛma lɛmmɔ lɛlɔ. Anwuɔsu bɛbla-ma kalala kalɛ kani na lɛ́su-mii.

⁶Bɛya na anumi egyie-mii na binye kpakplaa. Bitayia-ma. Na bina Unwoti Katɔti ɔlati ɔdubɔkya-mii akɔ. Na ulénwini kama ulakya-mii iye ɔda-mii ɔnyonu.”

⁷Amu na Mose ɔ́lɔ Yosua úbenyene Israelƒuɔ bammɔ ƒui anumi, na ɔ́su-nwu ɔnini, “Nye kpakplaa na taya na enu áƒɛ-ɔ, ɔsika awɔ ndi ukyuli ɔni ndubo bekyuli bamɛni bɔtɔnku na bitéduo kalɔ kani kemmo na Unwoti ɔ́su úse ka weti wete bina bati kuuku.

⁸Na Unwoti ɔlati ɔdubɔtɔnku-ɔ. Na ulálɛ-ɔ kama iye ɔnyonu-ɔ. Anwuɔsu taya na enu áƒɛ-ɔ iye liƒu lɛda-a.”

⁹Anwuɔsu Mose únweni ɔda bubo etemila ammɔ úse na úti-nya úte Israelƒuɔ benengu ku Lewiƒuɔ bakpane bani nti Katɔti Bunyimi Adaka.

¹⁰Na úbo-ma ɔda ɔnini, “Na lɛkwa maatɛdi biala kawɔlɔkɔ kani ndi ukyulikpana kayu butitaakyiɛ lɛkwa na Kevo Kemmo Bulie Emeyi bɔdi kemmo ni,

¹¹bɛka ɔku ɔmɛni kemmo etemila momoomo bite Israelƒuɔ kasala na kesii kani na bina Unwoti ɔ́su úse ka bitaakpa-nwu mmɔ.

¹²Na asa na bɛdubɔka ɔku ɔmmɔ ni, bɛlɔ bananabi ku bakloƒu ku beleku ku banamu ku bekyuli bani naaadi Israelƒuɔ na bakya bina lɛma ƒui na bebo bebenu etemila ammɔ. Na bɛya na ɔdi biala ɔtɛya kalɛ na weti ɔbu wete Unwoti Katɔti, na ɔdi nwuna ala ani na ɔ́tina mmɔ ulu lɛlɔ.

¹³Na ulu ɔmɛni lɛlɔ na bina bawɔ bani nétenu tɔ bina Unwoti Katɔti ɔda bubo etemila amɛni udu kudii benu-nya. Na ɔmɛni ndubɔya na batɛya kalɛ na ɔlɛka beti ɔbu bete-nwu uwi ɔni na bɛ́via Yordan Ketu na bísie bilie kalɔ kani na ɔ́su-mii ɔni bitélie mmɔ lɛlɔ.”

¹⁴Amu na Unwoti ɔ́su Mose ɔnini, “Ƒula kukpi uwi úudu. Anwuɔsu lɔ Yosua na bibenye kɔdi ɔtɔ ɔmɛni anumi na lɛtina-nwu lɛla lɛni na ɔlɛka ɔbla.” Anwuɔsu Mose ku Yosua bálɛ bébenye kɔdi ɔtɔ ɔmmɔ anumi.

¹⁵Na Unwoti ɔ́buɛ ɔ́lɛ-ma akɔ aani liƒlukutu kalɛ, na liƒlukutu lɛmmɔ líbenye kɔdi ɔtɔ ɔmmɔ anumi.

¹⁶Amu na Unwoti ɔ́su Mose ɔnini, “Adubo bukpi. Na ƒula kekpima ni, bekyuli bamɛni badubo-mi kama bɔlɛ na bata benye ɔda ɔni na líbo-ma lɛlɔ. Badubo-mi bɔda buse na besie batátaakpa kadi bamba baƒiɔ na kalɔ kani lɛlɔ bésela betélie mmɔ lɛlɔ.

¹⁷Na si ɔ́lɛ lɛni ni, ndubo kɔnyi buti bɔkya-ma geen. Na ndubo-ma bɔda bɔnyonu na bayila-ma udu. Na ndubɔya ɔgbankpi lidu lidu libo-ma lɛlɔ. Na si ala amɛni udu eebo-ma lɛlɔ ni, mmɔ na badubɔnu bɔti ka Ami ɔni ndi bana Katɔti nsɔ liiibo-ma akɔ lɛnɔ.

¹⁸Na ndubuni ka libunku-ma, ɔsika bénwini bésie bakya baakpá baƒiɔ ɔ́si bana likyulikpi ɔsu.

¹⁹“Anwuɔsu, nweni ɔnu ɔmɛni se te-ma. Na aya na Israelƒuɔ batɛya ɔnu ɔmmɔ kalɛ na ɔnu ɔmmɔ wabla likposela wete-ma.

²⁰Na ndubuti-ma busienku kalɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii mmɔ lɛlɔ aani kalɛ na líse kenye líte bana bati kuuku. Na adila biala na baawia ni, ndubo-ma bute, na badi bemo ku ebiti. Nsu ɔmɛni kama ƒui badubo kama bunwini bɔkya-mi na batákpa kadi bamba baƒiɔ. Na badubo-mi buni na bata benye mina ɔda bubo lɛlɔ.

²¹Na ndubɔya na ɔgbankpi lidu lidu libo-ma lɛlɔ na batu ɔnu ɔmɛni beti benyimene lɛlɔ kalɛ na báƒiɔ-mi. Ɔsika bana bawɔ muedi ƒui kani na bakya beeti balayiƒala-nwu. Ɔƒɛni ngyi-ma kasusu ƒui asa na ndubɔsu ka líiti-ma líselaku kalɔ kani na lɛ́su líse ka ndubute-ma lɛlɔ.”

²²Na limeyi lɛmmɔ kani lɛlɔ ni, Mose únweni ɔnu ɔmmɔ úse na úti ɔ́tina Israelƒuɔ ƒui.

²³Amu na Unwoti ɔ́su Yosua ɔni ndi Nun ubidi ɔnini, “Nye kpakplaa na akya ɔkplu. Ɔsika awɔ ndubo Israelƒuɔ bamɛni bɔkpanku busienku kalɔ kani lɛ́su líse ka meti mete-ma lɛlɔ. Na ndubulieku-ɔ.”

²⁴Na Mose úwi lɛlɔ na únweni Katɔti ɔda bubo bɔmmɔ ɔkya ɔku kemmo na ɔ́nu kaduɛ ka útada lɛla lɛdi útakya.

²⁵Ka únweni ɔ́wɔlɔ ni, ɔ́su Lewiƒuɔ bakpane bani mɔɔnu Unwoti Bunyimi Adaka lɛlɔ ɔnini,

²⁶“Biti Katɔti ɔda bubo ɔku ɔmɛni bɛkya bina Unwoti Bunyimi Adaka ɔmmɔ kakɛ kenwi kalɛ na wenwini likposela wete nwuna bekyuli.

²⁷Ɔsika ngyi kalɛ na baatá teenye ala lɛlɔ na bebo atuɔkplu. Na baata teenye Unwoti lɛlɔ uwi ɔni na ami Mose nlie ngba na nkya-ma kudɔ. Na ngyi ka badubo bɔbla butulo lɛni na mina kekpima.”

²⁸Amu na Mose ɔ́su ɔnii balɔ adua benengu ku bana bebunkune bammɔ ƒui beboku na ɔtɛmi ute-ma. Na ɔ́su-ma ɔnini, “Lɛla lɛni mɔɔsu-mii ni, katɔ ku kalɔ ndubudie bina bɔƒiɔ ɔtina-mii.

²⁹Ngyi ka mina kekpima ni, bekyuli bamɛni badubo bekyuli bekpidi bunwini na badubo ala ani na lɛ́tina-ma mɛni buni. Na uwi ɔdi ɔdubo ɔni na badubo ɔgbankpi bɔsiaku, na uwi ɔdi ɔdubo ɔni na badubo Unwoti kɔnyi bɔkya na bataabla ala ani na úbo-ma ɔda ɔnii batabla.”

³⁰Amu na Mose ɔ́tu ɔnu ɔmɛni na ɔ́tina Israelƒuɔ ƒui na bénu.