Read Lelemi Lɛkpa Ulu 32 Bible Online

Lɛkpa Ulu 32 - Lelemi bible

Lɛkpa Ulu 32

¹Katɔ ku kalɔ, binu mina etemila na bise atu kaduɛ, na binu lɛla lɛni ndubo bɔsu.

²Mina ala bɔtina adubɔyu aani kalɛ na ɔnantu ɔɔna na ubewi kalɔ aani amii. Mina etemila adubɔyu aani kalɛ na ɔnantu uuwi blii blii teewi edula ani na átalɛ tɔ lili lɛlɔ. Na adubɔyu ewi livo lɛni na ɔƒɛni na lɛɛkwɛ́ lɛlɔ blii blii.

³Ndubumwi Unwoti lɛnyi, na nwuna bekyuli badubɔsu nwuna ala ebendi ani na ɔɔbla.

⁴Na Unwoti ndi bina lɛtakpɛ lɛni na bíkpo kama, na nwuna ablala ƒui ese siin, na bɔƒiɔ bɔdi buuubo-nwu kemmo. Bina Unwoti ablala ƒui adi sɔsɔ, na ɔɔbla ala ani nse siin na akɛ ulu lɛlɔ.

⁵Nsu bana ablala aaadi sɔsɔ, na bátamanku ka babla nwuna bekyuli. Ɔma ɔmmɔ bekyuli béyi ku likpidi ku katɔlɔ.

⁶Ulu ɔni lɛlɔ na bɛdubɔsia bise bina Unwoti kɔdɛ na ɔdi mmɔ? Amii bekyuli badɔlɔdi biiibo kasusu kadi. Unwoti ndi bina Ɔti ku bina Udiene. Na anwu nábla-mii na ɔ́vɔ-mii.

⁷Binyimo ala ani nébo abavi ku kuuku ala, na biye bina bati na basu-mii ala ani nálɛ dii. Na biye bina benengu bani náabi, na basu-mii ala ani nálɛ dii.

⁸Uwi ɔni na Unwoti ɔni ntulo ƒui úti kalɔ úte kadi biala bekyuli na uwi ɔni na úle-ma ntɛ ni, ɔ́sia kalɔ kammɔ lɛmii úte bekyuli bammɔ na nwuna badi bumomo kenye na ama alati baƒuna bana unwoti ɔni na beti lɛlɔ bete na utaanu-ma lɛlɔ.

⁹Ɔsika Unwoti ɔlati néti Israelƒuɔ bani ndi Yakob bebi ɔ́bla nwuna badi.

¹⁰Na bese-nwu aani bekyuli bakɛdi na kalɔ kakwiidi kani kemmo na ɔƒɛƒɛɛ ɔni mɔɔkula ala uukpó uwi ƒui ku kudu. Na Katɔti nébenwini bana kabɛkɔ. Na ɔkya ɔɔgyumana-ma aani nwuna lɛnumi kebi.

¹¹Na Unwoti ɔ́bla-ma aani kɔdigbo aasɛ ɔni mɔɔtina ubidi buveyi. Na si ɔ́yu kalɔ na úƒie-nwu ɔ́sia nwuna avwi kama. Na Unwoti ɔ́gyumana Israel kalɛ na ulebuli.

¹²Na Unwoti lɛti pɛ ɔ́tɔnku nwuna bekyuli ɔni na útawia kebunku kadi útasiku kadi kadi baƒiɔ kudɔ.

¹³Na úbunku-ma na békpo baƒɔ kɔlɔ. Na bana edula ani báva na bana mmo ádia na bádi. Na bana nnɔ egyii adia na atakpɛ lɛlɔ. Na uwɔ úlie na atakpɛ akɔ.

¹⁴Ɔ́ya na bana ɔmantɛ bakɔ ku bese bákɛ anyi ntu pii. Na bebo baƒonu ku bese ku ɔmantɛ bakɔ bani ndia ntulo. Na bákɛ edula abuni, na bákɛ ntɛ bɔni mɔɔda ɔkwɛ geen.

¹⁵Unwoti bekyuli bákɛ lɛlɔ, nsu balábu-nwu. Bélie lɛmwi, na bádi bémo. Nsu bénwini kama bákya bana Katɔti ɔni ndi bana Udiene. Na béni bana Ɔƒɔne Ɔyikune ƒui.

¹⁶Bana baƒiɔ bani kama básiaku ni, ɔ́ya na úkpo kogyulo. Na likpidi lɛni bábla ɔ́ya na úti kɔnyi.

¹⁷Bádu bebuo bákpa béte baƒiɔ bani naaadi ku lɛla, baƒiɔ bani bana bati kuuku baaagyi kudii, baƒiɔ bani na Israel úni ka balakpa kudii.

¹⁸Na báyiƒala bana Katɔti ɔni ndi bana Ɔƒɔne Ɔyikune ƒui ɔni náya na belie ngba.

¹⁹Ka Unwoti ɔ́nu ɔmɛni ni, úti kɔnyi. Na úni nwuna bebi belekubi ku bananabi.

²⁰Na ɔ́su ɔnii ɔsɔ ulebunku-ma lɛnɔ. Na ɔdubunye bɔnu lɛla lɛni malɛku-ma. “Bekyuli bamɛni báyii ulu na bana ablala eeese siin.

²¹Baƒiɔ bani na bábla ɔ́ya na líti kɔnyi lɛ́kya-ma. Na muukpó kogyulo ku bana baƒiɔ bani naaadi ku lɛla mmɔ sɔsɔ. Anwuɔsu ndubuti kadi bekyuli bani naaadi lɛla lɛdi lɛkya-ma kɔnyi. Na ndubɔya na bana bekisine babla bekyuli geen.

²²“Mina kɔnyi kɔdubo bɔta bɔda aani ogya kalɛ na lɛkyula lɛla biala na kayawi. Na ɔvi utákyula lɛla biala na lɛkya kalɔ kalɔ. Na ɔkyula abi ƒui.

²³Ndubɔya na ɔgbankpi ɔni kenye naaadubo bɔyɔ kudii ubo-ma lɛlɔ aani kalɛ na baata kataminta.

²⁴Na kɔka ku lɛlɔ bɔbi ɔdubo-ma bɔdu. Na lɛlɛ lidu lidu lɛdubo-ma bɔdu. Na ndubɔya na beƒiebuo bebekpoku-ma na balakpi bani mbo ugyulo ukpidi ɔdu-ma.

²⁵Na kekpo kalɛ na bekyuli bekpi beyile lɛblɔnu, na liƒula libeyi kɔduli kemmo. Na bakloƒu ku begblebi badubo bukpi. Na banamu ku benengu lɛnɔ balanu-ma kɔnyana.

²⁶“Lɛ́yɔ ka lɛyila-ma udu kede kede kalɛ na ukyuli biala ulenyimo-ma.

²⁷Nsu naaawia ka bana bekisine bataakun lɛmɛnɛ taasu banii, ‘Bɔ́di-ma lɛlɔ ɔni na kebunku kadi kátasi Unwoti kudɔ.’ ”

²⁸Israelƒuɔ ƒui badi bekyuli bani neeebo kasusu. Na bátada anu kula kula.

²⁹Ɔsika bátawia-nwu kemmo na banu lɛla lɛni ɔsu na bádi-ma lɛlɔ. Na belenu kalɔ lɛla lɛni ɔsu na ɔ́lɛ lɛni.

³⁰Bi mɔɔlɛ́ ɔsu na ukpone ukisine unwi pɛ ɔ́bi ɔ́siaku Israelƒuɔ bekpone apim? Na bekisine bekpone inyɔ bábi básiaku Israelƒuɔ bekpone mpim leevu?

³¹Bula bekisine alati bagyi ka bana baƒiɔ bese kpɛtɛ kpɛtɛ, na beeebo ɔyikun aani Israel Katɔti.

³²Na bana adingyii ese aani Sodom ku Gomora adingyii. Na adingyii ebi ammɔ ebo ɔdu kati kati, na ugyulo ukpidi ɔkya-nwu kemmo.

³³Bana ntɛ buse aani ugyulo ukpidi ɔni mɔɔlɛ́ balakpi kunye.

³⁴Unwoti uunyimo lɛla lɛni na bula bekisine bábla. Na unye ɔɔnu anumi uwi ɔbuni ɔni na weti wani-ma kɔtu.

³⁵Na uwi uletu badubɔnu lɛla lɛni na ɔlɛka banu. Na uwi ɔdubo ɔni na bana ƒui badubo bubuli. Na bana kɔtu bɔni uwi úude.

³⁶Unwoti ɔdubo nwuna bekyuli bukpo bɔƒɔ uwi ɔni na ɔ́nu ka bana ɔlɔkplu ɔ́yuɛ. Na ɔdubo bani muumwi-nwu kɔnyana bɔnu si ɔ́nu kalɛ na bábla kpɛtɛ kpɛtɛ.

³⁷Amu na Unwoti ɔdubuye nwuna bekyuli ɔnini, “Wɛ na baƒiɔ bani na bɛɛsu ka bebo ɔyikun ɔsu na bɛ́ƒɔ-ma bɛdi mmɔ bakya?

³⁸Na biti bebuo bani nélie lɛmwi bɛkpa bite-ma. Na bite-ma ntɛ na bani. Bɛsu-ma na bebo bebebunku-mii ɔƒaani. Bɛya na bekeli babaƒɔ-mii.

³⁹“Bɛnu! Ami lɛti ndi Katɔti, na ɔdi ɔsɔ uuubo. Ami mbo ngba ku kukpi lɛlɔ ɔyikun. Na muudie lɛlɛ teeboku na mɔɔbwi-ni lɛnɔ. Na lɛla biala liiibo na linye litile lɛla lɛni mɔɔbla kenye.

⁴⁰“Ami ndi Ngba Ƒui Katɔti na lɛ́talaku mina kɔnu katɔ na muusé kenye nnii

⁴¹ndubo mina kewii kani mɔɔda ku ogya bɔdɔ, na liti lɛƒɔ mina bekisine kayu na lɛni bani muukisi-mi kɔtu uti utédu ka lɛbla lɛla biala na ulu lɛlɔ.

⁴²Na ubugya ɔdubɔƒɔ mina kɔtaminta lɛlɔ ƒui. Na mina kewii kɔdubɔdu ukyuli ɔni mɔɔta teenye-mi lɛlɔ. Na ukyuli biala mebekpoku-mii ni, neeeti naaakyiɛ-nwu. Ina bani nápila ku bani béƒie muedi ni, badubo bukpi.”

⁴³Kadi ƒui bekyuli, ɔlɛka bimwi Unwoti. Ɔsika ɔɔní bekyuli bani ƒui mɔɔdú nwuna bekyuli kɔtu. Na ɔɔƒɔ nwuna bekisine kayu teete nwuna bekyuli. Na uuti nwuna bekyuli ekpidi taakyiɛ-ma.

⁴⁴Amu na Mose ku Yosua ɔni ndi Nun ubidi bátu ɔnu ɔmɛni, na Israelƒuɔ bénu.

⁴⁵Ka Mose ɔ́tina bekyuli bammɔ Katɔti etemila ammɔ ɔ́wɔlɔ ni,

⁴⁶ɔ́su ɔnini, “Bɛnu ka bɛ́di ɔda bubo bɔni líti muute-mii ɔmwi mɛni lɛlɔ ƒui. Na bitaasia kama teeti-nya taatina bina bebi kalɛ na badi Katɔti ɔda bubo bɔmmɔ ƒui lɛlɔ.

⁴⁷Na ala bɔtina bɔmɛni bɔɔɔdi etemila keeke. Mmomu bɔdanku bina ngba. Anwuɔsu bɛdi ɔda bubo bɔmmɔ lɛlɔ ɔni na bɛdubo Yordan Ketu bɔvia busie butéle kalɔ kani na béti beete-mii mmɔ lɛlɔ.”

⁴⁸Limeyi lɛmmɔ kani Unwoti ɔ́su Mose ɔnini,

⁴⁹“Teesie Abarim abi ani nkya Moab na Yeriko ɔƒɛnyi kakɛ. Na akɔ Nebo Kɔbi na atánu Kanaan kalɔ kani na líti muute Israelƒuɔ.

⁵⁰Na adubukpi kɔbi kɔmmɔ lɛlɔ aani kalɛ kani na ƒula ɔnwani Aaron úkpi ɔ́tɛ Hor Kɔbi lɛlɔ.

⁵¹Ɔsika awɔ ku Aaron ƒui bítadi mina etemila lɛlɔ na Israelƒuɔ anumi ɔsu. Uwi ɔni binye Meriba Ketudɔ kesii kani nde ɔma ɔni baalɔ banii Kades na Sin kalɔ kakwiidi kemmo ni, bíni litemi lɛni lɛ́su-mii na Israelƒuɔ anumi.

⁵²Anwuɔsu adubuti ƒula anumi anu kalɔ kani líti muute Israelƒuɔ, nsu ƒula ɔgba ɔɔɔdubo mmɔ bɔnya.”