Read Lelemi Lɛkpa Ulu 33 Bible Online

Lɛkpa Ulu 33 - Lelemi bible

Lɛkpa Ulu 33

¹Ɔmɛni ndi kusɛ kusɛ ɔni na Katɔti Kenye Udiene Mose úte Israelƒuɔ asa na úkpi. Ɔ́su ɔnini,

²“Unwoti ɔ́si Sinai kɔbi lɛlɔ. Na nwuna bukeye bɔ́lɛ aani kalɛ na ɔƒɛ ɔ́tu ɔ́si Seir na úkeye ɔ́si Paran Kɔbi uwi nwuna bekyuli. Na ka ɔdubo ni, katɔ batu mpim leevu básiaku-nwu. Na nwuna kɔdianu kɔɔda ani ogya.

³Unwoti ɔɔyɔ́ nwuna bekyuli na ɔɔgyumana bani ndi nwuna badi. Anwuɔsu bɔɔlɛ-nwu akɔnkɔ kalɔ na bɔɔdi nwuna ɔda bubo lɛlɔ.

⁴Na bɔɔdi ɔda bubo bɔni Mose úte-bu mmɔ lɛlɔ. Na ɔda bubo bɔmɛni bɔdi abu Israelƒuɔ lɛkɛ linengudi.

⁵Na Unwoti úbenwini ɔga úte nwuna bekyuli uwi ɔni na Israelƒuɔ kaba ƒui ku bana benengu básala lisu.”

⁶Amu na Mose úte Ruben kaba kusɛ kusɛ ɔnini, “Ina ka Ruben bekyuli beeemomo ni, belekpi kudii.”

⁷Na ɔ́su Yuda kɔdua bekyuli ɔnini, “Unwoti ɔdubunu-mii bɔkpali si bíwulo bɛ́kpali-nwu ka bɛɛwia kebunku. Na uti-mii ɔsala ku kaba bakladi lɛnɔ. Na Unwoti ukpo bina kekpo ute-mii. Na Unwoti ubunku-mii na bɛdi bina bekisine lɛlɔ.”

⁸Na ɔ́su Lewi kaba ɔnini, “Na Masa ku Meriba Ketudɔ ni, Unwoti ɔ́kɔku-mii ɔ́nu. Nsu ɔ́nu ka bɛɛbla bina ala ulu lɛlɔ. Anwuɔsu akpala kabla kammɔ kadi bina ɔdi.

⁹Ɔsika bídie bina Unwoti kama bɔsiaku bɔyɔ bɛtina geen. Na bɔyɔ bɔmmɔ bubo ɔkplu butulo bɔni bibo bite bina bawɔne ku banwani ku bebi muedi.

¹⁰Na amii bɛtina Israelƒuɔ Katɔti ɔda bubo bɔmmɔ. Na kesii kani na Unwoti ɔ́su-mii ka bitaakpa-nwu na bitaabla nwuna akpala ku oloƒui bɔkyula ɔdi mmɔ.

¹¹Unwoti ute-mii kusɛ kusɛ na lɛla biala bɛɛbla kemmo. Na ɔya na bɛyu ɔkplu na bɛkana-ma lɛlɔ bɔdi.”

¹²Na Benyamin kaba ɔ́su-ma ɔnini, “Unwoti Katɔti udie nwuna bɔyɔ ɔtina-mii. Na ulie bina abi lɛlɔ na ɔgyumana-mii.”

¹³Na Yoseƒ kaba ama ni, ɔ́su-ma ɔnini, “Unwoti kusɛ kusɛ ɔsiaku-mii. Na ute-mii ntu bɔbuni ɔsiku katɔ ku kalɔ kemmo.

¹⁴Na kɔbuli biala kemmo ni, bina adingyii ataanwu teete-mii ɔkɛnku ɔƒɛ ku kɔbuli bukeye bɔni na adingyii ammɔ aakɛ́ ɔsu.

¹⁵Na bina adingyii ani nkya bina kuuku abinkpo lɛlɔ ese anumi ataanwu ebi buni ani bɛɛyɔ́ teete-mii.

¹⁶Unwoti ɔni butemi na bínu na kalɔ kakwiidi kani mɔɔkywí kemmo ɔya na kusɛ kusɛ ɔsiaku-mii, na bina kɔlɔ kulie lɛmwi kaduɛ. Ɔya na kusɛ kusɛ ɔni muute-mii mɛni ubo-nwu kemmo ute Yoseƒ Kaba. Ɔsika Yoseƒ ɔmɛni ndi nwuna banwani ƒui ɔtɔnkune.

¹⁷Na Yoseƒ ubo ɔyikun aani lɛku kemmo akɔ. Na nwuna kekpo kabua kani na ubi kese aani akɔ ese. Na Manase ɔlɔkplu buti bɔsala apim unwi ni, anwu ndi Yoseƒ ɔdi. Na Eƒraim ɔlɔkplu buti bɔsala mpim leevu ni, anwu ndi Yoseƒ ɔdi. Na ese ammɔ na úti ɔ́di kaba kammɔ bekyuli lɛlɔ. Na ɔ́yila-ma kede kede.”

¹⁸Na ɔ́su Sebulon ku Isakar kaba lɛlɔ ɔnini, “Sebulon kaba, bɛya ɔtɛ ute-mii na bina kuye kɔni bɛɛdi na ɛpu anumi. Na Isakar kaba lɛnɔ ni, bina lɛkɛ lisie anumi na bina kɔduli kuye bɔdi kemmo.

¹⁹Ɔsika bɛ́kɛ bina lɛkɛ bɛ́siku ama bani nlie ɛpu amadɔ kudɔ. Bɛlɔ-ma ka bebo babakpa Katɔti na abi lɛlɔ.”

²⁰Na Gad kɔdua lɛlɔ ni, ɔ́su ɔnini, “Bimwi Katɔti ɔni náya na Gad kalɔ kébomo kébu. Na Gad use aani gyata ɔni nnye kagyumana mɔɔwia ebuo ɔni weƒie na ɔmami-nwu kɔnu iye lili.

²¹Na ama nákɛ kalɔ kammɔ kesii kani kakɛ ndia ntulo. Na lɛla lɛni námanku ɔtɔnkune ni, béti béte-nwu. Ɔsika ama nádi Unwoti ɔda bubo etemila lɛlɔ uwi ɔni na Israelƒuɔ batɔnkune ƒui basala lisu.”

²²Na Dan kɔdua lɛlɔ ni, ɔ́su ɔnini, “Dan use aani gyata ɔkɔdi ɔni nábɛ ubi Basan kalɔ lɛlɔ na mmɔ na ɔɔba agyu taasi teetéƒie bebuo.”

²³Na Naƒtali kɔdua lɛlɔ ni, ɔ́su ɔnini, “Bina lɛlɔ lɛɛda Unwoti kubiti. Anwuɔsu ɔdubo-mii kusɛ kusɛ bute. Na kalɔ kani nási ɔ́si kɔmii kakɛ úti útédu lɛba kemmo ni, kadubɔbla bina ɔdi.”

²⁴Na Aser kɔdua lɛlɔ ni, ɔ́su ɔnini, “Unwoti kusɛ kusɛ kenengudikɔ kabla bina ɔdi. Na kaba kammɔ ƒui akɔ ni, amii na baayɔ́ teetulo. Na bɛkɛ nnɔ egyii ebi pii.

²⁵Na beti abuala ani mbo ɔkplu geen bagyumana bina lɛma kɔyakun. Na ɔyikun ɔkya bina bekyuli akɔ.

²⁶“Israelƒuɔ! Ɔti ɔdi uuutulo bula Katɔti. Na anwu muuti liƒlukutu taabla aani nwuna ɔpɔnkɔ kɛɛkɛ na ɔda ɔɔví na uubo teebebunku-mii.

²⁷Na Katɔti kani muukpó bina kekpo ƒui teete-mii. Na nwuna enubɔ mɔɔyá na bulayia. Na anwu mɔɔgyú taatɔ teetékpo taadi bina bekisine lɛlɔ. Na ɔ́su-mii ɔnini, ‘Biteesie! Na bitayia-ma!’

²⁸Anwuɔsu Yakob bawɔ, bilie na atu bɔyɔ kemmo. Na bilie kpli na kalɔ kani Unwoti úti uute-mii mmɔ kaduɛ. Kalɔ kani nélie lɛmwi na edula ku adingyii ani beeti taabla ntɛ adubɔdia-ka lɛlɔ. Na Unwoti ɔɔyá na amii aasí katɔ teebewi-ka ntu.

²⁹Israelƒuɔ, bɛya na lɛlɔ lɛyɔ-mii. Ɔsika bekyuli badi beeebo aani bina kalɛ. Bɛdi bekyuli bani na Unwoti náƒɔ-mii ngba. Na Unwoti ɔlati ndi bina ekpola. Na biti-nya bikpo bɛdi lɛlɔ. Na bina bekisine badububo bebevele-mii ka bɛnu-ma kɔnyana. Nsu bitenu kalɔ, na bibo-ma bɛdu ƒui.”