Read Lelemi Lɛkpa Ulu 34 Bible Online

Lɛkpa Ulu 34 - Lelemi bible

Lɛkpa Ulu 34

¹Amu na Mose ɔ́kɔ úsie Moab kalɔ kani nwi ƒiaa ɔ́si Nebo Kɔbi na útédu Pisga Kɔbi lili na Yeriko ɔƒɛ katukɔ kakɛ. Na mmɔ na Unwoti ɔ́tina-nwu kalɔ kammɔ ƒui ɔ́si Gilead úti útédu Dan

²ku Naƒtali ƒui ku Eƒraim ku Manase ku Yuda kalɔ ƒui úti útédu ɛpu kama kama ƒui.

³Na Unwoti ɔ́sɔ ɔ́tina-nwu kalɔ kani na kewi káyu ɔ́si kɔwɛ kɔni nde Yeriko na baalɔ mmɔ banii Ebo Ɔma úti útédu ɔma ɔni baalɔ banii Soar.

⁴Amu na Unwoti ɔ́su Mose ɔnini, “Kalɔ kamɛni na líse kenye ka meti mete Abraham ku Isak ku Yakob ku bana bawɔ. Ɔƒɛni lɛ́ya-na éti ƒula anumi ánu kalɔ kammɔ. Nsu aaadubo mmɔ busie.”

⁵Anwuɔsu Mose ɔni ndi Unwoti kabla ɔblane úkpi na Moab kalɔ lɛlɔ mmɔ. Na úbo úte aani kalɛ kani na Unwoti ɔ́su-nwu.

⁶Na Unwoti ɔ́va-nwu na kɔwɛ kɔni nkya Moab na ɔma ɔni nde Bet-Peor. Na úti úbedu ɔmwi limeyi lɛmɛni lɛlɔ ni, ukyuli biala ɔɔɔgyi kesii kani báva-nwu.

⁷Na Mose ɔ́kɛ akwa eti anyɔ ku aavlanyɔ asa na úkpi. Na asa na wekpi ni, na ɔmu ubo ɔlɔkplu kaduɛ na ɔmu ɔɔnu kaduɛ lɛnɔ.

⁸Na Israelƒuɔ béti emeyi avlaatɛ bábla-nwu kekwa na Moab kalɔ ƒiaa kammɔ lɛlɔ.

⁹Na asa na Mose wekpi ni, úti nwuna enu ɔ́sia Yosua lili na ɔ́kpali katɔ, na Unwoti úte Yosua lɛnunda kɔyu. Anwuɔsu Israelƒuɔ béti ɔbu béte Yosua na beenú-nwu litemi na baadi ɔda bubo bɔni na Unwoti úti úte-ma lɛlɔ ɔkɛnku Mose lɛlɔ.

¹⁰Na Katɔti kenye udiene ɔdi útakya Israel kudii aani Mose kalɛ. Na Unwoti útaatɛmi-ku Mose anumi ku anumi.

¹¹Na kenye udiene ɔdi lɛnɔ útabla akɔla lidu lidu budie taatina kudii aani akɔla lidu lidu lɛni na Unwoti ɔ́tala Mose na útábla ɔ́tina Egyipteƒuɔ Ɔga ku nwuna kabla bablane ku Egyipte kalɔ bekyuli ƒui.

¹²Na ukyuli ɔdi lɛnɔ útakɛ ɔyikun ɔni na Mose ɔ́kɛ na ɔ́bla liƒu ala ku ɔtɔtɔ ala ani nálɛ na Israelƒuɔ anumi kudii.