Read Lelemi Lɛkpa Ulu 5 Bible Online

Lɛkpa Ulu 5 - Lelemi bible

Lɛkpa Ulu 5

¹Amu na Mose ɔ́lɔ Israelƒuɔ bammɔ ƒui ɔ́sala na ɔ́su-ma ala amɛni. Israel kadi bekyuli, binu ɔda bubo bɔni ƒui líti muute-mii ɔmwi mɛni. Bɛtɛya ɔda bubo bɔmmɔ na bɛnu ka bɛdi-mu lɛlɔ.

²Bula Unwoti Katɔti ku abu búnyimi linyese lɛdi na Sinai Kɔbi lɛlɔ.

³Na ɔɔɔdi bula bati kuuku ku Katɔti nényimi linyese lɛmɛni. Mmomu abu bani nli ngba mɛni ɔsu na únyimi linyese lɛmɛni.

⁴Na kɔbi kɔmmɔ lɛlɔ ni, amii alati binu ka Katɔti ɔ́tɛmiku-mii ɔ́siku lɛgyavonku lɛni mɔɔda kemmo.

⁵Nsu ka bɛɛyia lɛgyavonku lɛmmɔ na bilayɔ ka bɛkɔ bisie kɔbi kɔmmɔ lili ɔsu ni, ami nénye amii ku Katɔti ntɛ na lɛ́su-mii ala ani na Katɔti ɔ́su. Na ami nénye Katɔti ku bina ntɛ uwi ɔmmɔ kemmo na lɛ́su-mii ala ani Katɔti ɔ́su.

⁶“Ami ndi bina Unwoti Katɔti ɔni nédie-mii ɔ́lɛku Egyipte kalɔ lɛlɔ kesii kani nka bénye-mii lɛlɔ na bɛɛbla bana kabla.

⁷Bitese benwoti badi bitebunku-mi lɛlɔ.

⁸Bitavɔ iye bɛnwi lɛla lɛni nálɛ ala ani nkya kayaa iye kalɔ lɛlɔ iye ntu bɔni na kalɔ kemmo na bitaakpa.

⁹Na tebo kalɔ takya baƒiɔ badi lili kalɔ iye akpa ɔdi. Ɔsika ndi bina Unwoti Katɔti ɔni muukpó kɔgyulo. Na mɔɔní bekyuli bani muukisi-mii kɔtu ɔ́si bati ku bebi lɛlɔ útédu kaba katɛdi ku kenedi lɛlɔ.

¹⁰Nsu mɔɔbla lɛƒɔndia teete nkyuli ɛlɛ ɛlɛ bani mɔɔyɔ́-mi na baadi mina ɔda bubo lɛlɔ.

¹¹Takpali Unwoti ƒula Katɔti lɛnyi keeke. Ɔsika Unwoti ɔdubɔni ukyuli ɔni mɔɔlɔ-nwu lɛnyi keeke kɔtu.

¹²Se lɛnwunameyi likpo na abla-ni kedee, aani kalɛ na ami ɔni ndi bina Unwoti Katɔti líbo-mii ɔda.

¹³Emeyi aku na ɔlɛka eti abla ƒula kabla.

¹⁴Nsu limeyi maatɛdi ndi ami Unwoti ƒula Katɔti Lɛnwunameyi lɛni kemmo na útalɛ ka abla kabla kadi, awɔ iye ƒula bebi iye ƒula kabla bablane iye ƒula bebuo iye baƒɔ bani nkya-a kudɔ babla kabla kadi. Na útalɛka bekyuli bani mɔɔbla kabla teete-ɔ babla kabla kadi lɛnwunameyi lɛmmɔ lɛlɔ aani kalɛ na awɔ lɛnɔ alábla kabla kadi.

¹⁵Na ɔlɛka binyimo ka uwi ɔni návi kemmo ni, bɛdi bekyuli bani na bénye-mii lɛlɔ ka bitaabla kabla teete-ma. Na ami ɔni ndi bina Unwoti Katɔti néti mina ɔyikun bonwu ku ɔlɔkplu kpakplaa na lídie-mii lɛ́lɛku mmɔ. Ɔmɛni ɔsu na muubó-mii ɔda ka bitabla kabla kadi lɛnwunameyi lɛlɔ.

¹⁶Bu ƒula ɔti ku ƒ'ini aani kalɛ na ami bina Unwoti líbo-mii ɔda na adubulie ngba gyɔlɔɔ na keyi kadubɔyɔku-ɔ na kalɔ kani na líti muute-ɔ lɛlɔ.

¹⁷Tadu ukyuli.

¹⁸Tadi kɔsɔnɔ.

²⁰Tada ukyuli ɔdi kenye.

²¹Taya anumi egyie-ɔ-na ƒula ukyulikpana ulekudi iye nwuna kaduli iye nwuna kabla ɔblane iye nwuna kalɔ iye nwuna ɔmantɛ bakɔ iye nwuna bebuo ala betine iye nwuna lɛla biala na ubo lɛlɔ!”

²²Ɔda bubo bɔmɛni na Unwoti úti úte-mii uwi ɔni bɛ́sala binye kɔbi kɔmmɔ kaƒɔna. Na mmɔ bínu-nwu lɛdi bonwu bɛ́siku lɛgyavonku kemmo ku liƒlukutu bili bili kemmo na mmɔ use suu geen. Na únweni ala ammɔ ɔ́sia atabi anyɔ lɛlɔ na úti úte-mii. Na ɔ́sɔ útasu lɛla lɛdi útebunku ɔmmɔ.

²³Uwi ɔni na bínu Unwoti lɛdi bɛ́siku kasuudikɔ mmɔ uwi ɔni na kɔbi kɔmmɔ kɔɔda mmɔ ni, bina benengu ku bina adua benengu ku baduɔti bébo-mi kudɔ na básu-mi banini,

²⁴“Bɔ́nu bula Unwoti Katɔti ɔyikun ku bukeye uwi ɔni na búnu-nwu lɛdi bɔ́siku lɛgyavonku lɛmmɔ kemmo. Na ɔmwi limeyi lɛmɛni na bɔ́nu bɔ́ti geen ka ukyuli ɔkana ulie ngba ina Katɔti ɔ́tɛmiku-nwu.

²⁵Nsu buuye bɔnii bi ɔsu na buuti bula ngba butákya ɔgbankpi kemmo? Ɔsika lɛgyavonku lɛmmɔ lɛdubo-bu ngba bɔyila. Na bɔɔtí nwaa ka bɔdubo bukpi si bɔ́sɔ búnu bula Unwoti Katɔti lɛdi.

²⁶Na buuye bɔnii ukyuli ɔdi uulie ngba dii ka únu Katɔti ɔni nlie ngba lɛdi ɔ́siku lɛgyavonku kemmo?

²⁷Anwuɔsu Mose, awɔ kani teesie na eteenu lɛla biala na bula Unwoti Katɔti ɔsu-bu. Na enwini abasu-bu. Na lɛla biala ɔdubo-bu bɔsu ni, bɔdubo-ni lɛlɔ bɔdi.”

²⁸Unwoti ɔ́su-mi ɔnini, “Línu lɛla lɛni na bekyuli bamɛni básu-ɔ. Na lɛla lɛmmɔ lɛdia.

²⁹Si lɛni na bekyuli bamɛni badubutaabla na beteeti ɔbu teete-mi na bataadi mina ɔda bubo ƒui lɛlɔ ni, lɛla biala lɛdubuteesie kaduɛ teete-ma, ama ku bana kaba bekyuli ƒui, ɔ́si ɔƒɛni úsela uwi ƒui.”

³⁰Amu na Unwoti ɔ́su Mose ɔnini, “Teesie na atásu bekyuli bammɔ na benwini beteesie bana kɔkyakɔ.

³¹Nsu awɔ Mose amu adubɔsɔ bɔkya-mi kudɔ mɛni na ndubuti mina ɔda bubo bɔmmɔ ƒui lite-ɔ. Na atina bekyuli bammɔ ɔda bubo etemila ammɔ kalɛ badi-nya lɛlɔ na kalɔ kani lɛlɔ bésela betélie mmɔ.”

³²Anwuɔsu Israelƒuɔ, bɛnu kaduɛ na bɛdi ɔda ɔni na bina Unwoti Katɔti úbo mɛni ƒui lɛlɔ.

³³Bɛdi-mu lɛlɔ ƒui kalɛ na lɛla biala bɛdubɔbla lɛtɛ lite-mii na keyi kadubɔyɔku-mii na bilie ngba gyɔlɔɔ na kalɔ kani lɛlɔ bísela bitélie mmɔ.