Read Lelemi Lɛkpa Ulu 6 Bible Online

Lɛkpa Ulu 6 - Lelemi bible

Lɛkpa Ulu 6

¹Ɔda bubo bɔmɛni na bina Unwoti Katɔti úti úte-mi ka ntina-mii. Na bɛdi-mu lɛlɔ na kalɔ kani na bɛdubo Yordan Ketu bɔvia na bitéti binwini bina kadikɔ mmɔ lɛlɔ.

²Na bina ngba bulie uwi ƒui ni, bɛnu ka amii ku bina bebi ku bawɔ bíti ɔbu bíte bina Unwoti Katɔti. Na bɛ́di nwuna ɔda bubo bɔni ƒui líti muute-mii mɛni, lɛlɔ kalɛ na bilie kalɔ kammɔ lɛlɔ bitu uwi.

³Israelƒuɔ, binu! Bɛnu kaduɛ na bɛdi ɔda bubo bɔmmɔ lɛlɔ. Na ɔmɛni ndubɔya na lɛla biala lisieku-mii kaduɛ. Na bɛdubo bumomo bubu na kalɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii na bísela bitélie mmɔ lɛlɔ aani kalɛ na Unwoti ɔni ndi Bula Bati Kuuku Katɔti ɔ́su úse.

⁴Israelƒuɔ, binu kaduɛ! Unwoti ndi bula Katɔti, na anwu lɛti pɛ kani nkya.

⁵Anwuɔsu ɔlɛka bɛyɔ-nwu ku bina kayi ƒui ku bina kɔyu ƒui ku bina ɔyikun ƒui.

⁶Na bɛda ɔda bubo bɔni líti muute-mii ɔmwi kadi kamɛni lɛlɔ kaduɛ na bina kayi kemmo.

⁷Biti ɔda bubo bɔmmɔ bitaatina bina bebi kaduɛ uwi ndi uwi. Na bitaatɛmi-mu lɛlɔ si bɛkya kaduli iye bɛkɛ bísela kesii kadi iye si bilie bɛɛnwuna iye si bɛkya bina kabla akɔ.

⁸Binweni-mu bɛsia lɛla lɛdi lɛlɔ na binyimi-mu bɛda bina enu ku atɛntɛ lɛlɔ aani linyimola.

⁹Na binweni-mu bɛmana bina lɛtɔ kɔyaku eli ku kɔduli ɔban kɔyakun.

¹⁰Bina Unwoti Katɔti ɔdubuti-mii ubeduoku kalɔ kani na ɔ́su úse ka weti wete bina bati kuuku bani ndi Abraham ku Isak ku Yakob ku amii lɛnɔ. Kalɔ kammɔ ni, lɛma libendi lɛkya-ka kemmo ku ala ani náƒɔ kuye na ɔɔɔdi amii alati náda lɛma lɛmmɔ.

¹¹Na ala abuni éyi lɛtɔ lɛmmɔ kemmo ɔni na ɔɔɔdi amii náwia ala ammɔ bɛ́kya-ni kemmo ku abiɔ ani na ɔɔɔdi amii néku ku mmo bɔni na ɔɔɔdi amii nátuma-mu ku nnɔ egyii ani na ɔɔɔdi amii nálɛ-nya. Na si bɛ́di na bímo ni,

¹²bɛnu kaduɛ kalɛ na bina kasusu kalálɛ bina Unwoti ɔni náda-mii údie Egyipte kalɔ lɛlɔ kesii kani nka bénye-mii lɛlɔ na bɛɛbla-ma kabla mmɔ.

¹³Bɛyia bina Unwoti Katɔti ɔmmɔ na bɛkpa anwu lɛti. Na si biisé kenye kadi ni, bise-ka na anwu lɛti lɛnyi kemmo.

¹⁴Na bitakpa bekyuli bani nli amadɔ mmɔ baƒiɔ badi betebunku-nwu lɛlɔ.

¹⁵Na si bɛ́yu atuɔkplu na bɛkya bɛɛkpá baƒiɔ bammɔ badi ni, Katɔti kɔnyi kɔdubo-mii lɛlɔ aani ogya na ɔdubɔkyula-mii na ɔyila bina udu ƒui ɔlɛku kalɔ kammɔ lɛlɔ. Ɔsika Bina Katɔti ɔdi Katɔti ɔni muukpó kogyulo.

¹⁶Na ɔdi utakɔku bina Unwoti Katɔti utanu aani kalɛ na bɛ́kɔku-nwu bɛnu na kesii kani baalɔ banii Masa mmɔ.

¹⁷Na bɛnu kaduɛ na bɛdi nwuna ɔda bubo bɔni ƒui na úti úte-mii mmɔ lɛlɔ na bɛsiaku-mu kama.

¹⁸Na bɛbla ala ani nse siin na adia na Katɔti anumi kalɛ na lɛla biala lisie siin lite-mii. Na bɛkana na bisie bitéti kalɔ kabuni kani na Unwoti úse kenye úse ka weti-ka wete bina bati kuuku mmɔ binwini bina kadikɔ.

¹⁹Na ɔmɛni ɔdubɔya na wabɔku bina bekisine ƒui wete-mii aani kalɛ na ɔ́su úse.

²⁰Na uwi ɔdi ɔdubo ɔni na bina bebi badubo-mii buye banii, “Bi ɔsu na bula Unwoti Katɔti úbo-bu ɔda ka bɔdi nwuna ɔda bubo bɔmɛni ƒui lɛlɔ?”

²¹Na bɛsu-ma bɛnini, “Uwi ɔdi nábavi ni, nka bɔdi bekyuli bani na Egyipteƒuɔ bénye-bu lɛlɔ na bɔɔbla-ma kabla. Na Unwoti néti nwuna ɔyikun unengudi úkpo ɔ́ƒɔ-bu ɔ́lɛku nwuna enu kemmo.

²²Bɔ́nu ku bula anumi lɛlɔ kalɛ na Katɔti ɔ́bla akɔla budie taatina enengudi lidu lidu ku ala ani mɔɔda liƒu úti úkpoku Egyipteƒuɔ ku Ɔga Ƒarao ku nwuna kabla bablane benengu.

²³Na údie-bu úboku mɛni kalɛ na uti kalɔ kani na ɔ́su bula bati kuuku úse ka wete-ma ute-bu.

²⁴Ɔmɛni ɔsu na bula Unwoti Katɔti úbo-bu ɔda ka bɔdi nwuna ɔda bubo ƒui lɛlɔ na buti ɔbu bute-nwu lɛnɔ. Na si bɔɔbla ɔmɛni ni, uwi biala ɔdubo-bu lɛlɔ butaanu na bɔlɛ lili aani kalɛ bɔɔnu ɔƒɛni.

²⁵Na si bɔ́sia anu na bɔɔdi ɔda bubo biala na Katɔti úbo-bu lɛlɔ ni, ɔdubɔnu-bu aani bekyuli bani nse siin.”