Read Lelemi Lɛkpa Ulu 9 Bible Online

Lɛkpa Ulu 9 - Lelemi bible

Lɛkpa Ulu 9

¹Bise atu na binu! Ɔmwi limeyi lɛmɛni lɛlɔ ni, bɛdubo Yordan Ketu bɔvia na bisie bitáƒɔ kalɔ kani na kana bekyuli bemomo na bebo ɔyikun betulo-mii binwini bina kadikɔ. Na bana lɛma linengudi líbomo kaduɛ na lɛma lɛmmɔ awodu ákuku ésie kayaa geen.

²Na bekyuli bammɔ alati bákuku na bebo ɔyikun na baalɔ-ma Anakƒuɔ. Na bínu ka básu dii ka bekyuli badi beeebo na bakana bunye bɔsiaku-ma.

³Nsu ɔƒɛni amii ɔlati bɛdubo bɔnu ka bina Unwoti Katɔti ɔdubo bɔgyu bɔtɔ-mii anumi aani ogya ɔni mɔɔkyula ala kalɛ. Na ɔdubo-ma udu bɔyila na ɔdi-ma lɛlɔ uwi ɔni na bɛ́kpɛ bíde-ma kalɛ na bɛkɛ kuƒi na bɛbɔku-ma bɛlɛku bana lɛma. Na ɔdia na bɛyila-ma udu pla aani kalɛ úse kenye úse.

⁴Na si bina Unwoti Katɔti ɔ́bɔku-ma úte-mii ni, bitasu lɛlɔ ka úti-mii úboku kalɔ kamɛni lɛlɔ, ɔsika amii bise siin ɔsu. Oowo! Ɔɔɔdi lɛni na use. Mmomu lɛla lɛni ɔsu na Unwoti ɔɔbɔku-ma ndi ka bekyuli bammɔ badi bekyuli bekpidi ɔsu.

⁵Na ɔɔɔdi ka bɛdi bekyuli babuni na bɛɛbla ala ani nse siin ɔsu na Unwoti ɔ́ya na bísie bitéti bana kalɔ bínwini bina kadikɔ. Mmomu Unwoti ɔdubo-ma bɔbɔku, ɔsika bekyuli bammɔ badi bekyuli bekpidi. Na ka ɔɔyɔ́ ka ɔdi nwuna linyese lɛlɔ ute bina bati kuuku bani ndi Abraham ku Isak ku Yakob lɛnɔ ɔsu na ɔɔbɔku bekyuli bammɔ.

⁶Anwuɔsu bɛnu ka ɔɔɔdi bina ala bɔbla ulu lɛlɔ ɔsu na Unwoti úti kalɔ kani na kélie lɛmwi mɛni uute-mii. Ɔsika batuɔkplune na amii lɛnɔ bɛdi.

⁷Bitayiƒala kalɛ na bɛ́ya na Unwoti úti kɔnyi ɔ́kya-mii na kalɔ kakwiidi kemmo. Úti ɔ́si limeyi lɛni lɛlɔ na bɛ́ta Egyipte kalɔ úti úbedu limeyi lɛni bíbeduo mɛni ni, lɛni kani na bɛkya bɛɛta teenye Unwoti lɛlɔ.

⁸Na bɛ́kya Unwoti kɔnyi geen na Sinai Kɔbi lɛlɔ ɔni na úbu blii nka ɔyila-mii udu ƒui.

⁹Lɛ́kɔ lísie kɔbi kɔmmɔ lili nnii ntáƒɔ kenye kani na únyimiku-mii na únweni ɔ́sia atabi bɛbɛ anyɔ ammɔ lɛlɔ. Lílie kɔbi kɔmmɔ lili emeyi aavlene usien ku ɔƒɛ ɔni na ńtadi na ńtani.

¹⁰Mmɔ na Unwoti úti atabi anyɔ ammɔ na anwu ɔlati úti nwuna kɔnu na únweni etemila ani na ɔ́tɛmiku-mii ɔ́siku lɛgyavonku kemmo na limeyi lɛni bɛ́sala lisu na kɔbi kɔmmɔ kaƒɔna úte-mi.

¹¹Na emeyi aavlene ammɔ kama na Unwoti úti atabi anyɔ ani lɛlɔ na únweni kenye kani na únyimiku-mii ɔ́sia mmɔ úte-mi.

¹²Amu na Unwoti ɔ́su-mi ɔnini, “Yu teesie kɔbi kɔmmɔ kalɔ kɔnakunwi. Ɔsika bekyuli bani na ákpanku álɛku Egyipte kalɔ lɛlɔ mmɔ báƒiɔ-mi geen. Na bálɛ ulu ɔni lɛlɔ na lɛ́su-ma ka basia na bávɔ baƒiɔ mmomu bese lɛlɔ lɛlɔ baakpá.”

¹³Na Unwoti ɔ́sɔ ɔ́su-mi ɔnini, “Ami Unwoti ngyi ka bekyuli bamɛni bebo atuɔkplu geen.

¹⁴Anwuɔsu te-mi kuƒi na lɛyila bekyuli bamɛni udu. Na linine bana anyi lidie na ɔƒɛ kalɔ. Na ndubudie kadi bekyuli bani ndubɔyu ɔyikun geen na bimomo bitulo-ma lɛsiku-ɔ kemmo.”

¹⁵Anwuɔsu líti atabi anyɔ bɛbɛ ani na Katɔti únweni kenye kani na únyimiku-mii ɔ́sia mmɔ na lɛ́yu kɔbi kɔni mɔɔda ku ogya bonwu mmɔ líbo.

¹⁶Na ka mɔɔnu ni, lɛ́nu ka bɛ́bla likpidi bɛ́ƒiɔ bina Unwoti Katɔti. Ɔsika bɛ́vɔ ɔmantɛ akɔ ɔkɔdi ɔgyani udu na bɛɛkpá-nwu aani baƒiɔ na bínwini kama bɛ́kya Katɔti ɔƒɛni kani ɔdi ɔmɛni.

¹⁷Anwuɔsu líƒwimi atabi anyɔ ammɔ lɛ́va na ábwɛ kɔkɛ kɔkɛ na bina anumi.

¹⁸Amu na kunyɔdi lɛnɔ ntayu lɛ́tɛ Unwoti anumi na líti mina anumi líbi kalɔ emeyi aavlene usien ku ɔƒɛ ɔni na ntadi iye ntani lɛla lɛdi. Lɛ́bla ɔmɛni ƒui ɔ́si likpidi lɛni bɛ́bla Unwoti na bɛɛbla lɛla lɛni naaayɔ-nwu kaƒɔ ɔsu. Na bɛ́ya na ɔ́kɛ kɔnyi.

¹⁹Ka mɔɔyia Unwoti kɔnyi ɔsu ku kalɛ ɔ́kɛ kɔnyi kpakplaa kɔni na úti ku kalɛ na ɔɔyɔ́ ka ɔyila-mii udu ɔsu ni, lɛ́bla ɔmɛni ƒui. Na Unwoti kaƒɔ káyɔ-nwu na únu mina buvele.

²⁰Lɛni kani na Unwoti úti kɔnyi ɔ́kya Aaron na ɔ́yɔ ka ɔdu-nwu, na lívele líte-nwu uwi ɔmmɔ kemmo kani.

²¹Amu na líti lɛla likpidi lɛni bɛ́vɔ mmɔ aani ɔmantɛ akɔ ɔgyani ɔkɔdi na líƒwimi lɛ́kya ogya kemmo. Na lídie-nwu na lɛ́ƒɛ-nwu eku eku, na lɛ́kɔ-nwu na únwini ntɔ, na líbo ntɔ bɔmmɔ líwi ketu kani mɔɔgbá taayu kɔbi kɔmmɔ lɛlɔ.

²²Na uwi ɔni na bílie kesii kani baalɔ Tabera ku Masa ku Kibrot-Hataawa ni, lɛni kani na bɛ́kya bina Unwoti Katɔti kɔnyi.

²³Ka bɛ́kya Kades Barnea ni, Unwoti ɔ́su-mii ɔnii, “Biteesie na bitéti kalɔ kani na líti muute-mii mmɔ binwini bina kadikɔ.” Nsu bítaƒɔ-nwu bítadi na bítabu nwuna litemi lɛni na ɔ́su-mii mmɔ. Mmomu bɔta na bɛ́ta binye-nwu lɛlɔ.

²⁴Na ɔ́si uwi ɔni na ami Mose lɛ́ti-mii ni, bɔta kani na bɛɛta teenye Unwoti lɛlɔ.

²⁵Anwuɔsu lɛ́yu lɛ́tɛ kalɔ na línwini anumi libi kalɔ na Unwoti anumi emeyi aavlene ammɔ kemmo usien ku ɔƒɛ. Ɔsika línu ka Unwoti ɔ́su ka ɔdubɔyila-mii udu.

²⁶Mmɔ na lɛ́kpali-nwu lívele-nwu nnii, “O Ɔyikune Ƒui Katɔti, tayila ƒula bekyuli bani na ɔkɛnku ƒula ɔyikun ku ɔlɔkplu na édie-ma álɛku Egyipte kalɔ lɛlɔ udu.

²⁷Na enyimo ƒula kabla bablane bani ndi Abraham ku Isak ku Yakob, na alakpete bekyuli bamɛni atuɔkplu ku likyulikpi ku bana ekpidi ani bábla.

²⁸Si ɔɔɔdi lɛni ni, Egyipteƒuɔ badubɔsu banii átakana na akpanku ƒula bekyuli bammɔ esienku kalɔ kani ásu ése ka éti-ma éselaku mmɔ lɛlɔ. Na badubɔsu lɛnɔ banii bɔkpanku na ákpanku ƒula bekyuli bammɔ esienku kalɔ kakwiidi kemmo na átadu-ma. Ɔsika eekisi-ma.

²⁹Ɔmɛni ƒui kama ni, bekyuli bamɛni na áƒuna na éti-ma ábla ƒula badi. Na ama na édie álɛku Egyipte kalɔ lɛlɔ ɔkɛnku ƒula ɔyikun bonwu ku ɔlɔkplu ɔsu.”