Read Lelemi Yohane 1 Bible Online

Yohane 1 - Lelemi bible

Yohane 1

¹Kalɔ kesekɔ ƒui ni, Anwu ɔni ndi Katɔti Litemi mmɔ ɔkya. Na Litemi lɛmɛni ku Katɔti nkya. Na Litemi lɛmɛni ɔlati ku Katɔti badi unwi. Na ɔ́si kalɔ kesekɔ ni,

²Anwu ku Katɔti nli uwi ƒui.

³Ɔkɛ Anwu ɔmmɔ lɛlɔ na Katɔti ɔ́sia údie lɛla biala. Na lɛla lɛdi liiibo ɔni na ɔɔɔdi nwuna lɛlɔ na Katɔti ɔ́sia údie-ni.

⁴Na Litemi lɛmmɔ kemmo na ngba geen bɔɔsí. Na ngba bɔmɛni muute bekyuli Katɔti bukeye geen.

⁵Bukeye bɔmɛni muukeye na bɔ́ɔyila lɛdisa. Na lɛdisa lítakana na linye bukeye bɔmɛni kenye.

⁶Na uwi ɔmmɔ kemmo ni, Katɔti ɔ́tala ukyuli ɔdi aani kenye udiene kalɛ, na baalɔ-nwu banii Yohane.

⁷Úbo ɔnii ubedie kenye na ukyuli ɔni ndi bukeye bɔmɛni lɛlɔ kalɛ na ukyuli biala unu linyesia lɛmɛni na ɔƒɔ ukyuli ɔni ndi bukeye mmɔ ɔdi.

⁸Ɔɔɔdi Yohane ɔmɛni ndi bukeye bɔmmɔ. Mmomu kenye kani na úbo ubedie na bukeye bɔmɛni lɛlɔ.

⁹Na uwi ɔmmɔ kemmo ni, bukeye geen bɔni muuti bukeye teete ukyuli biala bɔ́si bɔdubo kayawi.

¹⁰Nsu geen ni, ɔkya kayawi. Na ina ka nwuna lɛlɔ na Katɔti ɔ́kɛ asa na údie kayawi ni, bekyuli bátanu-nwu bátati.

¹¹Úbo anwu badi akɔ, nsu bétegyingya enu bátaƒɔ-nwu.

¹²Nsu ɛlɛɛ badi báƒɔ-nwu. Na bani ƒui náƒɔ-nwu mmɔ aani Katɔti Ukyuli Ɔƒunadi ɔmmɔ ni, úte-ma ɔyikun ɔni náya na benwini Katɔti bebi.

¹³Na ubi bɔdi bɔmɛni bɔɔɔkɛnku kaba kemmo kɔwɔ lɛlɔ. Na bɔɔɔdi ɔnana ku uleku kɔwɔ kemmo na bɔ́si. Na bútasi ɔnana ubi bɔwia kasusu kemmo lɛnɔ. Mmomu ni, Katɔti ubi bunwini bɔmɛni bɔ́si Katɔti ɔlati kudɔ.

¹⁴Na Katɔti Litemi lɛmɛni líbo aani ukyuli ɔyawine, na úlie kalɔ lɛlɔ mɛni na bula akɔ. Na Katɔti lɛƒɔndia ku litemi geen lɛ́ƒɔ-nwu lɛlɔ kemmo ƒui. Na abu bɔ́nu kalɛ na uukeye ka ɔdi Katɔti ubidi unwi pɛ ɔsu.

¹⁵Yohane údie-nwu ɔ́tina bekyuli uwi ɔni na ɔ́kɔ lɛsa úte kasalakɔ ƒui ɔnini, “Ɔmɛni ndi ukyuli ɔni lɛlɔ na ńtaatɛmi taasiku ɔni lɛ́su nnii ukyuli ɔdi ɔkpɛ-mi kama ɔdubo ɔni ntulo-mi ƒui, ɔsika ɔkya kukuuku asa na báwɔ-mi.”

¹⁶Na Katɔti lɛƒɔndia ku litemi geen lɛni náƒɔ-nwu lɛlɔ kemmo ƒui ɔsu ni, ɔ́bla bula ƒui lɛƒɔndia ɔ́sia kama.

¹⁷Ɔsika kudeedi ni, Katɔti ɔkɛ Mose lɛlɔ úte-bu nwuna ɔda bubo. Nsu ɔkɛ Yesu Kristo lɛlɔ úte-bu lɛƒɔndia lɛmɛni ku litemi geen.

¹⁸Ukyuli ɔdi útanu Katɔti nwaa dii. Nsu Katɔti ubidi unwi pɛ ɔni mma-nwu lɛlɔ ni, anwu nédie-nwu nwaa ɔ́tina bekyuli.

¹⁹Yohane údie kenye kadi úte Yudaƒuɔ batɔnkune bani nátala bakpane ku bana bebunkune básiku Yerusalem bákya-nwu. Bébo bébeye-nwu banini, “Ɔma geen na aasu anii adi tɔ?”

²⁰Amu na Yohane údie ala kalɔ úte-ma mmɔ kani ɔnini, “Lɛɛɛdi Katɔti Ukyuli Ɔƒunadi ɔni na básu bése ka webo.”

²¹Bakpane bammɔ básɔ béye-nwu banini, “Amu ɔma na adi? Katɔti Kenye Udiene Elia na adi?” Údie kenye ɔnini, “Ɔɔɔdi anwu na ndi.” Béye-nwu banii, “Na awɔ ndi Kenye Udiene ɔni básu bése ka ɔdubo?” Na ɔ́sɔ ɔ́su-ma ɔnini, “Oowo.”

²²Anwuɔsu básu-nwu banini, “Su-bu lɛla lɛdi kalɛ na bɔkana kenye budie bute bekyuli bani nátala-bu! Ɔma na adi? Bi na aasu taasiku ƒula lɛlɔ?”

²³Údie kenye ɔ́su-ma aani kalɛ na Kenye Udiene Yesaia únweni úse ɔnini, “Ami ndi ukyuli ɔni mɔɔva na ketele kemmo nnii bɛklibi ulu bise bite Blɔti bubo.”

²⁴Na bekyuli bani na bátala mɛni ni, bási Yudaƒuɔ lɛkpa lɛni baalɔ banii Ƒarisiƒuɔ kemmo.

²⁵Anwuɔsu béye-nwu banini, “Si aaadi bekyuli bani na Katɔti ɔ́su úse ka badubo akɔ unwi aani Ukyuli Ɔƒunadi, iye Elia, iye Kenye Udiene ɔmmɔ ni, bi ɔsu na aabla ketu kemmo ntu bɔkpila ɔdi ɔmɛni?”

²⁶Yohane ɔ́su-ma ɔnini, “Ntu kani na muuti taabla bɔkpila ɔdi ɔmɛni. Nsu ukyuli ɔdi ɔkya bina akɔ na bɛɛɛgyi-nwu.

²⁷Anwu ndi ukyuli ɔni nkpɛ-mi kama ɔdubo, na ami ńtedu ka lɛbla kabla kadi lite-nwu muedi.”

²⁸Lɛla lɛmɛni lɛ́lɛ na ɔma ɔni baalɔ banii Betania na Yordan Ketu ɔvi. Mmɔ na Yohane útaabla ketu kemmo ntu bɔkpila ɔdi ɔmɛni.

²⁹Kadi kégye ni, Yohane ɔ́nu ka Yesu ɔ́si ɔdubo. Amu na ɔ́su bani nnye-nwu kudɔ mmɔ ɔnini, “Bɛnu! Ɔmɛni ndi Katɔti Lɛkpa Koƒonu Ubi ɔni ndubo bayawine ekpidi buni budie-ma lɛlɔ.

³⁰Anwu ndi ukyuli ɔni lɛlɔ na ńtaatɛmi taasiku uwi ɔni na lɛ́su nnii ukyuli ɔdi ɔkpɛ-mi kama ɔdubo ɔni ntulo-mi ƒui, ɔsika ɔkya kukuuku asa na báwɔ-mi.

³¹Ami lɛnɔ lɛɛɛgyi nnii anwu ndi ukyuli ɔmmɔ. Nsu nwuna bubo ɔsu na líbo mɔɔbla bɔkpila ɔdi ɔmɛni kalɛ na lidie-nwu lɛtina bula kadi bekyuli Israelƒuɔ.”

³²Amu na Yohane ɔ́sɔ údie kenye ɔnini, “Lɛ́nu ka Katɔti Kɔyu kɔ́yu kɔ́si katɔ aani kalɛ na abloduma ɔɔyu, na kúbelie-nwu lɛlɔ.

³³Kudeedi ni, ńtati-nwu. Nsu uwi ɔni na Katɔti ɔ́tala-mi ɔnii ntaabla bɔkpila ɔdi ɔmɛni ni, ɔ́su-mi ɔnini, ‘Si ánu ka mina Kɔyu kɔ́yu kuulie ukyuli ɔdi lɛlɔ ni, adubɔnu ati ka anwu ndi ukyuli ɔni muuti Katɔti Kɔyu taabla bɔkpila ɔdi ɔmmɔ.’

³⁴Na lɛ́nu ka ɔ́lɛ lɛni na ukyuli ɔmɛni lɛlɔ. Na mɔɔsu-mii geen ka anwu ndi Katɔti Ubidi ɔmmɔ.”

³⁵Limeyi lɛni nsɔ nsia ni, ka Yohane ku nwuna basiakune inyɔ benye ni,

³⁶Yesu úsie úbavi. Amu ka Yohane ɔ́nu-nwu ni, ɔ́su ɔnini, “Bɛnu! Ɔmɛni ndi Katɔti Lɛkpa Koƒonu Ubi!”

³⁷Ka bénu ɔmɛni ni, Yohane basiakune inyɔ bammɔ bátu bénwini na básiaku-nwu. Yesu únwini ɔ́nu ka basiaku-nwu, na úye-ma ɔnini, “Bi na bɛɛwia?”

³⁸Mmɔ na bédie kenye banini, “Rabi,” ɔni kalɔ ndi ala ɔtinane, “Buvele, wɛ na eli?”

³⁹Ɔ́su-ma ɔnini, “Bibo na bibanu.” Anwuɔsu anwu ku-ma bakɛ bétédu kesii kani na ɔ́kya, na bélie-nwu kudɔ useyi uwi ɔmmɔ ƒui ɔ́si lɛdɔ ine.

⁴⁰Na bekyuli bamɛni akɔ unwi ɔdi Andrea ɔni ndi Simon Petro ɔnwani.

⁴¹Lɛla lideedi lɛni na Andrea ɔ́bla ndi ka úsie útáwia ɔnwani Simon na ɔ́su-nwu ɔnini, “Abu bɔ́nu Mesia ɔmmɔ,” iye Kristo. Na anyi ammɔ kalɔ budie ndi Ukyuli Ɔƒunadi.

⁴²Na Andrea ɔ́tɔnku Simon úsienku Yesu kudɔ. Na ka Yesu ɔ́nu Simon ni, ɔ́su-nwu ɔnini, “Awɔ ndi Yohane ubidi Simon, nsu bekyuli badubɔlɔ-ɔ banii Keƒas,” iye Petro. Na anyi ammɔ kalɔ budie ndi lɛtakpɛ.

⁴³Kadi kégye ni, Yesu ɔ́bla kasusu ka uteesie kalɔ kani baalɔ banii Galilea. Na ka ɔkɛ ulu ni, ɔ́nu ukyuli ɔni baalɔ Ƒilipo, na ɔ́su-nwu ɔnini, “Bo, na abasiaku-mi.”

⁴⁴Na Ƒilipo lɛnɔ ɔ́si Betsaida ɔni ndi Andrea ku Simon ɔma.

⁴⁵Ɔƒɛni ni, Ƒilipo ɔ́gyu ɔ́tɔlɔ útáwia Natanael. Na ɔ́su-nwu ɔnini, “Abu bɔ́nu ukyuli ɔni geen lɛlɔ na Mose ku kenye bediene bénweni ala básiku-nwu lɛlɔ bése na Bunweni Kedee Ɔku kemmo! Anwu ndi Yoseƒ ubidi Yesu ɔni nási Nasaret!”

⁴⁶Natanael údie kenye ɔnini, “Dɛ! Bɔsi na lɛla lɛbuni lɛdi lɛdubɔsi Nasaret ntu?” Ƒilipo ɔ́su-nwu ɔnini, “Awɔ bo, na abanu!”

⁴⁷Ka bákpɛ beedé na Yesu ɔ́nu ka Natanael ɔdubo ni, ɔ́su-nwu lɛlɔ kɔtɛ ɔnini, “Bɛɛnu ka ukyuli ɔdi ɔdubo na ulatɔlɔ bekyuli. Ɔdi Israelni geen!”

⁴⁸Natanael úye-nwu ɔnini, “Dɛ na ábla na agyi ukyuli ɔni udu na ndi?” Yesu údie kenye ɔnini, “Mɔɔnu-ɔ kukuuku na kɔdingyii kɔni kalɔ na eli asa na Ƒilipo úbo úbalɔ-ɔ.”

⁴⁹Natanael ɔ́su-nwu ɔnini, “Rabi, awɔ ndi Katɔti Ubidi. Awɔ ndi Israelƒuɔ Ɔga.”

⁵⁰Amu na Yesu úye-nwu ɔnini, “Áƒɔ ala amɛni ƒui ádi ɔsika lɛ́su-ɔ nnii lɛ́nu-ɔ na kɔdingyii kɔmmɔ kalɔ ɔsu? Adubɔnu budie bɔtina bunengudi butulo bɔmɛni.

⁵¹Litemi geen na mɔɔsu-ɔ ka ni, adubɔnu ka katɔ kálɛmi na Katɔti batu baakɔ́ teesie katɔ taayu teebo ami Ukyuli Ɔyawine Ubi lɛlɔ.”