Read Lelemi Yohane 12 Bible Online

Yohane 12 - Lelemi bible

Yohane 12

¹Ka kébu emeyi aku na badi Kukpi Lili Bɔvia Limeyi ni, Yesu úsie Betania na kesii kani na Lasaro ɔni na ɔ́gyila ɔ́lɛku kekpine ɔkya.

²Mmɔ ni, bánwa Yesu ebiti bɔkya adila na anwu ku nwuna badi bádi. Na Marta néti adila ammɔ útése-ma. Lasaro lɛnɔ ɔ́kya Yesu ku bani mɔɔdi mmɔ akɔ.

³Amu na Maria úti nnɔmii ƒɛƒɛɛ bɔdi bɔni náƒɔ kuye geen na baalɔ-mu nard úwi Yesu lɛgba, na ɔ́da nwuna lili linwini úni-nwu lɛgba. Na ɔnyi ƒɛƒɛɛ ɔ́ƒɔ ɔtɔ ɔmmɔ ƒui kemmo.

⁴Mmɔ ni, Yesu batɛyane akɔ unwi ɔni ndi Yuda Iskariot ɔni ndubɔkya Yesu kakya ni, útayɔ-nwu kaƒɔ na úye ɔnini,

⁵“Bi ɔsu na nka búteti nnɔmii bɔmɛni búteye na bɔkɛ aani nkyuli eti aku limeyi lɛyuƒɔla na buti egulabi ammɔ bute bawabane?”

⁶Nsu ɔɔɔdi ɔni na bawabane baakywí-nwu kaƒɔ ɔsu na úye ɔmɛni. Mmomu ka ɔdi uyune na anwu kani mɔɔda bana kavumi, na ɔɔyɔ́ ka nka utaaƒana egulabi ammɔ adi teedie taabla nwuna lɛlɔ ala ɔsu.

⁷Amu na Yesu ɔ́su-nwu ɔnini, “Nwuna lɛla biala litekpoku-ɔ. Ya na ɔbla lɛla lɛni na ubo use ute mina kukpi.

⁸Bawabane bammɔ bakya-mii kudɔ uwi biala. Nsu ami lɛɛɛdubo-mii kudɔ bɔkya uwi biala.”

⁹Ka Yudaƒuɔ pii bénu ka Yesu úsie ɔkya Betania ni, bésie mmɔ. Na ɔɔɔdi Yesu lɛti pɛ ɔsu. Mmomu kalɛ na banu Lasaro ɔni na Yesu ɔ́gyila ɔ́siku kekpine lɛnɔ ɔsu.

¹⁰Anwuɔsu bakpane benengu bábla kasusu ka badu Lasaro lɛnɔ.

¹¹Ɔsika ɔkɛnku-nwu lɛlɔ ɔsu na Yudaƒuɔ pii baalɛ́ bakpane benengu bammɔ kama na basiaku Yesu ka báƒɔ-nwu bádi ɔsu.

¹²Limeyi lɛni nsia ni, bekyuli lisu bonwu lɛni nébo Kukpi Lili Bɔvia Limeyi kadikɔ ni, bénu ka Yesu ɔ́si ɔdubo Yerusalem.

¹³Anwuɔsu béti kuke na bálɛ bésie bátásiaku-nwu. Na baava taasu banini, “Hosiana! Bimwi anwu ɔni ndubo na Blɔti lɛnyi kemmo! Bimwi Israelƒuɔ Ɔga!”

¹⁴Na Yesu ɔ́nu ebuo ala utine ubi ɔdi na ulie-nwu lɛlɔ aani kalɛ na Bunweni Kedee Ɔku ɔ́su ɔnini,

¹⁵“Amii, Sion bekyuli, bitayia lɛla lɛdi! Bɛɛnu bina ɔga ka ulie ebuo ala utine ubi lɛlɔ ɔdubo!”

¹⁶Na nka Yesu batɛyane bétenu lɛla lɛmɛni kalɔ kudeedi. Nsu uwi ɔni na Katɔti ɔ́gyila-nwu ɔ́siku kekpine na úte-nwu ɔbu ni, mmɔ na bényimo ka Bunweni Kedee Ɔku ɔ́su ɔmɛni ɔ́siku-nwu lɛlɔ ka bekyuli bábla ala amɛni ƒui béte-nwu.

¹⁷Bekyuli bani nnye baanu uwi ɔni na Yesu ɔ́kpali Lasaro na kaƒiɔtɔ kemmo na ɔ́gyila-nwu ɔ́lɛku kekpine ni, bésie bátásu lɛla lɛni nálɛ mmɔ bávi.

¹⁸Ɔmmɔ ɔsu na bekyuli pii bammɔ bésie bátásiaku-nwu, ɔsika bénu akɔla budie taatina bɔni na ɔ́bla.

¹⁹Mmɔ na Ƒarisiƒuɔ bammɔ básu lɛlɔ banini, “Bɛnu ka bekyuli bammɔ bálɛ-bu kama! Kayawi bekyuli ƒui bétiku lɛlɔ bésie basiaku-nwu kama!”

²⁰Helaƒuɔ badi bakya bekyuli bani nésie Yerusalem batákpa na limeyi lɛmmɔ bɔdi kemmo.

²¹Amu na bésie Ƒilipo kudɔ ɔni nási Betsaida na Galilea kalɔ lɛlɔ. Na básu-nwu banini, “Ati, bɔɔwia ka bɔnu Yesu.”

²²Mmɔ na Ƒilipo úsie útásu Andrea, na bana inyɔ bakɛ bésie bátásu Yesu.

²³Amu na Yesu údie kenye ɔnini, “Uwi údu ka Katɔti ɔkɔliku ami nwuna Ubidi lɛnyi katɔ na bekyuli anumi.

²⁴Na mɔɔsu-mii geen ka ni, lɛntabi lilemomo teetulo linwi lɛni kani na lɛdi, amu ntu béti-ni bákya kalɔ na libu. Na si líbu lɛni ni, uwi ɔmmɔ kama asa na liimomo teenwini antabi pii.

²⁵Ukyuli ɔni na nwuna bɔdia lɛti pɛ na ulie ute na ngba bɔmɛni kemmo ni, ɔdubɔyila lɛla biala. Nsu ukyuli ɔni néni anwu ɔlati lɛkɛ na uulie ngba taawia bekyuli bamba bɔdia ni, ɔɔkɛ́ ngba bɔmmɔ uwi ƒui.

²⁶Ukyuli biala ɔni mɔɔwia ka ɔbla-mi kabla ni, ɔdi ka ɔsiaku-mi. Na kesii kani na nlie ni, mmɔ na mina kabla ɔblane ɔmmɔ lɛnɔ welie. Na ukyuli biala ɔni mɔɔbla-mi kabla ni, mina Ɔti ɔdubute-nwu ɔbu.

²⁷“Ɔƒɛni ni, kayi keekpóku-mi. Nsu bi na ɔlɛka lɛsu? Bɔsu na lɛsu nnii, ‘Ati, taya na lɛbibo lɛmɛni udu lɛsiaku-mi’? Oowo! Ɔmmɔ ɔsu geen na líbo kalɔ kamɛni lɛlɔ kalɛ na libo abi amɛni udu.

²⁸Anwuɔsu mɔɔsu nnii, ‘Ati, ya na bekyuli bakɔliku ƒula lɛnyi katɔ.’ ” Mmɔ ni, bénu butemi bɔdi básiku kayaa ka bɔɔsu bɔnini, “Lɛ́ɛya na bekyuli bákɔliku mina lɛnyi katɔ. Na nsɔ ndubo bɔya na bakɔliku-mi lɛnyi katɔ bebu.”

²⁹Ka bekyuli bani nnye mmɔ bénu lɛdi lɛmmɔ ni, básu ka ɔnantu muudu. Na babambadi banini, “Katɔti ɔtu ɔdi násu-nwu lɛla lɛdi.”

³⁰Amu na Yesu ɔ́su-ma ɔnini, “Ɔɔɔdi ami ɔsu na lɛdi lɛmmɔ lɛɛku, mmomu amii ɔsu.

³¹“Ɔƒɛni na uwi údu ka Katɔti ɔdu kayawi kamɛni bekyuli kɔtɔ. Na Katɔti ɔdubɔbɔku kayawi kamɛni lɛlɔ ɔdine ɔlɛku nwuna lɛga kadikɔ.

³²Na si uwi ɔni na bekyuli bákɔliku-mi katɔ ni, ndubɔya na bekyuli ƒui bebo-mi kudɔ.”

³³Ka Yesu ɔ́su ɔmɛni ni, ɔ́tina ka badubo-nwu katɔ bɔkɔliku na ugyii lɛlɔ na ukpi.

³⁴Amu na bekyuli lisu lɛmmɔ básu banini, “Na Bunweni Kedee Ɔku kemmo ni, básu ka Ukyuli Ɔƒunadi ɔmmɔ ɔdubɔsɔ ɔkya ngba uwi ƒui. Na dɛ na ɔ́bla na aasu ka bekyuli badubɔkɔliku Ukyuli Ɔyawine Ubi ɔmmɔ katɔ lɛni? Ɔma ndi Ukyuli Ɔyawine Ubi ɔmmɔ?”

³⁵Mmɔ ni, Yesu údie kenye ɔnini, “Uwi klukui ɔdi kani na bɛdubɔsɔ bɛnu Katɔti bukeye bɔmmɔ. Anwuɔsu ni, uwi ɔni na kadi kammɔ kamu keekeye ni, bɛkya ɔkplu na bisie anumi kalɛ na kadi kalása kalakya-mii. Ɔsika ukyuli ɔni nkɛ na lɛdisa kemmo ni, ɔɔɔgyi kesii kani na úsela.

³⁶Anwuɔsu ni, biti bina anu ƒui bɛsia bukeye bɔmmɔ lɛlɔ uwi ɔni na bɛ́mu bɛɛnu bukeye. Na ɔmmɔ ndubɔya na binwini bukeye bɔmmɔ bekyuli.” Ka Yesu ɔ́su-ma ɔmɛni ɔ́wɔlɔ ni, ɔ́gyu ɔ́tɔlɔ-ma kudɔ. Na ɔ́bɛla lɛlɔ na básɔ bátanu-nwu.

³⁷Na ina ka Yesu ɔ́bla akɔla budie taatina amɛni ƒui na bana anumi ni, bátaƒɔ-nwu bátadi.

³⁸Nsu ɔmɛni ɔ́lɛ lɛni kalɛ na Katɔti Kenye Udiene Yesaia lɛla lɛni na ɔ́su ka lɛdubɔlɛ libo-nwu kemmo lɛni ɔnini, “Blɔti, ka búdie ƒula kenye kammɔ ni, ɔma náƒɔ-bu ɔ́di? Na ɔma bene na Blɔti údie nwuna ɔyikun ɔ́tina?”

³⁹Ɔmmɔ ɔsu na bátakana bɔƒɔ bɔdi, ɔsika Yesaia ɔ́sɔ ɔ́su ɔnini,

⁴⁰“Ami Katɔti lɛ́bala-ma anumi kalɛ na balanu lɛla lɛdi balati. Na lɛ́ya na bádɔlɔ kalɛ na belénu ala kalɔ. Ɔmmɔ ɔsu belénwini belebo-mii kudɔ kalɛ na lɛbwi-ma.”

⁴¹Yesaia ɔ́nu ɔ́ti Yesu kenyekɔ ku ɔbu. Anwuɔsu na ɔ́su lɛla lɛmɛni ɔ́siku-nwu lɛlɔ ka badubuni-nwu.

⁴²Nsu ina ka use lɛni ni, Yudaƒuɔ batɔnkune pii báƒɔ Yesu bádi. Mmomu ka baayia lɛla lɛni na Ƒarisiƒuɔ badubo-ma bɔbla ɔsu ni, bátakana na basu ɔmɛni nwaa. Ɔsika badubɔgya-ma balɛku bana kasala kemmo.

⁴³Na baayɔ́ ɔbu ɔni nási bekyuli kudɔ teetulo ɔni nási Katɔti kudɔ.

⁴⁴Amu na Yesu ɔ́su ku lɛdi momoomo ɔnini, “Ukyuli ɔni mɔɔƒɔ́-mi taadi ni, ɔɔɔdi ami lɛti na ɔ́ƒɔ ɔ́di. Mmomu ɔ́ƒɔ anwu ɔni nátala-mi lɛnɔ ɔ́di.

⁴⁵Na ukyuli ɔni mɔɔnu-mi ni, ɔɔnu anwu ɔni nátala-mi.

⁴⁶Líbo kayawi kamɛni kemmo aani ukyuli ɔni mɔɔyá na bekyuli baanu bukeye kalɛ na ukyuli biala ɔni náƒɔ-mi ɔ́di ni, uláƒɔ lɛlɔ ulakya lɛdisa kemmo.

⁴⁷“Si ukyuli ɔdi uunú litemi lɛni na mɔɔsu nsu uládi-ni lɛlɔ ni, lɛɛɛdubo-nwu kɔtɔ bɔdu. Ɔsika ńtebo nnii mbadu kayawi bekyuli kɔtɔ. Mmomu líbo nnii mbaƒɔ-ma ngba.

⁴⁸Ukyuli biala ɔni muuní-mi ni, na ulaƒɔ mina litemi taadi ni, lɛla lɛni madu-nwu kɔtɔ linye lɛgya-nwu. Na etemila ani na lɛ́su anya ndubo-nwu kɔtɔ bɔdu na limeyi likplodi lɛmmɔ lɛlɔ.

⁴⁹Ɔsika ɔɔɔdi ami ɔlati ɔyikun kemmo na lɛ́tɛmi. Mmomu mina Ɔti ɔni nátala-mi nátina-mi lɛla lɛni na ɔdi ka lɛsu ku kalɛ na lɛsu-ni.

⁵⁰Na ngyi ka lɛla lɛni na ɔ́tala-mi ka mbasu mmɔ ni, ani mɔɔyá na bekyuli beelie ngba bɔni nsɔ naaadubo bɔsa kudii. Anwuɔsu lɛla lɛni na Ati ɔ́su-mi ka masu ni, ani kani na mɔɔsu.”