Read Lelemi Yohane 13 Bible Online

Yohane 13 - Lelemi bible

Yohane 13

¹Amu na limeyi lɛni na kadi kégye ndi Kukpi Lili Bɔvia Limeyi lɛmmɔ ni, Yesu ɔ́ti ka uwi údu ka ɔtɔlɔ kayawi kamɛni lɛlɔ uteesie ɔti kudɔ. Na ka ɔɔyɔ́ ama bani náƒɔ-nwu bádi ƒui na kayawi kamɛni lɛlɔ ɔsu ni, ɔɔwia ka ɔtina-ma kalɛ na ɔɔyɔ́-ma geen.

²Na useyi ɔmmɔ ka Yesu ku nwuna batɛyane bésie belie kadikɔ badaku bɔdi ni, ukisine ɔmmɔ ɔ́ɔya na kasusu kekpidi kéduo Yuda ɔni ndi Simon Iskariot ubidi lili kemmo kalɛ na ɔkya Yesu kakya.

³Yesu ɔgyi nwaa ka Ɔti úti ɔyikun úte-nwu ka ɔdi ala ƒui lɛlɔ. Na ɔgyi ka Katɔti ɔmmɔ kudɔ na ɔ́si, na nwuna kudɔ kani na ɔdubɔsɔ unwini usie.

⁴Anwuɔsu ɔ́ta únye na kadikɔ mmɔ, na údie nwuna awu gyɔlɔɔ ɔmmɔ úwi, na úti ɔsa ɔ́sabla kavobi.

⁵Na údu ntu bɔdi úwi lɛkpibui lɛdi kemmo, na úse kalɔ ɔɔƒɔ nwuna batɛyane bammɔ lɛgba, na uuni-ma ku ɔsa ɔni ɔ́sabla mmɔ.

⁶Ka Yesu úbo úbedu Simon Petro kudɔ ni, Petro úye-nwu ɔnini, “Blɔti, bɔƒɔ na adubo-mi lɛgba?”

⁷Amu na Yesu údie kenye na ɔ́su-nwu ɔnini, “Elénu tɔ lɛla lɛni na mɔɔbla ɔƒɛni mɛni kalɔ. Nsu kama ni, adubunu-ni kalɔ.”

⁸Mmɔ ni, Petro úni na ɔ́su ɔnini, “Kudii! Lɛɛɛdubo kalɔ bunu na aƒɔ-mi lɛgba uwi ɔdi.” Amu na Yesu ɔ́su-nwu ɔnini, “Si étenu kalɔ na lɛƒɔ-ɔ lɛgba ni, agyi anii bɔsɔ buuubo kɔna kɔdi.”

⁹Lɛla lɛmmɔ lɛ́gyu Petro ɔtɔtɔ! Anwuɔsu ɔ́su Yesu ɔnini, “Blɔti, si use lɛni ni, ɔɔɔdi mina lɛgba lɛti! Mmomu adubɔƒɔ mina enu ku lili lɛnɔ!”

¹⁰Amu na Yesu ɔ́su-nwu ɔnini, “Ukyuli ɔni náakpi ntu ni, ɔ́lɛ bɔkpi. Anwuɔsu lɛgba kani na ɔlɛka ɔƒɔ. Bina ƒui bɛ́lɛ bɔkpi, amu ntu ukyuli unwi pɛ kani.”

¹¹Yesu ɔ́su ɔmɛni ɔsika ɔ́ɔti ukyuli ɔni ndubo-nwu kakya bɔkya. Anwuɔsu na ɔ́su ɔnini, “Bina ƒui bɛ́lɛ bɔkpi, amu ntu ukyuli unwi pɛ kani.”

¹²Ka Yesu ɔ́ƒɔ-ma lɛgba ɔ́wɔlɔ ni, ɔ́sɔku nwuna awu ɔmmɔ ɔ́kya, na ɔ́sɔ únwini úsie útélie kalɔ. Amu na úye nwuna basiakune ɔnini, “Bínu lɛla lɛni na lɛ́bla mɛni kalɔ?

¹³Bɛɛlɔ-mi bɛnii ala ɔtinane ku Blɔti, na ɔdi lɛni sɔsɔ. Ɔsika ukyuli ɔmmɔ na ndi.

¹⁴Na ami ɔni ndi Blɔti ku ala ɔtinane ni, ami náƒɔ-mii lɛgba ɔƒɛni kani. Amii lɛnɔ lɛni na ɔdi ka bɛƒɔ bina bakpana lɛgba.

¹⁵Lɛla lɛni na bɛnu bɛtɛya na bitaabla lɛnɔ ni, ani na lɛ́bla lɛ́tina-mii mɛni.

¹⁶Mɔɔsu-mii geen ka ni, kabla ɔblane ɔdi biala uletulo nwuna unwoti. Lɛni kani na ukyuli ɔni bátala uletulo ukyuli ɔni nátala-nwu.

¹⁷Ka bɛ́ti litemi geen lɛmɛni ɔƒaani ɔsu ni, lɛlɔ lɛdubɔyɔ-mii si bɛ́bla ala amɛni.

¹⁸“Ɔɔɔdi bina ƒui litemi na ndaku bɔsu ɔƒaani. Ngyi bina akɔ bani na lɛ́ƒuna. Nsu ɔlɛka Bunweni Kedee Ɔku kemmo etemila ebo-nwu kemmo lɛni kalɛ na bénweni bése banini, ‘Ukyuli ɔni nákyaku-mi kɔnu lɛkyami kemmo na bɔ́di ni, anwu nénwini únye-mi lɛlɔ.’

¹⁹“Na mɔɔsu-mii ɔmɛni lise asa ubo ubalɛ, kalɛ na si úbo úbalɛ lɛni sɔsɔ ni, na bɛti ka ami ndi Anwu ɔni nkya ɔ́si kalɔ kesekɔ.

²⁰Mɔɔsu-mii geen nnii ukyuli biala ɔni muugyingya enu taaƒɔ ukyuli ɔni na lɛ́tala ni, ami na ɔ́ƒɔ. Na ukyuli ɔni megyingya enu na waƒɔ-mi ni, anwu ɔni nátala-mi lɛnɔ na ɔ́ƒɔ.”

²¹Uwi ɔni na Yesu ɔ́su ɔmɛni ɔ́wɔlɔ ni, kayi kékpoku-nwu geen. Amu na ɔ́su-ma nwaa ɔnini, “Mɔɔsu-mii geen ka bina akɔ unwi ɔdubɔkya-mi kakya.”

²²Mmɔ ni, Yesu basiakune bammɔ bénwini bánu lɛlɔ anumi na béƒu, ɔsika baaagyi ukyuli ɔni na Yesu ɔda.

²³Na batɛyane bammɔ akɔ unwi ɔni na Yesu ɔɔyɔ́ ni, úlie ude Yesu.

²⁴Ɔmmɔ ɔsu Simon Petro ɔ́su ɔtɛyane ɔmmɔ kabɛsɛ kemmo ɔnini, “Ye-nwu ukyuli ɔni na ɔda.”

²⁵Anwuɔsu anwu lɛnɔ ɔ́bu úsie Yesu kudɔ na úye-nwu ɔnini, “Blɔti, ɔma na ɔdi?”

²⁶Amu na Yesu údie kenye ɔnini, “Ukyuli ɔni na ndubuti bodobodo ɔdi litu kutu lite ni, anwu na ɔdi.” Anwuɔsu Yesu ɔ́bwɛ bodobodo blii ɔdi útu kutu na úti úte Yuda ɔni ndi Simon Iskariot ubidi.

²⁷Na ɔni kani na Yuda ɔ́ƒɔ bodobodo ɔmmɔ ni, mmɔ kani na Satan ɔ́ƒɔ-nwu lɛlɔ kemmo ƒui. Amu na Yesu ɔ́su-nwu ɔnini, “Babla ku lɛla lɛni na aayɔ́ ka abla.”

²⁸Nsu bakladi bani nlie kadikɔ mmɔ bétenu kalɔ lɛla lɛni ɔsu na Yesu ɔ́su Yuda lɛni.

²⁹Na ka Yuda ɔmɛni nda bana kavumi ɔsu ni, batɛyane bammɔ badi bákali ka bɔsu na Yesu ɔ́ɔsu-nwu ɔnii utéye ala ani na badubuti badi limeyi uboku iye utéte bawabane ala adi.

³⁰Amu ka Yuda ɔ́ƒɔ bodobodo ɔmmɔ ni, ɔ́vi ɔ́lɛ kɔnakunwi. Na kadi káasa uwi ɔmmɔ.

³¹Uwi ɔni na Yuda ɔ́tɔlɔ kama ni, Yesu ɔ́su-ma ɔnini, “Ɔƒɛni na Katɔti ɔdubɔkɔliku Ukyuli Ɔyawine Ubi lɛnyi katɔ. Na ɔkɛnku Ubidi ɔmmɔ lɛlɔ ni, bekyuli badubɔkɔliku Ɔti ɔmmɔ lɛnyi katɔ.

³²Na si ɔkɛnku Ubi lɛlɔ na bekyuli bákɔliku Ɔti lɛnyi katɔ ni, Katɔti lɛnɔ ɔdubɔya na bekyuli bakɔliku Ubi ɔmmɔ katɔ na nwuna anumi. Na ɔdubɔya na babla lɛni kɔnakunwi.

³³“Mina bebi, uwi blii ɔdi kani nébu na lɛkya-mii kudɔ. Bɛdubo-mi bɔwia, nsu mɔɔsu-mii lɛla lɛni na lɛ́su Yudaƒuɔ benengu nnii, ‘Kesii kani na lísela ni, bilakana mmɔ bubo.’

³⁴“Na ɔƒɛni ni, muubó-mii ɔda ɔwɔdi. Bɛyɔ lɛlɔ! Na kalɛ na ami lɛ́yɔ-mii ni, lɛni kani na ɔlɛka amii lɛnɔ bɛyɔ lɛlɔ.

³⁵Na si bɛɛyɔ́ lɛlɔ lɛni ni, ukyuli biala ɔdubɔnu ɔti ka mina batɛyane na bɛdi.”

³⁶Mmɔ na Simon Petro úye-nwu ɔnini, “Blɔti, wɛ na ésela?” Amu na Yesu údie kenye ɔnini, “Kesii kani na lísela ni, alakana-mi bɔsiaku ɔƒaani. Nsu nwuna kama ni, adubɔsia-mi kama ebo mmɔ.”

³⁷Amu na Petro úye-nwu ɔnini, “Blɔti, bi ɔsu na naaakana-a bɔsiaku ɔƒaani? Nnye kagyumana ka likpi na ƒula lili!”

³⁸Mmɔ ni, Yesu údie kenye ɔnini, “Aaƒɔ́ taadi geen ka enye kagyumana ka ekpi na mina lili? Mɔɔsu-ɔ litemi geen nnii asa na akɔkɔ wete kenye ni, adubɔsu kɔtɛ sɔɔn anii aaagyi-mi.”