Read Lelemi Yohane 14 Bible Online

Yohane 14 - Lelemi bible

Yohane 14

¹Amu na Yesu ɔ́su-ma ɔnini, “Bɛda kayi bukpoku bɛya. Kalɛ kani na bɛɛƒɔ́ Katɔti taadi ni, bɛƒɔ ami lɛnɔ bɛdi.

²Kuduokɔ pii kɔkya mina Ɔti kesii. Na lísela ntáklibi kuduokɔ kɔmmɔ lise-mii. Na si buse na uuuse lɛni ni, nka naaasu ɔmɛni.

³Anwuɔsu si lísie ńtáklibi-ku lɛ́wɔlɔ ni, ndubɔsɔ linwini libo na mbakpanku-mii ntése mina kudɔ na amii lɛnɔ bilie mmɔ.

⁴Bɛgyi ulu ɔni lɛlɔ na baasia teesie kesii kani na lísela.”

⁵Amu na Toma ɔ́su-nwu ɔnini, “Blɔti, bɔɔɔgyi kesii kani na ésela. Anwuɔsu bulati ulu ɔni lɛlɔ na bɔdubɔsia asa na bubo-ɔ kudɔ.”

⁶Amu na Yesu údie kenye ɔnini, “Ami ndi ulu ɔmmɔ ku litemi geen lɛmmɔ ku ngba bɔmmɔ. Na ɔdi ulakana Katɔti kudɔ buduo, amu ntu mina lɛlɔ na ɔ́sia.

⁷Na si bɛgyi-mi sɔsɔ ni, bɛdubɔti mina Ɔti lɛnɔ. Anwuɔsu ɔƒɛni ni, bɛgyi Katɔti ɔmmɔ na bɛ́ɛnu-nwu lɛnɔ.”

⁸Amu na Ƒilipo ɔ́su Yesu ɔnini, “Blɔti, lɛla lɛni kani na bɔɔwia ndi ka edie Ƒ'ɔti ɔmmɔ atina-bu.”

⁹Mmɔ na Yesu údie kenye na úye-nwu ɔnini, “Ɔ́si uwi gyɔlɔɔ ɔni ƒui na lɛ́ɛkya-mii kudɔ mɛni ni, bɔsu na amu ada anii aaagyi-mi? Ƒilipo, ukyuli ɔni náanu-mi dii ni, ɔ́ɔnu Ati lɛnɔ. Na bi ɔsu na asɔ aasu-mi anii, ‘Tina-bu Ati ɔmmɔ’?

¹⁰Átaƒɔ átadi ka ami nliku Katɔti, na anwu lɛnɔ uliku-mi? Ala ani ƒui na lɛ́su-mii ni, aaadi ami ɔlati etemila kani na adi. Mmomu adi Katɔti ɔni nliku-mi na ɔɔbla nwuna kabla ɔdi.

¹¹Bɛƒɔ-mi bɛdi si lɛ́su-mii nnii ami nliku Katɔti, na anwu lɛnɔ uliku-mi. Si alakana ɔmɛni bɔbla ni, ɔlɛka bɛƒɔ mina ala ani na mɔɔbla lɛti bɛdi.

¹²Mɔɔsu-mii geen nnii ukyuli biala ɔni mɔɔƒɔ́-mi taadi ni, ɔdubɔbla ala ani na mɔɔbla. Na ɔdubɔbla-nya utulo kalɛ na lɛ́bla. Ɔsika bɔtɔlɔ nda nteesie mina Ɔti kudɔ.

¹³Na lɛla biala na bivele si bɛ́kpali-mi lɛnyi ni, ndubɔbla-ni lite-mii. Ɔmɛni ndubɔya na ɔkɛnku-mi lɛlɔ ni, bekyuli badubɔkɔliku mina Ɔti lɛnyi katɔ.

¹⁴Bɛkpali-mi lɛnyi bivele lɛla biala, na ndubɔbla-ni lite-mii.

¹⁵“Si bɛɛyɔ́-mi ni, bɛdubɔdi mina ɔda bubo lɛlɔ.

¹⁶Na ndubuvele mina Ɔti na ute-mii Ubunkune ɔbambadi ɔni ndubulie-mii kudɔ uwi ƒui.

¹⁷Anwu ndi Kɔyu kɔni muudie litemi geen lɛni ndanku Katɔti lɛlɔ taatina. Nsu kayawi bekyuli balakana enu bugyingya bɔƒɔ-nwu. Ɔsika balanu-nwu balati. Nsu amii ni, Kɔyu kɔmmɔ kuliku-mii na kɔdubɔƒɔ-mii lɛlɔ kemmo ƒui.

¹⁸Si lɛ́tɔlɔ-mii kudɔ ni, naaada-mii neeese aani bekpinebi. Mmomu ndubɔsɔ linwini libo-mii kudɔ.

¹⁹Kébu blii na kayawi bekyuli basɔ balanu-mi. Nsu amii bɛdubo-mi bɔnu. Na ka nli ngba ɔsu ni, amii lɛnɔ bɛdubulie ngba.

²⁰Si limeyi lɛmmɔ lídu ni, bɛdubɔti ka ami nliku mina Ɔti, na amii biliku-mi aani kalɛ na ami lɛnɔ nliku-mii.

²¹“Ukyuli biala ɔni mɔɔdi mina ɔda bubo lɛlɔ ni, anwu mɔɔyɔ́-mi. Na mina Ɔti ɔdubɔyɔ ukyuli ɔni mɔɔyɔ́-mi. Na ami lɛnɔ ndubɔyɔ-nwu na lidie lɛlɔ lɛtina-nwu na ɔnu-mi.”

²²Amu na Yuda ɔni naaadi Iskariot ubidi ɔmmɔ úye Yesu ɔnini, “Blɔti, dɛ na ɔdubɔbla na abu kani na adubudie lɛlɔ atina, na bayawine balanu-ɔ?”

²³Mmɔ na Yesu údie kenye ɔnini, “Ukyuli biala ɔni mɔɔyɔ́-mi ni, ɔdubɔdi mina ala ani mɔɔtina lɛlɔ. Na mina Ɔti ɔdubɔyɔ-nwu. Na ami ku mina Ɔti bɔdububo-nwu kudɔ na abu ku-nwu bɔsɔ bulie.

²⁴Na ukyuli ɔni naaayɔ-mi ni, uladi mina ala ani mɔɔtina lɛlɔ. Na ala ani bínu ka lɛ́su mɛni ni, ɔɔɔdi ami ɔlati kani náta mɔɔsu-nya. Mmomu mina Ɔti ɔni nátala-mi kudɔ na ási.

²⁵“Ala amɛni ƒui na lɛ́ɛsu-mii uwi ɔni na nkya-mii kudɔ.

²⁶Katɔti Kɔyu kɔni ndi Ubunkune ɔni na Katɔti ɔdubɔtala ɔkya-mii na mina lɛnyi kemmo ni, anwu ndubɔtina-mii lɛla biala. Na ɔdubɔya na binyimo ala ani ƒui na lɛ́su-mii.

²⁷“Keyi buɛɛ na lɛ́da muusé-mii. Na mina keyi buɛɛ na líti muute-mii. Ɔɔɔdi aani kalɛ na bayawine beete ukyuli keyi buɛɛ kalɛ. Kayi ku kasusu ketekpoku-mii na ala ani ndubo bɔlɛ lɛlɔ. Na bitayia.

²⁸Bínu ka lɛ́su-mii nnii, ‘Bɔtɔlɔ nda bina kudɔ, na ndubɔsɔ linwini libo-mii kudɔ.’ Si bɛgyi ka bɛɛyɔ́-mi geen ni, kubiti kɔdubɔda-mii ka lísela Ati kudɔ. Ɔsika anwu utulo-mi.

²⁹Na lɛ́ɛsu-mii ɔmɛni líse asa na ala ammɔ ebo abalɛ kalɛ na si uwi ɔni na álɛ sɔsɔ ni, na bɛƒɔ bɛdi.

³⁰Nsɔ naaakana-mii bɔtɛmiku gyɔlɔɔ. Ɔsika ukyuli ɔni mɔɔdi kayawi kamɛni lɛlɔ ni, ɔ́si ɔdubo. Na uuubo ɔyikun ɔdi na mina lɛlɔ.

³¹Nsu ɔlɛka bayawine bati ka mɔɔyɔ́ Ati, na mɔɔbla lɛla biala kalɛ kani na úbo-mii ɔda. “Amu bibo, na bɔgyu.”