Read Lelemi Yohane 15 Bible Online

Yohane 15 - Lelemi bible

Yohane 15

¹Ami ndi kɔdingyii kɔbuni, na mina Ɔti ndi kugyii kɔmɛni lɛlɔ ɔnune.

²Ɔɔmɛnɛ kagba biala kani naaakana bɔnwu teedie kɔgba kɔkladi akɔ. Na ɔɔƒiala kɔgba kɔni mɔɔnwu lɛnɔ kemmo kalɛ na kuna akɔ kɔbla nwaa na kɔkana kutaanwu kaduɛ.

³Lɛni kani na lɛ́ya na amii lɛnɔ bɛ́bla sɛɛn ɔkɛnku ala ani na lɛ́su-mii ɔsu.

⁴Bɛsɔ biliku-mi, na ami lɛnɔ ndubuliku-mii. Kugyii kagba kadi kalatɛ sɛsɛɛ taanwu ebi aka lɛti. Ɔlɛka kada kugyii kɔmmɔ lɛlɔ. Lɛni kani na amii lɛnɔ bilakana ebi adi bɔnwu, amu ntu bɛsɔ biliku-mi.

⁵“Ami ndi kɔdingyii kɔmmɔ, na amii ndi kuna kɔgba. Ukyuli ɔni nliku-mi na ami lɛnɔ nliku-nwu ni, ɔɔnwu ebi pii. Ɔsika bilakana lɛla lɛdi bɔbla si liiibo-mii kemmo.

⁶Ukyuli biala ɔni neeeliku-mi ni, use aani kugyii kagba kani békulo bávaakun na kákwii. Na kɔgba kɔmmɔ udu ni, bɔsala na baasála-ku taakya ogya na kɔkywi.

⁷Si biliku-mi na mina etemila ákɛ keliekɔ na bina lɛlɔ kemmo ni, bivele lɛla biala na bɛɛwia, na ndubute-mii.

⁸Na si bɛ́nwu ebi pii ni, ɔmɛni ɔɔyá na bekyuli baakɔliku mina Ɔti lɛnyi katɔ. Na ɔmmɔ ɔɔtina lɛnɔ ka bɛdi mina batɛyane.

⁹Mɔɔyɔ́-mii kalɛ kani na mina Ɔti ɔɔyɔ́-mi. Anwuɔsu bɛsɔ biliku-mii na ntaayɔ-mii uwi biala.

¹⁰Si bɛɛdi mina ɔda bubo lɛlɔ ni, bɛdubulieku-mi na ndubɔyɔ-mii uwi ƒui. Lɛni kani na lɛ́di mina Ɔti ɔda bubo lɛlɔ na nliku-nwu, na ɔɔyɔ́-mi uwi ƒui.

¹¹“Lɛ́ɛsu-mii ala amɛni ƒui kalɛ na ebiti ani na mɔɔkɛ́ ni, amii lɛnɔ bɛkɛ-nya na edu awɔlɔ.

¹²Na ɔda ɔni na líbo-mii ndi ɔmɛni. Bɛyɔ lɛlɔ aani kalɛ kani na ńtaayɔ-mii.

¹³Na bɔyɔ bunengudi bɔni kani na ukyuli ɔdubɔkana na ɔyɔ nwuna bakpana ndi ka uti nwuna ngba ute na bana lili.

¹⁴Na amii ndi mina bakpana si bɛɛdi mina ɔda ɔni na líbo-mii lɛlɔ.

¹⁵Nsɔ naaalɔ-mii mina kabla bablane ɔƒɛni, ɔsika ukyuli ɔni mɔɔbla ukyuli bamba kabla ni, ɔɔɔgyi lɛla lɛni na nwuna unwoti ɔɔbla. Mmomu mɔɔlɔ-mii nnii bakpana. Ɔsika lɛla biala na línu lɛ́siku mina Ɔti kudɔ ni, ani na lɛ́su-mii.

¹⁶Ɔɔɔdi amii náƒuna-mi. Mmomu ami náƒuna-mii. Na lɛ́ƒuna-mii lise ka bisie bitátaabla kabla kabuni kani ndi ebi pii ani na bɛdubɔnwu. Na abla ebi ani ndubutu uwi na elebie. Ɔmɛni ɔsu ni, Katɔti ɔdubute-mii lɛla biala na bivele-nwu si bɛ́kpali-mi lɛnyi.

¹⁷Anwuɔsu ɔda ɔni muubo-mi ndi ɔmɛni. Bɛyɔ lɛlɔ.

¹⁸“Si kayawi bekyuli beekisi-mii ni, bɛti kɔnakunwi ka ami na báka bukisi lɛni.

¹⁹Si bɛ́bla unwi ku kayawi bekyuli na bana ablala kemmo ni, badubɔyɔ-mii aani bana badi. Nsu ami lɛ́ƒuna-mii lɛ́lɛku kayawi bekyuli bammɔ akɔ, na bɛsɔ bɛɛɛdi bana badi. Ɔmmɔ ɔsu na beekisi-mii.

²⁰Binyimo ka lɛ́su-mii nnii, ‘Ukyuli ɔni mɔɔbla ukyuli bamba kabla ni, uletulo nwuna unwoti.’ Si bekyuli békpoku-mi ni, bɛti ka badubo amii lɛnɔ bukpoku. Si bádi ala ani na lɛ́tina-ma lɛlɔ ni, badubɔdi amii adi lɛnɔ lɛlɔ.

²¹Nsu kayawi bekyuli badubo-mii bukpoku, ɔsika binye na mina lɛnyi kemmo. Na baaagyi anwu ɔni nátala-mi lɛnɔ.

²²Si bubo na ńtebo ńtabasu-ma lɛla lɛdi ni, nka ukyuli ɔdi uládu-ma kɔtɔ ka bábla likpidi lɛdi. Nsu ɔƒɛni ni, basɔ balakana bɔsu banii bátati asa na bábla likpidi.

²³Na ukyuli biala ɔni muukisi-mi ni, uukisi mina Ɔti lɛnɔ.

²⁴Na si bubo na ńtebo ńtababla ala ani udu na ɔdi útabla kudii na bana akɔ ni, nka ukyuli ɔdi uládu-ma kɔtɔ ka bábla likpidi lɛdi. Nsu ɔƒɛni ni, bánu ala ani na lɛ́bla, nsu beekisi ami ku mina Ɔti.

²⁵Na ala amɛni ƒui ni, ɔlɛka ebo-nwu kemmo lɛni kalɛ kani na bénweni bése na Bunweni Kedee Ɔku kemmo banini, ‘Beekisi-mi keeke.’

²⁶“Katɔti Kɔyu kɔni ndi Ubunkune ɔ́si Katɔti kudɔ ɔdubo. Na anwu muudie litemi geen lɛni ndanku Katɔti lɛlɔ taatina. Ami ndubɔtala-nwu lɛsiku Katɔti kudɔ lɛkya-mii. Na ɔdubɔsu-mii ala ɔsiku-mi lɛlɔ.

²⁷Na amii lɛnɔ bɛsu bekyuli ala bɛsiku-mi lɛlɔ, ɔsika bɛ́ɛsiaku-mi kama ɔ́si kalɔ kesekɔ ƒui.”