Read Lelemi Yohane 18 Bible Online

Yohane 18 - Lelemi bible

Yohane 18

¹Ka Yesu ɔ́kpali katɔ lɛni ɔ́wɔlɔ ni, anwu ku nwuna batɛyane bátɔlɔ mmɔ. Na bávia Kedron Obonka bétédu nnɔ egyii kemmo kadi. Na Yesu ku nwuna batɛyane béduo kemmo kammɔ kemmo.

²Na uwi ɔmmɔ kemmo ni, kakya ɔkyane Yuda Iskariot ɔgyi likpo lɛmmɔ. Ɔsika mmɔ na Yesu ku nwuna batɛyane bátaayɔ bɔsa bɔsa.

³Anwuɔsu Yuda lɛnɔ útiku Romaƒuɔ bekpone ku kakpakɔ bagyumanane bani na bakpane benengu ku Ƒarisiƒuɔ bátala. Bekyuli bamɛni bada lɛlɔ ku ekpola ku lɛsogya ku likpo.

⁴Na ka Yesu ɔ́ti ala ani ndubo-nwu bɔlɛku ɔsu ni, ɔ́lɛ úbo anumi na úye-ma ɔnini, “Ɔma na bɛɛwia?”

⁵Amu na bédie kenye banini, “Yesu Nasareni bɔɔwia.” Mmɔ ni, Yesu údie kenye ɔnini, “Bɛɛnu-mi mɛni.” Na kakya ɔkyane Yuda lɛnɔ unye-ma akɔ.

⁶Na uwi ɔni na Yesu údie kenye ɔnini, “Bɛɛnu-mi mɛni” ni, bédi bésie kama na bébuli.

⁷Amu na Yesu ɔ́sɔ úye-ma kunyɔdi ɔnini, “Ɔma na bɛɛwia?” Na ama lɛnɔ básɔ bédie kenye banini, “Yesu Nasareni.”

⁸Amu na Yesu ɔ́su-ma ɔnini, “Lɛ́ɛsu-mii nnii bɛɛnu-mi mɛni.” Na Yesu ɔ́sɔ ɔ́su-ma ɔnini, “Si ami na bɛɛwia bɔdi ni, bɛya na bekyuli bakladi bamɛni batɔlɔ.”

⁹Na Yesu ɔ́su ɔmɛni kalɛ na ala ani na ɔ́su úbavi ebo ete lɛni uwi ɔni na ɔ́su ɔnii, “Ati, bekyuli bani ƒui na éte-mi ni, ńtayila bana akɔ ɔdi.”

¹⁰Na mmɔ ni, Simon Petro ɔda kewii kadi. Amu na ɔ́ni-ka ɔ́kpa livuo kemmo, na ɔ́nwi ɔkpane unengudi kabla ɔblane kɔdianu kɔtu úkulo. Na kabla ɔblane ɔmmɔ baalɔ Malkus.

¹¹Nsu Yesu ɔ́su Petro ɔnini, “Sɔku ƒula kewii kya livuo kemmo! Aakali anii lɛbibo ɔɔƒɛɛ ɔni na mina Ɔti úte-mi ɔnii nnii ni, naaani-nwu?”

¹²Ɔmmɔ kama ni, Romaƒuɔ bekpone ku bana ɔtɔnkune ku Yudaƒuɔ bagyumanane badi béƒie Yesu, na bényimi-nwu.

¹³Na báka-nwu buti busienku Hana kudɔ. Na Hana ɔmɛni ɔdi Kaiaƒa ulekudi ɔti. Na Kaiaƒa ɔmɛni mɔɔbla ɔkpane unengudi kabla na lɛkwa lɛmmɔ kemmo.

¹⁴Na Kaiaƒa ndi anwu ɔni násu Yudaƒuɔ batɔnkune bammɔ ka ɔdia ka ukyuli unwi ukpi na kadi ƒui lili.

¹⁵Simon Petro ku ɔtɛyane ɔbambadi básiaku Yesu kama. Na ɔtɛyane ɔbambadi ɔmmɔ ni, ɔkpane unengudi ɔmmɔ ɔgyi-nwu, anwuɔsu na ɔ́siaku Yesu na bétéduo ɔkpane unengudi ɔmmɔ kaduli.

¹⁶Nsu uwi ɔmmɔ ni, Petro anwu ɔsɔ unye kayakun. Amu na ɔtɛyane ɔmmɔ ɔ́sɔ únwini úbo úbatɛmiku ulekubi ɔni nnye ɔba kenye mmɔ, na ɔ́ya na Petro lɛnɔ uduo kaduli kammɔ.

¹⁷Mmɔ na ulekubi ɔmmɔ úye Petro ɔnini, “Ɔɔɔdi ɔnana ɔmmɔ batɛyane akɔ unwi na adi?” Amu na Petro údie kenye ɔnini, “Oowo, lɛɛɛdi bana akɔ ɔdi.”

¹⁸Ɔƒɛni ni, ka kɔyɔ kɔɔda-ma ɔsu ni, kabla bablane bammɔ ku bagyumanane bammɔ básala ogya ɔdi na benye baawaa. Na Petro lɛnɔ ɔ́gyu úsie unye-ma kudɔ mmɔ ɔɔwaa ogya ɔmmɔ.

¹⁹Uwi ɔmmɔ ni, ɔkpane unengudi ɔkya uuye Yesu ala taasiku nwuna basiakune ku ala ani na ɔɔtina lɛlɔ.

²⁰Amu na Yesu údie kenye ɔnini, “Lɛ́tina ukyuli biala ala na kadi ƒui anumi uwi biala kemmo. Na ala ani na lɛ́tina mmɔ lɛnɔ ni, Yudaƒuɔ kɔsakɔ na lɛ́tina-nya na Yudaƒuɔ kakpakɔ uwi ɔni na bana ƒui bábasa. Na ńtasu lɛla lɛdi na bɔbɛ kemmo.

²¹Na bi ɔsu na eeye-mi lɛla lɛdi na ɔmɛni lɛlɔ? Ye bekyuli bani nénu-mi bɔtɛmi. Ama ngyi ala ani na lɛ́su-ma.”

²²Ka Yesu ɔ́su-nwu lɛla lɛmɛni ɔ́wɔlɔ ni, bagyumanane bammɔ akɔ unwi úbo-nwu kɔnu ɔtugya na úye Yesu ɔnini, “Ɔkpane Unengudi na eedie kenye lɛni?”

²³Amu na Yesu úye-nwu ɔnini, “Si lɛ́su lɛla lɛni naaadia ni, su ukyuli biala na mɛni lɛla lɛmmɔ. Na si ńtasu lɛla likpidi lɛdi bɔdi ni, bi ɔsu na ébo-mi kɔnu ɔtugya?”

²⁴Mmɔ na Hana úti Yesu ɔni na bámu bényimi bada úmene Ɔkpane Unengudi Kaiaƒa.

²⁵Uwi ɔmmɔ ni, Simon Petro ɔmu unye ogya kudɔ mmɔ ɔɔwaa ogya. Mmɔ na bekyuli bammɔ béye-nwu banini, “Ɔɔɔdi awɔ ndi ɔnana ɔmmɔ kama basiakune akɔ unwi iye?” Mmɔ ni, Petro ɔ́tuala ɔnini, “Oowo, lɛɛɛdi bana akɔ ɔdi!”

²⁶Amu na ɔkpane unengudi nwuna kabla ɔblane ɔdi ɔni na ɔnwani ndi okloƒu ɔni kɔtu na Petro ɔ́nwi ɔ́mami ni, úye Petro ɔnini, “Ɔɔɔdi awɔ na lɛ́nu na nnɔ egyii kemmo mmɔ ka enye-nwu kudɔ iye?”

²⁷Mɛni lɛnɔ ni, Petro ɔ́sɔ ɔ́tuala ɔnini, “Oowo!” Na mmɔ mmɔ ni, akɔkɔ úte kenye.

²⁸Amu na ɔtanta tutuutu ni, bákpanku Yesu básiku Kaiaƒa kudɔ mmɔ, na béti-nwu bésienku Romaƒuɔ aban unengudi kaduli. Nsu Yudaƒuɔ bammɔ béteduo mmɔ, ɔsika na bana ɔda bubo kenye ni, bátayɔ ka beduo mmɔ na ɔya bana lɛlɔ lise lɛlɔ ka badubo Kukpi Lili Bɔvia Limeyi bɔdi ɔsu.

²⁹Ɔmmɔ ɔsu Pilato ɔ́lɛ úbo-ma kudɔ na ɔba kenye mmɔ, na úye-ma ɔnini, “Likpidi lɛmani na ɔ́bla?”

³⁰Amu na bédie kenye banini, “Si ɔɔɔdi likpidi bonwu lɛdi na ɔ́bla ni, nka bulakpanku-nwu buleboku ƒula kudɔ.”

³¹Anwuɔsu Pilato ɔ́su-ma ɔnini, “Amu na amii alati bitiku-nwu na bitátɛku-nwu litemi ɔkɛnku bina ɔda bubo lɛlɔ.” Mmɔ na Yudaƒuɔ bammɔ bédie kenye banini, “Roma aban útete-bu kuƒi ka abu alati bɔdu ukyuli kukpi kɔtɔ.”

³²Na ala amɛni álɛ lɛni kalɛ na litemi lɛni na Yesu ɔ́su ɔ́siku kukpi kɔni udu na ɔdubo bukpi lɛlɔ ubo ute lɛni sɔsɔ.

³³Amu na Pilato únwini útéduo kaduli mmɔ, na ɔ́lɔ Yesu na úye-nwu ɔnini, “Awɔ ndi Yudaƒuɔ Ɔga?”

³⁴Mmɔ ni, Yesu únwini na úye-nwu ɔnini, “Awɔ ɔlati muuye-mi kenye kamɛni, munuu bekyuli bamba násu-ɔ banii ye-mi nu?”

³⁵Amu na Pilato údie kenye ɔnini, “Aabu anii Yudani na ndi? Awɔ ɔlati ƒula kadi bekyuli ku bakpane benengu néti-ɔ bábakya-mi kɔnu. Bi na ábla?”

³⁶Mmɔ na Yesu ɔ́su-nwu ɔnini, “Mina lɛga bɔdi bútasi kalɔ kamɛni lɛlɔ. Si banii kalɔ kamɛni lɛlɔ lɛga bɔdi na lɛdi ni, nka mina basiakune badubukpo bete-mi kalɛ na neeeduo Yudaƒuɔ benengu enu kemmo. Nsu ni, ɔɔɔdi lɛni na use. Mina lɛga bɔdi lɛ́si kesii bamba.”

³⁷Ka ɔ́su-nwu lɛni ni, Pilato úye-nwu ɔnini, “Anwuɔsu ɔga na adi?” Amu na Yesu ɔ́su-nwu ɔnini, “Awɔ mɔɔsu ka ɔga na ndi. Na ɔmɛni ɔsu geen na báwɔ-mi. Na líbo kalɔ kamɛni lɛlɔ kalɛ na mbedie litemi geen lɛtina. Na ukyuli biala ɔni nkɛnku litemi geen lɛmmɔ ni, uunú lɛla lɛni na mɔɔsu.”

³⁸Mmɔ ni, Pilato úye-nwu ɔnini, “Bi ndi litemi geen?” Mmɔ kani na Pilato ɔ́sɔ únwini úsie keyi na Yudaƒuɔ bammɔ kudɔ na útásu-ma ɔnini, “Naaanu likpidi lɛni ɔsu na lɛdu ukyuli ɔmɛni kɔtɔ.

³⁹Nsu na bina ɔda bubo bɔni na bibo kenye ni, si údu Kukpi Lili Bɔvia Limeyi bɔdi uwi ni, uwi biala mɔɔnyonu batɔntɛne akɔ unwi. Anwuɔsu ni, bɛɛwia ka lɛnyonu Yudaƒuɔ Ɔga?”

⁴⁰Amu na bana ƒui báva básu banini, “Oowo! Ɔɔɔdi anwu, mmomu Baraba!” Na Baraba ɔmɛni ɔdi bekyuli ɔdune.