Read Lelemi Yohane 19 Bible Online

Yohane 19 - Lelemi bible

Yohane 19

¹Anwuɔsu ni, Pilato ɔ́ya na bagyumanane béti kɔbuli kɔni na bélii básala na bébo Yesu kaduɛ.

²Na bekpone bammɔ béti liyu kagba bédi kabwa na béti bébi-nwu lili. Na béti awu ugyiedi gyɔlɔɔ ɔdi aani ɔga kalɛ bákya-nwu.

³Na beesié teebo-nwu kudɔ taabasu-nwu banini, “Yiidu! Yudaƒuɔ Ɔga ɔ́si ɔdubo o-o!” Na si básu-nwu lɛni ni, na bébo-nwu kɔnu ɔtugya.

⁴Ɔmmɔ kama ni, Pilato ɔ́sɔ ɔ́lɛ úbo bekyuli lisu lɛmmɔ kudɔ úbasu-ma ɔnini, “Bɛnu! Ndubo-nwu bɔkpanku buboku bina anumi na mbatina-mi ka ńtanu likpidi lɛdi na nwuna lɛlɔ kalɛ na lɛdu-nwu kukpi kɔtɔ.”

⁵Anwuɔsu Yesu ɔ́lɛ úbo keyi mmɔ, na liyu kabwa kammɔ kebi-nwu lili na ɔkya awu ugyiedi gyɔlɔɔ ɔmmɔ. Mmɔ ni, Pilato ɔ́su ɔnini, “Bɛnu! Ukyuli ɔmmɔ na ɔdi mɛni!”

⁶Amu na uwi ɔni na bakpane benengu ku Yudaƒuɔ benengu bammɔ bánu-nwu ni, báva básu banini, “Kana-nwu mana ugyii lɛlɔ! Kana-nwu mana ugyii lɛlɔ!” Mmɔ ni, Pilato ɔ́su-ma ɔnini, “Amii biti-nwu na bitákana-nwu bɛmana ugyii lɛlɔ. Ami ńtanu likpidi lɛdi na nwuna lɛlɔ kalɛ na lɛdu-nwu kɔtɔ.”

⁷Amu na bekyuli lisu lɛmmɔ básu banini, “Bubo ɔda bubo bɔni mɔɔtina ka ɔlɛka ukpi. Ɔsika ɔ́su ɔnii ɔdi Katɔti Ubidi.”

⁸Uwi ɔni na Pilato únu-ma kenye kamɛni ni, liƒu lɛ́sɔ lɛ́da-nwu libu.

⁹Ɔmmɔ ɔsu ni, ɔ́sɔ únwini útéduo kaduli mmɔ na úye Yesu ɔnini, “Wɛ na ási?” Nsu Yesu útedie kenye kadi.

¹⁰Amu na Pilato úye-nwu ɔnini, “Eledie lɛla lɛdi kenye alasu-mi? Aaagyi ka mbo kenyekɔ na lɛnyonu-ɔ, na mbo kenyekɔ na lɛya na bakana-a bamana ugyii lɛlɔ?”

¹¹Mmɔ ni, Yesu údie kenye ɔnini, “Nka alákɛ ɔyikun ɔdi na mina lɛlɔ si ɔɔɔdi Katɔti néte-ɔ kuƒi kɔmmɔ. Anwuɔsu ukyuli ɔni néti-mi ɔ́kya-a kɔnu kemmo ni, ɔ́bla likpidi útulo-ɔ.”

¹²Ka Pilato únu lɛla lɛmɛni ni, ɔ́wia ulu ɔni lɛlɔ na ɔsia na ɔnyonu Yesu. Nsu bekyuli bammɔ bakya baava taasu banini, “Si ányonu-nwu ni, asɔ aaadi Ɔga Unengudi Kaesare kabla ɔblane! Na ukyuli biala ɔni meti lɛlɔ mabla ɔga ni, ɔ́ta únye Kaesare ɔmmɔ lɛlɔ!”

¹³Ɔmmɔ ɔsu ka Pilato únu etemila amɛni ni, ɔ́kpanku Yesu ɔ́lɛku na útélie litemi bɔtɛ liboku lɛlɔ kesii kani baalɔ banii Atabi Kasalakɔ. Na Hebri lɛdi kemmo banii Gabata.

¹⁴Uwi ɔmmɔ ɔbla aani ɔƒiiwi. Na lɛdi limeyi lɛni kadi kegye ndi Kukpi Lili Bɔvia Limeyi lɛmmɔ. Na Pilato ɔ́su bekyuli bammɔ ɔnini, “Bɛɛnu bina Ɔga!”

¹⁵Amu na báva básu banini, “Gyunku-nwu! Gyunku-nwu! Kana-nwu mana ugyii lɛlɔ!” Mmɔ na Pilato úye-ma ɔnini, “Bɔkana na nkana bina Ɔga mmana ugyii lɛlɔ?” Amu na bakpane benengu bammɔ básu-nwu banini, “Buuubo ɔga ɔdi buuutulo Romaƒuɔ Ɔga Unengudi Kaesare!”

¹⁶Ka básu lɛni ni, Pilato úti Yesu úte-ma ɔnii batákana-nwu bamana ugyii lɛlɔ.

¹⁷Anwuɔsu bekpone bammɔ bákpanku Yesu bátɔlɔku. Na báya na anwu ɔlati uti ugyii ɔni lɛlɔ na badubo-nwu bɔkana bɔmana mmɔ. Na báyu ulu bésie kesii kani baalɔ banii Opokuo kalɔ. Na Hebri lɛdi kemmo ndi Golgota.

¹⁸Mmɔ na bákana-nwu bámana ugyii lɛlɔ. Na mmɔ lɛnɔ ni, bákana nkyuli inyɔ bamba badi bámana ligyii lɛlɔ na Yesu kɔmii ku kɔdianu.

¹⁹Pilato ɔ́ya na bénweni ala adi básia kalɛkɛ kadi lɛlɔ na úti-ka ɔ́mana Yesu ugyii ɔmmɔ lɛlɔ. Na etemila ammɔ ndi amɛni. Yesu Nasareni, Yudaƒuɔ Ɔga.

²⁰Yudaƒuɔ pii báka ala amɛni, ɔsika kesii kani na bákana Yesu bámana ugyii lɛlɔ mmɔ ude ɔma unengudi ɔmmɔ. Na Pilato únweni ala ammɔ lɛnɔ na Hebri ku Roma ku Griki lɛdi kemmo.

²¹Lɛla lɛmɛni lítayɔ Yudaƒuɔ bakpane benengu bammɔ kaƒɔ. Anwuɔsu bátásu Pilato banini, “Útalɛka enweni anii Yudaƒuɔ Ɔga, mmomu ukyuli ɔmɛni ɔ́su ɔnii ɔdi Yudaƒuɔ Ɔga.”

²²Amu na Pilato údie kenye ɔnini, “Lɛla lɛni na línweni ni, líinweni lɛ́wɔlɔ.”

²³Uwi ɔni na bekpone bammɔ bákana Yesu bámana ugyii lɛlɔ báwɔlɔ ni, béti nwuna adala na béle-nya akpa ene. Na ɔdi biala úti lɛkpa linwi. Na Yesu awu gyɔlɔɔ ɔmmɔ ni, bétele-nwu. Na awu ɔmmɔ ni, bátaka-nwu kesii kadi, mmomu budi sɔɔn na bédi-nwu ɔ́si limɔ útédu lɛgba.

²⁴Na bekpone bammɔ básu lɛlɔ banini, “Buláni awu ɔmɛni bulabwɛ. Mmomu bɛya na bɔtu egulabi bɔnu bula akɔ ɔni menwini mewi na buti awu ɔmmɔ bute-nwu.” Na ɔkɛnku ɔmɛni ɔsu ni, Bunweni Kedee Ɔku kemmo etemila ébo éte lɛni sɔsɔ uwi ɔni na básu bése banii, “Béle-mi lɛlɔ ala béte lɛlɔ. Na bátu egulabi na mina awu lɛlɔ.” Na lɛni geen lɛnɔ na bekpone bammɔ bábla.

²⁵Na Yesu ugyii ɔmmɔ kalɔ ni, Yesu uni ku uni ɔnwani ulekubi ku Klopa ulekudi Maria ku Maria Magdalene benye.

²⁶Yesu ɔ́nu uni ku nwuna ɔtɛyane ɔni na ɔɔyɔ́ geen ka benye. Anwuɔsu ɔ́su uni ɔnini, “Nna, aanu ƒ'ubidi.”

²⁷Amu na ɔ́su ɔtɛyane ɔmmɔ lɛnɔ ɔnini, “Aanu ƒ'ini.” Anwuɔsu ɔ́si uwi ɔmmɔ ni, ɔtɛyane ɔmmɔ ɔ́ƒɔ-nwu úsienku kaduli na ɔɔnu-nwu lɛlɔ.

²⁸Yesu ɔ́ti ka ɔƒaani ni, ɔ́ɔwɔlɔ lɛla biala na ɔlɛka ɔbla. Na kalɛ na Bunweni Kedee Ɔku kemmo ala ani bénweni bése ebo ete lɛni ɔsu ni, Yesu ɔ́su ɔnini, “Utukwɛ ɔɔda-mi.”

²⁹Amu na kesii kani na ala amɛni aalɛ́ mmɔ ni, kalaku bonwu kadi kese na ntɛ bɔni nányi buwi. Anwuɔsu béti unwo bátu ugyii ɔdi baalɔ banii hisope lɛlɔ na bánwu bákya ntɛ bɔmmɔ kemmo, na bákɔliku bátu-nwu kenye.

³⁰Ka Yesu ɔ́ni ntɛ bɔmmɔ ɔ́wɔlɔ ni, ɔ́su ɔnini, “Ɔƒɛni amu ɔ́sa!” Ka ɔ́su lɛni ɔ́wɔlɔ ni, ɔ́kya lili kalɔ na ɔ́yula.

³¹Amu na Yudaƒuɔ benengu bammɔ básu Pilato banii ute-ma kuƒi na bekyuli bani na bákana bámana ugyii lɛlɔ mmɔ ni, na bebo-ma lɛgba ekubi baƒɛ na baƒami-ma na ugyii lɛlɔ mmɔ. Yudaƒuɔ bammɔ báwia ka babla ɔmɛni ɔsika limeyi lɛmmɔ lɛdi Ƒida. Na bátayɔ ka bekyuli bammɔ ɔlɔna ɔƒa ligyii lɛlɔ mmɔ utédu kadi kégye kani ndi bana lɛnwunameyi. Na lɛnwunameyi lɛni ndubo mmɔ lɛnɔ lɛdi limeyi linengudi geen lɛni nse kedee ƒui lite-ma.

³²Ɔmmɔ ɔsu bekpone bammɔ bésie na nkyuli inyɔ bani na bákana bámana ugyii lɛlɔ bébunku Yesu mmɔ ni, bébo-ma lɛgba báƒɛ.

³³Nsu ka bébedu Yesu kudɔ ni, bánu ka úukpi. Anwuɔsu anwu ni, bátaƒɛ-nwu lɛgba.

³⁴Mmomu ukpone unwi ɔ́tu-nwu ɔƒɛnyi ɔ́ƒuala ku nwuna lɛtula. Na mmɔ mmɔ ni, ubugya ku ntu bɔ́lɛ.

³⁵Ukyuli ɔni nánu ala amɛni ni, anwu muunweni-nya kalɛ na amii lɛnɔ bɛƒɔ bɛdi. Na lɛla lɛni na ɔ́su lɛnɔ ni, sɔsɔ na ɔdi. Na ɔgyi nwaa ka litemi geen na ɔɔsu.

³⁶Bábla ala amɛni ƒui kalɛ na Bunweni Kedee Ɔku kemmo etemila ebo ete lɛni ɔni na bénweni banini, “Nwuna likubi linwi muedi balaƒɛ-ni.”

³⁷Na bénweni lɛla bamba lɛnɔ banini, “Bekyuli badubɔnu anwu ɔni na bátu-nwu lɛtula ɔƒɛnyi mmɔ.”

³⁸Ɔmmɔ kama ni, Yoseƒ ɔni nási ɔma ɔni baalɔ banii Arimatea ni, úvele Pilato ɔnii ɔnyonu Yesu ukpine ute-nwu. Na Yoseƒ ɔmɛni ɔdi Yesu kama basiakune akɔ unwi. Nsu útabla na bekyuli bati, ɔsika ɔɔyia Yudaƒuɔ benengu bammɔ ɔsu. Na ka Pilato ɔ́tuna ni, úbo úbaƒɔ ukpine ɔmmɔ ɔ́tɔlɔku.

³⁹Na Nikodemo ɔni nábɛ útánu Yesu usien ɔdi ni, anwu lɛnɔ ɔsiaku Yoseƒ ɔmɛni. Na evogyii ani na beeti taaklibi ukpine ni, Nikodemo ɔ́ya na béti-nya pii geen basiaku-ma.

⁴⁰Amu na nkyuli inyɔ bamɛni béti Yesu ukpine ɔmmɔ na bátáwɛɛ-nwu evogyii ammɔ ƒui na béti adi aƒualadi abuni bényimi bada-nwu lɛlɔ ƒui aani kalɛ na Yudaƒuɔ baaklibi ukpine asa na baavá-nwu.

⁴¹Na kesii kani na bádu Yesu mmɔ ni, likpo blii lɛdi lɛkya mmɔ. Na mmɔ ni, béku kaƒiɔtɔ kawɔdi kadi bése na bátava tɔ ukyuli kana kemmo kudii.

⁴²Ɔƒɛni ka kadi kegye kani ndi lɛnwunameyi na kaƒiɔtɔ kammɔ lɛnɔ kede mmɔ ɔsu ni, béti Yesu bátáva mmɔ.