Read Lelemi Yohane 2 Bible Online

Yohane 2 - Lelemi bible

Yohane 2

¹Na limeyi lɛtɛdi lɛni nsia ni, bekyuli badi baawɛɛ uleku ɔdi na ɔma ɔni baalɔ Kana na Galilea kalɔ lɛlɔ. Mmɔ ni, Yesu uni Maria lɛnɔ ɔ́kya bebunkune bammɔ akɔ.

²Na bálɔ Yesu ku nwuna batɛyane lɛnɔ banii bebo uleku ketikɔ mmɔ.

³Uwi ɔni na ntɛ bɔni básala bɔ́sa ni, Yesu uni úbo Yesu kudɔ úbasu-nwu lɛla lɛni mɔɔlɛ́ mɛni ɔnini, “Ntɛ bɔmmɔ bútedu.”

⁴Amu na Yesu ɔ́su-nwu ɔnini, “Uleku, ɔɔɔdi awɔ masu-mi lɛla lɛni mabla. Uwi ɔni na mete kebunku útedu tɔ.”

⁵Mmɔ na Yesu uni ɔ́su kabla bablane bani nnye mmɔ ɔnini, “Binye kagyumana na bɛbla lɛla lɛni na wasu-mii ɔnii bɛbla.”

⁶Uwi ɔmmɔ ni, atabi kutubui bonwu aku alɛ mmɔ. Na kadi biala kadubɔƒɔ aani alɔkumbui ene iye aku. Aku na Yudaƒuɔ béteeti taabla bana lɛlɔ bɔƒɔ ɔdi.

⁷Amu na Yesu ɔ́su kabla bablane bammɔ ɔnii bedu ntu bewi-ku kemmo. Anwuɔsu bédu ntu béyile-ku tɛtɛɛtɛ utédu atu.

⁸Amu na ɔ́su-ma ɔnini, “Bidu bɔdi bisienku ukyuli ɔni muubo ntɛ ɔda.” Na bédu-mu bésienku-nwu.

⁹Ka unengu ɔmɛni útu ntu bɔni nénwini ntɛ mɛni ɔ́nu ni, útati kesii kani na ntɛ bɔmmɔ bɔ́si. Nsu kabla bablane bani nédu ntu bɔmmɔ ama báti. Anwuɔsu unengu ɔmmɔ ɔ́lɔ uleku ɔgya,

¹⁰na ɔ́su-nwu ɔnini, “Bi na ábla mɛni? Ntɛ bɔbuni na bekyuli pii beeti teese kalɔ na si uwi ɔni na báani na búdu-ma ɔkwɛ asa beeti bukpidi teeboku. Nsu awɔ ni, ɔƒɛni na édie ntɛ bɔbuni keyi!”

¹¹Lɛla lɛni nálɛ na Kana na Galilea mɛni ni, ani ndi akɔla budie taatina edeedi ani na Yesu ɔ́bla. Na ka údie nwuna ɔyikun ɔ́tina lɛni ni, nwuna batɛyane báƒɔ-nwu bádi.

¹²Na uleku buti kama ni, Yesu ku uni ku Yesu banwani ku batɛyane bammɔ bátɔlɔ bésie ɔma ɔni baalɔ banii Kapernaum. Na bélie mmɔ emeyi alɛɛ adi.

¹³Lebo lɛmmɔ ni, uwi ɔdaku budu ka badi Yudaƒuɔ Kukpi Lili Bɔvia Limeyi, na Yesu lɛnɔ úsie Yerusalem.

¹⁴Ka údu Katɔti kakpakɔ ɔtɔ anumi ni, ɔ́nu ka beyedine belie beeyé ɔmantɛ bakɔ ku baƒonu ku babloduma bete lɛkpa. Na egulabi bavumanane lɛnɔ belie bana egulabi kasiakɔ.

¹⁵Anwuɔsu Yesu úlii kɔbuli kɔdi ɔ́sala na ɔ́bɔku-ma ku baƒonu ku ɔmantɛ bakɔ bammɔ ɔ́lɛku mmɔ. Amu na úgyingya egulabi ammɔ úwi kalɔ na únwini bana ala kasiakɔ úbi kalɔ.

¹⁶Amu na úsie bekyuli bani muuyé babloduma kudɔ na ɔ́bɔku-ma ɔnini, “Bɛda ala amɛni bidie mɛni, na biteti mina Ɔti ɔtɔ bitenwini kuye kadikɔ!”

¹⁷Mmɔ ni, nwuna batɛyane bényimo lɛla lɛni nkya Bunweni Kedee Ɔku kemmo ka Ukyuli Ɔƒunadi ɔ́su Katɔti ɔnini, “Ƒula ɔtɔ lɛlɔ bɔnu anumi adubo-mi bugyie aani ogya ɔni mɔɔda na mina lɛlɔ kemmo.”

¹⁸Na ɔmɛni ɔsu ni, Yudaƒuɔ batɔnkune bádɔnku Yesu banini, “Ɔma nátala-a lɛla lɛmɛni udu bɔbla? Akɔla budie bɔtina bɔmani na adubɔbla na eti atina-bu kenyekɔ kani na ebo ɔsu na aabla lɛni?”

¹⁹Yesu údie kenye ɔnini, “Bɛƒɛ Katɔti ɔtɔ ɔmɛni, na ndubɔtalaku-nwu linyene limeyi lɛtɛdi lɛlɔ!”

²⁰Amu na báva básu banini, “Bi na aasu? Bábla kabla akwa aavlene-aku sɔɔn asa na bátu ɔtɔ ɔmɛni! Na awɔ aasu anii adubɔtalaku-nwu enyene emeyi atɛ kemmo?”

²¹Nsu bátati ka Yesu ɔ́tɛmi ɔ́siku nwuna ɔlɔna lɛlɔ aani Katɔti kakpakɔ ɔtɔ ɔmmɔ.

²²Kama ƒui ka Katɔti ɔ́gyila-nwu ɔ́lɛku bekpine akɔ úboku ngba ni, asa na nwuna batɛyane bényimo ka ɔ́su lɛni. Anwuɔsu báƒɔ ala ani na bénweni na Bunweni Kedee Ɔku kemmo ku ala ani na Yesu ɔ́su mmɔ bádi.

²³Uwi ɔni na Yesu ɔ́kya Yerusalem na Kukpi Lili Bɔvia uwi kemmo ni, bekyuli pii bánu akɔla lidu lidu lɛni na ɔ́bla na báƒɔ-nwu bádi ka ubo Katɔti ɔyikun.

²⁴Nsu Yesu útanyonu lɛlɔ útete bekyuli bammɔ, ɔsika ɔgyi bekyuli ƒui.

²⁵Anwuɔsu uláwia ka ukyuli ɔdi ɔtina-nwu lɛla lɛdi na ukyuli lɛlɔ, ɔsika anwu ɔlati ɔgyi ukyuli ɔyawine udu geen.