Read Lelemi Yohane 3 Bible Online

Yohane 3 - Lelemi bible

Yohane 3

¹Uwi ɔmmɔ kemmo ni, Yudaƒuɔ ɔtɔnkune ɔdi ɔkya ɔni nkya lɛkpa lɛni baalɔ Ƒarisiƒuɔ akɔ, na baalɔ-nwu banii Nikodemo.

²Ɔ́bɛ úbo Yesu kudɔ usien na úbeye-nwu ɔnini, “Ala ɔtinane, buvele, bula ƒui bɔgyi ka awɔ nási Katɔti kudɔ ébo abatina-bu ala, ɔsika ukyuli biala ɔdi ulakana akɔla budie bɔtina bɔmɛni udu bɔbla amu ntu Katɔti uliku-nwu.”

³Amu na Yesu údie kenye ɔnini, “Mɔɔsu-ɔ geen ka ni, si bátasɔku ukyuli bátawɔ ni, Katɔti ulakana lɛga bɔdi na nwuna kayi kemmo.”

⁴Amu na Nikodemo úye-nwu ɔnini, “Bi na aasu? Dɛ na ukyuli ɔni náabi lɛlɔ wasɔ wetéduo uni kaƒɔ kemmo na basɔku-nwu bawɔ?”

⁵Amu na Yesu ɔ́su-nwu ɔnini, “Mɔɔsu-ɔ geen ka ni, si bátawɔ ukyuli bátalɛku ntu ku kɔyu kemmo ni, ulakana Katɔti lɛga kadikɔ mmɔ buduo.

⁶Ɔsika ukyuli ɔni na ɔlɔna kemmo na básia báwɔ-nwu ni, ɔdi ɔlɔna kani. Nsu Katɔti Kɔyu kɔdubɔwɔ kɔyu kemmo bekyuli.

⁷Anwuɔsu utabla-a dɛye dɛye si mɔɔsu nnii ɔlɛka basɔku-mii bawɔ.

⁸Ɔƒɛƒɛɛ uukpó teesie kesii kani na ɔɔyɔ́. Nsu alakana bɔti kesii kani na ɔɔsí iye kesii kani na úsela ina ka eenú-nwu kɔku. Lɛni kani na aláti kalɛ na Kɔyu kemmo kabla keeti ngba bɔwɔdi teete ukyuli.”

⁹Amu na Nikodemo úye-nwu ɔnini, “Dɛ na ɔmɛni udu ɔɔlɛ́?”

¹⁰Yesu ɔ́su-nwu ɔnini, “Adi bula kadi Israelƒuɔ ala ɔtinane kemmo ɔdi. Bi ɔsu na elenu ala amɛni kalɔ?

¹¹Mɔɔsu-ɔ geen ka bɔɔtɛmi taasiku ala ani na bɔgyi lɛlɔ, na buudie ani na bɔ́nu kenye teete-mii. Nsu bilaƒɔ ala ani kenye na buudie teete-mii taadi.

¹²Na si mɔɔsu-mii ala ani mɔɔlɛ́ bina akɔ na kalɔ lɛlɔ mɛni na bilaƒɔ-mi taadi ni, dɛ na bɛdubɔkana na bɛƒɔ-mi bɛdi si lɛ́su-mii lɛla lɛni mɔɔlɛ́ na katɔ?

¹³Ukyuli ɔdi útesie katɔ utatáwia ala amɛni udu ntu ami Ukyuli Ɔyawine Ubi kani. Na ami kani nási katɔ líbo kayawi kamɛni lɛlɔ.

¹⁴“Bínu na Mose ɔku kalɛ na ɔ́kana kɔlakpi kɔni bávɔ ku lɛbuala ɔ́mana ugyii lɛlɔ, na ɔ́kɔliku-ku katɔ na ketele kukuuku kalɛ na bekyuli bammɔ bakɛ ngba. Lɛni kani na ɔlɛka bakɔliku ami Ukyuli Ɔyawine Ubi katɔ,

¹⁵kalɛ na ukyuli biala ɔni maƒɔ-mi madi ni, ɔkɛ ngba bɔni nsɔ naaadubo bɔsa kudii.

¹⁶“Ka Katɔti ɔɔyɔ́ bayawine geen ɔsu ni, úti Ubidi unwi pɛ ɔmmɔ úte. Na ukyuli biala ɔni mɔɔƒɔ́-nwu taadi ni, ulayii. Mmomu ɔdubɔkɛ ngba bɔni nsɔ naaadubo bɔsa kudii.

¹⁷Ɔsika Katɔti útatala Ubidi ɔnii ubadu bekyuli bayawine kɔtɔ. Mmomu ɔkɛnku Ubidi ɔmmɔ lɛlɔ ni, ubedie-ma na bakɛ bɔƒɔ.

¹⁸“Bekyuli bani mɔɔƒɔ́-nwu taadi ni, Katɔti uládu-ma kɔtɔ. Nsu bekyuli bani naaadubo-nwu bɔƒɔ bɔdi ni, Katɔti ɔ́ɔtɛku-ma litemi kukuuku na ɔ́ɔdu-ma kɔtɔ ka bátaƒɔ Katɔti Ubidi unwi pɛ bátadi ɔsu.

¹⁹Lɛla lɛni ɔsu na ɔ́du-ma kɔtɔ ndi ka bukeye bɔ́si katɔ búbo kayawi, nsu bekyuli báyɔ lɛdisa bétulo bukeye bɔmmɔ. Ɔsika bana ablala adi likyulikpi ala.

²⁰Ukyuli biala ɔni mɔɔbla likyulikpi ala ni, ukisi bukeye na ulakpɛ teede-mu. Ɔsika ɔɔyia ka nwuna ablala adubɔlɛ keyi na Katɔti ɔdubɔni-nwu kɔtu.

²¹Nsu ukyuli biala ɔni nda nwuna ngba na ulu lɛlɔ geen ni, ɔɔkpɛ́ teede bukeye. Ɔsika ɔɔwia ka bukeye bɔmmɔ budie nwuna Katɔti bɔsiaku ablala atina.”

²²Ɔmɛni kama ni, Yesu ku nwuna batɛyane bátɔlɔ Yerusalem bésie likpo bamba na Yudea kalɛkɛ lɛlɔ bátákya emeyi alɛɛ adi. Na bákya mmɔ bátaabla ketu kemmo ntu bɔkpila ɔdi teete bekyuli.

²³Na uwi ɔmmɔ kemmo ni, Yohane lɛnɔ ɔkya ɔɔkpila bekyuli ntu na Ainon na Salim kudɔ, ɔsika ntu bɔkya mmɔ kaduɛ, na bekyuli pii beesié-nwu kudɔ ka ɔkpila-ma ntu.

²⁴Uwi ɔmɛni kemmo ni, útedu tɔ ka kalɔ kammɔ ɔga úƒie Yohane ɔ́kya aban ɔtɔ.

²⁵Limeyi linwi lɛdi ni, Yohane batɛyane ku Yudani ɔdi bése kalɔ baakya unyeƒi na ntu bɔkpi ɔdi lɛlɔ.

²⁶Anwuɔsu bébo Yohane kudɔ na béye-nwu banini, “Ala ɔtinane, buvele, ukyuli ɔni na átina-bu na Yordan Ketu ɔvi ngye na édie-nwu kenye ni, anwu lɛnɔ ɔɔbla ketu kemmo ntu bɔkpila ɔdi ɔmɛni. Ɔdia kalɛ na bula bekyuli ƒui békeli bésela-nwu kudɔ mɛni?”

²⁷Yohane údie kenye ɔnini, “Ukyuli biala ulakɛ lɛla lɛdi si ɔɔɔdi Katɔti néte-nwu lɛla lɛmmɔ.

²⁸Amii alati bɛdubudie-mi kenye ka lɛ́su-mii nwaa nnii ɔɔɔdi ami ndi Ukyuli Ɔƒunadi ɔmmɔ. Nsu Katɔti ɔ́tala-mi ka lɛgyu lɛtɔ-nwu.

²⁹Na ɔƒɛni ni, anwu ɔni ndi uleku ɔgya ɔmmɔ mbo uleku. Na uleku ɔgya ɔkpana ɔni nnye uleku buti kabla kamɛni kenye ni, si uwi ɔni na uleku ɔgya ku uleku ɔmmɔ bása baatɛmi bana lɛlɔyɔ atɛ ni, uunye teenu-nya ku ebiti. Lɛni kani na ami lɛnɔ ebiti aada-mi geen aani uleku ɔgya ɔkpana ɔmmɔ.

³⁰Nwuna lɛnyi ɔlɛka lɛkɔ katɔ, na mina lɛdi lɛyii lɛkya.

³¹“Ukyuli Ɔƒunadi ɔni na katɔ na ɔ́si ni, utulo ukyuli biala. Na ukyuli ɔni nási kalɔ lɛnɔ ni, kalɔ ukyuli kani na ɔdi. Na ɔɔtɛmi ala taasiku kalɔ lɛlɔ. Anwu ɔni nási Katɔ Ɔga Ɔma ni, utulo ukyuli biala.

³²Na anwu muudie ala ani na ɔ́nu ku ani na únu mmɔ kalɔ. Nsu ɛlɛɛ kani mɔɔƒɔ́-nwu taadi.

³³Bani mɔɔƒɔ́-nwu taadi ni, beedie taatina nwaa ka ala ani na Katɔti ɔɔsu ni, anya ndi litemi geen.

³⁴Ukyuli Ɔƒunadi ɔni na Katɔti ɔ́tala ni, anwu mɔɔsu Katɔti etemila. Ɔsika Katɔti ɔ́tala nwuna Kɔyu ɔnii kubelie ukyuli ɔmɛni lɛlɔ ku kuna ɔyikun ƒui.

³⁵Katɔti ɔɔyɔ́ Ubidi na úti lɛla biala ɔ́kya nwuna enu kemmo.

³⁶“Na ukyuli biala ɔni mɔɔƒɔ́ Ubidi ɔmɛni taadi ni, ubo ngba bɔni nsɔ naaadubo bɔsa kudii. Na ukyuli ɔni muuní ka ɔdi Ubidi litemi lɛlɔ ni, ulákɛ ngba bɔmmɔ. Mmomu Katɔti kɔnyi kɔdubo butaasiaku-nwu.”