Read Lelemi Yohane 7 Bible Online

Yohane 7 - Lelemi bible

Yohane 7

¹Na ɔmɛni kama ni, Yesu útaavi na Galilea kalɔ lɛlɔ na útayɔ ka usie Yudea kalɔ lɛlɔ ka Yudaƒuɔ bakya baawia ulu ɔni lɛlɔ na basia na badu-nwu ɔsu.

²Na uwi ɔmmɔ kemmo ni, Yudaƒuɔ ketele kemmo Kevo Kemmo Bulie Emeyi bɔdi uwi úudu.

³Anwuɔsu Yesu banwani básu-nwu banini, “Tɔlɔ mɛni teesie Yudea kesii kani na ƒula basiakune badubɔnu ƒula ablala.

⁴Ɔsika ukyuli ɔni mɔɔwia ka bati-nwu ni, ulabɛ taabla lɛla lɛdi. Ka aakana ala amɛni udu bɔbla ni, ya na kayawi bekyuli ƒui banu ƒula ablala bati!”

⁵Básu-nwu lɛni ɔsika nwuna banwani muedi bátaƒɔ-nwu bátadi.

⁶Amu na Yesu ɔ́su-ma ɔnini, “Mina uwi útedu tɔ. Nsu amii ni, uwi biala use ute-mii.

⁷Kayawi kalakana amii bukisi. Nsu keekisi ami, ɔsika muudie taasu kede kede ka bayawine ablala adi likpidi.

⁸Amii biteesie bina limeyi lɛmmɔ kadikɔ. Ami ńtesela emeyi ammɔ kadikɔ, ɔsika mina uwi útedu tɔ ƒui.”

⁹Ka ɔ́su lɛni ɔsu ni, ɔ́ƒɔ lɛlɔ ɔ́kya Galilea mmɔ.

¹⁰Nsu uwi ɔni na nwuna banwani bátɔlɔ bésie emeyi ammɔ kadikɔ kama ƒui ni, anwu lɛnɔ úbesie na bɔbɛ kemmo.

¹¹Na Yudaƒuɔ bákya béteeye-nwu lili banii, “Anwu nɔɔ, anwu nɔɔ?”

¹²Na lɛni kani na nwuna lɛlɔ atɛ ada na bana akɔ mmɔ. Badi baasu banii, “Ukyuli ɔbuni na ɔdi.” Na babambadi lɛnɔ banini, “Oowo! Bekyuli na uuƒú taakya!”

¹³Nsu Yudaƒuɔ bɔyia ɔsu ni, ukyuli ɔdi útakana na ɔsu lɛla lɛdi ɔlɛku ƒui na nwuna lɛlɔ.

¹⁴Ka emeyi ani baadi mmɔ éle ntɛ ni, Yesu úsie útéduo Yudaƒuɔ kakpakɔ na ɔ́tina ala.

¹⁵Ala bɔtina bɔmɛni bɔ́bla Yudaƒuɔ bammɔ dɛye dɛye, na baasu banii, “Wɛ na kebi kamɛni kásiku lɛlati lɛmɛni udu ka útesie ala katɛyakɔ kadi?”

¹⁶Amu na Yesu údie kenye na ɔ́su-ma ɔnini, “Mina ala bɔtina bɔɔɔdi ami alati bɔdi. Mmomu ukyuli ɔni nátala-mi ala bɔtina na bɔdi.

¹⁷Ukyuli ɔni mɔɔyɔ́ ka ɔbla lɛla lɛni na Katɔti ɔɔwia ni, ɔdubɔti si ala ani na mɔɔtina ási Katɔti kudɔ iye ami ɔlati ɔyikun kemmo na muutemi.

¹⁸Na ukyuli ɔni mɔɔtɛmi na anwu ɔlati ɔyikun kemmo ni, nwuna lɛlɔ bumwi na ɔɔwia. Nsu ukyuli ɔni mɔɔwia ka umwi ukyuli ɔni nátala-nwu ni, ɔɔbla ala ulu lɛlɔ na ulányi ɔkɔ.

¹⁹Ɔɔɔdi Mose néte-mii ɔda bubo bɔmmɔ yoo? Nsu bina akɔ ɔdi uládi ɔda bubo bɔmmɔ lɛlɔ. Bi ɔsu na bɛɛwia ka bɛdu-mi?”

²⁰Mmɔ na bekyuli bammɔ bédie kenye básu-nwu banini, “Kɔyu kukpidi kɔsiaku-ɔ! Ɔma mɔɔwia ka ɔdu-ɔ?”

²¹Amu na Yesu údie kenye ɔnini, “Lɛla linwi pɛ na lɛ́bla, na ɔ́bla bina ƒui kalɛ kadi.

²²Mose úbo-mii ɔda ɔnii bikulo bina bebi ago. Nsu ɔɔɔdi anwu ɔmmɔ lɛlɔ na ago bukulo búse kalɔ bɔ́si. Mmomu ɔ́si bati kuuku uwi ƒui. Na biikúlo ago na lɛnwunameyi muedi lɛlɔ.

²³Na si bakana bekulo ukyuli lego na lɛnwunameyi lɛlɔ na bátata bétenye ɔda bubo bɔmmɔ lɛlɔ ni, ɔdi bɔƒiɔ si ami lɛ́bwi ukyuli ɔdi na lɛlɔ ƒui lɛ́yu-nwu ɔkplu?

²⁴Bitatɛ litemi anumi lɛlɔ! Mmomu bɛtɛ litemi na ulu geen lɛlɔ.”

²⁵Amu na bekyuli badi bási Yerusalem ɔma na béye banii, “Ɔɔɔdi ukyuli ɔmɛni na Yudaƒuɔ batɔnkune baawia badu yoo?

²⁶Na aanu-nwu! Unye mɛni ɔɔtɛmi na kadi anumi! Na balakana-nwu lɛla lɛdi bɔsu! Munuu bɔti na báti geen ka anwu ndi Ukyuli Ɔƒunadi ɔmmɔ?

²⁷Si Ukyuli Ɔƒunadi ɔmmɔ úbo ni, ukyuli ɔdi uláti kesii kani na ɔ́si. Nsu ukyuli ɔmɛni anwu ni, bɔgyi kesii kani na ɔ́si.”

²⁸Na uwi ɔni na Yesu ɔɔtina ala na kakpakɔ mmɔ ni, úye-ma ku lɛdi momoomo ɔnini, “Bɛɛbu bɛnii bɛgyi-mi ku kesii kani na lɛ́si? Ńtebo mɛni na ami ɔlati ɔyikun kemmo! Ukyuli ɔni nátala-mi ni, ulányi ɔkɔ. Na amii bɛɛɛgyi-nwu.

²⁹Nsu ami ngyi-nwu. Ɔsika anwu nátala-mi, na nwuna kudɔ na lɛ́si.”

³⁰Ɔmɛni ɔsu ni, báwia ka beƒie-nwu. Nsu ukyuli ɔdi útakana-nwu butuku, ɔsika nwuna uwi útedu tɔ.

³¹Nsu bana akɔ pii báƒɔ-nwu bádi na béye banii, “Na si Ukyuli Ɔƒunadi ɔmmɔ úbo ni, ɔdubɔbla akɔla budie bɔtina butulo ani na ukyuli ɔmɛni ɔ́ɔbla?”

³²Amu ka Yudaƒuɔ lɛkpa lɛni baalɔ bani Ƒarisiƒuɔ bénu ka nwuna lɛlɔ atɛ ada bekyuli bammɔ akɔ lɛni ɔsu ni, ama ku bakpane benengu bása lili na bátala kakpakɔ bagyumanane badi banii betéƒie Yesu.

³³Amu na Yesu ɔ́su-ma ɔnini, “Ndubɔsɔ lɛkya-mii kudɔ libu uwi klukui ɔdi kani na lɛtɔlɔ nteesie Anwu ɔni nátala-mi kudɔ.

³⁴Bɛdubo-mi bɔwia na bilanu-mi. Ɔsika kesii kani na ndubɔkya ni, bilakana mmɔ bubo.”

³⁵Amu na Yudaƒuɔ bammɔ béye lɛlɔ banini, “Wɛ na ukyuli ɔmɛni úsela tɔ ɔsu na bulanu-nwu? Munuu ɔɔkali ka usie Helaƒuɔ lɛma kesii kani na bula kadi bekyuli badi bégyingya bakya na utátina-ma ala na mmɔ?

³⁶Bi na ɔdanku ɔni na ɔɔsu ɔnii, ‘Bɛdubo-mi bɔwia na bilanu-mi,’ na ‘Kesii kani na ndubɔkya ni, bilakana mmɔ bubo’?”

³⁷Na limeyi likplodi lɛlɔ na emeyi ammɔ bɔdi kemmo ɔni ndi limeyi linengudi ni, Yesu ɔ́ta únye na ɔ́su ku lɛdi momoomo ɔnini, “Si utukwɛ ɔɔda ukyuli ɔdi ni, ukyuli ɔmmɔ ɔtɔlɔ ubo-mi kudɔ na ubani ntu.

³⁸Lɛni na Bunweni Kedee Ɔku ɔ́su ɔ́siku ukyuli ɔni mɔɔƒɔ́-mi taadi lɛlɔ ɔnini, ‘Abiɔ ani naaakwii na aayá na ukyuli uulie ngba ntu bɔdubo butaagba taasiku-nwu kayi kemmo.’ ”

³⁹Mɛni ni, Kɔyu kɔni ndubɔƒɔ bekyuli bani náƒɔ-nwu bádi lɛlɔ kemmo litemi na ɔɔsu. Ɔsika úti úbedu ɔƒɛni ni, Katɔti útatala tɔ Kɔyu kɔmmɔ ɔnii kutáƒɔ-ma lɛlɔ kemmo. Ɔsika Yesu úteduo tɔ nwuna lɛga bɔdi bukeye kemmo.

⁴⁰Ka bénu etemila amɛni ni, bana badi básu banii, “Sɔsɔ ukyuli ɔmɛni ndi Katɔti Kenye Udiene ɔmmɔ.”

⁴¹Na babambadi lɛnɔ banini, “Ɔmɛni ndi Ukyuli Ɔƒunadi.” Nsu badi ama ni, béye banini, “Ukyuli Ɔƒunadi ɔmmɔ ni, Galilea na ɔdubo bɔsi?

⁴²Ɔɔɔdi bɔsu na Bunweni Kedee Ɔku ɔ́su ka Ukyuli Ɔƒunadi ɔmmɔ wasi Ɔga Dawid kaba kemmo na Betlehem ɔma kesii kani na Dawid ɔ́si yoo?”

⁴³Ɔkɛnku Yesu ɔsu ni, bekyuli bammɔ ƒui béle lɛlɔ.

⁴⁴Badi báyɔ ka beƒie-nwu, nsu ɔdi útakana-nwu butuku.

⁴⁵Ka kakpakɔ bagyumanane bani na bátala bénwini bésie Ƒarisiƒuɔ ku bakpane benengu bammɔ kudɔ ni, béye-ma banini, “Bi ɔsu na bítakpanku-nwu bíteboku?”

⁴⁶Amu na ama bédie kenye banini, “Bútenu ka ukyuli ɔdi ɔtɛmi aani ukyuli ɔmɛni kudii!”

⁴⁷Amu na Ƒarisiƒuɔ bammɔ béye-ma banini, “Amii lɛnɔ ukyuli ɔmɛni úƒu-mii kasusu?

⁴⁸Bíinu dii si benengu badi iye Ƒarisiƒuɔ badi báƒɔ-nwu bádi?

⁴⁹Kudii! Nsu otogyi bekyuli bamɛni ƒui baaagyi ɔda bubo bɔmmɔ. Anwuɔsu na ewida asiaku-ma!”

⁵⁰Amu na Nikodemo ɔni ndi benengu bammɔ akɔ unwi na úusie Yesu kudɔ uwi ɔdi ni, úye-ma ɔnini,

⁵¹“Bula ɔda bubo búte-bu ulu ka bɔdu ukyuli kɔtɔ si bútenu-nwu kenye litemi na bɔti lɛla lɛni na ɔdanku iye ɔɔbla?”

⁵²Nsu bédie kenye béye-nwu banini, “Awɔ lɛnɔ Galilea na ási yoo? Duo lɛku kemmo na anu ati ka Katɔti kenye udiene ɔdi ulási Galilea.”

⁵³Mmɔ ni, ukyuli biala ɔ́tɔlɔ úsie kaduli.