Read Lelemi Batalane Kabla 18 Bible Online

Batalane Kabla 18 - Lelemi bible

Batalane Kabla 18

¹Amu na ɔmmɔ kama ni, Paulo ɔ́tɔlɔ Atene úsie Korinto.

²Mmɔ na útánu Yudani ɔni baalɔ Akwila, na báwɔ-nwu na Ponto. Anwu ku ulekudi Priskila bási Italia bébo mmɔ uwi útetu tɔ, ɔsika kalɔ kammɔ lɛlɔ ɔdine ɔni baalɔ Klaudio ɔ́su ka Yudaƒuɔ ƒui balɛ Roma. Paulo úsie útanu-ma,

³na ɔ́kya-ma kudɔ úteebunku-ma na bebuo lɛku bɔka kabla kani na anwu lɛnɔ ɔɔbla taadi kemmo.

⁴Amu na lɛnwunameyi biala ni, Paulo uusié Yudaƒuɔ kasalakɔ teetédie ala kalɔ teete Yudaƒuɔ ku Grikiƒuɔ ƒui kalɛ benwini kayi.

⁵Amu na uwi ɔni na Silas ku Timoteo bási Makedonia bébo ni, Paulo ɔ́kɛ uwi kaduɛ úti úte litemi buni bɔsu ku kalɔ budie taatina Yudaƒuɔ ka ni, Yesu ndi Ukyuli Ɔƒunadi ɔmmɔ geen.

⁶Amu uwi ɔni na Yudaƒuɔ bamɛni báta bénye-nwu lɛlɔ na beetemi enyekpi taasiku Yesu lɛlɔ ni, Paulo úveli enu úwi-ma, na ɔ́su-ma ɔnini, “Si bɛ́yii ni, mina kɔnu, mina ɔgba uuubo-nwu kemmo. Ɔ́si ɔƒaani ni, lísela bekyuli bani naaadi Yudaƒuɔ kudɔ ntásu-ma litemi buni lɛmɛni.”

⁷Na ka ɔ́gyu-ma kudɔ ni, ɔ́tɔlɔ útákya ɔnana ɔdi ɔni naaadi Yudani na baalɔ-nwu banii Tito Yusto kudɔ ɔni mɔɔbu Blɔti na ulie Yudaƒuɔ kasalakɔ kudɔ.

⁸Amu na kasalakɔ kammɔ unengu ɔni baalɔ Krispo ku nwuna kaduli bekyuli ƒui báƒɔ Blɔti bádi, na bákpila-ma ntu. Lɛni kani na bákpila babambadi bani náƒɔ bádi lɛnɔ ntu na Korinto mmɔ.

⁹Amu na limeyi lɛdi usientɛ ni, Blɔti ɔ́su Paulo na kɔna kemmo ɔnini, “Tayia! Na tada litemi lɛmɛni bɔsu taya.

¹⁰Ɔsika nsiaku-ɔ, na ukyuli ɔdi ulákana-a likpidi lɛdi bɔbla. Bekyuli pii bakya ɔma ɔmɛni kemmo bani ndi mina badi.”

¹¹Anwuɔsu Paulo úlie ɔma ɔmɛni kemmo lɛkwa linwi ku kakɛ ɔ́su Blɔti litemi lɛmɛni ɔ́tina bekyuli.

¹²Nsu uwi ɔni na bése Galio Roma aban lɛga na Akaia kalɔ lɛlɔ ni, Yudaƒuɔ badi bábla lɛkpa lɛdi na bánwi litemi bámana Paulo lɛlɔ na béƒie-nwu bésienku litemi katɛkɔ.

¹³Amu na básu ɔga ɔmmɔ banini, “Ukyuli ɔmɛni uunwíni bekyuli kasusu ɔnii bataakpa Katɔti na ulu ɔni náta únye bula ɔda bubo lɛlɔ.”

¹⁴Nsu uwi ɔni kani na Paulo úse kalɔ ɔnii uteedie kenye ni, aban lɛga ɔdine Galio ɔmɛni útemi na ɔ́su Yudaƒuɔ bamɛni ɔnini, “Amii Yudaƒuɔ binu! Si litemi lɛni bɛda bíboku mɛni lɛdi bɔƒiɔ bubendi bɔdi ni, ndubɔkɛ kayi na linu bina litemi.

¹⁵Nsu ka unyeƒi ukpludi na bɛɛkya na bina etemila ku ɔda bubo lɛlɔ ɔsu ni, amii alati bitásu-ni. Ɔɔɔdi ami mabla litemi ɔtɛne mete-mii na ala amɛni lɛlɔ.”

¹⁶Anwuɔsu ɔ́bɔku-ma ɔ́lɛku nwuna litemi katɛkɔ mmɔ.

¹⁷Amu na bekyuli lisu lɛmɛni béƒie Sostene ɔni ndi bana kasalakɔ kammɔ ɔtɔnkune na bétébo-nwu na litemi katɛkɔ kamɛni kudɔ. Nsu Galio útakpete-ma.

¹⁸Amu na Paulo úlie Korinto ɔma ɔmɛni kemmo emeyi pii. Na nwuna kama ni, ɔ́kada baƒɔtaadine bamɛni na anwu ku Akwila ku Priskila básia ntu anumi bésie Siria. Nsu asa na watɔlɔ ni, Paulo ɔ́ya na békpeyi-nwu lili na Kenkrea na Yudaƒuɔ ɔdi lɛlɔ ɔ́si kenye kani na úse ɔsu.

¹⁹Ka úbayu na Eƒeso ni, ɔ́da Priskila ku Akwila ɔ́kya ɔkɔlɔ kemmo mmɔ. Nsu anwu ɔ́tɔlɔ úsie Yudaƒuɔ kasalakɔ ɔnii utéduoku Yudaƒuɔ bammɔ ala adi kemmo.

²⁰Amu na bévele-nwu banii ulie-ma kudɔ ubu, nsu ɔ́nu ka uuubo uwi.

²¹Ɔmɛni ɔsu ka ɔɔtɔlɔ ni, ɔ́su-ma ɔnini, “Si Blɔti ɔ́tuna ni, ndubɔsɔ linwini libo-mii kudɔ.” Na ɔ́sɔ útéduo ɔkɔlɔ kemmo na ɔ́tɔlɔ Eƒeso.

²²Na ka útéduo Kaesarea ni, ɔ́tɔlɔ úsie Yerusalem na útákya baƒɔtaadine bammɔ kenye. Na ɔ́sɔ úbavi ɔ́tɔlɔ úsie Antiokia.

²³Na ka ɔ́kya mmɔ uwi ɔdi ni, ɔ́sɔ ɔ́tɔlɔ úsie útásia Galatia ku Ƒrigia kalɔ lɛlɔ. Na uwi ɔmɛni ƒui ni, ɔkɛ ɔɔví taanu baƒɔtaadine bani nkya mmɔ bene, na ɔɔkya-ma ɔkplu.

²⁴Amu na Yudani ɔdi úbo Eƒeso. Anwu baalɔ Apolo, na báwɔ-nwu na Aleksandria. Ɔdi ukyuli ɔni na kenye káda-nwu, na ɔgyi Bunweni Kedee Ɔku kemmo etemila lɛnɔ.

²⁵Na ina ka únu Blɔti lɛlɔ litemi na uutemi ku ogya na ɔ́tɛmi ɔ́siku Yesu lɛlɔ na ulu geen ɔmmɔ lɛlɔ ni, Yohane ntu bɔkpila lɛlɔ ala kani na ɔgyi.

²⁶Amu ka unye uutemi ku kayi buse na kasalakɔ mmɔ na Priskila ku Akwila bénu ni, bákpanku-nwu bésienku kaduli na bédie Blɔti etemila kemmo bátina-nwu kaduɛ bébu.

²⁷Amu na ka Apolo ɔ́bla kasusu ka usie Akaia ni, Eƒesoƒuɔ baƒɔtaadine bébebunku-nwu na bénweni ɔku béte baƒɔtaadine bani nkya Akaia mmɔ banii si úbeduo mmɔ ni, na baƒɔ-nwu kaduɛ. Na uwi ɔni na útéduo mmɔ ni, úbunku bekyuli pii bani nébenwini kayi na Blɔti kɔnyana bɔnu ɔsu.

²⁸Na nwuna etemila ammɔ ádi Yudaƒuɔ lɛlɔ, ɔsika úti Bunweni Kedee Ɔku kemmo etemila údie ɔ́tina nwaa ka Yesu ndi Ukyuli Ɔƒunadi ɔmmɔ.