Read Lelemi Batalane Kabla 20 Bible Online

Batalane Kabla 20 - Lelemi bible

Batalane Kabla 20

¹Uwi ɔni na lɛsɛ lɛmmɔ líbo kalɔ ni, Paulo ɔ́lɔ baƒɔtaadine bamɛni ɔ́sala. Na ka ɔ́kya-ma ɔkplu na bana bɔƒɔtaadi kemmo ɔ́wɔlɔ ni, úye ulu na ɔ́kada-ma na ɔ́tɔlɔ úsie Makedonia.

²Na nwuna ulu busie kemmo ni, Paulo ɔ́vi ekutɛ ammɔ ƒui na ɔ́su-ma Blɔti etemila pii úti ɔ́kya-ma ogya útédu Akaia.

³Mmɔ na ɔ́kya aani abuli atɛ. Uwi ɔni na ɔɔklibi lɛlɔ ka watɔlɔ wesie Siria ni, ɔ́nu ɔ́ti ka Yudaƒuɔ bakya baawia nwuna ngba na ulu ɔdi lɛlɔ. Anwuɔsu ɔ́bla nwuna kasusu ɔnii ɔsɔ ɔɔsia usie Makedonia.

⁴Na uwi ɔni na úsela ni, anwu ku bekyuli pii nkɛ. Na bekyuli bamɛni ndi Sopater ɔni nási Beroia na ɔdi Piro ubidi ku Aristarko ku Sekundo bani nási Tesalonika ku Gaio ɔni nási Derbe ku Tihiko ku Troƒimo bani nási Asia kalɛkɛ ku Timoteo.

⁵Ama nágyu bátɔ-bu béténye ɔma ɔni baalɔ banii Troa bágya-bu.

⁶Amu ka Yudaƒuɔ emeyi ani na bɔɔdi Bodobodo Ɔni Néteƒu Limeyi ávi ni, búti ɔkɔlɔ na Ƒilipi, na bútásiaku-ma na Troa emeyi alɔ kama. Na búlie mmɔ emeyi maatɛ.

⁷Amu na Kwasida limeyi lideedi lɛlɔ ni, bɔ́sala lɛlɔ lisu bɔnii bɔɔdi Blɔti adila. Na ka Paulo ɔdubo bɔtɔlɔ kadi kegye ɔsu ni, útemi laa útédu usientɛ.

⁸Na bátu likpo pii bése ɔtɔ ɔtɔdi ɔmmɔ kemmo.

⁹Amu ka Paulo útemi úsela laa ni, lɛlɛɛ líti okloƒu ɔni baalɔ Eutiko uwi ɔni na ulie katɔ ƒansili lɛlɔ. Mmɔ na ɔ́ƒami ɔ́si katu taasia ɔtɔ ɔtɛdi lɛlɔ mmɔ úbayu kalɔ. Na bani nátása-nwu kudɔ ni, bánu ka úkpi.

¹⁰Nsu ka Paulo ɔ́yu úbo kalɔ ni, ɔ́kpɛ-nwu uboku lɛlɔ na ɔ́su-ma ɔnini, “Bitebo kudu! Ɔkya ngba!”

¹¹Amu na bana ƒui básɔ bénwini bésie katɔ mmɔ bátádi Blɔti adila. Na básɔ bátɛmiku lɛlɔ útédu lɛdigye asa na Paulo ɔ́tɔlɔ.

¹²Nsu ka okloƒu ɔni na bágyila mmɔ ɔ́sɔ ɔkya-ma akɔ ɔsu ni, kayi káyɔ-ma.

¹³Amu na Paulo ɔ́sia lɛgba ulu úsie Aso. Nsu abu bani na abu ku-nwu bɔkɛ ni, búti ɔkɔlɔ bɔ́gyu bɔ́tɔ-nwu kalɛ na butása mmɔ na buti-nwu aani kalɛ na ɔ́su.

¹⁴Amu ka úbo úbanu-bu na Aso mmɔ ni, abu ku-nwu ƒui bɔ́tɔlɔ búsie Mitilene.

¹⁵Na kadi kégye ni, bútéduo Kio. Amu na limeyi lɛni nsɔ nsia lɛmmɔ kama ni, bútéduo Samo. Amu na limeyi lɛtɛdi ni, búsie bútéduo Mileto.

¹⁶Paulo ɔ́ya na búbo bɔ́vi Eƒeso, ɔsika útayɔ ka ɔdi uwi gyɔlɔɔ ɔdi na Asia kalɔ mmɔ. Na ɔ́lɛ ugyii ka si ɔ́kana ni, na uduo Yerusalem na Pentekoste limeyi lɛlɔ.

¹⁷Amu ka bútédu Mileto ni, ɔ́tala batu ɔ́kya Eƒesoƒuɔ baƒɔtaadine benengu ɔnii bebo babanu-nwu na mmɔ.

¹⁸Amu ka bébo ni, ɔ́su-ma ɔnini, “Banwa, bina ƒui bɛgyi ka ńtalɛ-mii kama kudii ɔ́si limeyi lideedi lɛni na lɛ́ka Asia kalɔ lɛlɔ mɛni bubo úti úbedu ɔƒaani.

¹⁹Bɛ́nu kalɛ na lɛ́siaku Blɔti na lɛlɔ kalɔ buboku kemmo, ina ka líbo abi ku keku ɔ́si ɔni na Yudaƒuɔ báwia ka badu-mi ɔsu.

²⁰Bɛɛnu-mi kaƒɔ. Lɛɛɛdi ulikplune. Na Blɔti ala ani ƒui ngyi na nwuna lɛlɔ ni, anya na lɛtina-mii, na ńteti ɔdi ńtabla-mii. Lɛ́tina Blɔti litemi lɛmɛni na kadi ƒui anumi ku bina kɔduli.

²¹Na kesi kesii na lísie ni, lɛ́su Yudaƒuɔ ku Helaƒuɔ ƒui kpakplaa ka bada ekpidi bɔbla baya na benwini besie Katɔti kudɔ, na baƒɔ Blɔti Yesu Kristo badi.

²²“Na ɔƒaani ni, Katɔti Kɔyu kɔɔsu-mi ka nteesie Yerusalem, ɔni na lɛɛɛgyi lɛla lɛni malɛku-mi mmɔ.

²³Nsu na lɛma lɛni ƒui kemmo na mɔɔví ni, Katɔti Kɔyu kɔɔyá na mɔɔtí ka ndubɔtɛ ɔtɔ ku lɛbibo.

²⁴Nsu ɔmmɔ ɔɔɔdi-mi lɛla lɛdi. Ɔsika si ńtakana na lɛbla lɛla lɛni na Blɔti Yesu ɔ́tala-mi ɔnii mbabla ni, mina ngba buuubo-mi kɔsia kɔdi. Lɛla lɛni na Yesu ɔ́tala-mi ɔnii mbabla ndi ka lɛsu bekyuli Blɔti litemi buni ku kalɛ na Katɔti ɔɔnu-bu kɔnyana.

²⁵“Na ni, amii bani ƒui nénu mina ala bɔtina ɔ́si Blɔti lɛga kadikɔ ala lɛlɔ ni, bɔsɔ bulasa kudii.

²⁶Anwuɔsu muute-mii bɔti ka ni, si ɔdi ɔ́yila nwuna ngba ulu ni, beleti ukyuli ɔmmɔ kɔtɔ bɔdu balasia-mi lɛlɔ.

²⁷Sɔsɔ ni, ńteti Katɔti lɛga kadikɔ ulu lɛla lɛdi ńtabla-mii.

²⁸Ɔmɛni ɔsu ni, binye lɛlɔ kagyumana. Katɔti Kɔyu nábla-mii batɔnkune ɔnii bɛda nwuna bebi bani na Katɔti úti úte-mii bɔda kɔkɔɔkɔ. Bɛda-ma kaduɛ, ɔsika Katɔti úwi Ubidi ubugya kalɔ úti udie-ma lili.

²⁹Na ngyi kede kede ka si lɛ́tɔlɔ-mii kudɔ ni, bekyuli badubo bɔta bukpoku-mii na begyingya-mii aani kalɛ na begiti beekpóku baƒonu.

³⁰Na bina akɔ muedi ni, badi badubo litemi geen lɛmmɔ bɔda bɔnyonu na bakpanku bekyuli pii basiaku bana ɔkɔ ala bɔtina kama.

³¹Binye kagyumana na bɛkali bɛnu kalɛ na líti keku buwulo lɛ́lɛ-mii na lɛ́tina-mii ala usien ku ɔƒɛ na akwa atɛ ani na lɛ́kya-mii kudɔ kemmo.

³²“Na ɔƒaani ni, líti-mii mɔɔkya Blɔti lɛkɔkɔ nnii ɔnu-mii lɛlɔ. Na nwuna litemi lɛni muubunku bekyuli mɛni lɛkya bina bɔƒɔtaadi ɔkplu kalɛ na wabla-mii katɔ ala badine aani bani na ɔ́ƒuna úte nwuna lɛlɔ.

³³Anumi étegyie-mi na ɔkpanadi sika ugyiedi iye ɔƒualadi iye lɛwu lɛlɔ.

³⁴Amii alati bɛgyi ka mina enu amɛni líti lɛ́bla kabla kani na ńtaadi ku kani na ńteeti taanu bekyuli bani nsiaku-mi lɛlɔ.

³⁵Lɛ́bla ala amɛni ƒui líti lɛ́tina-mii kalɛ na buteebunku bawabane, na binyimo litemi lɛni na Blɔti Yesu ɔ́su ɔnini, ‘Bute bɔdia butulo bɔƒɔ.’ ”

³⁶Na uwi ɔni na Paulo ɔ́wɔlɔ butemi bɔmɛni ni, ɔ́lɛ akɔnkɔ na ama ku-nwu bákpali katɔ.

³⁷Na bana ƒui bátu báda-nwu na beewulo ɔ́si bana lɛlɔ bɔkada bɔmɛni ɔsu.

³⁸Na lɛla lɛni nábla-ma ɔkwɛnu útulo ndi ɔni na ɔ́su-ma ɔnii basɔ baaadubo-nwu bɔnu ɔsu. Amu na básiaku-nwu na béti-nwu bétése ɔkɔlɔ kudɔ na ketu kenye mmɔ.