Read Lelemi Batalane Kabla 27 Bible Online

Batalane Kabla 27 - Lelemi bible

Batalane Kabla 27

¹Amu na uwi ɔni na bálɛ ugyii ka ɔdi ka busie Italia ni, béti Paulo ku batɔntɛne bakladi bákya bekpone unengu ɔni baalɔ Yulio enu kemmo. Ɔdi aban bagyumanane lɛkpa linwi lɛni baalɔ Ɔga Unengudi Bekpone Lɛkpa.

²Amu na búti ɔkɔlɔ ɔni nási Adramitio na úsela Asia kalɛkɛ. Na abu ku Makedoniani ɔni baalɔ Aristarko na ɔ́si Tesalonika nlie ɔkɔlɔ ɔmɛni kemmo.

³Amu na nwuna kadi kégye ni, bútédi búnye Sidon Ketudɔ. Amu na Yulio úte Paulo kuƒi ku kaƒɔ ƒaa ɔnii uteesie ɔma kemmo na utánu nwuna bakpana kalɛ na bete-nwu ala ani na weti wesie ulu.

⁴Na ka bɔ́sɔ bɔ́ta mmɔ ni, na ɔƒɛƒɛɛ ɔmmɔ kenye ɔkplu ɔsu ni, bɔ́sia Kipro kada kakɛ kesii kani na bɔ́bɛ ɔƒɛƒɛɛ ɔmmɔ.

⁵Amu ka bɔ́via mmɔ ni, bútásia Kilikia ku Pamƒilia Ketudɔ, na bútédi búnye ɔma ɔni baalɔ Mira na Likia kalɛkɛ lɛlɔ.

⁶Mɛni na ɔgyumanane ɔni ntɔnku-bu ɔ́nu ɔkɔlɔ ɔdi ɔni nási Aleksandria na úsela Italia kalɔ lɛlɔ. Na úti bula ƒui ɔ́kya ɔkɔlɔ ɔmɛni kemmo.

⁷Na emeyi pii kemmo ni, ulu busie bɔmmɔ bɔ́yu-bu ɔkplu asa na bɔ́kana Knido ɔma kudɔ budu. Na ɔƒɛƒɛɛ kpakplaa ɔni muukpó mmɔ ɔsu ni, bútakana na bɔvi ligeen. Anwuɔsu ka búdu Salmone ni, búdeyi bútávi Kreta kɔmadɔ kesii kani na kalɔ kammɔ kétile ɔƒɛƒɛɛ ɔmmɔ kenye ɔkplu.

⁸Na ɔkplu kemmo na bɔkɛ utubili kudɔ kudɔ búbedu kesii kani baalɔ Ɔkɔlɔ Kenyekɔ ɔni na útagyunku ɔma ɔni baalɔ Lasea.

⁹Amu ka bɔ́ɔdi emeyi pii na bula ulu busie bɔmɛni kemmo ɔsu ni, Kɔka Bulie Uwi ɔ́vi. Na ntu lɛlɔ bɔvi na uwi ɔmɛni kemmo ɔdubo ɔkplu bɔyu. Ɔmɛni ɔsu na Paulo ɔ́lɛ-ma ɔnini,

¹⁰“Ati bene, lɛ́nu lɛ́ti ka bula ulu busie ɔ́si ɔƒɛni bɔdubo ɔkplu bɔyu, ɔsika ɔkɔlɔ ɔmɛni ɔdubuduo ɔgbankpi kemmo, na ala pii ku bekyuli lɛnɔ badubo bɔyii.”

¹¹Nsu bekpone unengu ɔmɛni ɔ́ƒɔ ɔkɔlɔ ɔtɔnkune ku ɔkɔlɔ ɔlati bɔlɛ útulo lɛla lɛni na Paulo ɔ́su.

¹²Amu ka kalɛlɛkɔ kammɔ kaaadia bunye gyɔlɔɔ na kɔyɔ uwi ɔni ndubo ɔsu ni, ulu besiene bamɛni ketulodikɔ béte kasusu ka besie betédu Ƒoinike. Mmɔ na badubɔkana bɔkya kɔyɔ uwi. Ɔsika Ƒoinike ɔdi ɔma na Kreta kalɔ lɛlɔ ɔni mbo lɛkɔlɔ kalɛlɛkɔ kani muutile ɔƒɛƒɛɛ kenye na ɔƒɛ kanukɔ.

¹³Amu na uwi ɔmmɔ kemmo kani na ɔƒɛƒɛɛ ɔbuni ɔdi úse kalɔ uukpó ɔ́si kada kakɛ, na ɔ́bla aani si ulu busie bɔmmɔ bɔdubɔdia. Anwuɔsu báklibi lɛlɔ na bátɔlɔ bátásia Kreta kɔmadɔ.

¹⁴Nsu kɔnakunwi ni, ɔƒɛƒɛɛ ukpidi ɔdi úkpo ɔ́si kɔmii kakɛ ɔ́vi Kreta.

¹⁵Na úbo ɔkɔlɔ ɔmɛni ɔ́kɔli. Bawia ka nka basɔ benwini ɔkɔlɔ ɔmɛni anumi besienku ketudɔ, nsu bátákana. Anwuɔsu bányonu-nwu na ɔƒɛƒɛɛ ɔmmɔ údi-nwu úsela.

¹⁶Amu kama kama ni, bútákɛ kabɛkɔ blii kadi na ntuntɛ kalɔ kani baalɔ Klauda kama kakɛ. Na ɔkplu kemmo asa na bɔ́kana ɔkɔlɔ blii ɔni bɔda na unengudi ɔmmɔ kemmo bunyimi bɔda lɛla lɛdi lɛlɔ.

¹⁷Amu ka bébo-nwu báda ni, béti lɛbuli báda ɔkɔlɔ ubendi lɛnɔ, ɔsika baayia ka ɔƒɛƒɛɛ webo-nwu wesienku kɔnwinimi kekpidikɔ na Libia ketudɔ. Anwuɔsu báyula adi ani nƒa ɔkɔlɔ ɔmmɔ katɔ ƒui. Ɔmɛni ɔsu ɔƒɛƒɛɛ ɔmmɔ kani nda-nwu mɔɔvínku.

¹⁸Kadi kégye ka ɔƒɛƒɛɛ ɔmmɔ útada bukpo útaya ɔsu ni, bése kalɔ beedie ɔkɔlɔ ɔmɛni kemmo etila teebo taakya ntu kemmo.

¹⁹Na limeyi lɛtɛdi lɛlɔ ni, bébo ɔkɔlɔ lɛlɔ ala pii lɛnɔ bávaakun.

²⁰Amu na ɔƒɛƒɛɛ bonwu ɔmɛni úkpo laa emeyi pii ɔni na básɔ bátanu ɔƒɛ iye ayabi kudii. Na bula akɔ ɔdi ɔsɔ uuubo ngba bɔkɛ lɛnunsia lɛdi!

²¹Amu ka bésie liluku gyɔlɔɔ na bátakɛ uwi bátadi ni, Paulo ɔ́ta únye-ma anumi na ɔ́su-ma ɔnini, “Banwa, si búnu na nka bínu-mi litemi ni, nka bútata Kreta na ala amɛni ƒui ataalɛku-bu.

²²Na mɔɔsu-mii kede kede ka ni, ɔkɔlɔ ɔmmɔ ɔdubɔyii udu bɔdi, nsu bina akɔ ɔdi biala ulekpi!

²³Ɔsika kamaadi usien ni, Katɔti ɔni mbo-mi na anwu na mɔɔkpá ni, nwuna ɔtu ɔdi úbenye-mi kudɔ.

²⁴Na ɔ́su-mi ɔnini, ‘Paulo, sɔ tayia. Ɔlɛka atɛ ƒula litemi na Kaesare anumi! Katɔti lɛƒɔndia ɔsu ni, únu ƒula buvele na ɔ́nu-ɔ kɔnyana ɔnii awɔ ku belusiene bammɔ ƒui ɔdi ulekpi.’

²⁵Anwuɔsu banana, bɛkɛ kayi! Mɔɔƒɔ́ Katɔti taadi ka ni, lɛla lɛdi biala lɛdubo bɔsia aani kalɛ na ɔ́su.

²⁶Nsu ni, ɔƒɛƒɛɛ ɔdububo-bu utáva ntuntɛ kalɔ kadi lɛlɔ.”

²⁷Amu na ɔƒɛƒɛɛ bonwu ɔmɛni ɔda-bu uubó teesienku teeboku na Adria Ɛpu lɛlɔ emeyi leevu-ene. Na limeyi leevu-linedi usientɛ ni, bula ɔkɔlɔ lɛlɔ kabla bablane bákali ka báakpɛ béde kalɔ kadi.

²⁸Mmɔ na bákɔku ntu bɔmɛni bɔgyu bánu, na bánu ka ntu bɔmɛni bɔ́gyu aani lɛgba eti anyɔ ku aavlanyɔ. Na ka bésie anumi blii ni, básɔ bákɔku na bánu ka ntu bɔmmɔ bɔgyu bɔdi lɛgba liti ku aavlene.

²⁹Amu ka baayia ka ɔƒɛƒɛɛ webo ɔkɔlɔ ɔmmɔ watáƒiɛmi atakpɛ adi lɛlɔ ɔsu ni, báyula abuala ene ani mbo unu geen adi bákya ntu kalɔ na bébo-nya báda ɔkɔlɔ ɔmmɔ kalɛ na udi unye. Na benye baanu anumi kpakplaa ka kadi keyile bugye.

³⁰Amu ka ɔkɔlɔ ɔmmɔ lɛlɔ kabla bablane báwia ka bekeli ɔsu ni, béti ɔkɔlɔ ubliidi ɔmmɔ na bákya lɛkwɛ banii nka batánu ɔkɔlɔ ubendi ɔmmɔ lɛtɔtɔ na bakya abuala ku unu ɔmmɔ adi.

³¹Nsu ni, Paulo ɔ́su bekpone ku bana ɔtɔnkune ɔnini, “Si bina ƒui bítasɔ bítakya ɔkɔlɔ ɔmɛni kemmo ni, bɛdubukpi.”

³²Anwuɔsu bekpone bamɛni békulo ɔkɔlɔ ubliidi ɔmɛni kɔbuli kɔni nda-nwu, na bányonu-nwu bákya ntu bɔmɛni kemmo.

³³Amu uwi ɔni na kadi kadaku bugye ni, Paulo úvele bana ƒui ɔnii badi. Na ɔ́sɔ ɔ́su-ma ɔnini, “Emeyi leevu-ene sɔɔn mɛni ka búduo ɔgbankpi ɔmɛni kemmo na bina akɔ ɔdi biala útetuku tɔ adila kenye.

³⁴Ɔmɛni ɔsu buvele nda-mii, bɛdi lɛla lɛdi na bɛkɛ ɔyikun kalɛ na bilekpi. Ɔsika alɔlɔ muedi ulelie ɔdi lɛlɔ.”

³⁵Amu na Paulo úti bodobodo ɔdi, na ka ɔ́gya Katɔti enu na bana ƒui anumi mmɔ ni, ɔ́ƒɛ ɔdi na úti ɔ́di.

³⁶Kɔnakunwi ni, ɔdi biala ɔ́kɛ kayi na bana ƒui bése kalɔ baadi.

³⁷Amu na bekyuli bani nkya ɔkɔlɔ ɔmɛni kemmo bumomo bɔbla nkyuli eti alɔ ku aavlanyɔ-ɛku.

³⁸Uwi ɔni na bádi báwɔlɔ ni, bekyuli bammɔ básɔ bédie etila akladi ƒui na ɔkɔlɔ ɔmɛni kemmo béwi ntu kemmo, na ɔkɔlɔ ɔmmɔ ɔ́bla ƒaaƒaa.

³⁹Uwi ɔni na kadi kégye nwaa ni, bátanu ɛpu kɔtu mɛni bétese likpo. Nsu bánu kalɛlɛkɔ kadi na ɛpu kɔtu mɛni kesii kani na nka kadia kalɛ na basia mmɔ balɛ. Anwuɔsu báwia ka nka si ɔdia muedi ni, na beti ɔkɔlɔ ɔmmɔ anumi batákya mmɔ.

⁴⁰Anwuɔsu békulo abuli ani nda abuala ani bébo báda ɔkɔlɔ ɔmmɔ, na báƒɛnimi ugyii ɔni nda ɔkɔlɔ ɔmmɔ kama na ɔɔtina ɔkɔlɔ kavinkɔ. Na bákɔliku ɔkɔlɔ ɔmmɔ adi katɔ kalɛ na ɔƒɛƒɛɛ ubo-ma usienku ɛpu kɔtu.

⁴¹Amu ka bésela lɛtɔtɔ ni, ɔkɔlɔ ɔmmɔ útányi kɔnwinimi kemmo ɔni na ɔsɔ ulakana lɛtɔtɔ busie. Na ɔƒɛƒɛɛ lɛnɔ úbo kama kakɛ úgyingya ƒui kede kede.

⁴²Ka bekpone bamɛni bákali bani batɔntɛne bammɔ badubo bukeli ɔsu ni, bábla kasusu ka bebo-ma badu.

⁴³Nsu ka bana ɔtɔnkune ɔmɛni ɔɔwia ka ɔƒɔ Paulo ngba ɔsu ni, útatunaku-ma. Anwuɔsu údie ɔ́su ɔnii si bani makana ni, baba lɛgyu beduo ntu kemmo na bakpi beteesie ketudɔ.

⁴⁴Na bakladi bani mebu ƒui lɛnɔ ni, beti kugyiikɛ ku ala abambadi ani meti-ma masia ntu anumi metédu ketudɔ. Ɔmɛni ɔsu bétéduo ketudɔ mmɔ, na ɔdi biala útekpi.