Read Lelemi Romaƒuɔ 16 Bible Online

Romaƒuɔ 16 - Lelemi bible

Romaƒuɔ 16

¹Muudie bula ɔnwani uleku Ƒoibe lɛtina-mii. Ɔdi ubunkune na Kenkrea baƒɔtaadine akɔ.

²Na muuvele-mii nnii bigyingya enu na bɛƒɔ-nwu na Blɔti lɛnyi kemmo na ulu ɔni námanku Katɔti bekyuli lɛlɔ. Bite-nwu kebunku biala na wawia wasiku-mii kudɔ, ɔsika úte bekyuli pii kebunku ku ami lɛnɔ.

³Bigyele Priska ku Akwila bani ndi mina kabla bablane bakpana na Kristo Yesu kemmo.

⁴Bénye kagyumana ka bekpi na mina lili muedi. Na ɔɔɔdi ami lɛti mɔɔgyá-ma enu, mmomu ku bekyuli bani naaadi Yudaƒuɔ baƒɔtaadine akpa ammɔ ƒui.

⁵Na bigyele baƒɔtaadine bani mɔɔsa na bana kaduli mmɔ lɛnɔ. Bigyele mina ɔkpana Epaineto ɔni náka kayi bunwini ɔ́ƒɔ Kristo na Asia kalɛkɛ lɛlɔ mmɔ.

⁶Na bigyele Maria ɔni nábla kabla kpakplaa úte bina lɛkpa lɛmmɔ.

⁷Bigyele Androniko ku Yunia bani ndi mina kadi bekyuli bani na ami ku-ma na bákya aban ɔtɔ mmɔ. Bekyuli bagyi-ma geen na batalane bammɔ akɔ. Na ama báka-mi Kristo ɔmmɔ bɔƒɔ.

⁸Bigyele Amplia ɔni na mɔɔyɔ́ geen na Blɔti lɛnyi kemmo bite-mi.

⁹Na bigyele Urbana ɔni ndi bula kabla ɔblane ɔkpana na Kristo kemmo. Na bigyele mina ɔkpana ɔyɔne Staki.

¹⁰Bigyele Apele ɔni na bɔ́kɔku-nwu bɔ́nu na bɔ́nu ka ɔdia na Kristo kemmo mmɔ. Na bigyele Aristobulo kaduli bekyuli ƒui.

¹¹Bigyele Herodion mina kadi ukyuli bite-mi. Na bigyele Narkiso kaduli bekyuli bani néti lɛlɔ béte Blɔti mmɔ.

¹²Bigyele beleku bani ndi Triƒaina ku Triƒosa bani nábla kabla na Blɔti kemmo. Na bigyele mina ɔkpana ɔyɔne Persi ɔni ndi uleku ɔbambadi ɔni lɛnɔ nábla kabla kpakplaa na Blɔti kemmo.

¹³Bigyele Ruƒo ɔni náƒɔ lɛnyi na Blɔti kemmo ku uni ɔni náda ami lɛnɔ aani mina uni kalɛ.

¹⁴Bigyele Asinkrito ku Ƒlegon ku Herme ku Patroba ku Herme ku bana banwa baƒɔtaadine bani nkya-ma kudɔ.

¹⁵Bigyele Ƒilologo ku Yulia ku Nereo ku ɔnwani uleku ku Olimpa ku Katɔti bekyuli bani nkya-ma kudɔ.

¹⁶Bigyele lɛlɔ na bɛkya lɛlɔ kɔgbu na lɛlɔ bɔbla kedee kemmo. Kristo baƒɔtaadine akpa ammɔ ƒui na Kreta banii beegyele-mii o-o.

¹⁷Banwa, mɔɔlɛ-mii kpakplaa nnii binye kagyumana na bekyuli bani muuti bule taakya bekyuli ntɛ lɛlɔ. Na beeti ala bamba ani náta énye bula ala ani na bɔɔtina lɛlɔ teetile-mii kuƒi. Bɛda lɛlɔ bɛmami-ma lɛlɔ.

¹⁸Ɔsika bekyuli bammɔ udu ni, balábla Blɔti Yesu Kristo kabla. Mmomu ama alati bana ayɔla na baabla. Na bada kenye emini atɛ ku katɔlɔ beeƒú bekyuli bani naaagyi lɛla lɛdi kasusu.

¹⁹Ukyuli biala únu kalɛ na bɛɛdi litemi buni lɛmmɔ lɛlɔ, anwuɔsu lɛlɔ lɛɛyɔ́-mi geen na bina lɛlɔ. Nsu mɔɔwia ka bɛda anu na lɛla lɛni ndi lɛbuni lɛlɔ. Na binwini bekyuli bani naaagyi lɛla lɛdi na likpidi ani kudɔ.

²⁰Katɔti ɔni muute keyi buɛɛ ɔdubususu ukisine ɔmmɔ kpɛtɛ kpɛtɛ na ɔya na bɛdi-nwu lɛlɔ na uwi klukui kemmo. Blɔti Yesu Kristo lɛƒɔndia lɛsiaku-mii.

²¹Timoteo ɔni ndi mina kabla ɔblane ɔkpana uugyele-mii. Na lɛni kani na Lukio lɛnɔ ku Yason ku Sosipatro bani ndi mina kadi bekyuli beegyele-mii.

²²Ami Tertio ɔni nénweni ɔku ɔmɛni líse lɛnɔ muugyele-mii na Blɔti lɛnyi kemmo.

²³Gaio ɔni négyingya enu ɔ́ƒɔ ami ku baƒɔtaadine lɛkpa lɛni mɔɔsa mɛni ƒui uugyele-mii. Na Erasto ɔni ndi ɔma ɔmɛni egulabi lɛlɔ ɔnune ku bula ɔnwani Kwarto banii beegyele-mii.

²⁴Blɔti Yesu Kristo lɛƒɔndia lɛsiaku bina ƒui. Ɔsia lɛni.

²⁵Na ɔƒaani ni, bɛya bumwi Katɔti. Anwu ndubɔkana na ɔda-mii na binye kpakplaa aani kalɛ na mɔɔsu na litemi buni lɛni kudu na muubó kemmo ɔkɛnku Yesu Kristo lɛlɔ. Litemi buni lɛmɛni nkɛnku ala abɛdi ani na Katɔti údie keyi na ábɛ-bu na akwa pii ani návi kemmo.

²⁶Nsu ɔƒɛni ni, bédie ala ammɔ keyi béte kalɔ ƒui bekyuli aani kalɛ na nwuna kenye bediene bénweni bése. Katɔti ɔni nli ngba úsela ƒui lɛƒɔyɔ ndi ka ɔlɛka bakɔ litemi buni lɛmɛni lɛsa na kadi ƒui baƒɔ-nwu badi na badi nwuna litemi lɛlɔ.

²⁷Katɔti ɔni lɛti ndi ɔnundane ni, anwu na ɔlɛka bumwi ka ɔ́si ɔƒɛni úsela uwi ƒui na Yesu Kristo lɛnyi kemmo! Ɔsia lɛni.