Read Lelemi Korintoƒuɔ 1 1 Bible Online

Korintoƒuɔ 1 1 - Lelemi bible

Korintoƒuɔ 1 1

¹Ami Paulo ɔni nkɛnku Katɔti lɛƒɔyɔ lɛlɔ ɔsu na ndi Yesu Kristo ɔtalane ku bula ɔnwa Sostene muunweni-mii ɔku ɔmɛni.

²Búnweni ɔku ɔmɛni buute Korintoƒuɔ baƒɔtaadine bani na ɔkɛnku Yesu Kristo lɛlɔ na Katɔti údie úse na ɔ́lɔ-ma ɔnii babla nwuna bekyuli kedee. Lɛni na ɔ́bla bekyuli bani ƒui lɛnɔ mɔɔkpali Blɔti Yesu Kristo. Anwu ndi Blɔti ute abu ku-ma ƒui.

³Buuvele bɔnii bula Unwoti Katɔti ku Blɔti Yesu Kristo lɛƒɔndia ku keyi buɛɛ kasiaku-mii.

⁴Mɔɔgyá Katɔti enu uwi biala na bina lili ɔkɛnku lɛƒɔndia lɛni na úte-mii ɔ́siaku Yesu Kristo lɛlɔ ɔsu.

⁵Ɔni bɛ́bla unwi ku Kristo ɔsu ni, bɛɛtí litemi buni lɛmmɔ na biidie-ni keyi na bínwini Kɔyu kemmo balakɛne lɛnɔ.

⁶Yesu Kristo lɛlɔ litemi lɛmɛni lɛ́kɛ keliekɔ na bina akɔ kaduɛ.

⁷Ɔmɛni ɔsu ni, bilayaki litela lɛdi ɔni na binye bɛgya ka Katɔti ɔya na Blɔti Yesu Kristo ɔ́da ɔ́lɛ.

⁸Na ɔdubɔgyumana-mii na bɛda bina bɔƒɔtaadi kaduɛ utédu kawɔlɔkɔ. Anwu ndubɔya na si Blɔti Yesu Kristo úbo ubatɛku bayawine litemi ni, kɔtɔ bɔdu bɔdi bulebo-mii lɛlɔ.

⁹Katɔti ɔni nálɔ-mii ɔnii bɛbla unwi ku Ubidi Blɔti Yesu Kristo ni, ɔdi ukyuli ɔni lɛlɔ na bɛkada bikpo.

¹⁰Na kenyekɔ kani na Blɔti Yesu Kristo úte-mi kenye ni, mɔɔsu-mii kpakplaa aani mina banwa baƒɔtaadine kalɛ nnii bina ƒui binu lɛlɔ kalɔ kalɛ na lɛlɔ bule bɔdi bulakya-mii akɔ. Na bɛbla unwi na ala ani na bɛɛkali ku ala ani na bɛwia lɛlɔ.

¹¹Ɔsika ni, banwa, bekyuli badi bási Klo kaduli na básu-mi nwaa banii kadɔ kakya-mii ntɛ.

¹²Lɛla lɛni mɔɔtina ndi ka bina akɔ ɔdi biala ku lɛla lɛni na ɔɔsu. Ɔdi ɔnii, “Ami Paulo kama na nsia.” Na ɔbambadi ɔnii, “Ami Apolo kama na nsia.” Na ɔbambadi lɛnɔ ɔnii, “Ami Petro kama na nsia.” Na ɔbambadi lɛnɔ ɔnii, “Ami Kristo kama na nsia.”

¹³Muuye-mii nnii Kristo ule lɛlɔ kemmo akpa akpa? Munuu ni, Paulo nékpi na ugyii lɛlɔ na bina lili? Iye bákpila ɔdi ntu na Paulo lɛnyi kemmo? Oowo!

¹⁴Mɔɔgyá Katɔti enu ka ńtabla ntu bɔkpila ɔdi ɔmmɔ ńtete bina akɔ ɔdi ntu Krispo ku Gaio lɛti pɛ.

¹⁵Anwuɔsu ukyuli ɔdi ulakana bɔsu ɔnii mina lɛnyi kemmo na bákpila-nwu ntu bɔmmɔ.

¹⁶Línyimo ka Steƒana lɛ́bla ntu bɔkpila ɔdi ɔmmɔ líte ku nwuna kaduli bekyuli na nsɔ neeenyimo si lɛ́kpila ukyuli ɔbambadi ɔdi lɛnɔ.

¹⁷Kristo útatala-mi ɔnii mbo mbataabla ntu bɔkpila ɔdi teete bekyuli. Mmomu ɔ́tala-mi ɔnii mbakɔ litemi buni lɛmmɔ lɛsa nte bekyuli. Na naaasu-ni na kayawi lɛnunda ulu ɔdi lɛlɔ. Ɔsika naaayɔ ka ɔyikun ɔni nkɛnku kalɛ na Yesu Kristo úkpi na ugyii lɛlɔ mmɔ ɔyii udu na ɔbla keeke.

¹⁸Bekyuli bani na bana ɔbladu ɔ́ya na badaku bukpi na kɔyu kemmo ni, Kristo kukpi na ugyii lɛlɔ kɔtɛ kɔdi adɔlɔla kute-ma. Nsu abu bani na Katɔti ɔɔyá na bɔɔkɛ́ bɔƒɔ ni, bɔgyi ka Katɔti litemi lɛmmɔ lɛdi Katɔti ɔyikun ɔni na úte-bu.

¹⁹Na Bunweni Kedee Ɔku kemmo ni, Katɔti ɔ́su ɔnini, “Ndubo banundane lɛnunda udu bɔyila. Na lídie lɛ́tina ka bakutine lɛnunda lɛɛɛdi lɛla lɛdi.”

²⁰Ɔmɛni ɔɔtina ka kayawi kamɛni banundane ku bakutine ku bekyuli bani mbo kenye ogya ƒui lɛnunda lɛdi adɔlɔla.

²¹Katɔti ɔkɛnku nwuna lɛnunda lɛlɔ na ɔ́bla bekyuli lɛni kalɛ na balasia bana kayawi lɛnunda lɛlɔ na bati-nwu. Na nwuna litemi lɛni lɛsa na bɔɔkɔ́ mɛni lɛdi badi adɔlɔla. Nsu Katɔti ɔɔsia-ni lɛlɔ na ɔɔƒɔ́ bekyuli bani na báƒɔ bádi ngba.

²²Yudaƒuɔ baawia akɔla budie taatina. Na Helaƒuɔ ama kayawi lɛnunda kani na ama baawia bati.

²³Nsu abu ni, Yesu ɔni na bákana bámana ugyii lɛlɔ litemi na bɔɔsu. Na litemi lɛmɛni lɛɛtu Yudaƒuɔ kayi. Na bekyuli bani naaadi Yudaƒuɔ lɛnɔ ni, beenú-ni aani adɔlɔla.

²⁴Nsu ni, bekyuli bani na Katɔti ɔ́ƒuna ɔ́lɛku bani ndi Yudaƒuɔ ku Helaƒuɔ akɔ ni, Kristo ɔni lɛlɔ litemi na bɔɔsu mɛni ɔdi Katɔti ɔyikun ku nwuna lɛnunda.

²⁵Ɔsika lɛla lɛni na bekyuli baanu banii ɔdi Katɔti kɔdɔlɔ ni, lɛdi lɛnunda litulo bekyuli lɛdi. Na Katɔti bɔbla kpɛtɛ kpɛtɛ ni, bubo ɔyikun butulo bekyuli lɛlɔ ɔkplu.

²⁶Banwa, asa na Katɔti waƒuna-mii ni, binyimo kalɛ na bíse na bekyuli anumi! Bina pii biiibo lɛnunda ku ɔyikun. Iye bítasi kaba kani náƒɔ kuye kadi kemmo.

²⁷Mmomu Katɔti úse ɔ́ƒuna bekyuli badɔlɔdi na bayawine anumi kalɛ na uti-ma ɔkya kayawi kamɛni banundane kɔƒa. Na ɔ́ƒuna bekyuli bani neeebo ɔyikun ɔdi na bayawine anumi kalɛ na uti ɔkya kayawi kamɛni bayikune kɔƒa.

²⁸Katɔti ɔ́ƒuna bekyuli bani neeebo kenyekɔ kadi na bayawine anumi, na balábu-ma lɛnɔ taakya lɛla lɛdi kemmo kalɛ na uti ɔyila bekyuli bani na bayawine baabu na báƒɔ kuye udu.

²⁹Ɔmɛni ndubɔya na ukyuli biala ulakana lɛlɔ katɔ bɔtalaku na Katɔti anumi.

³⁰Katɔti náya na bɛ́bla unwi ku Yesu Kristo. Na Kristo ɔmmɔ ndi bula lɛnunda lɛni na Katɔti úti úte-bu. Na ɔkɛnku Kristo ɔmmɔ lɛlɔ ɔsu na Katɔti ɔɔnu-bu ka buse siin. Na búnwini Katɔti bekyuli kedee. Na ɔ́ƒɔ-bu lili kayu ɔ́lɛku ekpidi kemmo.

³¹Ɔmɛni ɔsu na Bunweni Kedee Ɔku ɔɔsu ɔnii, “Ukyuli ɔni mɔɔkun lɛmɛnɛ ni, ɔkun lɛmɛnɛ na lɛla lɛni na Blɔti ɔ́bla lɛlɔ.”