Read Lelemi Korintoƒuɔ 1 12 Bible Online

Korintoƒuɔ 1 12 - Lelemi bible

Korintoƒuɔ 1 12

¹Na ɔƒɛni ni, na ala ani ndanku Katɔti Kɔyu etela lɛlɔ ni, banwa, mɔɔyɔ́ ka bɛti litemi geen lɛni nkya-nya kemmo.

²Bɛgyi nwaa ka uwi ɔni na bɛɛɛgyi tɔ Katɔti ni, bɛ́ya na ala ani neeebo ngba átaadi-mii lɛlɔ na bitaakpa-nya na bɛ́yii ulu ɔmmɔ.

³Na ɔdi ka bɛnu bɛti ka ukyuli biala na Katɔti Kɔyu mɔɔdi-nwu lɛlɔ ni, ulakana na wasu ɔnii, “Yesu ɔdubɔnuku-ni.” Lɛni kani na ukyuli ɔdi lɛnɔ ulakana na wasu ɔnii, “Yesu ndi Blɔti,” si ɔɔɔdi Katɔti Kɔyu mɔɔdi-nwu lɛlɔ.

⁴Katɔti Kɔyu kuute etela pii, nsu Kɔyu kunwi kɔmmɔ kani na kɔdi.

⁵Lilu pii lɛkya na bɔɔbla kabla teete Katɔti, nsu Katɔti unwi ɔmmɔ kani na ɔdi.

⁶Na kabla lidu lidu lɛnɔ lɛkya, nsu Katɔti unwi ɔmmɔ kani mɔɔtina ɔdi biala nwuna kabla.

⁷Litela lɛni na ɔdi biala ubo ni, Katɔti Kɔyu néte-nwu litela lɛmmɔ kalɛ na bekyuli ƒui bakɛ-nwu lɛlɔ kɔsia.

⁸Ɔdi anwu ni, Katɔti Kɔyu kúte-nwu litela lɛni náya na ɔti butemi ku lɛnunda ɔkɛnku Kɔyu kɔmmɔ lɛlɔ. Na ɔdi lɛnɔ ni, Kɔyu kɔmmɔ kúte-nwu litela lɛni náya na ɔti butemi ku lɛlati ɔkɛnku Kɔyu kɔmmɔ kani lɛlɔ.

⁹Na ɔbambadi ubo bɔƒɔtaadi ɔkɛnku Kɔyu kɔmmɔ kani lɛlɔ. Na ɔdi ni, ubo litela lɛni na uti ɔbwi ɔlɛ ɔkɛnku Kɔyu kɔmmɔ kani lɛlɔ.

¹⁰Ukyuli bamba ni, ɔɔkana na ɔɔbla akɔla budie taatina. Na ɔdi ni, kalɛ na ɔsu Katɔti litemi. Na ɔbambadi ni, ayu lidu bɔnu taati. Na ɔdi ni, adi lidu bɔtɛmi. Na ɔbambadi ni, adi lidu kalɔ budie.

¹¹Ala amɛni ƒui ni, adi Katɔti Kɔyu kunwi kɔmmɔ ablala. Na kuule ala ammɔ teete ɔdi biala kalɛ kani na kɔɔyɔ́.

¹²Kristo use aani ukyuli ugyii ɔni mbo lɛlɔ ekpo pii. Ɔlɔna unwi kani na ɔdi ina ka lɛlɔ ekpo pii násala.

¹³Lɛni kani na use na abu bani ndi Yudaƒuɔ ku kadi bamba bekyuli akɔ ku bani mɔɔbla bekyuli bamba kabla ku bani mɔɔbla ama alati kabla lɛnɔ akɔ. Kɔyu kunwi kɔmmɔ kani na béti bábla-bu ntu bɔkpila ɔdi ɔmmɔ na bɔdi ɔlɔna unwi. Na Kɔyu kunwi kɔmmɔ na béte bula ƒui na bɔ́ni.

¹⁴Ɔsika ɔlɔna ɔmmɔ ɔlati ni, ɔɔɔdi lɛlakpa linwi kani na lɛdi. Mmomu lɛlɔ ekpo pii násala ɔ́bla-nwu unwi.

¹⁵Si ɔgba ɔ́su ɔnii, “Ka ami lɛɛɛdi kɔnu ɔsu ni, ami lɛɛɛkɛ ɔlɔna ɔmmɔ kemmo” ni, ɔmmɔ ulátina ka sɔsɔ na anwu ɔɔɔdi ɔlɔna ɔmmɔ kakɛ kadi.

¹⁶Na si kɔtu lɛnɔ kɔnii, “Ka ami lɛɛɛdi lɛnumi ɔsu ni, ami lɛɛɛkɛ ɔlɔna ɔmmɔ kemmo” ni, ɔmmɔ ulátina ka sɔsɔ na ɔɔɔdi ɔlɔna ɔmmɔ kakɛ kadi.

¹⁷Na si ɔlɔna ɔmmɔ ƒui ɔdi lɛnumi kani ni, dɛ na wabla asa na wenu lɛla lɛdi? Na si kɔtu lɛti lɛnɔ na ɔdi ni, dɛ na wabla asa na wenu ɔnyi?

¹⁸Nsu si bɔ́sia anumi ni, bɔdubɔnu ka Katɔti úti lɛlɔ ekpo bun bun ɔ́bla ɔlɔna umodi ɔmmɔ kalɛ na anwu ɔlati ɔɔyɔ́ ka use.

¹⁹Lɛlɔ ugyii ɔdi uuubo si ɔna ƒui ɔdi likpo linwi!

²⁰Nsu kalɛ na bɔɔnu-nwu ni, ɔdi ekpo pii. Nsu ɔdi lɛlɔ ugyii unwi.

²¹Ɔmmɔ ɔsu na lɛnumi lilakana kɔnu bɔsu ɔnii, “Naaawia-a na mina lɛla lɛdi kemmo.” Na lɛni kani na lili lɛnɔ lilakana lɛgba bɔsu lɛnii, “Naaawia-a na mina lɛla lɛdi kemmo.”

²²Lɛlɔ ekpo ani nse kpɛtɛ kpɛtɛ ntulo ni, anya mmomu na si eeebo-bu lɛlɔ na bulakana lɛla lɛdi bɔbla.

²³Na ekpo ani na bulábu ni, anya na bɔɔtí bɔda kaduɛ mmomu. Na ekpo ani naaadia ka budie keyi ni, anya na bɔɔda buɛɛ.

²⁴Na bulábla ɔmmɔ udu teete ekpo ani na bekyuli baanu uwi biala. Nsu Katɔti násala lɛlɔ ekpo lɛni na ɔ́ya na buuti ɔbu teete ekpo ani mmomu na bɔɔnu ka átaƒɔ kuye.

²⁵Ɔmɛni ɔsu bule bɔdi buuubo lɛlɔ ekpo ntɛ. Mmomu ekpo ƒui adanku kɔsia ete lɛlɔ.

²⁶Na si lɛlɔ kakɛ kadi kakya lɛbibo kemmo ni, ɔlɔna ugyii ɔmmɔ ƒui uunú ɔlɛ na lɛlɔ ekpo akladi lɛnɔ eebó abi. Na si beemwi kakɛ kadi ni, lɛlɔ ekpo ana ƒui aakɛ́ ebiti ammɔ.

²⁷Anwuɔsu bina ƒui násala bɛ́bla Kristo ɔlɔna ugyii ɔmmɔ na bɛdi-nwu lɛlɔ ekpo unwi unwi.

²⁸Na baƒɔtaadine lɛkpa kemmo ni, Katɔti úti bula ƒui úse ekpo ani námanku-bu. Udeedi ni, batalane. Na unyɔdi ni, kenye bediene. Na ɔtɛdi ni, ala batinane, asa na bani mɔɔbla akɔla budie taatina. Na bani mbo ɔyikun ɔni na babwi lɛlɛ iye bebunku bekyuli iye banu kabla lɛlɔ iye batɛmi adi lidu lidu lɛnɔ basia-ma kama.

²⁹Ɔɔɔdi bekyuli ƒui ndi batalane iye kenye bediene iye ala batinane. Na ɔɔɔdi ɔdi biala mbo ɔyikun ɔni na uti ɔbla akɔla budie taatina.

³⁰Na ɔɔɔdi ɔdi biala mbo ɔyikun ɔni na uti ɔbwi lɛlɛ iye ɔtɛmi adi lidu iye udie ala ani básu kalɔ.

³¹Ɔmɛni ɔsu ni, biti bina kayi bɛsia etela ani náƒɔ kuye etulo lɛlɔ. Ala ani náƒɔ kuye etulo ƒui ndi ani na ndubo-mii bɔtina mɛni.