Read Lelemi Korintoƒuɔ 1 15 Bible Online

Korintoƒuɔ 1 15 - Lelemi bible

Korintoƒuɔ 1 15

¹Banwa, ɔƒɛni ni, mɔɔyɔ́ ka binyimo litemi buni lɛni lɛsa na lɛ́kɔ líte-mii. Litemi lɛmɛni na bɛ́ƒɔ bɛ́di na binye bɔƒɔtaadi bɔmmɔ lɛlɔ kpakplaa.

²Na ani ndi litemi buni lɛmmɔ na nina lɛsa na lɛ́kɔ líte-mii. Litemi lɛmmɔ ndubɔƒɔ-mii ngba si bɛ́da-ni kpakplaa amu ntu ukpludi na bɛnii bɛ́ƒɔ-ni bɛ́di.

³Lɛla lɛni na lɛ́ƒɔ lɛ́siku Blɔti kudɔ ni, ani kani na líti muute-mii. Na ani ndi lɛla lɛni náƒɔ kuye lítulo ƒui, ka Kristo úkpi úte-bu na bula alaekpidi ɔsu aani kalɛ na bénweni bákya Bunweni Kedee Ɔku kemmo.

⁴Na báva-nwu, na Katɔti ɔ́gyila-nwu ɔ́lɛku bekpine akɔ emeyi atɛ kama, na úbo uli ngba aani kalɛ na ɔkya Bunweni Kedee Ɔku kemmo.

⁵Na údie lɛlɔ ɔ́tina Petro ku batalane leevu-inyɔ bammɔ.

⁶Ɔmmɔ kama ni, údie lɛlɔ ɔ́tina nwuna basiakune bani ntulo nkyuli eti leevu na mmɔ. Na bana akɔ badi bamu belie ngba ɔmwi, ina ka badi béekpi.

⁷Na ɔmmɔ kama údie lɛlɔ ɔ́tina Yakobo ku batalane bammɔ ƒui.

⁸Na kekplokɔ ni, údie lɛlɔ ɔ́tina ami lɛnɔ ina ka lɛlɛ ukyuli ɔni na nwuna bɔwɔ bɔ́bla kekuma.

⁹Ɔsika ami ndi batalane bammɔ akɔ ubliidi ƒui. Na ńtamanku ka balɔ-mi banii ɔtalane muedi, ɔsika ami líkpoku Katɔti baƒɔtaadine lɛkpa lɛmmɔ.

¹⁰Nsu ɔkɛnku Katɔti lɛƒɔndia ɔsu ni, ndi ukyuli ɔni ndi ɔƒɛni. Na nwuna kaƒɔbuni ala ani na úte-mi ni, ánwu ebi. Na lɛ́bla kabla kpakplaa lítulo batalane bakladi ɔni na bekyuli baaasia anu ina ka ɔɔɔdi ami ɔlati ɔyikun kemmo na ɔdi. Mmomu Katɔti ɔyikun nkɛ-mi lɛlɔ na lɛ́bla ɔmɛni.

¹¹Anwuɔsu si ami násu-mii lɛla lɛdi o-o, iye ama násu-mii o-o ni, lɛlakpa linwi lɛmɛni kani na bɔɔsu. Na ani na bɛ́ƒɔ bɛ́di.

¹²Ɔƒɛni ka kenye kani na bɔɔsu ndi ka Katɔti ɔ́gyila Kristo ɔ́lɛku bekpine akɔ ni, bi ɔsu na bina badi bɛɛsu bɛnii Katɔti ulágyila bekpine na basɔ bebelie ngba?

¹³Si sɔsɔ na use lɛni ni, na ɔɔtina ka Katɔti útagyila Kristo útalɛku bekpine akɔ.

¹⁴Na si Katɔti útagyila Kristo útalɛku bekpine akɔ bɔdi ni, na lɛsa lɛdi liiibo na bɔɔkɔ́ bute-mii. Na lɛla lɛdi lɛnɔ liiibo na bɛƒɔ bɛdi.

¹⁵Na ɔni nsɔ mbo ɔkplu ntulo ndi ka ɔɔtina ka bɔɔnyi ɔkɔ taasia Katɔti ka anwu nágyila Yesu ɔ́lɛku bekpine akɔ. Nsu si sɔsɔ na ɔdi ka bekpine baláta teelie ngba ni, na útagyila Yesu.

¹⁶Anwuɔsu si sɔsɔ na ɔdi ka ulágyila bekpine taasiku kekpine ni, na bɛgyi bɛnii útagyila Yesu útalɛku bekpine akɔ.

¹⁷Na si Katɔti útagyila Yesu útalɛku bekpine akɔ bɔdi ni, na bina bɔƒɔtaadi buuubo kɔsia kɔdi, na bɛmu bɛkya bina ekpidi kemmo.

¹⁸Na nwuna kalɔ ndi ka Kristo baƒɔtaadine bani nékpi lɛnɔ báyii.

¹⁹Na si kayawi kamɛni ngba bulie kani ɔsu na bula anu aasia Kristo lɛlɔ ni, na bula lɛlɔ libo kɔnyana litulo bekyuli ƒui.

²⁰Nsu litemi geen lɛmmɔ ndi ka Katɔti ɔ́gyila Kristo ɔ́lɛku bekpine akɔ. Na ɔmɛni ndi bula kama kekpokɔ ka bani ƒui ntɛ kekpine badubɔsɔ bɔta.

²¹Ɔsika kalɛ na kukpi kɔkɛnku ukyuli lɛlɔ na kúduo bekyuli akɔ ni, lɛni kani na bekpine badubo bɔsɔ bɔta ɔkɛnku ukyuli kani lɛlɔ.

²²Kalɛ na bekyuli bani nálɛ bási Adam kemmo ƒui békpi ka báblaku-nwu unwi ɔsu ni, lɛni kani na Katɔti ɔdubɔsɔ ɔgyila bekyuli ƒui ɔlɛku kekpine na belie ngba ɔkɛnku bana unwi bɔbla ku Kristo ɔsu.

²³Nsu Katɔti ɔdubɔgyila ɔdi biala na ulu ɔni na Katɔti ɔlati úse úse lɛlɔ. Na Kristo ndi udeedi. Na uwi ɔni lɛlɔ na wasɔ webo ni, bani na béti lɛlɔ béte Kristo ɔmmɔ na ɔdubɔsɔ ɔgyila.

²⁴Ɔmmɔ kama ni, kawɔlɔkɔ kammɔ kadububo. Na Kristo ɔdubɔyila bayikune ku kenyekɔ ku ɔyikun ƒui udu. Na Kristo ɔdubuti lɛga kadikɔ kammɔ ɔkya Katɔti ɔni ndi Ɔti enu kemmo.

²⁵Ɔsika Kristo ɔdubo lɛlɔ butaadi wetédu ka Katɔti úti nwuna bekisine ƒui ɔ́kya Yesu lɛgba kalɔ.

²⁶Na ukisine ukplodi ɔni udu na ɔdubɔyila ndi kukpi.

²⁷Ɔsika Bunweni Kedee Ɔku ɔ́su ɔnini, “Katɔti úti ala ƒui ɔ́kya-nwu lɛgba kalɔ.” Na use nwaa ka si básu banii ala ƒui ni, ɔmmɔ ulátina ka Katɔti ɔni néti ala ammɔ ɔ́kya Kristo lɛgba kalɔ lɛnɔ ubunku.

²⁸Na si uwi ɔni na Katɔti úti ala ƒui ɔ́kya Kristo kalɔ ɔ́wɔlɔ ni, anwu Kristo ɔni ndi Katɔti Ubidi ɔmmɔ ɔdubuti lɛlɔ ɔkya Katɔti ɔmmɔ kalɔ na Katɔti ɔmmɔ ɔdi ala ƒui lɛlɔ kede kede.

²⁹Ɔƒɛni ni, na bekyuli bani mɔɔƒɔ́ ntu bɔkpila ɔdi na bekyuli bani néekpi lili ni, bi na ɔbladu ɔmmɔ ɔdanku? Na bi mɔɔlɛ́ taasiku ɔmmɔ kemmo. Si sɔsɔ na ɔdi kalɛ na badi baasu banii basɔ balata balálɛ kekpine na bebelie ngba ni, bi ɔsu na baakpila bekyuli bammɔ ntu na bani néekpi lili?

³⁰Na abu batalane nɔɔ? Bi ɔsu na bula ngba bɔkya ɔgbankpi kemmo uwi biala?

³¹Banwa, kukpi ɔgbankpi ɔsiaku-mi kadi biala megye! Na mɔɔkɔliku lɛlɔ katɔ na amii ɔsu ɔkɛnku kalɛ na bɔ́bla unwi ku Kristo ɔsu. Anwuɔsu na muudie ɔmɛni keyi nwaa.

³²Nsu si kayawi kamɛni kasusu kani ɔsu na líkpoku bekyuli bani nse aani beƒiebuo na Eƒeso ni, bi kɔsia na lɛ́kɛ? Na si bekyuli basɔ balata balálɛ kekpine na bebelie ngba bɔdi ni, na bɛgyi bɛnii ɔlɛka bɔbla aani kalɛ na lɛsugba lɛdi lɛɛsu lɛnii, “Bɛya bɔdi na bɔni, ɔsika kɔnaadi bɔdubo bukpi.”

³³Bitabla susuusu. Kɔkpana kukpidi kuubile udu buni.

³⁴Bɛsɔku kasusu buni bɛbla, na bɛda bina ekpidi lilu bɛva. Mɔɔsu-mii nwaa kalɛ na kɔƒa kukpo-mii ka bina badi bɛɛɛgyi Katɔti.

³⁵Ukyuli ɔdi ɔdubuye ɔnii, “Dɛ na baasɔ taagyila bekpine na baasɔ teebelie ngba? Na ɔlɔna ɔmani udu ndubo-ma bɔkya?”

³⁶Bekyuli susuusu! Si bɛ́va edula kebi bɛ́kya kalɔ ni, lilakwɛ teenwini lɛla lɛni mbo ngba si útebu.

³⁷Na lɛla lɛni na bɛɛvá ni, edula kebi kani na kadi ɔƒaalɛ lɛntabi na lɛdi iye edula kebi kabambadi kadi. Na ɔɔɔdi kebi kammɔ kugyii na bɛɛkya kalɔ asa na ɔɔlɛ́ lili kama.

³⁸Katɔti muute kebi kammɔ ugyii udu ɔni na ɔɔyɔ́. Uute kebi biala ku kana kugyii udu ɔni námanku-ka.

³⁹Na ala ani ƒui nli ngba ni, ɔlɔna ɔɔɔdi ɔlɔna udu unwi. Bekyuli bebo bana ɔlɔna bun. Na bebuo lɛnɔ bebo bana ɔlɔna bun. Baasɛ lɛnɔ bebo bana ɔlɔna, na kɔbɛ lɛnɔ kubo kuna ɔlɔna bun.

⁴⁰Katɔ ala akya. Na kayawi kamɛni lɛlɔ ala lɛnɔ akya. Katɔ ala bɔdia bɔvumana ku kalɔ lɛlɔ ɔlɔna bɔdia.

⁴¹Ɔƒɛ ɔdanku nwuna bukeye, na kɔbuli lɛnɔ kɔdanku bukeye bɔbambadi. Na ayabi lɛnɔ ana bukeye buse bun. Na ayabi ammɔ akɔ muedi kavumana kakya ana bukeye kemmo.

⁴²Lɛni kani na ɔdubo buse uwi ɔni na Katɔti ɔdubɔgyila bekpine na basɔ bebelie ngba. Si báva ukyuli ɔlɔna ni, ɔdi lɛla lɛni muubie taayii udu. Na si bágyila-nwu ni, ɔsɔ ulekpi.

⁴³Si uwi ɔni na báva-nwu ni, údubie na use kpɛtɛ kpɛtɛ. Na si uwi ɔni na bágyila-nwu básiku kekpine ni, ɔdubɔdia bɔnu na ɔyu ɔkplu.

⁴⁴Uwi ɔni na báva-nwu ni, ɔdi kayawi ɔlɔna ɔni muukpi. Na si bágyila-nwu ni, únwini kɔyu kemmo ɔlɔna. Si kayawi ɔlɔna ɔkya ni, na bɛgyi bɛnii kɔyu kemmo ɔlɔna lɛnɔ ɔkya.

⁴⁵Ɔsika ɔkya Bunweni Kedee Ɔku kemmo ka ni, “Ukyuli udeedi ɔni ndi Adam ni, Katɔti nédie-nwu na úte-nwu ngba aani ɔyawine.” Na Adam ukplodi ɔmɛni anwu ni, ɔdi Kɔyu kɔni muute ngba geen.

⁴⁶Ɔɔɔdi kɔyu kemmo lɛla mɔɔgyú taatɔ. Mmomu ɔlɔna kemmo lɛla mɔɔtɔ. Kama asa na kɔyu kemmo lɛdi lɛɛsia.

⁴⁷Adam udeedi ɔni na Katɔti úti lɛti ɔ́vɔ ni, kalɔ lɛlɔ na ɔ́si. Na Adam unyɔdi ni, katɔ na ɔ́si.

⁴⁸Na bekyuli bani na kalɔ lɛlɔ mɛni na bási ni, bese aani ukyuli ɔni na béti lɛti bávɔ-nwu. Na bani na katɔ na bási ni, ama lɛnɔ bese aani ukyuli ɔni nási katɔ.

⁴⁹Kalɛ kani na bubo ukyuli ɔni nási kalɔ lɛlɔ mɛni udu ni, lɛni kani na ukyuli ɔni nási katɔ ɔdubɔya na bɔkɛ nwuna udu.

⁵⁰Banwa, lɛla lɛni kalɔ na muudie ndi ɔmɛni. Lɛla lɛni ndi ɔlɔna ku ubugya ni, lilakana Katɔti lɛga kadikɔ ala bɔdi. Na lɛla lɛni muubie taayii udu ni, lilakana na lɛkya kesii kani na lɛla lɛni neeebie taayii udu lɛkya.

⁵¹Binu lɛbɛla lɛmɛni. Ɔɔɔdi bula ƒui ndubukpi. Nsu si kakpɛɛ kekplodi káku ni, Katɔti ɔdubo bula ƒui udu bɔvumana kɔnakunwi.

⁵²Na ɔdubɔbla aani kalɛ na beebó anumi. Ɔsika si kakpɛɛ kammɔ káku ni, Katɔti ɔdubɔgyila bekpine ɔni na basɔ belekpi kudii. Na ɔdubo bula ƒui udu bɔvumana.

⁵³Ɔsika lɛla lɛni muubie taayii udu ni, badubo-ni bɔvumana bunwini lɛla lɛni nsɔ neeebie taayii udu. Na lɛla lɛni muukpi lɛnɔ ni, ɔdubo-ni bɔvumana bunwini lɛla lɛni nsɔ naaadubo bukpi.

⁵⁴Anwuɔsu si ala amɛni álɛ na bávumana ala ebiedi na énwini ani nsɔ neeebie ni, na Bunweni Kedee Ɔku kemmo etemila ani mɔɔsu anii, “Ɔ́yila kukpi udu na ɔ́di-ku lɛlɔ,” ébo éte lɛni sɔsɔ.

⁵⁵Na bénweni lɛnɔ banii, “Kukpi, wɛ na ƒula lɛlɔ bɔdi bɔkya. Na wɛ na ƒula ɔyikun ɔni mɔɔta-bu mmɔ ɔkya?”

⁵⁶Kukpi kɔɔkɛ́ ɔyikun ɔni na ɔda ɔɔta-bu taasiku likpidi kudɔ. Na likpidi lɛnɔ lɛɛkɛ́ nwuna ɔyikun taasiku ɔda bubo kudɔ.

⁵⁷Nsu bɔɔgyá Katɔti enu. Anwu náya na bɔ́di lɛlɔ ɔkɛnku Blɔti Yesu Kristo lɛlɔ!

⁵⁸Anwuɔsu ni, banwa, binye kpakplaa na bitagbanta. Na binye Blɔti kabla lɛlɔ uwi biala. Ɔsika bɛgyi ka lɛla lɛdi liiibo na bɛdubɔbla na Blɔti kabla kemmo na wabla keeke.