Read Lelemi Korintoƒuɔ 1 8 Bible Online

Korintoƒuɔ 1 8 - Lelemi bible

Korintoƒuɔ 1 8

¹Na ɔƒɛni ni, mɔɔyɔ́ ka lɛsu-mii lɛla lɛdi na adila ani na béti bákpa na baƒiɔ abi lɛlɔ. Bɔɔsu bɔnii bula ƒui bubo lɛlati. Nsu bɔgyi lɛnɔ ka lɛlati lɛmɛni lɛɛyá na ukyuli uuƒu na ɔɔtina lɛlɔ. Nsu lɛla lɛni mɔɔkya-bu ogya ni, ani ndi si aayɔ́ bekyuli.

²Ukyuli biala ɔni mɔɔkali ɔnii ɔgyi lɛla lɛdi ni, geen geen ni, ɔɔɔgyi-ni kalɛ na ɔlɛka ɔti.

³Nsu ukyuli ɔni mɔɔyɔ́ Katɔti ni, Katɔti ɔgyi-nwu.

⁴Na ɔmɛni ndi lɛla lɛni mɔɔsu-mii na adila ani na béti bákpa na baƒiɔ abi lɛlɔ bɔdi lɛlɔ. Bɔgyi ka ala ani na bekyuli bábla bése baakpá ni, aaadi lɛla lɛdi na kayawi kamɛni kemmo. Ɔsika bɔgyi ka Katɔti unwi pɛ kani nkya.

⁵Ina bekyuli baasu banii baƒiɔ bakya katɔ iye kalɔ mɛni na ina ka baƒiɔ bamɛni lidu limomo ku kalɔ benwoti muedi ni,

⁶abu bɔgyi ka Katɔti unwi pɛ na bubo. Anwu ndi Ati ɔni nédie ala ana ƒui. Na anwu na bulie ngba bute. Na Blɔti unwi pɛ kani nkya, na anwu ndi Yesu Kristo ɔni lɛlɔ na Katɔti ɔkɛ údie ala ƒui. Na ɔkɛ anwu ɔsu na buli ngba.

⁷Ɔɔɔdi ukyuli biala ngyi litemi geen lɛmɛni. Ala ani na bekyuli bábla bése baakpá ni, ése áƒɔ badi lɛlɔ kemmo ɔni na úbedu ɔmwi kadi si bádi adila amɛni udu ni, baabu banii baƒiɔ adila na adi. Na bana kasusu kpɛtɛ kpɛtɛ kaadú-ma kɔtɔ ka adila ammɔ aayá beesé lɛlɔ.

⁸Ɔɔɔdi adila adi bɔdi ndubɔya na abu ku Katɔti ntɛ bɔdia bubu. Na bulayila lɛla lɛdi si bútadi. Na lɛni kani na bulákɛ lɛla lɛdi si bɔdi adila adi.

⁹Bɛnu kaduɛ na bina kuƒi kɔni na bibo lɛlɔ kalɛ na uleboku ukyuli ɔni na nwuna bɔƒɔtaadi buuubo ɔkplu kalɔ na wabla likpidi lɛdi.

¹⁰Kali nu si ukyuli ɔni na nwuna bɔƒɔtaadi buuubo ɔkplu ɔnu-ɔ aani ukyuli ɔni na ƒula lɛnunda lísie anumi ka aadi adila ani bákpa béte baƒiɔ na nwuna ɔtɔ. Anwu lɛnɔ ɔdubɔkɛ ɔyikun na ɔdi adila ani na béti bákpa béte baƒiɔ mmɔ.

¹¹Ɔmmɔ ɔsu ni, ƒula ɔnwani ɔni ɔsu na Kristo úkpi na nwuna bɔƒɔtaadi buse kpɛtɛ kpɛtɛ ɔdubɔyii ku udu na ƒula lɛla lɛni na aanu anii lɛlati ɔsu.

¹²Si úbo lɛni ni, na aabla likpidi taaƒiɔ ƒula baƒɔtaadine bakpana. Na áya na bani bɔƒɔtaadi neeebo ɔkplu bɔdubo-ma buteekpoku na bana kɔyi kemmo. Na si úbo lɛni ni, aabla likpidi taaƒiɔ Kristo.

¹³Anwuɔsu si adila ani na mɔɔdi adubɔya na mina ɔnwani ɔbla likpidi ni, nsɔ lɛɛɛdubo adila ani na béti bákpa béte baƒiɔ bɔdi kudii kalɛ na mina ɔnwani weduo likpidi kemmo.