Read Lelemi Korintoƒuɔ 2 2 Bible Online

Korintoƒuɔ 2 2 - Lelemi bible

Korintoƒuɔ 2 2

¹Ɔmɛni ɔsu lɛ́bla kasusu ka nsɔ neeebo-mii kudɔ na enu aƒɛ-mii.

²Ɔsika si lɛ́ya na enu áƒɛ-mii ni, ɔdi lɛnɔ ɔ́sɔ uuubo na waya na lɛlɔ lɛyɔ-mi, amu ntu amii bani na lɛ́ya na enu áƒɛ mmɔ kani.

³Na línweni ɔku kpakplaa ɔmmɔ límene-mii ɔsika si bubo na líbo-mii kudɔ uwi ɔmmɔ kemmo ni, nka bɛdubɔya na enu aƒɛ-mi. Nsu amii ndi bekyuli bani nálɛka bɛya na lɛlɔ lɛyɔ-mi. Na lɛ́ƒɔ lɛ́di ka si lɛlɔ lɛɛyɔ́-mi ni, amii lɛnɔ lɛlɔ lɛdubɔyɔ-mii.

⁴Sɔsɔ ni, ɔku ɔni na línweni-mii mmɔ ni, línweni-nwu na kayi ɔlɛ bunu ku enuƒɛ ku keku buwulo kemmo. Na ɔɔɔdi ka mɔɔwia nnii amii lɛnɔ binu ɔlɛ ɔdi, mmomu kalɛ na bɛnu bɛti ka mɔɔyɔ́-mii geen ɔsu.

⁵Anwuɔsu ukyuli ɔni bɔƒiɔ lɛlɔ litemi línweni-mii ni, ɔɔɔdi ami lɛti na ɔ́ƒiɔ. Mmomu bɔkana bɔsu bɔnii ɔ́ƒiɔ bina ƒui. Nsu naaayɔ ka bɔdɔnku-nwu bɔgya.

⁶Ɔsika ukyuli ɔmmɔ ni, kɔtu kɔni na bina akɔ pii bɛ́ni-nwu mmɔ ni, ɔmmɔ kani ɔbɔ.

⁷Na ɔƒɛni ni, biti bɛkyiɛ-nwu na bɛkya-nwu ɔkplu kalɛ na lɛlɔ lilayuɛ-nwu na enu aƒɛ-nwu ƒui.

⁸Ɔmɛni ɔsu ni, bise-nwu kayi na bidie bɛtina-nwu ka bɛmu bɛɛyɔ́-nwu.

⁹Ɔmɛni ɔsu na línweni-mii ɔku na lɛ́wia nnii mɔɔtí kalɛ na binye kpakplaa na bɛda mina ala ani ƒui na lɛ́tina-mii kaduɛ uwi biala.

¹⁰Si bíti ukyuli ɔmmɔ bɔƒiɔ bɛ́kyiɛ-nwu ni, ami lɛnɔ líti lɛ́kyiɛ-nwu. Na si bɔƒiɔ bɔdi bɔkya bɔni na ɔlɛka liti lɛkyiɛ-nwu ni, líti lɛ́kyiɛ-nwu na Kristo anumi kalɛ na bɛbla unwi.

¹¹Ɔmɛni ndubɔya na butile ukisine ɔmmɔ kuƒi na ulákɛ kasiakɔ kadi na bula lɛlɔ, ɔsika bɔgyi-nwu kɔkwɛ.

¹²Uwi ɔni na líbo ḿbakɔ Kristo litemi buni lɛmmɔ lɛsa na Troia ni, Blɔti ɔ́lɛmi kuƒi ka lɛbla nwuna kabla na mmɔ.

¹³Nsu mina kasusu kétete-mi bɔnwuna bɔdi, ɔsika ńtanu mina ɔnwani Tito na mmɔ ka línu-mii kɔku. Ɔmmɔ ɔsu lívele ulu na lɛ́tɔlɔ lísie Makedonia.

¹⁴Nsu ni, bɔ́gya Katɔti enu! Na bula unwi bɔbla ku Kristo ni, Katɔti ɔɔtɔnku-bu uwi biala na bɔkɛ bekyuli bani muusié taavi na Kristo lɛlɔ bɔdi kemmo. Na Katɔti ɔsia-bu lɛlɔ na udie Kristo ɔtina kayawi ƒui aani kalɛ na ɔnyi ƒɛƒɛɛ ɔɔƒɔ́ likpo lɛdi ƒui.

¹⁵Buse bute Katɔti aani ɔnyi ƒɛƒɛɛ ɔni nási Kristo lɛlɔ. Na ɔkɛ ɔɔví bekyuli bani nkɛ ulu buni lɛlɔ bésela ngba bɔƒɔ ƒui kemmo ku ama bani nkɛ ulu ukpidi lɛlɔ bésela bɔyii ƒui kemmo lɛnɔ.

¹⁶Bekyuli bani naaadubo bɔkɛ ngba bɔƒɔ ni, ɔnyi ɔmɛni ɔɔtina ka badubɔyii ku udu. Na bekyuli bani ndubɔkɛ ngba bɔƒɔ ama ni, ɔnyi ɔmɛni ɔɔtina ka badubɔkɛ ngba ƒui. Na ɔma geen ndubɔkana na ɔbla kabla kamɛni si ɔɔɔdi kuƒi na béte-ɔ?

¹⁷Abu buuuse aani bekyuli babambadi pii bani nkɛ bada litemi lɛmmɔ baadi kuye. Mmomu Katɔti úte-bu kenyekɔ na bɔɔkɔ́ litemi lɛmmɔ lɛsa na nwuna anumi aani Kristo kabla bablane kalɛ. Bulatɔlɔ bekyuli.