Read Lelemi Eƒesoƒuɔ 5 Bible Online

Eƒesoƒuɔ 5 - Lelemi bible

Eƒesoƒuɔ 5

¹Ka bɛdi Katɔti bebi bani na ɔɔyɔ́ ɔsu ni, amii lɛnɔ bɛkya ɔkplu na bɛlɛ-nwu.

²Na bɛsiaku Kristo ɔbladu kama na bɛyɔ lɛlɔ aani kalɛ na ɔɔyɔ́-bu na úti lɛlɔ ɔ́kpa na bula lili aani akpala ƒɛƒɛɛ úte Katɔti. Na adi akpala ani mɔɔyɔ́ Katɔti kaƒɔ.

³Ka Katɔti bebi bɛdi ɔsu ni, bɛda lɛlɔ bidie lɛsɔnɔdi ku lɛyalɛ ku lɛnungyie ƒui kemmo. Ɔsika ala amɛni udu átamanku ka balɔ-nya anyi muedi na Katɔti bekyuli kedee akɔ.

⁴Lɛni kani na utalɛka bitatɛmi kɔyalɛtɛ, ɔsika atɛ ekpidi ku adɔlɔla na adi. Mmomu biti linugya biteete Katɔti.

⁵Ɔsika amii alati bɛgyi bise ka ukyuli ɔni mɔɔbla lɛnungyie lɛni ndi lɛƒiɔkpa iye ɔni mɔɔbla lɛsɔnɔdi iye lɛyalɛ ni, uuubo kadikɔ kadi na Kristo ku Katɔti lɛgadi kemmo.

⁶Bitaya na ukyuli ɔdi uti etemila ekpludi adi ɔtɔlɔ-mii. Ɔsika ala ammɔ udu lɛlɔ ɔsu na Katɔti kɔnyi kuubo bekyuli bani mbo atuɔkplu mmɔ lɛlɔ.

⁷Anwuɔsu amii ku-ma bitadi kɔnwa kɔdi.

⁸Ɔsika kudeedi ni, na bɛkya lɛdisa kemmo. Nsu ɔƒɛni ka bínwini Blɔti badi ɔsu ni, bɛkya bukeye kemmo. Anwuɔsu bilie ngba aani bekyuli bani nlie bukeye kemmo.

⁹Ɔsika bekyuli bani nli bukeye kemmo ni, ebi ani na baanwu ndi ebi abuni. Baasu etemila geen na beelie siin.

¹⁰Na lɛnɔ ni, bɛtɛya lɛla lɛni mɔɔyɔ́ Katɔti kaƒɔ.

¹¹Amii ku bekyuli bani na bana ablala akya lɛdisa kemmo ni, bitasala lɛlɔ bitabla bana ɔbladu ukpidi ɔdi. Mmomu bidie-ma keyi.

¹²Ɔsika ala ani na baabɛ́ taabla mmɔ adi kɔƒa ka balɔ-nya anyi muedi.

¹³Na ala ani ƒui bédie keyi ni, adubɔda bɔlɛ keyi nwaa.

¹⁴Ɔsika lɛla lɛni na bédie keyi líduo bukeye kemmo. Ɔmɛni ɔsu na básu banii, “Awɔ ɔni mɔɔlɛɛ ni, gyinya na ata alɛ bekpine akɔ, na Kristo ɔdubukeye uwi-ɔ lɛlɔ.”

¹⁵Anwuɔsu bɛnu lɛlɔ kemmo kaduɛ na bɛti kalɛ na biti bilie ngba. Bitelie aani bekyuli bani nátada anu. Mmomu bilie ngba aani bekyuli bani náda anu.

¹⁶Bɛda bina lɛlɔ kaduɛ, ɔsika likyulikpi ala bɔbla bɔ́ƒɔ uwi ɔni kemmo bɔkya mɛni.

¹⁷Ɔmɛni ɔsu ni, bitabla lɛlɔ aani bekyuli badɔlɔdi. Mmomu bɛwia na bɛti ala ani geen na Blɔti ɔɔyɔ́ ka bɛbla.

¹⁸Bitekpi ntɛ, ɔsika ɔmɛni mɔɔyá na bɛɛyii udu. Mmomu Katɔti Kɔyu kɔƒɔ-mii lɛlɔ kemmo ƒui.

¹⁹Na biti Bunweni Kedee Ɔku kemmo lɛnu etemila bɛtɛmiku lɛlɔ, na bidie bɔƒɔtaadi lɛnu ku lɛnu lɛni ndanku Katɔti Kɔyu ala. Bɛtu lɛnu ku agyala biti bimwi Blɔti na bina kayi kemmo.

²⁰Na bɛgya Katɔti ɔni ndi bula Ɔti enu na Blɔti Yesu Kristo lɛnyi kemmo uwi biala na lɛla biala ɔsu.

²¹Na biboku lɛlɔ kalɔ bite bina lɛlɔ na kalɛ na bɛɛbu Kristo ɔsu.

²²Amii beleku biboku lɛlɔ kalɔ bite bina bagya aani kalɛ na biiboku lɛlɔ kalɔ teete Blɔti.

²³Ɔsika uleku ɔgya ɔdi lili ute ulekudi aani kalɛ na Kristo ɔdi lili ute baƒɔtaadine lɛkpa lɛni ndi nwuna ɔlɔna. Anwuɔsu na úti lɛlɔ ɔ́kpa na bana lili kalɛ na bakɛ bɔƒɔ.

²⁴Kalɛ na baƒɔtaadine beeboku lɛlɔ kalɔ teete Kristo ni, lɛni kani na ɔlɛka beleku lɛnɔ beteeboku lɛlɔ kalɔ teete bana bagya na lɛla biala kemmo.

²⁵Bagya, amii lɛnɔ bɛyɔ bina beleku aani kalɛ kani na Kristo ɔ́yɔ baƒɔtaadine lɛkpa lɛmmɔ ɔsu na úti lɛlɔ ɔ́kpa na bana lili.

²⁶Ɔ́bla ɔmɛni kalɛ na ɔbla nwuna ɔyɔne ɔmmɔ kedee. Na etemila ani na ɔ́su-nwu ɔsu ni, ɔ́bla-nwu sɛɛn aani kalɛ na beeti ntu taakpila ukyuli.

²⁷Na ɔ́klibi anwu ɔni ndi nwuna baƒɔtaadine lɛkpa kedee lɛni muukeye na bɔƒiɔ bɔdi buuubo-ni lɛlɔ, ɔsika likpidi iye bɔsɔ bɔdi bɔɔɔma-ni lɛlɔ.

²⁸Lɛni kani na ɔlɛka bagya bayɔ bana beleku aani kalɛ na baayɔ́ ama alati bana ɔlɔna. Na ɔnana ɔni mɔɔyɔ́ ulekudi ni, ɔɔyɔ́ anwu ɔlati ɔlɔna.

²⁹Ɔsika ukyuli ɔdi uuubo ɔni na uukisi nwuna ɔlɔna. Mmomu ni, ɔɔnu-nwu lɛlɔ na ɔɔbla-nwu kaduɛ, aani kalɛ na Kristo ɔɔbla teete nwuna baƒɔtaadine lɛkpa lɛmmɔ.

³⁰Ɔsika bɔdi nwuna lɛlɔ kakɛ kadi.

³¹Bunweni Kedee Ɔku ɔɔsu ɔnii, “Ɔmɛni ɔsu na ɔnana ɔdubɔmami ɔti ku uni lɛlɔ na uti lɛlɔ utámana ulekudi na bana inyɔ badubɔbla ɔlɔna unwi.”

³²Litemi lɛmɛni lɛdi abɛla ebendi. Na mɔɔsu-mii nnii etemila ammɔ ese ete Kristo ku baƒɔtaadine lɛkpa lɛmmɔ.

³³Nsu ni, akɛnku amii lɛnɔ lɛlɔ. Anwu ndi ka ɔlɛka ɔgya biala ɔyɔ ulekudi aani nwuna lɛlɔ, na uleku biala lɛnɔ ɔbu ɔgyani.