Read Lelemi Koloseƒuɔ 1 Bible Online

Koloseƒuɔ 1 - Lelemi bible

Koloseƒuɔ 1

¹Ami Paulo ɔni nkɛnku Katɔti lɛƒɔyɔ lɛlɔ ɔsu na ndi Yesu Kristo ɔtalane ni, ami ku bula ɔnwa Timoteo muunweni ɔku ɔmɛni.

²Na búti buute amii, bula banwa kedee, bani lɛnɔ náƒɔ Kristo bɛ́di geen na bɛkya Kolose. Buuvele Katɔti bɔnii nwuna lɛƒɔndia ku keyi buɛɛ kasiaku-mii.

³Uwi biala si bɔɔkpali katɔ ni, bɔɔgyá Katɔti ɔni ndi Blɔti Yesu Kristo Ɔti enu na bina lili.

⁴Ɔsika búnu kalɛ na bɛda bina bɔƒɔtaadi na Yesu Kristo kemmo ku kalɛ na bɛɛyɔ́ bina banwa baƒɔtaadine ƒui.

⁵Uwi ɔni na básu-mii litemi geen lɛni ndi litemi buni lɛmmɔ kudeedi ni, bínu ala abuni ani nse nte-mii na katɔ. Na ka bɛsia-nya anu ɔsu ni, bina bɔƒɔtaadi ku bina bɔyɔ bunye ala ani bɛsia anu mɛni lɛlɔ.

⁶Litemi buni lɛmɛni ala abuni amu aalɛ́ku bekyuli na liigyingya na kayawi ekpo ƒui aani kalɛ na ɔ́lɛku-mii uwi ɔni na bínu Katɔti kɔnyana bɔnu litemi geen lɛmmɔ kudeedi, na bɛ́nu bɛ́ti kalɛ na Katɔti ɔɔyɔ́-mii.

⁷Bula ɔnwa Epaƒra ɔni náƒɔ-bu kuye na anwu lɛnɔ ɔdi kabla ɔblane geen ute Kristo na bula kabla kamɛni kemmo nábasu-mii Katɔti kɔnyana bɔnu litemi lɛmmɔ.

⁸Ɔ́su-bu kalɛ na Katɔti Kɔyu kɔ́ya na bibo bɔyɔ bite bina baƒɔtaadine bakpana.

⁹Anwuɔsu ɔ́si uwi ɔni na búnu-mii kɔku ni, bútada Katɔti bɔkpali na bina lili bútaya. Na buuvele Katɔti bɔnii ubimi bina kasusu kemmo na ɔya na bɛti nwuna lɛyɔla. Na nwuna Kɔyu kute-mii lɛnunda ku ala kalɔ bunu kalɛ na bɛti ala ani na ɔɔyɔ́ ka bɛbla.

¹⁰Ɔmɛni ndubɔya na bɛti bina lɛlɔ bɔda na bilie ngba bɔni na Blɔti ɔɔwia. Na bina ngba bulie ɔbladu biala ɔbla ɔbuni. Na ɔdubo-mii bubunku na bitaati Katɔti teebu.

¹¹Muuvele-nwu nnii ɔya na nwuna ɔyikun ɔni nási nwuna bukeye kemmo ɔƒɔ-mii lɛlɔ kemmo ƒui kalɛ na bɛkana bunye kpakplaa na ala ani muukpóku-mii kenye ku kayi buɛɛ. Bɛgya Katɔti enu ku lɛlɔyɔ, ɔsika anwu náya na bínwini ala badine na Katɔ Ɔga Ɔma kesii kani na muukeye.

¹³Na anwu náda-bu údie ukisine ɔmmɔ enu kemmo na kasuudikɔ mmɔ, na úti-bu útákya Ubidi ɔni na ɔɔyɔ́ geen mmɔ lɛga bɔdi kemmo.

¹⁴Na anwu náƒɔ bula ekpidi lili kayu na bɔ́kɛ bula ekpidi buti taakyiɛ.

¹⁵Kristo ukyuli udu ɔni na bɔɔnu muudie Katɔti ɔni ukyuli udu na bulánu taatina. Na anwu ndi Katɔti Ubi udeedi ɔni mɔɔdi nwuna ala ani na údie ƒui lɛlɔ.

¹⁶Na ɔkɛnku anwu ɔmmɔ lɛlɔ na Katɔti údie ala ani ƒui nkya katɔ ku kalɔ kamɛni kemmo, ala ani na bɔɔnu ku ani na bulánu aani lɛgadi ku bagadine ku bayikune ku kenyekɔ biala ƒui lɛlɔ. Ɔkɛnku ubi ɔmmɔ lɛlɔ na údie ala ƒui, kalɛ na lɛla biala lɛbu Kristo ɔmmɔ.

¹⁷Kristo ɔ́kya asa na Katɔti údie ala ƒui. Na ɔkɛnku-nwu lɛlɔ na ala ƒui eesié kaduɛ.

¹⁸Anwu ndi lili ute nwuna ɔlɔna ɔni ndi baƒɔtaadine lɛkpa lɛmmɔ. Na ɔdi lɛkpa lɛmɛni kalɔ kesekɔ. Anwu ndi Katɔti Ubi udeedi ɔni na ɔ́gyila ɔ́lɛku bekpine akɔ, kalɛ na ɔtɔnku lɛla biala.

¹⁹Na nwuna kemmo na Katɔti ɔ́ya na bekyuli bánu nwuna ukyuli udu ƒui báti.

²⁰Na ɔkɛnku Ubidi ɔmmɔ lɛlɔ na Katɔti ɔ́klibi anwu ku ala ani nkya katɔ ku kalɔ ƒui ntɛ. Na ɔ́ya na bɔ́kɛ keyi buɛɛ ɔkɛnku Ubidi ɔmmɔ ubugya ɔni néwiakun na ugyii ɔni lɛlɔ na bákana-nwu bámana ɔsu.

²¹Na uwi ɔdi nábavi kemmo ni, bínwini kama bɛ́kya Katɔti na bíkisi-nwu na bina kasusu kemmo ɔ́si ala ekpidi ku kasusu kekpidi kani na bɛ́bla ɔsu.

²²Nsu ɔƒɛni ni, Katɔti ɔkɛnku nwuna Ubidi kukpi kɔni na úkpi na ugyii lɛlɔ mmɔ ɔsu ni, ɔ́klibi amii ku-nwu ntɛ kalɛ na bɛkana na binye nwuna anumi aani bekyuli bani nse kedee na bátasɔ na beeebo kɔtu bɔni bɔdi.

²³Anwuɔsu ɔdi ka binye kpakplaa na bina bɔƒɔtaadi kemmo, na bitaya na enu aƒɛ-mii na bɛyila lɛnunsia lɛni bibo ɔ́si uwi ɔni na bínu litemi buni lɛmmɔ. Na ɔdi litemi buni lɛni lɛsa na lɛ́kɔ líte bayawine ƒui. Na ani ɔsu na ami Paulo ḿbenwini Katɔti kabla ɔblane.

²⁴Na ɔƒɛni ni, ɔdi-mi kubiti ka muubó abi na amii ɔsu. Na mina abi ani na muubó na ɔlɔna kemmo mɛni ni, ɔ́ya na muubunku na libo abi ani na Kristo ɔlɛka ubo na nwuna baƒɔtaadine lɛkpa lɛni ndi nwuna ɔlɔna ɔmmɔ lili lɛwɔlɔ.

²⁵Baƒɔtaadine lɛkpa lɛmmɔ ɔsu na ḿbenwini Katɔti kabla ɔblane na kabla kani na úte-mi kenye, kalɛ na lɛkɔ litemi buni lɛmmɔ ƒui lɛsa lite-mii nwaa.

²⁶Na litemi buni lɛni kalɔ mbo ɔkplu ku bunu mɛni ni, Katɔti úti ɔ́bala kuuku bekyuli. Nsu ɔƒɛni ni, údie-ni keyi ɔ́tina nwuna bekyuli.

²⁷Katɔti bɔyɔ ndi ka bekyuli bani naaadi Yudaƒuɔ ƒui bati lɛla libendi lɛni na ɔ́da úse-bu, na lɛ́ƒɔ kuye geen. Na ani ndi Kristo ɔni nkya-bu kayi kemmo. Na anwu ndi bula lɛnunsia ka abu lɛnɔ bubo kadikɔ na Katɔti bukeye kemmo.

²⁸Na ɔmɛni ɔsu na bɔɔsu Kristo lɛlɔ litemi lɛmmɔ teete ukyuli biala. Na bɔɔlɛ-ma na bɔɔtina-ma ala na lɛnunda ƒui kemmo kalɛ na ɔdi biala ɔda ɔlɛ Katɔti anumi na use siin ɔkɛnku lɛla lɛni na Kristo ɔ́bla úte ɔdi biala kenye.

²⁹Ɔmɛni ɔsu na muukpóku lɛlɔ ɔkɛnku Kristo ɔyikun ɔni nkya-mi lɛlɔ kemmo ɔɔbla kabla kamɛni kenye.