Read Lelemi Yosua 12 Bible Online

Yosua 12 - Lelemi bible

Yosua 12

¹Israelƒuɔ békpo bádi baga inyɔ badi lɛlɔ. Na béti bana kɔlɔ kɔni nwi Yordan Ketu úti úsie ɔƒɛ katukɔ na ɔ́si Arnon Kɔwɛ útédu Hermon.

²Na Amoriƒuɔ baga inyɔ bammɔ kemmo unwi ndi Ɔga Sihon na úlie Hesbon ɔdi lɛga. Sihon ɔmɛni ɔɔdi lɛga ɔ́si Arnon Kɔwɛ kemmo útédu Yabok Ketu kemmo kesii kani na Amoriƒuɔ ɔmii ɔtɛ.

³Na ɔdanku Yordan Kɔwɛ uti ɔsi Galilea Ɛpu lɛba kada kakɛ utédu Bet-Yesimot na Mma Ɛpu ɔƒɛ katukɔ kakɛ na ɔkɛ Pisga Kɔbi kaƒɔna.

⁴Na Israelƒuɔ bamɛni bádi ɔga unyɔdi ɔni baalɔ banii Ɔga Og ɔni nási Basan lɛlɔ. Na ɔdi bekyuli bagyangladi bekplodi kemmo unwi ɔni nébu. Na ɔ́di lɛga na Astarot ku Edrei.

⁵Na Og ɔ́di lɛga na Hermon Kɔbi ku Salka ku Basan kɔlɔ lɛlɔ ƒui úti útédu Gesurƒuɔ ku Maakatƒuɔ ɔmii lɛlɔ ku Gilead kɔlɔ kakɛ kadi úti útédu Ɔga Sihon ɔni nási Hesbon ɔmii lɛlɔ.

⁶Na baga inyɔ bamɛni na Mose ku Israelƒuɔ békpo na bádi-ma lɛlɔ. Na Mose ɔni ndi Unwoti kabla ɔblane úti kalɔ kammɔ úte Rubenƒuɔ ku Gadƒuɔ na úti kalɔ kammɔ kakladi lɛnɔ úte Manase kaba bekyuli kakɛ kenwi.

⁷Na baga bani na Yosua ku Israelƒuɔ békpo na bádi-ma lɛlɔ ni, ama ndi baga bani nlie bésie Yordan Ketu ɔƒɛ kanukɔ ɔ́si Baal-Gad na Lebanon Kɔwɛ kemmo útédu Halak Kɔbi lɛlɔ úti ɔɔkɔ́ útédu Seir na Edom kalɔ lɛlɔ. Na Yosua úle kalɔ kammɔ úte Israel kaba kammɔ ƒui. Na béti mmɔ bábla bana kadikɔ.

⁸Na lɛma lɛni nwi abi eli ku kaƒɔna na Yordan Kɔwɛ si éti aayu kalɔ kani nákwii na kewi ƒiaa ku Galilea Ɛpu lɛba. Na nka Hetiƒuɔ ku Amoriƒuɔ ku Kanaanƒuɔ ku Perisiƒuɔ ku Hewiƒuɔ ku Yebusiƒuɔ nli-ka kemmo.

⁹Na Israelƒuɔ békpo bádi baga bani mɔɔdi lɛma lɛni anyi ndubo bɔlɔ mɛni lɛlɔ. Na lɛma lɛmmɔ ndi Yeriko ku Ai ɔni nde Betel

¹⁰ku Yerusalem ku Hebron

¹¹ku Yarmut ku Lakis

¹²ku Eglon ku Geser

¹³ku Debir ku Geder

¹⁴ku Horma ku Arab

¹⁵ku Libna ku Adulam

¹⁶ku Makeda ku Betel

¹⁷ku Tapua ku Heƒer

¹⁸ku Aƒek ku Saron

¹⁹ku Madom ku Hasor

²⁰ku Simron-Meron ku Aksaƒ

²¹ku Taanak ku Megido

²²ku Kedes ku Yakneam ɔma ɔni nkya Karmel Kɔbi,

²³ku Dor ɔma ɔni nkya ɛpu kudɔ ku Goim ɔma ɔni nkya Gilgal ku Tirsa.

²⁴Na baga bani na Yosua ku Israelƒuɔ bádi-ma lɛlɔ badi baga avlaatɛ-unwi.