Read Lelemi Yosua 16 Bible Online

Yosua 16 - Lelemi bible

Yosua 16

¹Kalɔ kani na Yosua úti úte Yoseƒ kaba kése kalɔ kásiku Yordan Ketu. Na ɔkɛ Yeriko na ketu kani nkɛ Yeriko ɔƒɛ katukɔ kakɛ. Na úti útéduo kalɔ kakwiidi kani nwi Yeriko si éti aakɔ́ abi ésela Betel ɔni basɔ baalɔ Lus

²na ɔkɛ Arkiƒuɔ ɔmii lɛlɔ na Atarot.

³Na úsie útédu ɔƒɛ kanukɔ kakɛ na Yaƒletiƒuɔ ɔmii lɛlɔ úti ɔ́kɛ ɔƒɛ kanukɔ na Bet-Horon ɔmii lɛlɔ, na ɔkɛ Geser utáwɔ Mediterenia Ɛpu.

⁴Kalɔ kamɛni na béti béte Yoseƒ bebi bani ndi Manase ku Eƒraim kaba ka beti-ka babla bana kadikɔ.

⁵Na ɔmii ɔni na bɔdubo bɔtina ndi Eƒraimƒuɔ kaba bekyuli ɔdi. Na bana ɔmii ɔni ntɛ ɔƒɛ katukɔ kakɛ ndi Atarot-Adar ɔ́kɔ úti útédu Bet-Horon eli.

⁶Na útédu Mediterenia Ɛpu ɔkɛ Mikmetat katɔ kakɛ. Na ɔ́kanti ɔkɛ ɔƒɛ katukɔ na Taanal-Silo, na ɔkɛ ɔvi mmɔ útédu Yanoa.

⁷Na ɔkɛ ɔ́yu ɔ́si Yanoa, na útédu Atarot ku Naarat. Na útédu Yeriko na útáwɔlɔ Yordan Ketu.

⁸Na ɔkɛ Tabua ɔkɛ ɔƒɛ kanukɔ útédu Kana Kɔwɛ kemmo. Na ɔ́wɔ Mediterenia Ɛpu. Ɔmɛni ndi Eƒraim kaba bekyuli kadikɔ.

⁹Na lɛma ku akpaklɔ ani ndi Manase kaba bekyuli ɔdi ni, béti-ka béte Eƒraim kaba ka beti-ka babla bana kadikɔ.

¹⁰Nsu Kanaanƒuɔ bani nli Geser na béƒu basala ku Eƒraimƒuɔ ni, bátabɔku-ma. Mmomu buti na béti Kanaanƒuɔ bamɛni bábla bekyuli bani mɔɔbla kabla teete-ma. Na bamu bakya baabla kabla teete-ma úti úbedu ɔmwi limeyi lɛmɛni lɛlɔ.