Read Lelemi Yosua 17 Bible Online

Yosua 17 - Lelemi bible

Yosua 17

¹Yosua úte Manase kaba bekyuli kalɔ geen, ɔsika Manase ndi Yoseƒ ubidi udeedi. Na Manase ubidi udeedi ndi Makir, na ɔdi Gileadƒuɔ ɔti ɔni nákɛ Gilead ku Basan kalɔ, ɔsika Makirƒuɔ badi bekpone geen.

²Na Manase bebi bani nébu na bana kaba kemmo ndi Abieser ku Helek ku Asriel ku Seken ku Heƒar ku Semida. Na ama ndi bebi babambadi bani ndi Yoseƒ ubidi Manase bebi bananabi kalɛ na bana lɛtɔ lise.

³Na Manase náwɔ Makir, na Makir ɔ́wɔ Gilead, na Gilead ɔ́wɔ Heƒer, na Heƒer ɔ́wɔ Seloƒehad, na Seloƒehad útawɔ bebi bananabi. Mmomu bebi belekubi kani na úbo. Na nwuna bebi belekubi bammɔ anyi ndi Mahla ku Noa ku Hogla ku Milka ku Tirsa.

⁴Amu na belekubi bamɛni bésie Katɔti ɔkpane Eleasar ku Nun ubidi Yosua ku Israel batɔnkune kudɔ. Na básu-ma banini, “Unwoti úbo Mose ɔda ka ute abu lɛnɔ kadikɔ kadi aani kalɛ bete bula banwa.” Anwuɔsu kalɛ na Unwoti ɔ́su mmɔ kalɛ ɔsu ni, Yosua úte-ma kadikɔ aani kalɛ na béte bana banwani bananabi.

⁵Ɔmɛni ɔsu Manase ɔ́kɛ kadikɔ leevu ubunku Gilead ku Basan na Yordan ɔƒɛ katukɔ kakɛ.

⁶Ɔsika béte Manase bebi belekubi kadikɔ kadi ɔsu ni, béle Gilead kalɔ béte Manase bawɔ bakladi.

⁷Na Manase ɔmii ɔ́si Aser úsie Makmetat ɔni ntɛ Sekem ɔƒɛ katukɔ kakɛ. Na ɔ́tɛ úsie kada kakɛ na ɔkɛ En-Tapuaƒuɔ kalɔ kemmo.

⁸Na Tapua kalɔ kammɔ kadi Manase ɔdi. Na Tapua ɔma ɔni nkya Manase ɔmii lɛlɔ ɔdi Eƒraim ɔdi.

⁹Na ɔmii ɔmmɔ údeyi ɔkɛ Kana Kɔwɛ kemmo na kɔwɛ kɔmmɔ kada kakɛ. Lɛma lɛni nkya mmɔ lɛɛɛdi Manase lɛma. Mmomu lɛdi Eƒraim ɔdi. Na Manase ɔmii ɔmmɔ ɔ́kya kɔwɛ kɔmmɔ katɔ kakɛ, na nwuna kenye kétédu Mediterenia Ɛpu.

¹⁰Na kada kakɛ kadi Eƒraim ɔdi, na katɔ kakɛ kadi Manase ɔdi. Na ɛpu ndi ɔmii. Na Aser ndi ɔmii na katɔ kakɛ. Na ama ku Isakar mɔɔva ɔmii na ɔƒɛ katukɔ kakɛ.

¹¹Na lɛma lɛni na Manase ɔ́kɛ na Isakar ku Asar ntɛ ndi Bet-San ku Yibleam ku bani nli Dor ɔni lɛnɔ baalɔ Naƒot ku nwuna lɛma ku En-Darƒo ku Taanakƒuɔ ku Megidoƒuɔ ku nina akpaklɔ ani náka amana-ma.

¹²Na Manase bebi batákana na bábɔku Kanaanƒuɔ bálɛku ɔma ɔmmɔ kemmo. Ɔsika bálɛ ugyii kpakplaa ka balatɔlɔ.

¹³Nsu uwi ɔni na Israelƒuɔ baakɛ́ ɔyikun teebu ni, benye Kanaanƒuɔ bammɔ lɛlɔ na béti-ma babla kabla bablane bete-ma. Anwuɔsu bátábɔku Kanaanƒuɔ bammɔ ƒui.

¹⁴Amu na Yoseƒ kaba bekyuli bébo Yosua kudɔ na béye-nwu banini, “Bi ɔsu na kadikɔ kenwi pɛ kani na éte-bu? Nsu bumomo na Unwoti lɛnɔ úte-bu kusɛ kusɛ.”

¹⁵Amu na Yosua ɔ́su-ma ɔnini, “Si bimomo na Eƒraim abi lɛlɔ kese blii suɛ kete-mi ni, amu biteesie lɛku kemmo ngye na bitáda ɔma mmɔ na Perisiƒuɔ ku bablani bammɔ kalɔ lɛlɔ.”

¹⁶Amu na Yoseƒ kaba bekyuli bammɔ básu Yosua banini, “Abi kalɔ kammɔ kese bliisuɛ kete-bu. Na Kanaanƒuɔ bani nlie kɔbi kaƒɔna na kalɔ kani nwi ƒiaa ku bani nlie Bet-San amadɔ lɛma ku bani nlie Yesreel Kɔwɛ kemmo ƒui bebo bapɔnkɔ abuala kɛɛkɛ.”

¹⁷Mmɔ na Yosua ɔ́su Yoseƒ kaba bekyuli bani nási Eƒraim ku Manase kaba kemmo ɔnini, “Bɛdi bekyuli bani mmomo na bibo ɔyikun. Anwuɔsu utalɛka bɛkɛ kadikɔ kenwi kani.

¹⁸Mmomu abi kalɔ kɔmmɔ kabla bina ɔdi. Ina ka akun na adi ni, bɛtuma-nya na biti mmɔ bɛbla bina kadikɔ bitédu kesii kani na bɛkana bɔda. Na bɛbɔku Kanaanƒuɔ bani nlie mmɔ ina ka bebo bapɔnkɔ ku abuala kɛɛkɛ na bebo ɔyiku lɛnɔ.”