Read Lelemi Yosua 20 Bible Online

Yosua 20 - Lelemi bible

Yosua 20

¹Ɔmmɔ kama Unwoti ɔ́su Yosua ɔnini,

²“Kɔ lɛsa te Israelƒuɔ anii bedie lɛma lɛdi bese kalɛ na ukyuli ɔkana ukeli utatamiku na mmɔ aani kalɛ na lɛ́su Mose lɛ́vi.

³Na si ukyuli ɔdi ɔ́du nwuna ukyulikpana ɔni na ɔɔɔgyi uuuse ni, ɔkana na ukeli usie lɛma lɛmmɔ ɔdi biala kemmo utátanku benengu bammɔ kalɛ na baladu-nwu balasia.

⁴“Na si uwi ɔni na ukyuli ɔdune ɔmmɔ úkeli úsie lɛma lɛmmɔ lɛdi biala kemmo ni, na uténye ɔma ɔmmɔ kabɛnye na udie lɛlɔ kalɔ ɔtina ɔma ɔmmɔ benengu. Na si údie kenye ɔ́wɔlɔ ni, na beti ukyuli ɔmmɔ beduoku ɔma ɔmmɔ kemmo na bete-nwu keliekɔ. Na ukyuli ɔmmɔ ɔsɔ ɔkya-ma kudɔ.

⁵Na si bekyuli bani ukyuli na ɔ́du békeli basiaku ukyuli ɔdune ɔmmɔ ni, benengu bammɔ betedie ukyuli ɔmmɔ betete-ma. Ɔsika ukyuli ɔdune ɔmmɔ ɔɔɔgyi uuuse asa na ɔ́du ɔkpanadi ɔmmɔ. Na kadɔ kadi lɛnɔ keeebo-ma ntɛ asa na ɔ́du-nwu.

⁶Na ukyuli ɔdune ɔmmɔ ɔlɛka ɔsɔ ɔkya ɔma ɔmmɔ kemmo utédu ka batɛku-nwu litemi. Na si bátadu-nwu kɔtɔ ni, ɔsɔ ɔkya ɔma ɔmmɔ kemmo na Katɔti ɔkpane unengudi ɔni nkya uwi ɔmmɔ kemmo úkpi. Na ɔmmɔ kama ukyuli ɔdune ɔmmɔ ubo kuƒi ka ɔsɔ unwini usie nwuna ɔma na kesii kani na úkeli ɔ́si.”

⁷Ɔmɛni ɔsu ni, lɛma lɛni bédie na Yordan Ketu ɔƒɛ kanukɔ ndi Kedes na Naƒtali abi lɛlɔ na Galilea ku Sekem na Eƒram Kɔbi lɛlɔ ku Kiriat-Arba ɔni básɔ baalɔ bani Hebron na ɔkya Yuda abi lɛlɔ.

⁸Bédie lɛma bamba lɛnɔ bése na Yordan Ketu ɔƒɛ katukɔ na Yeriko. Na ani ndi Beser ɔni nkya kalɔ kakwiidi kani nwi ƒiaa na ɔ́si Ruben kaba kemmo ku Ramot ɔni nkya Gilead na ɔ́si Gad kaba kemmo ku Golan ɔni nkya Basan na ɔ́si Manase kaba kemmo.

⁹Lɛma lɛmɛni na bédie bése bete katamikukɔ béte Israelƒuɔ ku baƒɔ bani nkya-ma kudɔ. Ka si ukyuli ɔdi ɔ́du ɔkpana ɔni na ɔɔɔgyi uuuse ni, ɔkana na ukeli utátamiku benengu bammɔ kalɛ na ukyuli ɔni na bádu mmɔ bekyuli baladu ukyuli ɔdune ɔmmɔ balasia uti utédu ka bátɛku-nwu litemi.