Read Lelemi Yosua 23 Bible Online

Yosua 23 - Lelemi bible

Yosua 23

¹Ɔ́ɔƒɔ uwi geen ka Unwoti ɔ́ya na Israelƒuɔ bákɛ bɔnwuna básiku bana bekisine enu kemmo. Ɔƒɛni lɛnɔ Yosua ɔ́ɔbi lɛlɔ na nwuna akwa lɛnɔ éesie anumi geen.

²Amu na Yosua ɔ́lɔ Israelƒuɔ ƒui ku bana benengu ku batɔnkune ku litemi batɛne ƒui ɔ́sala na ɔ́su-ma ɔnini, “Ɔƒɛni lɛ́ɛbi na mina akwa lɛnɔ éesie anumi.

³Na amii alati bɛ́nu lɛla lɛni na bina Unwoti Katɔti úti ɔ́bla kadi bamba bekyuli ɔ́si amii ɔsu. Na bina Unwoti Katɔti nékpo bina kekpo ƒui úte-mii.

⁴Na kɔlɔ kɔni ƒui na búkpo bɔ́ƒɔ ɔ́si Yordan Ketu úti útédu Mediterenia Ɛpu ɔni ntɛ úsie ɔ́ƒɛ kanukɔ kakɛ. Líle kɔlɔ kɔmmɔ ƒui líte bina kaba bekyuli. Na lɛ́sɔ líle kɔlɔ kɔni nébu na bukpo bɔƒɔ lɛnɔ líte-mii.

⁵Na kɔlɔ kɔni nébu na bútekpo tɔ na bɔƒɔ-ku ni, bina Unwoti Katɔti ɔlati ɔdubo-ma bɔbɔku bɔlɛku kɔlɔ kɔmmɔ lɛlɔ na bise bitéti-ku aani kalɛ kani na bina Unwoti Katɔti ɔ́su-mii úse.

⁶“Anwuɔsu bɛkya ɔkplu na bɛnu kaduɛ na ɔdi biala ɔdi Mose ɔda bubo etemila ɔku ɔni úti úte-mii mmɔ lɛlɔ ƒui. Na bitada bitavia ɔda bubo bɔmmɔ bitese kɔmii iye kɔdianu.

⁷Biteti lɛlɔ bitasala ku kadi bamba bekyuli bani nkya mmɔ akɔ, na bitakpali bana baƒiɔ bani na baakpa anyi, na bitese kenye kadi na bana baƒiɔ bammɔ badi kudɔ na bitakpa-ma iye bitalɛ-ma akɔnkɔ kalɔ.

⁸Mmomu binye bina Unwoti Katɔti kama kpakplaa aani kalɛ bɛɛbla úti úbedu ɔƒɛni.

⁹“Ɔsika ɔ́si amii ɔsu ni, Unwoti ɔ́bɔku kadi bamba bekyuli bani mbo ɔlɔkplu. Na úti úbedu ɔmwi kadi ni, ukyuli ɔdi útakana na unye ɔsiaku-mii.

¹⁰Bina kemmo ukyuli biala ɔkana na ɔya na bekisine apim unwi bekeli, ɔsika bina Unwoti Katɔti muukpó bina kekpo teete-mii aani kalɛ na ɔ́su úse.

¹¹Ɔmɛni ɔsu bɛnu kaduɛ geen na biti bɔyɔ bite bina Unwoti Katɔti.

¹²“Nsu si bɛ́lɛ bina Unwoti kama na bíti lɛlɔ bɛ́sala ku kadi bamba bekyuli bani nébu mmɔ akɔ na biiti lɛlɔ ni,

¹³bise likpo ka bina Unwoti Katɔti ɔsɔ ɔɔɔdubo bukpoku kadi bamba bekyuli bani nébu mmɔ bute-mii lɛnɔ. Mmomu bina ɔbladu ɔmmɔ ɔdubunwini kakpagyuɛ ute-mii, na ɔlɛ ɔni bɛdubunu ɔdubɔbla aani kalɛ na beewi ukyuli kugyiimi iye aani kalɛ na alakpi eeduo ukyuli anumi uti utédu ka bina Unwoti ɔ́yila bina ƒui udu na kalɔ kabuni kani na úti úte-mii mɛni lɛlɔ.

¹⁴“Na ɔƒɛni mina kukpi uwi úude. Na amii alati bɛgyi bɛsiku bina kɔyi ku kɔyu kemmo ka bina Unwoti Katɔti úte-mii ala abunidi ani ƒui na úse kenye ka wete-mii. Na kenye biala na úse-mii ni, ɔ́di-ka lɛlɔ na útada unwi pɛ útese.

¹⁵Nsu aani kalɛ kani na ɔ́di nwuna linyese biala na úse úte-mii lɛlɔ ni, lɛni kani na ɔdubɔni-mii kɔtu si bɛ́bla atu ɔkplu na ɔyila mii udu.

¹⁶Nsu si bɛ́ta bínye Unwoti Katɔti bunyimi bɔni unyimiku-mii lɛlɔ na bísie bɛɛkpá baƒiɔ badi ni, ɔdubuti kɔnyi ɔkya-mii na ɔyila bina ƒui udu kɔnakunwi na kalɔ kabunidi kani na úti úte-mii mɛni kemmo.”