Read Lelemi Yosua 24 Bible Online

Yosua 24 - Lelemi bible

Yosua 24

¹Amu na Yosua ɔ́lɔ Israel kaba bekyuli bammɔ ƒui ɔ́sala na Sekem. Na ɔ́lɔ kaba kammɔ benengu ku batɔnkune ku litemi batɛne ƒui bani nkya Israel na bébo na bébenye Katɔti anumi.

²Amu na ɔ́su bekyuli bammɔ ka Unwoti ɔni ndi Israelƒuɔ Katɔti ɔɔsu-ma ɔnini, “Uwi ɔdi nábavi ni, bina bati kuuku na nka bélie Euƒrate Ketu ɔvi na baƒiɔ na báakpa. Na bina bati kuuku bammɔ kemmo ɔdi ndi Tera ɔni náwɔ Abraham ku Nahor.

³Amu na líti Abraham ɔni ndi bina bati kuuku unwi lɛ́lɛku mmɔ na lɛ́ya na úsie ɔ́vi Kanaan kalɔ lɛlɔ ƒui. Na líte-nwu bawɔ pii. Na lɛ́ya na Abraham ɔ́wɔ Isak.

⁴Na Isak lɛnɔ ɔ́wɔ Yakob ku Esua. Na líti kɔbi kalɔ kani nkya Seir líte Esau ka uti-ka ɔbla nwuna kadikɔ. Na Yakob ku nwuna bebi bésie bétélie Egyipte kalɔ lɛlɔ.

⁵“Ɔmmɔ kama lɛ́tala Mose ku Aaron na líkpoku Egyipteƒuɔ kaduɛ asa na lɛ́da-mii lídie kalɔ kammɔ lɛlɔ.

⁶Ka lɛ́da bina bati kuuku lídie Egyipte kalɔ lɛlɔ ni, Egyipteƒuɔ béti kɛɛkɛ ku bapɔnkɔ na bábi básiaku-mii úti útédu ka bídu ɛpu kɔtu.

⁷Amu na bíwulo bɛ́kpali Unwoti ka ubo na ubebunku-mii. Amu na líti lɛdisa bonwu lɛ́kya amii ku Egyipteƒuɔ ntɛ. Na lɛ́ya na ɛpu ɔmmɔ ɔ́nyina-ma. Na ɔmɛni ƒui ɔ́lɛ na bina anumi kalɛ na lɛ́bla Egyipteƒuɔ bammɔ. Na bílie kalɔ kakwiidi kemmo uwi gyɔlɔɔ.

⁸“Amu na líti-mii líboku Amoriƒuɔ bani nlie Yordan Ketu ɔƒɛ katukɔ. Na báta bébekpoku-mii na líti-ma lɛ́kya bina enu kemmo na lɛ́yila-ma udu na bina anumi. Na bíti bana kalɔ bɛbla bina kadikɔ.

⁹Amu na Moab Ɔga Sipor ɔni ndi Balak ubidi ɔ́ta na útékpoku Israelƒuɔ. Na ɔ́tala na bététiku Bileam ɔni ndi Beor ubidi ka ubewida-mii.

¹⁰Nsu ntakpete lɛla lɛni na Bileam ɔ́su mmɔ. Mmomu kusɛ kusɛ na úte-mii. Anwuɔsu lɛ́da-mii lídie Balak enu kemmo.

¹¹“Ɔmmɔ kama ka bɛ́via Yordan Ketu bísie Yeriko ni, Yerikoƒuɔ báta na bébekpoku-mii. Lɛni kani na Amoriƒuɔ ku Perisiƒuɔ ku Kanaanƒuɔ ku Hetiƒuɔ ku Girgasiƒuɔ ku Hewiƒuɔ ku Yebusiƒuɔ lɛnɔ bébekpoku-mii. Nsu líti bana ƒui lɛ́kya-mii enu kemmo.

¹²Na lɛ́kya-ma liƒu na bayia. Ɔmmɔ ɔsu Amoriƒuɔ baga inyɔ bammɔ békeli ɔni na ɔɔɔdi bina ekpola nábla kabla kadi.

¹³Líti Lɛma lɛni na ɔɔɔdi amii nada-ni lite-mii na bilie-ni kemmo. Na liti kɔlɔ ku mmo bɔni na ɔɔɔdi amii natuma-ni asa na bɛɛdi nwuna egyiibi na bɛɛkɛ́ nnɔ taasiku mmo bɔni na ɔɔɔdi amii nátuma-mu kemmo.”

¹⁴Amu na Yosua úse anumi na ɔ́sɔ ɔ́su-ma ɔnini, “Bɛyia Unwoti na bitaabla-nwu kabla ulu lɛlɔ. Na bɛda baƒiɔ bani na bina bati kuuku bákpa na ketu ɔvi ku Egyipte mmɔ bidie bina akɔ. Na bitaabla Unwoti kabla kani.

¹⁵Nsu si Unwoti kama bɔsiaku buláda-mii kubiti ni, amii bidie ɔmwi limeyi lɛmɛni anwu ɔni geen na bɛɛyɔ́ ka bɛsiaku. Si baƒiɔ bani na bina bati kuuku bákpa na Euƒrate Ketu ɔvi ngye iye Amoriƒuɔ kalɔ kani bilie mɛni baƒiɔ na bɛɛyɔ́ ni, bidie. Nsu ami ku mina kaduli bekyuli abu ni, Unwoti lɛti na bɔdubɔsiaku.”

¹⁶Amu na Israelƒuɔ bammɔ ƒui bédie kenye banini, “Kudii, bulálɛ Unwoti kama, na bulasiaku baƒiɔ badi kama.

¹⁷Ɔsika bula Unwoti Katɔti náda abu ku bula bati údie abi ani na bɔkya buubó na Egyipte kalɔ lɛlɔ kemmo. Na abu ɔlati bɔ́nu akɔla budie lidu lidu lɛni na ɔ́bla, na ɔda-bu kɔkɔɔkɔ na bula ulu busie na kadi bamba akɔ.

¹⁸Na Unwoti nábɔku Amoriƒuɔ bani ƒui nkya kɔlɔ kɔni lɛlɔ na bulie mɛni ƒui nédie. Anwuɔsu abu lɛnɔ bɔdubɔsiaku Unwoti. Ɔsika anwu lɛti ndi bula Katɔti.”

¹⁹Amu na Yosua ɔ́su Israelƒuɔ ɔnini, “Ngyi ka bilakana Unwoti bɔɔsiaku, ɔsika ɔdi Katɔti ɔni nse kedee na uukpó kogyulo na si bɛ́ta binye-nwu lɛlɔ ni, uleti bina ekpidi ulakyiɛ-mii.

²⁰Na si bíni Unwoti na bitásiaku kadi bamba baƒiɔ ni, ɔdubɔya na ɔgbankpi ubo-mii lɛlɔ na ɔyila-mii udu ina ka ɔ́yɔ-mii litemi dii.”

²¹Amu na Israelƒuɔ básu Yosua banini, “Kudii! Unwoti lɛti na bɔdubɔsiaku.”

²²Ɔmmɔ kama Yosua ɔ́sɔ ɔ́su-ma ɔnini, “Amii alati bɛdi kenye bediene bite lɛlɔ ka amii náƒuna ka bɛdubɔsiaku Unwoti.” Amu na Israelƒuɔ básu banini, “Ɛɛn, bɔdi kenye bediene bute ɔmɛni.”

²³Amu na Yosua ɔ́su-ma ɔnini, “Si ɔdi lɛni ni, na bibo baƒiɔ bani nkya-mii akɔ mmɔ bivaakun na biti bina kɔyi bɛsia Unwoti ɔni ndi Israelƒuɔ Katɔti lɛlɔ.”

²⁴Amu na Israelƒuɔ básu Yosua banini, “Unwoti ɔni ndi bula Katɔti lɛti bɔdubɔsiaku. Na bɔdubɔnu-nwu litemi.”

²⁵Anwuɔsu limeyi lɛmmɔ Yosua únyimiku Israelƒuɔ bammɔ na Sekem, na úte-ma ɔda bubo etemila ka badi-nya lɛlɔ.

²⁶Na Yosua únweni etemila ammɔ ɔ́kya Katɔti ɔda bubo ɔku kemmo. Ɔmmɔ kama úti lɛtabi bonwu lɛdi úse mmɔ na kugyii kubendi kɔni nde Unwoti kakpakɔ kedee mmɔ kudɔ.

²⁷Amu na Yosua ɔ́su Israelƒuɔ bammɔ ɔnini, “Bɛnu lɛtabi lɛmɛni lɛdi bula ƒui kenye budie. Ɔsika únu etemila ani ƒui na Unwoti útemi úte-bu. Anwuɔsu ani ndubudie-mii kenye si bɛlɛ Katɔti kama.”

²⁸Amu na Yosua ɔ́ya na ɔdi biala ɔ́tɔlɔ úsie nwuna kalɔ lɛlɔ.

²⁹Ala amɛni kama ni, Unwoti kabla ɔblane Yosua ɔni ndi Nun ubidi úkpi. Na ɔ́kɛ akwa eti anyɔ ku leevu.

³⁰Na báva-nwu na anwu ɔlati kalɔ na Timnat-Sera. Na Eƒraim abi lɛlɔ na kɔlɔ kɔni nkya kusie Gaas Kɔbi lɛlɔ na katɔ kakɛ.

³¹Na uwi ɔni na Yosua úlie ngba ni, Israelƒuɔ básiaku Unwoti kama. Na nwuna kekpima lɛnɔ ni, ka bana batɔnkune bani nánu akɔla budie taatina lidu lidu lɛni Unwoti ɔ́bla úte Israelƒuɔ bamu belie ngba ɔsu ni, Israelƒuɔ básiaku Unwoti kani.

³²Na Yoseƒ likubi lɛni béti básiku Egyipte kalɔ lɛlɔ ni, béti likubi lɛmmɔ bátava na Sekem kalɔ lɛlɔ. Kalɔ kammɔ na Yakob úye egulabi ɔƒualadi eti anyɔ ɔ́siku Hamor bebi unwi ɔni ndi Sekem Ɔti. Na kalɔ kammɔ na béti béte Yoseƒ kaba bekyuli.

³³Amu na Katɔti Ɔkpane Eleasar ɔni ndi Aaron ubidi lɛnɔ úkpi na báva-nwu na Gibea na ɔma ɔni na béti béte ubidi Pinehas na Eƒraim abi lɛlɔ.