Read Lelemi Yosua 4 Bible Online

Yosua 4 - Lelemi bible

Yosua 4

¹Uwi ɔni na Israelƒuɔ bammɔ ƒui bávia Yordan Ketu báwɔlɔ ni, Unwoti ɔ́su Yosua ɔnini,

²“Ƒuna nkyuli leevu-inyɔ bani na bɛ́ƒuna bɛ́lɛku kaba leevu-inyɔ bammɔ kemmo,

³na aya na ɔdi biala utágyu lɛtakpɛ na kesii kani na bakpane bammɔ benye na Yordan Ketu ntɛ mmɔ. Na asu-ma na beti-nya betesie kesii kani badubo bulie usien ɔmɛni.”

⁴Amu na Yosua ɔ́lɔ nkyuli leevu-inyɔ bammɔ ɔsala lisu.

⁵Na ɔ́su-ma ɔnini, “Biteesie Yordan kemmo na kesii kani bakpane bani nti Katɔti Bunyimi Adaka mmɔ benye. Na ɔdi biala utágyu lɛtakpɛ linwi ɔsia lɛmangba lɛlɔ. Na lɛtakpɛ biala linye lite Israel kaba kenwi.

⁶Na atakpɛ amɛni adubɔbla likpose ete bekyuli bammɔ kalɛ na beti beteenyimo lɛla lɛni na Unwoti ɔ́bla. Na si limeyi lɛdi bina bebi béye-mii banii bi na atakpɛ amɛni enye ete ni,

⁷Na bɛsu-ma ka uwi ɔni na Unwoti Bunyimi Adaka ɔɔvia Yordan Ketu ni, ketu kammɔ káda na ntu bɔmmɔ bɔ́kwii na Israelƒuɔ bávia. Na atakpɛ amɛni adubɔya na Israelƒuɔ beteenyimo lɛla lɛni nálɛ mɛni uwi biala.”

⁸Anwuɔsu bekyuli bammɔ bábla kalɛ na Yosua ɔ́su-ma. Na aani kalɛ kani na Unwoti ɔ́su Yosua ni, bágyu atakpɛ leevu-anyɔ básiku Yordan Ketu ntɛ mmɔ. Na lɛtakpɛ biala linye lite Israel kaba kenwi. Na béti atakpɛ ammɔ bétéwi kesii kani na bélie.

⁹Na Yosua ɔ́la atakpɛ leevu-anyɔ ani bála mmɔ na ɔ́tɛ-nya ɔsala na atakpɛ ammɔ amu alɛ mmɔ úbedu ɔmwi.

¹⁰Na bakpane bani nti Unwoti Bunyimi Adaka mmɔ básɔ bénye Yordan Ketu ntɛ mmɔ úti útédu ka Yosua ɔbla ala ani ƒui na Unwoti úbo-nwu ɔda ka babla ku kalɛ na Mose lɛnɔ ɔ́su Yosua úse. Na Israelƒuɔ bammɔ bábabla na bávia Yordan Ketu.

¹¹Uwi ɔni na bekyuli bammɔ ƒui bávia Yordan báwɔlɔ ni, bakpane bani nti Unwoti Bunyimi Adaka básɔ bátávi batɔ bekyuli bammɔ anumi.

¹²Asa na bávia Yordan Ketu ni, Ruben ku Gad ku Manase kaba kakɛ banana baklibi lɛlɔ bese bete kekpo na ama bagyu batɔ bakladi aani kalɛ na Mose ɔ́su-ma use.

¹³Na bekpone bani mabla aani nkyuli mpim aavlene batɔ Unwoti anumi na bávia bésie kalɔ ƒiaa kani nde Yeriko ka betékpo.

¹⁴Na lɛla lɛni na Unwoti ɔ́bla limeyi lɛmmɔ lɛ́ya na Yosua ɔ́ƒɔ lɛnyi na Israelƒuɔ akɔ. Na béti ɔbu béte-nwu nwuna ngba bulie kemmo ƒui aani kalɛ kani na béti ɔbu béte Mose.

¹⁵Ɔmmɔ kama Unwoti ɔ́su Yosua ɔnini,

¹⁶“Bo bakpane bani nti Bunyimi Adaka ɔmmɔ ɔda na balɛ Yordan Ketu kemmo.”

¹⁷Anwuɔsu Yosua úbo bakpane bammɔ ɔda ɔnini, “Bɛlɛ Yordan Ketu kammɔ kemmo.”

¹⁸Na ka bakpane bammɔ bánya bákɔ balɛ Yordan Ketu kemmo na bedu kalɔ lɛlɔ kani na ntu na ntu bɔmmɔ búse kalɔ bɔɔgbá na kasɔ keyi ku atu.

¹⁹Na bekyuli bammɔ ƒui bávia Yordan Ketu kammɔ báwɔlɔ na kɔbuli kudeedi limeyi leevudi lɛlɔ. Na bételie ɔma ɔni baalɔ banii Gilgal na Yeriko ɔƒɛ katukɔ kakɛ.

²⁰Gilgal mmɔ na Yosua úti atakpɛ leevu-anyɔ ani básiku Yordan Ketu mmɔ bátálɛ.

²¹Na ɔ́su Israelƒuɔ ɔnini, “Limeyi lɛdi si bina bawɔ báta na béye-mii banii bi na atakpɛ amɛni enye ete ni,

²²bɛsu-ma ka uwi ɔmmɔ na Israel bekyuli bákɛ kalɔ kakwiidi bávia Yordan Ketu.

²³Na bɛsu-ma ka bina Unwoti Katɔti ɔ́ya na Yordan Ketu kákwii úti útédu ka Israelƒuɔ ƒui bávia-ka aani kalɛ kani na ɔ́ya na, Ɛpugyie ɔ́kwii asa na Israelƒuɔ bávia.

²⁴Ɔ́bla ɔmɛni úti ɔ́tina kayawi bekyuli ƒui na banu bati ka ubo ɔyikun geen. Na ɔmɛni ɔdubɔya na bayia Unwoti bana Katɔti uwi biala.”