Read Lelemi Yosua 6 Bible Online

Yosua 6 - Lelemi bible

Yosua 6

¹Na Yerikoƒuɔ ni, bákalɛ bana kɔyakun kpakplaa ɔ́si Israelƒuɔ bɔyia ɔsu. Na kɔyakun kenye benyene beléte kuƒi ka ukyuli ɔdi uduo ɔma ɔmmɔ kemmo iye ɔlɛ keyi.

²Amu na Unwoti ɔ́su Yosua ɔnini, “Líti Yeriko ku nwuna ɔga ku bekpone ƒui mɔɔkya-a enu kemmo.

³Anwuɔsu awɔ ku ƒula bekpone bisie bɛmana ɔma ɔmmɔ kunwi limeyi biala uti utédu emeyi aku.

⁴Na bakpane maatɛ ɔdi biala uti kakpɛɛ ɔda. Na ama ndubo bɔgyu bɔtɔ asa na Unwoti Bunyimi Adaka ɔmmɔ ɔsiaku-ma kama. Na limeyi maatɛdi lɛlɔ ni, awɔ ku bekpone bammɔ bɛka bɛmana ɔma ɔmmɔ maatɛ. Na bakpane bammɔ bataavwi bana kakpɛɛ.

⁵Na si béti kɔkpɛɛ kɔmmɔ na bédie kɔku momoomo kɔdi ni, na bekyuli bammɔ ƒui bebo kudu. Na ɔma ɔmmɔ awodu ƒui adubo bɔƒɛ buwi kalɔ. Na bekpone bammɔ ƒui beduo ɔma ɔmmɔ kemmo.”

⁶Amu na Yosua ɔ́lɔ bakpane bammɔ na ɔ́su-ma ɔnini, “Biti Bunyimi Adaka ɔmmɔ biti, na bina maatɛ lɛnɔ biti kɔkpɛɛ na bɛgyu bɛtɔ Bunyimi Adaka ɔmmɔ.”

⁷Na ɔ́su nwuna bekpone lɛnɔ ɔnini, “Bɛta na bitáka bɛmana ɔma ɔmmɔ. Na bagyumanane bammɔ badi bagyu batɔ Bunyimi Adaka ɔmmɔ anumi.”

⁸Anwuɔsu bekpone bammɔ badi bágyu batɔ bakpane bani mɔɔvwi atunkpɛ mmɔ aani kalɛ na Yosua úbo-ma ɔda. Na Unwoti Bunyimi Adaka lɛnɔ ɔkpɛ bakpane bani mɔɔvwi atunkpɛ mmɔ kama. Na bekpone bammɔ bamba lɛnɔ bakpɛ Bunyimi Adaka ɔmmɔ kama. Na uwi ɔmmɔ kemmo ƒui ni, bani nda atunkpɛ mmɔ bakɛ baavwi-nya.

¹⁰Nsu Yosua úbo nwuna bekpone bammɔ ɔda kpakplaa ka ɔdi utete kudu kɔdi iye utetemi uti utédu ka ute-ma kuƒi.

¹¹Anwuɔsu bekpone bammɔ ku bekyuli bani nti Unwoti Bunyimi Adaka ɔmmɔ bésie bámana Yeriko ɔma ɔmmɔ limeyi lideedi. Na basɔ bénwini bébo bana kakyakɔ na bakya mmɔ usien ɔmmɔ.

¹²Amu ka kadi kégye ni, Yosua ɔ́ta ɔtanta tutuutu na ɔ́sɔ ɔ́ya na bakpane ku bekpone bammɔ básɔ bésie bamana ɔma ɔmmɔ limeyi linyɔdi aani kalɛ na bábla. Na bekpone badi batɔ na bakpane bani mɔɔvwi kɔkpɛɛ lɛnɔ basia. Na bakpane bani nti Unwoti Bunyimi Adaka lɛnɔ basia. Na bekpone bakladi bakpɛ. Na uwi ɔmmɔ ƒui bani nda kɔkpɛɛ mmɔ baavwi-ku.

¹⁴Na limeyi linyɔdi lɛmɛni lɛnɔ bésie bamana ɔma ɔmmɔ na basɔ bénwini bésie bana kakyakɔ. Na bábla lɛni básiaku lɛlɔ emeyi aku sɔɔn.

¹⁵Na limeyi maatɛdi lɛlɔ ni, bekyuli bammɔ ƒui báta lɛdigye na besie bátáka bamana ɔma ɔmmɔ aani kalɛ bataabla. Na limeyi lɛmmɔ lɛlɔ amu ni, baka bamana ɔma ɔmmɔ maatɛ.

¹⁶Si báka bámana ɔma ɔmmɔ na udu maatɛdi lɛlɔ ni, kɔkpɛɛ bavwine bammɔ bedie bana kɔku kɔmmɔ. Mmɔ na Yosua úbo nwuna bekyuli bammɔ ɔda ɔnii babla kudu, na ɔ́su-ma ɔnini, “Unwoti úti ɔma unengudi ɔmɛni ɔ́kya-mii enu kemmo.

¹⁷Bɛyila ala ani ƒui nkya ɔma ɔmmɔ kemmo udu na enwini akpala ete Unwoti. Nsu ɔyalɛ Rahab ku nwuna kaduli bekyuli amu ni, bitabla-ma lɛla lɛdi. Ɔsika anwu nábala bula batu bani na bátala na Yeriko.”

¹⁸Nsu Yosua úbo-ma ɔda ɔnini, “Ɔdi uteti ala ani badubo bubele mmɔ ɔdi utakya lɛlɔ. Na si ɔdi ɔ́bla lɛdi ni, ɔdubuti lɛbibo ku ɔgbankpi uboku Israelƒuɔ akɔ.

¹⁹Na sika ugyiedi iye ɔƒualadi ku ala ani ƒui béti abuala udu ɔdi bábla énwini Unwoti adi. Na si ɔdi ɔ́nu adi ni, uti ubakya Unwoti kavumi kemmo.”

²⁰Amu na bakpane bammɔ bávwi kɔku gyɔlɔɔ kɔdi ku bana atunkpɛ. Na ka bekyuli bammɔ bénu kɔku kɔmmɔ ni, bése kalɔ beedie kudu momoomo. Mmɔ na awodu ammɔ áƒɛ éwi kalɔ kɔnakunwi. Na bekpone bammɔ bétéduo ɔma ɔmmɔ kemmo na békpo bádi-ma lɛlɔ.

²¹Na bákpa bana kuwii na bádu ukyuli biala, banana ku beleku, banamu ku benengu. Na bádu bana ɔmantɛ bakɔ ku baƒonu ku bebuo ala betine beblidi ƒui na énwini Unwoti akpala.

²²Amu na Yosua ɔ́tala bakloƒu inyɔ bani na ɔ́ya na bábɛ bésie Yeriko mmɔ ɔnini, “Biteesie ɔyalɛ ɔmmɔ kaduli na bitédie anwu ku nwuna kaduli bekyuli aani kalɛ na bíse-nwu kenye bíse.”

²³Anwuɔsu bésie na bétédie Rahab ku ɔti ku uni ku nwuna banwani bananabi ku nwuna kaduli bekyuli ƒui. Na bátáwia-ma kakyakɔ na Israelƒuɔ kakyakɔ kudɔ.

²⁴Ɔmmɔ kama ni, bátu ogya bákya ɔma ɔmmɔ kemmo na bákyula ɔma ɔmmɔ ku ala ani ƒui nkya-nya kemmo kede kede. Nsu sika ugyiedi ku ɔƒualadi ku abuala udu béti-nya bátákya Unwoti kavumi kemmo.

²⁵Na Yosua ɔ́nu ɔyalɛ Rahab ku nwuna kaduli bekyuli kɔnyana. Ɔsika anwu néti nkyuli inyɔ bani na Yosua ɔ́tala na Yeriko mmɔ ɔ́bala. Na Rahab ɔmɛni kaba bekyuli bamu belie Israel kalɔ lɛlɔ úti úbedu ɔmwi kadi.

²⁶Ɔmmɔ kama ka báyila Yeriko ɔma ɔmmɔ udu báwɔlɔ ni, mmɔ na Yosua úbo bekyuli bammɔ ɔda kpakplaa na Unwoti anumi, na ɔ́su ɔnini, “Ukyuli ɔni nsɔ mayɔ ka wasɔ watu Yeriko ɔma ɔdubɔnuku-ni. Na awɔ ɔni malɛ kowodu ni, ƒ'ubidi unengudi lili na aalɛ́-ku. Na awɔ ɔni matu awodu kɔyakun ni, ƒula kawɔkpulo lili lɛlɔ na aatu-ka.”

²⁷Na ala ani nálɛ mɛni kemmo ƒui ni, Unwoti ulieku Yosua na ɔ́ya na nwuna lɛnyi lɛ́ƒɔ kuye, nwuna lɛnyi lígyingya líyile kalɔ kammɔ ƒui.