Read Lelemi Hebriƒuɔ 4 Bible Online

Hebriƒuɔ 4 - Lelemi bible

Hebriƒuɔ 4

¹Anwuɔsu ka linyese lɛni na úte-bu ka buduo nwuna bɔnwuna ƒui kemmo kamu kese kéte-bu ɔsu ni, bɛya na bɔnu lɛlɔ kemmo kaduɛ kalɛ na ɔdi ulásɔ na kenye kammɔ lɛlɔ.

²Ɔsika básu abu lɛnɔ litemi buni lɛmmɔ aani kalɛ kani na básu ama lɛnɔ. Nsu litemi lɛni bénu kátalɛ kɔsia kɔdi kétete-ma. Ɔsika ama bani nénu kenye kammɔ ni, bátaƒɔ-ka bátadi.

³Nsu abu bani mɔɔƒɔ́ taadi ni, bɔdubɔkɛ bɔnwuna bɔmmɔ. Na bani nátaƒɔ bátadi ni, bátakɛ-mu aani kalɛ kani na Katɔti ɔ́su lebo lɛni na ɔ́su ɔnini, “Anwuɔsu lɛ́kpali lɛlɔ lɛ́su na kɔnyi kemmo nnini, ‘Baláni beléde-mi na bakɛ bɔnwuna kudii!’ ” Katɔti ɔ́su ɔmɛni ina ka úte kuƒi úse uwi ɔni na ɔ́wɔlɔ kayawi budie.

⁴Ɔsika na Bunweni Kedee Ɔku kemmo ni, bénweni lɛla lɛdi na limeyi maatɛdi lɛlɔ banini, “Na limeyi maatɛdi lɛlɔ ni, Katɔti ɔ́da kabla ƒui ɔ́ya na ɔ́nwuna.”

⁵Na litemi lɛni bɔ́su bɔ́vi mɛni kemmo ni, Katɔti ɔ́su ɔnini, “Baláni beléde-mi na bakɛ bɔnwuna kudii!”

⁶Litemi lɛmɛni lɛmu lise lɛni ka badi badubɔkɛ bɔnwuna bɔmmɔ. Na bani náka lɛsa bɔkɔ bɔmmɔ bunu ni, ama mmomu néteduo bɔnwuna bɔmmɔ kemmo ɔ́si bana atuɔkplu ɔsu.

⁷Ɔmɛni ɔsu na Katɔti ɔ́sɔ úse limeyi lɛbambadi lɛni na ɔɔlɔ ɔnii ɔmwi úse uwi ɔni na ɔ́tɛmiku kuuku bekyuli ɔkɛnku Ɔga Dawid lɛlɔ lɛni na bɔ́su búbavi bɔnini, “Si bínu Katɔti lɛdi ɔmwi ni, bitabla atuɔkplu.”

⁸Ɔsika si bɔya na Yosua ɔ́ya na bákɛ bɔnwuna ni, nka Katɔti ɔ́sɔ útasu lɛla lɛdi útasiku limeyi lɛbambadi lɛdi lɛlɔ.

⁹Ɔmɛni ɔsu na lɛnwunameyi lɛmu lise lite Katɔti bekyuli.

¹⁰Ɔsika ukyuli biala ɔni muuduo Katɔti bɔnwuna kemmo ni, ɔɔda nwuna kabla ƒui taaya na ɔɔnwuna aani kalɛ kani na Katɔti ɔ́bla.

¹¹Anwuɔsu bɛya bɔkya ɔkplu biala na buduo bɔnwuna bɔmmɔ kemmo. Na ɔdi biala uláwɔ ulu ka ɔsiaku bana atuɔkplu bɔbla kama ɔsu.

¹²Katɔti litemi lɛdi lɛla lɛni mbo ngba na lɛɛbla kabla pla pla teetulo kewii kani na bádɔ-ka lɛvi inyɔ. Na liiduo ukyuli kasusu ku kɔyu ntɛ. Na lɛɛbla lɛni aani kalɛ na kewii keele ɔlɔna ku ekubi ntɛ. Litemi lɛmmɔ lɛɛnu lɛla biala lɛni nkya ukyuli kasusu ku kayi kemmo taatina-nwu.

¹³Ala ani ƒui na Katɔti údie lítabɛ-nwu. Na ɔɔnu lɛla biala kalɛ na lise. Na nwuna anumi na bɔdubo bula akunta ƒui bɔbu.

¹⁴Anwuɔsu ka bubo ɔkpane unengudi ɔbuni ƒui ɔni ndi Katɔti Ubidi Yesu ɔni nkya-nwu kudɔ na katɔ mmɔ ɔsu ni, bɛya na buƒie bɔƒɔtaadi bɔni kenye na buudie mɛni bɔda kpakplaa.

¹⁵Ɔɔɔdi ɔkpane unengudi ɔni na bula lɛlɔ lilakywi-nwu kaƒɔ na bula kpɛtɛ kpɛtɛ bɔbla kemmo. Mmomu ɔdi ukyuli ɔni na ala ékpoku-nwu ánu na ulu biala lɛlɔ aani bula kalɛ kani. Nsu útabla likpidi lɛdi.

¹⁶Anwuɔsu bɛya na buti bula lɛlɔ ƒui bute-nwu na bɔkpɛ bude-nwu na nwuna lɛgaboku kudɔ ku kayi buse ka ubo lɛƒɔndia ɔsu. Na ɔkɛnku nwuna lɛƒɔndia ɔsu ni, ɔdubɔnu-bu kɔnyana na ubunku-bu uwi biala na búvele-nwu lɛla lɛdi.