Read Lelemi Litemi Batɛne 10 Bible Online

Litemi Batɛne 10 - Lelemi bible

Litemi Batɛne 10

¹Na Abimelek kukpi kama ni, ukyuli ɔni nási Isakar kɔdua kemmo náta na úkpo ɔ́ƒɔ Israelƒuɔ. Anwu ndi Tola ɔni ɔti ndi Pua ɔni ɔti ndi Dodo. Tola úlie Samir na Eƒraim abi kalɔ lɛlɔ.

²Na ɔ́tɔnku Israelƒuɔ akwa aavlanyɔ-atɛ na úkpi na báva-nwu na Samir.

³Na ɔmmɔ kama Yair ɔni nási Gilead nábatɔnku-ma. Na ɔ́tɔnku Israelƒuɔ akwa aavlanyɔ-anyɔ.

⁴Na ɔ́wɔ bananabi avlaatɛ na bélie bapɔnkɔ avlaatɛ kama. Na bébo lɛma avlaatɛ lɛni baadi-ni lɛlɔ na Gilead ɔni na baalɔ banii Haƒo Yair úti úbedu ɔmwi kadi.

⁵Uwi ɔni na Yair úkpi ni, báva-nwu na Kamon.

⁶Israelƒuɔ básɔ bábla likpidi na Unwoti anumi. Na likpidi lɛmmɔ ndi ka bésie bakya baakpá baƒiɔ Baal ku Astarot ku Aramƒuɔ baƒiɔ ku Moabƒuɔ baƒiɔ ku Amonƒuɔ baƒiɔ ku Ƒilistiƒuɔ baƒiɔ. Na ka Israelƒuɔ béni na báyu atuɔkplu ka basɔ balasiaku Unwoti ɔsu ni,

⁷Unwoti úti kɔnyi ɔ́kya-ma. Na ɔ́nyonu-ma úte Ƒilistiƒuɔ ku Amonƒuɔ na bakya-ma enu kemmo.

⁸Na akwa leevu-maane sɔɔn bekyuli bamɛni bakya baanya Israelƒuɔ bani nlie bésie Yordan ɔƒɛ katukɔ na Gilead, na Amoriƒuɔ kalɔ lɛlɔ taakya, na baabla-ma kalala.

⁹Na Amonƒuɔ lɛnɔ bávia Yordan na bétékpoku Yuda ku Benyamin ku Eƒraim adua bekyuli na Israelƒuɔ béduo ɔgbankpi ubendi kemmo.

¹⁰Amu na Israelƒuɔ béwulo bákpali Unwoti banini, “O Katɔti, bɔ́bla likpidi na ƒula anumi, na búni-ɔ búse, na búsie bɔsiaku Baal baƒiɔ ku bana lidu bamba.”

¹¹Amu na Unwoti únu-ma bɔkpali na úye-ma ɔnini, “Uwi ɔni na Egyipteƒuɔ ku Amoriƒuɔ ku Amonƒuɔ ku Ƒilistiƒuɔ

¹²ku Sidonƒuɔ ku Amalekƒuɔ ku Maonƒuɔ bánya-mii bakya na baabla-mii kalala ni, bíwulo bɛ́kpali-mi na lɛ́ƒɔ-mi lɛ́lɛku bana enu kemmo.

¹³Nsu ɔmɛni kama bɛ́sɔ bíni-mi na bínwini bíse bɛɛkpá ala bamba. Ɔmɛni ɔsu nsɔ lɛɛɛdubo-mii bɔƒɔ bɔlɛku-ma enu kemmo.

¹⁴Biteesie na bitákpali baƒiɔ bani na amii bɛnii ama bɛɛyɔ́ mmɔ. Bɛya na ama baƒɔ-mii si bɛkya bukpoku bɔdi kemmo.”

¹⁵Nsu Israelƒuɔ ama kɔtɔ kani na bakya beekpi Unwoti taasu banini, “Bɔ́bla likpidi na ƒula anumi. Anwuɔsu bla-bu lɛla biala na námanku-bu. Nsu buvele bɔda-a, ƒɔ-bu lɛku bekyuli bamɛni enu kemmo.”

¹⁶Mmɔ na bébo baƒiɔ bani na báƒɔ bése lɛlɔ mmɔ bévaakun, na bése kalɔ baabla Unwoti kabla. Ɔmɛni ɔsu ɔ́sɔ útakana bunye bɔnu Israelƒuɔ abi ani na beebó mmɔ.

¹⁷Uwi ɔni na Amonƒuɔ bekpone básala na besie bákya Gilead ni, na Israelƒuɔ lɛnɔ básala lɛlɔ na besie bakya Mispa.

¹⁸Amu na Gilead batɔnkune básu lɛlɔ banini, “Ukyuli ɔni maka Amonƒuɔ bɔta bukpoku ni, anwu ndubɔbla bula ɔtɔnkune ute bekyuli bani ƒui nlie Gilead.”