Read Lelemi Litemi Batɛne 11 Bible Online

Litemi Batɛne 11 - Lelemi bible

Litemi Batɛne 11

¹Yeƒta ɔdi ukpone geen, na Gileadni na ɔdi, nsu ɔyalɛ ɔdi náwɔ-nwu. Na ɔti baalɔ banii Gilead.

²Na Gilead ulekudi lɛnɔ úbo bebi babambadi lɛnɔ. Na ka bebi bamɛni bábalɛ lili ni, bábɔku Yeƒta bálɛku bana kaduli. Na básu-nwu banini, “Aaadubo kadikɔ kadi bɔkɛ bɔsiku bula kaduli kemmo, ɔsika uleku bamba náwɔ-ɔ.”

³Anwuɔsu Yeƒta ɔ́tɔlɔ nwuna banwani kudɔ na útáda keliekɔ na Tob kalɔ lɛlɔ na kesii kani na ulu besiene badi báƒɔ lɛlɔ bakya. Na anwu ku-ma beesié taavi.

⁴Uwi ɔdi kama ni, Amonƒuɔ báta ka bétékpoku Israelƒuɔ.

⁵Na Gilead batɔnkune bésie Yeƒta kudɔ na Tob kalɔ lɛlɔ.

⁶Na básu-nwu banini, “Bo na abatɔnku-bu na butékpoku Amonƒuɔ.”

⁷Amu na Yeƒta ɔ́su-ma ɔnini, “Ɔɔɔdi amii nábɔku-mii bɛ́lɛku mina ɔti kaduli iye ka biikisi-mi ɔsu? Na ɔƒɛni bɛ́ta bíbo-mi kudɔ mɛni ka bɛkya ɔgbankpi kemmo ɔsu, ɔɔɔdi lɛni?”

⁸Amu básu Yeƒta banini, “Oowo, bulatuna! Ɔmɛni ɔsu búbo-ɔ kudɔ ka abatɔnku-bu na butékpoku Amonƒuɔ. Na ɔƒɛni lɛnɔ adubɔbla ɔtɔnkune ete Gileadƒuɔ ƒui!”

⁹Mmɔ na Yeƒta úye-ma ɔnini, “Ya buti-nwu bɔnii biti-mi na bútekpoku Amonƒuɔ na Unwoti úti-ma ɔkya mina enu kemmo, sɔsɔ na ɔdi ka bɛdubuti-mi bɛbla bina ɔtɔnkune?”

¹⁰Amu na Gilead batɔnkune bammɔ básu banini, “Unwoti ɔdubudie-bu kenye ka lɛla biala násu-bu ni, bɔdubɔdi-ni lɛlɔ.”

¹¹Anwuɔsu Yeƒta ku Gilead batɔnkune bammɔ bátɔlɔ, na bábla-nwu bana ɔtɔnkune. Na ɔ́sɔ ɔ́su ala amɛni ƒui na Unwoti anumi na Mispa.

¹²Mmɔ na Yeƒta ɔ́tala bekyuli ɔ́kya Amonƒuɔ ɔga ka batásu-nwu banii, “Bi na bɔ́bla-a ɔsu na ébekpoku bula kalɔ bekyuli?”

¹³Amu na Amonƒuɔ ɔga údie kenye na ɔ́su Yeƒta batalane bammɔ ɔnini, “Uwi ɔni na Israelƒuɔ bálɛ Egyipte kalɔ lɛlɔ ni, békpeli mina kalɔ kani ntɛ ɔ́si Arnon na ɔ́kɛ Yabok útédu Yordan báƒɔ. Anwuɔsu sɔku mina kalɔ te-mi buɛɛ.”

¹⁴Na Yeƒta ɔ́ya na batalane bammɔ básɔ bénwini na bátásu Amonƒuɔ ɔga banini, “Lɛni na Yeƒta ɔɔsu!

¹⁵Israelƒuɔ bétekpleli Moabƒuɔ ku Amonƒuɔ kalɔ bátaƒɔ.

¹⁶Mmomu uwi ɔni bálɛ Egyipte kalɔ lɛlɔ ni, ketele ulu na bakɛ batáda bálɛ Ɛpugyie na bétédu Kades.

¹⁷Mmɔ na Israelƒuɔ bátala bekyuli bákya Edomƒuɔ ɔga banini, ‘Tebu kuƒi na busie bɔvia ƒula kalɔ lɛlɔ.’ Nsu Edomƒuɔ ɔga ɔmɛni úni. Lɛni kani na bátala bekyuli bákya Moabƒuɔ ɔga, na anwu lɛnɔ útatuna. Anwuɔsu Israelƒuɔ básɔ bákya Kades.

¹⁸“Ɔmmɔ kama básia ketele ulu ɔni ntɛ úsie Edom ku Moab kalɔ, na bakɛ baaka taamana úti útédu ka bédu Moab ɔƒɛ katukɔ kakɛ, na bétélie mmɔ na Arnon Ketudɔ. Na béteduo Moab kalɔ kemmo, ɔsika Arnon ndi bana ɔmii.

¹⁹Amu na Israelƒuɔ bátala bekyuli bákya Amoriƒuɔ Ɔga Sihon ɔni mɔɔdi lɛga na Hesbon ka batásu-nwu banini, ‘Te-bu kuƒi na bɔsia ƒula ɔma bɔvi busie bula kalɔ lɛlɔ.’

²⁰Nsu Sihon útete kuƒi na Israelƒuɔ basia bana kalɔ kemmo. Mmomu bɔya na ɔ́ya na nwuna bekpone bátábɛ bakya Yahas na békpoku Israelƒuɔ.

²¹“Amu na Unwoti ɔni ndi Israelƒuɔ Katɔti úti Sihon ku nwuna bekpone ƒui ɔ́kya Israelƒuɔ enu kemmo na békpo bádi-ma lɛlɔ. Na Israelƒuɔ béti Amoriƒuɔ kalɔ ƒui

²²úti ɔ́si Arnon Ketu útédu Yabok ku ɔ́si ketele kemmo útédu Yordan Ketu.

²³“Ɔƒɛni uwi ɔni na Unwoti ɔni ndi Israelƒuɔ Katɔti ɔ́bɔku Amoriƒuɔ úte nwuna bekyuli bani ndi Israelƒuɔ ɔ́wɔlɔ ni, bi kuƒi na bibo na biti kalɔ kammɔ?

²⁴Na biletéti kalɔ kani bina baƒiɔ bani baalɔ banii Kemos úte-mii. Na lɛni kani na bɔdubuti lɛla biala na bula Unwoti Katɔti úte-bu.

²⁵Munuu aakali ka áƒɔ kuye etulo Moab Ɔga Balak, Sipor ubidi? Bɔkya na anwu ku Israel bákya unyeƒi iye ɔ́ta úkpoku-ma dii?

²⁶Na ɔ́si uwi ɔni na Israel úlie Hesbon ku nina lɛma ku Areor ku nina lɛma ku Arnon ku nina lɛma ƒui akwa eti aku ni, bi ɔsu na bítekpo na bɛƒɔ lɛma lɛmmɔ uwi ɔmmɔ kemmo?

²⁷Na ɔɔɔdi ami náƒiɔ-mii, mmomu amii náƒiɔ-mi. Ɔsika bɛɛbla kasusu ka bibekpoku-mi. Anwuɔsu bɛya na Unwoti ɔni ndi litemi ɔtɛne geen ɔtɛ litemi lɛni nkya Israelƒuɔ ku Amonƒuɔ ntɛ.”

²⁸Nsu Amonƒuɔ ɔga ɔmɛni útakpete kenye kani batalane bani na Yeƒta ɔ́tala mmɔ.

²⁹Mmɔ na Unwoti Kɔyu kɔ́ƒɔ Yeƒta kemmo na ɔ́ta na úsie Gilead ku Manase, na ɔ́vi úsie Gilead-Mispe. Na ka ɔ́si Gilead-Mispe ni, útáda ɔ́lɛ Amonƒuɔ lɛlɔ.

³⁰Amu na Yeƒta úse kenye úte Unwoti ɔnini, “Si ákana na éti Amonƒuɔ ákya-mi enu kemmo si bútékpoku-ma ni,

³¹ndubuti lɛla biala na ndubɔsiaku na mina kayakun kenye lɛbla bɔkyula akpala lite-ɔ uwi ɔni na líbo lɛ́siku Amonƒuɔ kekpokɔ.”

³²Mmɔ na Yeƒta ɔ́ta na útékpoku Amonƒuɔ, na Unwoti úti-ma ɔ́kya-nwu enu kemmo.

³³Na ɔ́yila lɛma aavlanyɔ udu ɔ́si Aroer útédu kesii kani baasia teesie Minit, na ɔ́vi útédu Abel-Keramim. Lɛni na Israelƒuɔ bádi Amonƒuɔ lɛlɔ.

³⁴Uwi ɔni na Yeƒta ɔ́si úsela nwuna ɔma Mispa ni, ka ɔɔnu ni, aanu ukyuli ɔdi nátási ɔdubo na ɔda kabontobi ɔɔkunku na ɔɔtɔ́. Ubidi ulekubi unwi pɛ ɔni na ɔdi. Ɔsika ɔsɔ uuubo ubi ulekubi iye ɔnanabi ɔdi.

³⁵Uwi ɔni kani na ɔ́nu-nwu ni, mmɔ kani na ɔ́ni nwuna awu ɔ́bwɛ na úwulo momoomo, na ɔ́su-nwu ɔnini, “O mina ubi, áya na mina lɛlɔ lɛɛdu kɔnyana geen. Ɔsika líse kenye líte Unwoti na naaakana masu nnii naaadi-ka lɛlɔ.”

³⁶Amu na ubidi ɔmmɔ údie kenye ɔnini, “Ati, awɔ nése kenye éte Unwoti. Anwuɔsu babla-mi kalɛ kani na ásu Unwoti. Ɔsika ɔƒɛni na Unwoti úti ƒula bekisine bani ndi Amonƒuɔ ɔ́kya-a enu kemmo.

³⁷Nsu buvele nda-a, te-mi kuƒi na lɛkɔ lisie abi ku mina bakpana na betéwuloku-mi abuli anyɔ sɔɔn. Ɔsika nsɔ lɛɛɛdubo kɔgya bulie kudii.”

³⁸Amu na ɔti ɔ́su-nwu ɔnini, “Teesie.” Na anwu ku nwuna bakpana belekubi bésie abi lɛlɔ na béteewuloku-nwu abuli anyɔ. Ɔsika ɔsɔ ɔɔɔdubo kɔgya bulie kudii.

³⁹Na ka abuli anyɔ ammɔ édu ni, únwini úsie ɔti kudɔ. Na ɔti ɔ́bla-nwu kalɛ kani na úse kenye. Na ubi ɔmmɔ ɔdi adagyaa. Ɔƒɛni ɔ́si uwi ɔmmɔ kama Israelƒuɔ beleku béti lɛla lɛni nálɛ mɛni bábla ɔdi,

⁴⁰ɔni na si lɛkwa biala lídu ni, Israelƒuɔ begblebi baalɛ́ emeyi ene na beesié teetényimo Yeƒta Gileadni ɔmmɔ ubidi ulekubi.